“Mosaea 4: ‘Faatumauina Pea le Faamagaloina o a Outou Agasala,’” Tusi Lesona a le Faiaoga o le Tusi a Mamona (2024)
“Mosaea 4,” Tusi Lesona a le Faiaoga o le Tusi a Mamona
Mosaea 4
“Faatumauina Pea le Faamagaloina o a Outou Agasala”
E faapefea ona ese lou olaga pe a e lagonaina le faateleina o le olioli ma le filemu o le mafaufau? O sa Nifae, na uunaia e aoaoga a le Tupu o Peniamina, sa “faatumulia i le olioli” ma sa lagonaina le “filemu o le mafaufau” a o latou salamo ma maua se faamagaloga o a latou agasala (Mosaea 4:3). Ona aoao atu lea e le Tupu o Peniamina ia i latou le ala e faatumau ai lenei faamagaloga o a latou agasala. O lenei lesona e mafai ona fesoasoani ia oe e malamalama ai i mea e mafai ona e faia e maua ma faatumau ai se faamagaloga o au agasala.
Aoao atu e ala i le Agaga. E molimau mai le Agaga Paia i le upumoni, e molimau ia Keriso, ma suia loto. Ua na o le Agaga Paia e mafai ai ona tatou ausia le sini autu o le aoaoina atu o le talalelei—ia fausia le faatuatua ia Iesu Keriso ma fesoasoani i isi ia avea atili e faapei o Ia. Vaavaai mo ni auala e valaaulia ai le Agaga Paia e faatino Ana matafaioi.
Sauniuniga a le tagata aoga: Valaaulia tagata aoga e faitau le Mosaea 4, ma vaavaai pe na faapefea ona aafia tagata ona o Iesu Keriso ma le mea na valaaulia e le Tupu o Peniamina lona nuu e fai pe a uma ona latou maua se faamagaloga o a latou agasala.
Gaoioiga e Mafai Ona Aoao Ai
Tumau malosi faaleagaga
Vaai i le ata lenei ma mafaufau po o le a le mea e manaomia ona fai e se tasi e tausia ai le maloloina ma le tuputupu ae o lenei laau.
Mafaufau e aumai se laau maloloina i le vasega pe faaali atu le ata o lo o i lalo.
-
O le a le mea e tupu i lenei laau pe afai e teuina i totonu o se potu pogisa pe le fuiina lava?
-
E faapefea ona fesootai lenei mea i lo tatou soifua maloloina faaleagaga ma manaoga?
E pei o le tausia o se laau, o le tausia o i tatou lava ia maloloina faaleagaga e manaomia ai taumafaiga faifai pea. I le Mosaea 4, na aoao ai e le Tupu o Peniamina lona nuu i mea na manaomia ona latou faia e tumau ai le malosi faaleagaga. A o e suesue, mafaufau loloto i aoaoga o le a fesoasoani ia te oe i au taumafaiga e tumau malosi faaleagaga ai i lou olaga atoa ma tuputupu ae ia avea atili e faapei o le Faaola.
Faatumauina o se faamagaloga o a tatou agasala
Manatua o se vaega o le lauga a le Tupu o Peniamina, sa ia faasoa mai ai se savali sa ia mauaina mai se agelu e uiga i le afio mai o Iesu Keriso ma le taua o le faatoilaloina o lo tatou natura pa’ū e ala i le Togiola a le Faaola (tagai Mosaea 3).
Faitau le Mosaea 4:1–3, ma vaavaai mo faamanuiaga ma lagona na oo i ai le nuu o le Tupu o Peniamina.
-
O le a se mea e tumatila ia te oe mai nei fuaiupu?
-
O le a sou manatu o le a se mea e manaomia ona fai e tagata e tumau ai i lenei tulaga faamamaina ma le olioli?
Mafaufau e valaaulia tagata aoga e moeiini o latou mata ma mafaufau loloto i mea nei. A uma ona mafaufau loloto, e mafai ona latou faamaumauina a latou tali i le fesili i a latou api talaaga mo suesuega.
Vaai faalemafaufau pe faape’i le avea ai ma se tasi o le nuu o le Tupu o Peniamina i lena aso. Mafaufau pe o le a sou manatu i se aafiaga o lenei mea i ou lagona e uiga ia Iesu Keriso ma pe o le a foi se mea mai lenei aafiaga, e te manao e tumau ia oe e faavavau.
