Doktrinal nga Kahanas: Mosiah 2:41

“[Ang] Bulahan ug [ang] Malipayon nga Kahimtang Niadto nga Nagtuman sa mga Sugo sa Dios”

Sa miaging leksiyon, imong nakat-onan nga kon kita nagtuman sa mga sugo sa Dios, Siya mopanalangin kanato sa temporal ug espirituhanon nga paagi. Kini nga leksiyon makatabang kanimo sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan sa Mosiah 2:41, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinud-anay nga mga sitwasyon sa kinabuhi.

Pagtudlo sa mga kasulatan ug sa mga pulong sa mga propeta nga adunay pagtuo ug katuyoan.Si Elder Jeffrey R. Holland mitudlo, “Gawas kon mobati ka og madasigon mahitungod sa usa ka butang, dili ka mahimong maglaum nga mobati ang imong mga estudyante nga madasigon mahitungod niini” (“Angels and Astonishment” [pakigpulong nga gihatag atol sa Church Educational System annual training broadcast, Hunyo 12, 2019]). Pagtudlo uban ang pagtuo ug gahom base sa imong kaugalingong pagpamatuod sa Manluluwas ug sa mahangtoron nga mga kamatuoran sa Iyang gipahiuli nga ebanghelyo.

Pagpangandam sa estudyante: Ang mga estudyante mahimong hangyoon sa pagpili og usa ka sugo nga ilang gipaningkamotan sa pagsunod. Dayon paandama sa pagpaambit kon sa unsang paagi sila napanalanginan pinaagi sa pagtuman sa sugo.

Posibleng Kalihokan sa Pagkat-on

Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “Mosiah 2:19–41,” nga mao ang pangkonteksto nga leksiyon alang sa tudling sa doktrinal nga kahanas sa Mosiah 2:41. Kon kinahanglang ibalhin kini nga leksiyon sa tudling sa doktrinal nga kahanas sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Isag-ulo ug ipasabot

Isulat diha sa pisara ang Mosiah 2:41 ug ang mahinungdanon nga hugpong sa mga pulong sa kasulatan nga “[K]adto nga naghupot sa mga sugo sa Dios … bulahan sa tanan nga mga butang”. Mahimo nimong dapiton ang mga estudyante sa pagdrowing o paghimo og hulagway nga nagrepresentar sa doktrina nga gitudlo niini nga tudling.

Dapita ang mga estudyante sa pagpaambit sa unsay ilang gibuhat nga magkapares o sa gagmay nga mga grupo. Tudloi sila sa paghisgot kon unsa nga mga pulong o hugpong sa mga pulong ang ilang gihatagan og gibug-aton sa ilang alampat [artwork] ug nganong gibati nila nga importante kini.

Dapita ang mga estudyante sa paggamit sa mga hulagway nga ilang gihimo aron sa pagsag-ulo sa pakisayran sa kasulatan ug sa mahinungdanon nga hugpong sa mga pulong.

Pagbansay sa paggamit

Ipakita ang senaryo o hatagi ang mga estudyante og kopya samtang ilang kompletohon ang mosunod nga kalihokan. Kini nga senaryo gituyo aron matabangan ang mga estudyante sa paggamit sa mga baroganan sa pag-angkon og espirituhanong kahibalo aron masabtan nga ang mga panalangin ug kalipay nagagikan sa pagkamasulundon. Makatabang usab kini kanila nga magpabiling matinud-anon bisan kon maglisod sila sa pag-ila sa mga panalangin nga gihatag sa Ginoo kanila. Ikonsiderar ang pagpahiangay [adjust] niini nga senaryo sa mga panginahanglan o sitwasyon sa imong mga estudyante.

Si Jenna adunay leksiyon sa doktrinal nga kahanas sa seminary nga mihatag og gibug-aton nga ang pagkamasulundon sa mga sugo sa Dios makahatag og mas dakong kalipay ug mga panalangin sa atong mga kinabuhi. Pagkahuman, naglibog si Jenna bahin sa iyang kaugalingon nga sitwasyon. Naningkamot siya sa pagtuman sa mga sugo apan morag wala kini nakapahimong mas sayon, mas malipayon, o mas nakapaayo sa iyang kinabuhi. Naglisod gihapon siya sa eskwelahan ug adunay mga problema sa pamilya ug mga higala. Kon ang iyang pagkamasulundon sa mga sugo makahatag unta og kalipay, nganong ingon niini ang iyang gibati?

