Doktrinal nga Kahanas: Mosiah 2:17

“Anaa sa Pag-alagad sa Inyong Dios”

Diha sa leksiyon sa “Mosiah 2:1–18,” imong nakat-onan nga “kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17). Kini nga leksiyon makatabang kanimo sa pagsag-ulo sa tudling sa doktrinal nga kahanas ug sa mahinungdanon nga hugpong sa mga pulong sa kasulatan sa Mosiah 2:17, mapasabot ang doktrina, ug mabansay ang paggamit sa mga baroganan sa pag-angkon og espirituhanong kahibalo sa tinud-anay nga mga senaryo.

Paggamit sa mga senaryo.Ang paghisgot sa tinuod nga mga sitwasyon ug mga senaryo sa kinabuhi makatabang sa mga estudyante nga mas makasabot kon sa unsang paagi ang mga kamatuoran sa ebanghelyo magamit sa kada adlaw nga kinabuhi. Dasiga ang mga estudyante sa paghunahuna og mga sitwasyon gikan sa ilang kaugalingong kinabuhi, ug dayon dapita sila sa paggamit sa mga baroganan sa pag-angkon og espirituhanong kahibalo aron sa pagdiskobre sa posible nga mga tubag sa ilang mga pangutana.

Pagpangandam sa estudyante: Dapita ang mga estudyante sa pagtambong sa klase nga nakahunahuna og usa ka higayon nga sila adunay usa ka mahagiton nga kasinatian sa pagserbisyo o usa ka kahigayonan sa pagserbisyo apan dili gusto.

Posibleng Kalihokan sa Pagkat-on

Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “Mosiah 2:1–18,” nga mao ang pangkonteksto nga leksiyon alang sa tudling sa doktrinal nga kahanas sa Mosiah 2:17. Kon kinahanglang ibalhin kini nga leksiyon sa tudling sa doktrinal nga kahanas sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Ipasabot ug isag-ulo

Basaha ang Mosiah 2:17 ug ang tudling sa doktrinal nga kahanas sa Bag-ong Tugon nga Mateo 22:36–39, mangita sa pagkaparehas.

Aron malahi, ikonsiderar ang pagpares sa mga estudyante ug ipabasa sa matag usa ang usa sa mga tudling sa kasulatan. Dayon dapita sila sa paghisgot sa mosunod nga mga pangutana.

• Unsa nga mga pagkaparehas ang imong nakita tali sa Mateo 22:36–39 ug Mosiah 2:17?

• Unsaon nimo pagpasabot ang doktrina sa pag-alagad gamit kini nga mga tudling?

Aron matabangan ang mga estudyante sa pagsag-ulo niining mahinungdanon nga hugpong sa mga pulong sa kasulatan, mahimo nimong bahinon ang klase ngadto sa duha ka bahin. I-assign ang katunga sa klase sa unang bahin sa hugpong sa mga pulong: “Kon kamo anaa sa pag-alagad sa inyong mga isigkatawo.” I-assign ang nahabilin sa klase sa ikaduhang bahin sa hugpong sa mga pulong nga: “Kamo anaa lamang sa pag-alagad sa inyong Dios.” Tudloa ang unang grupo ug hangyoa sila sa pagsulti og balik sa ilang gi-assign nga hugpong sa mga pulong. Buhata og usab sa ikaduhang grupo. Human masubli ang duha ka hugpong sa mga pulong, isulti ang “Mosiah 2:17” nga magdungan isip usa ka klase. Mahimo nimong balikon ang kalihokan apan tugoti ang duha ka bahin sa klase nga magbaylo sa mga hugpong sa mga pulong nga ilang isulti og balik. Pahinumdomi ang mga estudyante nga magmatinahuron kon maghisgot mahitungod sa Dios.

Pagbansay sa paggamit

Hinumdomi nga ang katuyoan sa pagrebyo sa mga baroganan sa pag-angkon og espirituhanong kahibalo mao ang pagtabang sa mga estudyante nga masinati kini pag-ayo aron gamiton kini sa natural nga paagi diha sa ilang mga kinabuhi kon sila mag-atubang og espirituhanong mga pangutana. Gamita kini nga mga pagbansay sa pagrebyo aron masukod ang kahibalo sa mga estudyante sa mga baroganan. Ipahiangay o balika kini kon gikinahanglan.

Bahina ang mga estudyante sa tinagtulo matag grupo ug i-assign ang matag estudyante og usa sa mosunod nga mga baroganan gikan sa Mahinungdanon nga Dokumento sa Doktrinal nga Kahanas (2022): lihokon inubanan sa hugot nga pagtuo, susihon ang mga konsepto ug mga pangutana inubanan sa mahangtorong panglantaw, ug tinguhaon ang dugang nga panabot pinaagi sa balaanong gitudlo o gipili nga mga tinubdan. Dapita ang matag estudyante sa pag-ila og duha ka kapahayag [sentence] gikan sa ilang na-assign nga bahin nga sa ilang hunahuna importante nga masabtan. Hangyoa sila sa pagpaambit niini nga mga kapahayag [sentence] ngadto sa ilang grupo ug iapil kon nganong sila mipili niini.