-
O le a se eseesega e ono faia i lou olaga pe afai e te lagonaina le faamagaloina o au agasala i le tele o taimi?
O le vaega o totoe o aoaoga a le Tupu o Peniamina i le Mosaea 4 ua fesoasoani tatou te malamalama ai ina ua uma ona tatou maua le faamagaloga mai ia Iesu Keriso, e tatau ona tatou faia ni taumafaiga e tumau pea i le faamagaloina o a tatou agasala.
-
O le a sou manatu o le a le eseesega i le va o le mauaina ma le faatumauina o se faamagaloga o a tatou agasala?
-
Aisea e te manatu ai e taua mo i tatou le taumafai e faatumau ai pea se faamagaloga o a tatou agasala i o tatou olaga atoa?
O le parakalafa lenei ua faamoemoe e fesoasoani i tagata aoga e mafaufau loloto ma manatunatu ai ma aua nei faasoa maia o latou manatu po o lagona i le vasega.
Mafaufau pe faapefea ona faatatau lenei upumoni i lou lava olaga. O le a le lelei o lou lagona o lo o e faatumauina pea se faamagaloga o au agasala? A o faaauau pea ona e suesue, vaavaai mo upumoni e mafai ona fesoasoani ia oe e malamalama ai i mea e mafai ona e faia e faatumau ai se faamagaloga o au agasala.
Mafaufau e lisi le ulutala lenei i luga o le laupapa: O mea e mafai ona tatou faia e tumau ai pea se faamagaloga o a tatou agasala. E mafai e tagata aoga ona lisi i luga o le laupapa mea latou te maua a o latou suesue. E mafai foi ona faia se lisi faapena i a latou api talaaga mo suesuega.
Faitau le Mosaea 4:9–16 ma vaavaai mo aoaoga a le Tupu o Peniamina e fesoasoani tatou te malamalama ai i le ala e mafai ai ona tatou faatumau ai pea se faamagaloga o a tatou agasala.
O se vaega o le gaoioiga suesue lenei, mafaufau e faataga tagata aoga e o mai i le laupapa ma tusi i lalo ni fasifuaitau mai le Mosaea 4:9–16 latou te lagona e sili ona anoa ia i latou. Ona mafai lea ona faaaoga fesili e pei o nei e fesoasoani i tagata aoga e talanoaina ai mea na latou maua mai nei fuaiupu.
-
O a ni mea e le itiiti ifo ma le tolu na aoao mai e le Tupu o Peniamina e tatau ona tatou faia ina ia faatumau ai pea se faamagaloga o a tatou agasala e sili ona tumatila ia te oe?
-
O le a sou manatu o le a faapefea mo oe le faaaogaina o nei valaaulia mai le Tupu o Peniamina i lou olaga?
-
E mafai faapefea e le faia o nei mea ona fesoasoani ia oe e faatumau ai pea se faamagaloga o au agasala?
Afai e lava le taimi, e mafai e tagata aoga ona suesue le faamamafa a le Tupu o Peniamina i le tausia o isi i le Mosaea 4:17–26. O nisi manatu o lo o maua i le “O lo tatou tiutetauave o le tausia o isi” i le vaega o “Gaoioiga Faaopoopo e Aoao ai”.
O a’u laasaga e sosoo ai
Mafaufau po o le a le lelei o lo o e faia i le faaaogaina o aoaoga a le Tupu o Peniamina mai nei fuaiupu. E mafai ona e faia lenei mea e ala i le taulai atu i amioga e tolu pe fa na e faatoa e faailoaina ma fesili ifo ia te oe lava i fesili e pei o le:
-
O le a le tele o taumafaiga ou te faia i lenei mea?
-
E faafia ona ou faia lenei mea?
-
O a lagona ma uunaiga ua ou lagonaina i le asō e ono fautua mai ai ni vaega e mafai ona ou faaleleia?
Ia faia ma le agaga tatalo se fuafuaga patino e faaleleia atili ai i se vaega se tasi. Mafaufau i soo se faafitauli e te ono feagai a o e taumafai e faaleleia i lenei vaega ma mea e mafai ona e faia e maua ai le fesoasoani a le Alii e faatoilalo ai nei luitau. Atonu e fesoasoani le faasoa atu o lau sini i se tagata o le aiga po o se tasi e pele ia te oe o le e mafai ona lagolagoina oe i lenei mea. Atonu foi e te manao e faaaofia lenei sini i au sini mo Tamaiti ma le Autalavou.