Usa ka paagi sa pagtabang sa mga estudyante nga magamit ang mga baroganan sa pag-angkon og espirituhanong kahibalo niini nga sitwasyon mao ang pagsulat sa tulo ka mga baroganan isip mga ulohan diha sa pisara (tan-awa sa Mahinungdanon nga Dokumento sa Doktrinal nga Kahanas [2022], 3–4). Dapita ang mga estudyante sa pagsulat diha sa pisara ubos sa tukma nga ulohan sa mga pamahayag nga ilang gibati nga makatabang kang Jenna. Makadapit ka og partisipasyon pinaagi sa paghatag og chalk o marker ngadto sa usa ka estudyante ug dayon dapita kana nga estudyante sa pagpasa sa chalk o marker ngadto sa laing estudyante human sila makasulat diha sa pisara. Hisgoti kon unsay gisulat sa mga estudyante diha sa pisara.

Lihokon inubanan sa hugot nga pagtuo

Basaha ang mga parapo 5–6 diha sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2022). Pangita og mga hugpong sa mga pulong nga makatabang kang Jenna.

• Unsa ang imong mapaambit gikan niini nga mga parapo aron matabangan si Jenna nga molihok nga may hugot nga pagtuo?

• Sa imong hunahuna sa unsang paagi kini makatabang kang Jenna?

Mahimo nimong itudlo ang koneksiyon tali sa pamahayag ni Elder Jeffrey R. Holland sa parapo 6 nga “panggunit og hugot” ug ang saad ni Hari Benjamin sa Mosiah 2:41 alang niadtong kinsa “magpabilin nga matinud-anon hangtod sa kataposan.” Tabangi ang mga estudyante nga makasabot nga samtang ang pipila ka mga panalangin dili dayon mailhan, kita makapadayon sa unahan nga matinud-anong nagsalig nga ang Dios motuman sa Iyang mga saad (tan-awa sa Mosiah 2:22).

Susihon ang mga konsepto ug mga pangutana inubanan sa mahangtorong panglantaw

Basaha ang parapo 8 diha sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2022). Pangita og mga hugpong sa mga pulong nga makatabang kang Jenna.

• Unsay imong ipaambit kang Jenna?

• Nganong ipaambit nimo kini kaniya?

Tinguhaa ang dugang nga panabot pinaagi sa balaanong gitudlo nga mga tinubdan

Basaha ang parapo 11 diha sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2022). Pangita og mga hugpong sa mga pulong nga makatabang kang Jenna.

• Unsa ang ubang balaan nga mga tinubdan nga mahimo nimong irekomendar nga pangitaon ni Jenna?

• Sa imong hunahuna sa unsang paagi kini makatabang kaniya?

Ikonsiderar ang pagdapit sa mga estudyante sa pagpaambit sa mga panalangin nga ilang nadawat samtang sila naningkamot sa pagsunod sa mga sugo sa Dios. Hangyoa ang mga estudyante sa pagpaambit sa mga panalangin nga nadawat diha-diha dayon ug sa uban nga nadawat sa paglabay sa panahon. Ipamatuod nga sa walay kinutuban nga kaalam sa Dios, Iyang gitino dili lamang kon unsa nga mga panalangin ang ihatag apan usab ang pinakamaayong panahon alang kanato sa pagdawat niini.

Rebyo sa doktrinal nga kahanas

Atol sa umaabot nga mga leksiyon, tabangi ang mga estudyante sa pagrebyo og daklit sa pakisayran sa kasulatan ug sa mahinungdanon nga hugpong sa mga pulong sa kasulatan sa Mosiah 2:41. Isulat ang mahinungdanon nga hugpong sa mga pulong diha sa pisara ug dapita ang mga estudyante sa pagsulat sa mga blangko. Mahimo nimong ipahiangay ang pananglitan sa ubos aron mahatagan og gibug-aton ang bisan unsang mga pulong nga ang imong mga estudyante nagkinahanglan og tabang sa paghinumdom:

Mosiah : – “[K]adto nga sa mga sa Dios … sa nga .”