Ang mosunod nga kalihokan mahimong himoon nga magtinagsa, magtinagurha, o sa gagmay nga mga grupo. Kon mopili ang mga estudyante nga mosulat og senaryo, ang senaryo kinahanglan nga maglakip og hagit o panagsumpaki nga mahimong tan-awon pinaagi sa mga baroganan sa pag-angkon og espirituhanong kahibalo. Ipabaylo sa mga estudyante ang ilang mga senaryo sa usag usa. Dayon dapita sila sa pagbuhat pinaagi sa mga baroganan sa pag-angkon og espirituhanong kahibalo sa pagtubag sa senaryo nga ilang nadawat. Kon gikinahanglan, ihatag sa mga estudyante ang mga pangutana nga gilista sa matag seksiyon.

Ang pag-alagad sa kasagaran usa ka positibo nga kasinatian alang niadtong misalmot ug niadtong gialagaran. Apan, adunay mga hagit usab nga mahimong parte sa pag-alagad. Pamalandongi ang bag-ohay lang nga mga kahigayonan sa pag-alagad nga imong nasinati. Unsa ang pipila sa mga hagit nga miabot uban sa pag-alagad? Unsa ang pipila ka mga rason nga ang mga tawo mipili sa dili pag-alagad?

Isulat ang imong kaugalingon nga senaryo nga naghulagway sa usa ka hagit sa pag-alagad. Ania ang usa ka ehemplo: Si Sophia gihangyo sa iyang mga lider sa Simbahan sa pagdala og gasa alang sa adlawng natawhan sa usa ka dili kaayo aktibo nga babaye sa iyang klase sa Young Women. Pag-abot sa babaye sa pultahan, dili kaayo siya mahigalaon kang Sophia. Nasakitan, milakaw si Sophia nga nagbasol nga gihimo niya ang pag-alagad.

Lihokon inubanan sa hugot nga pagtuo

• Sa unsang paagi nga usa ka lihok inubanan sa hugot nga pagtuo ang pag-alagad bisan pa sa mga hagit?

• Sa unsang paagi ang doktrina nga gitudlo sa Mosiah 2:17 makatabang sa tawo niini nga sitwasyon nga molihok inubanan sa hugot nga pagtuo?

Susihon ang mga konsepto ug mga pangutana inubanan sa mahangtorong panglantaw

• Unsa ang mga kausaban kon imong makita ang senaryo inubanan sa mahangtorong panglantaw?

• Sa unsang paagi nga ang doktrina nga gitudlo sa Mosiah 2:17 makatabang niini nga tawo nga makakita sa mga butang gikan sa mahangtorong panglantaw?

• Unsa sa imong hunahuna ang buhaton sa Manluluwas niini nga sitwasyon?

Tinguhaa ang dugang nga panabot pinaagi sa balaanong gitudlo nga mga tinubdan

Aron matabangan ang mga estudyante nga makakita og pamahayag, mahimo nimong ipakita ang mga kinutlo gikan sa seksiyon sa “Komentaryo ug Background nga Impormasyon” sa leksiyon sa “Mosiah 2:1–18.”

Pangita og dugang nga kasulatan o pamahayag gikan sa kinatibuk-ang komperensiya nga mahimo nimong ipaambit aron sa pagtabang sa usa ka tawo nga makaalagad uban ang andam nga kinaiya. Aron mahimo kini, sulayi pagpangita ang “pag-alagad” diha sa Gospel Library app, ug dayon tan-awa ang mga kasulatan o ang mga pakigpulong sa komperensiya nga mogawas. Mahimo ka usab nga mangita sa “Pag-alagad” diha sa Giya ngadto sa mga Kasulatan.

Dapita ang mga estudyante sa pagpaambit sa unsay ilang nakaplagan. Mahimo nimong tapuson pinaagi sa pagdasig sa mga estudyante nga maningkamot sa pagbuntog sa mga babag nga makapugong kanila sa pag-alagad. Pahinumdomi sila sa plano sa pag-alagad nga ilang gihimo samtang nagtuon sa Mosiah 2:1–18 ug sa mga kahigayonan nga anaa sa ilang palibot kada adlaw sa pag-alagad sa uban.

Rebyo sa doktrinal nga kahanas

Isulat diha sa pisara ang pakisayran sa kasulatanan ug ang mahinungdanon nga hugpong sa pulong sa kasulatan, ug dapita ang mga estudyante sa pagsulti niini og kusog isip usa ka klase. Papasa ang pipila ka mga pulong ug dapita ang mga estudyante sa pagsulti og balik sa tibuok nga pakisayran ug hugpong sa mga pulong pag-usab. Balika kini nga proseso hangtod nga ang tanan mapapas ug ang mga estudyante makasulti og balik sa tibuok nga pakisayran ug sa hugpong sa mga pulong gikan sa panumdoman.

Dugang nga mga Kalihokan sa Pagkat-on

Alternatibo nga senaryo

Kon gikinahanglan, ang mosunod nga senaryo mahimong gamiton alang sa pagbansay sa paggamit:

Ang silingan ni Oliver nga tapad sa ilang balay usa ka tigulang nga lalaki nga nagpuyo nga nag-inusara. Ang pamilya ni Oliver naningkamot sa pagtabang sa tigulang, apan si Oliver nakakaplag nga hasol ug kapoy ang pagtabang sa iyang silingan. Si Oliver dili ganahan nga motabang tungod kay gibati niya nga daghan siya og gibuhat nga trabaho sa iyang kaugalingong balay.