Dapita ang mga estudyante sa pagsubli pagsulti sa pakisayran ug sa mahinungdanon nga hugpong sa mga pulong sa pipila ka mga higayon hangtod nga ilang masag-ulo kini. Mahimo usab nimong rebyohon ang mga drowing alang niini nga tudling nga ilang gibuhat kaniadto.

Komentaryo ug Background nga Impormasyon

Ngano nga gikinahanglan nakong magpadayon sa pagkamasulundon nga ang mga panalangin ingon og dili dayon moabot?

Si Elder Dieter F. Uchtdorf, kanhi sa Unang Kapangulohan, mipaambit sa usa ka kasinatian sa panahon sa iyang pagbansay sa German Air Force. Atol sa mga ehersisyo sa pisikal nga pagbansay, iyang nakita nga ang uban nga wala magsunod sa Pulong sa Kaalam mas maayo og lahutay kaysa kaniya.

Nahinumdom ako nga naghunahuna, “Taym pa usa! Dili ba unta nga makadagan ako ug dili maluya?” Apan na-luya ako, ug naapsan ako sa mga tawo kinsa piho nga wala magsunod sa Pulong sa Kaalam. Akong itug-an, nga nakasamok kini kanako niadtong higayona. Nangutana ko sa kaugalingon, “ang saad tinuod ba o dili?

Ang tubag wala moabot dayon. Apan sa kaulahian akong nakat-onan nga ang mga saad sa Dios dili kanunay nga matuman dayon o sa paagi nga atong gilauman; kini moabot sa Iyang panahon ug sa Iyang mga pamaagi. Paglabay sa mga tuig akong nakita ang klaro nga ebidensiya sa temporal nga mga panalangin nga madawat niadtong kinsa nagsunod sa Pulong sa Kaalam––agig dugang sa espirituhanon nga mga panalangin nga moabot dayon tungod sa pagkamasulundon sa bisan unsang mga balaod sa Dios. Sa paghinumdom, ako nakasiguro nga ang mga saad sa Ginoo, kon tingali dili kanunay nga dali, sa kanunay sigurado. (Dieter F. Uchtdorf, “Ipadayon ang Pagpailub,” Liahona, Mayo 2010, 58)

Dugang nga mga Kalihokan sa Pagkat-on

Dugang nga mga Pangutana

Kon makaayo sa mga estudyante ang dugang nga diskusyon sa usa o sa daghan pa sa mga baroganan sa pag-angkon og espirituhanong kahibalo, ikonsiderar ang pagpaambit sa pipila sa mosunod nga mga pangutana.

Lihokon inubanan sa hugot nga pagtuo

Unsa nga Kristohanon nga mga hiyas ang makatabang kang Jenna sa paglihok diha sa hugot nga pagtuo?

Susihon ang mga konsepto ug mga pangutana inubanan sa mahangtorong panglantaw

Gamit ang unsay imong nakat-onan gikan sa Mosiah 2:41, unsay imong mapaambit aron matabangan si Jenna nga mas makita ang iyang sitwasyon nga sama sa gibuhat sa Ginoo?

Unsa sa imong hunahuna ang gipasabot sa Ginoo sa dihang Siya misaad kanimo og “bulahan ug malipayon nga kahimtang” sa paghupot sa mga sugo?

Unsa kaha ang wala masabti ni Jenna mahitungod sa “bulahan ug malipayong kahimtang” nga moabot gikan sa pagkamasulundon?

Tinguhaa ang dugang nga panabot pinaagi sa balaanong gitudlo nga mga tinubdan

Kinsa ang pipila ka mga indibidwal diha sa mga kasulatan kinsa nagpabilin nga matinud-anon bisan sa lisod nga mga higayon? Sa unsang paagi kaha nga ang ilang mga ehemplo makatabang kang Jenna?