Mosaea 4:9–10

“Ia talitonu i le Atua”

Na e nofo ea e mafaufau loloto i le aafiaga o ou talitonuga i au faatinoga ma le tagata ua avea ai oe? A o aoao atu mea e tatau ona tatou faia e faatumauina ai se faamagaloga o a tatou agasala, sa faamamafa mai e le Tupu o Peniamina le taua o le talitonu i le Atua. O lenei lesona e mafai ona fesoasoani ia te oe e faamalosia ai lou talitonuga i le, ma le alofa mo le Atua.

O le aoaoina atu o tusitusiga paia ma upu a perofeta faatasi ma le talitonuga maumaututu ma le faamoemoe. I avanoa uma, ia faaosofia i latou e te aoaoina e liliu atu i afioga a le Atua mo se taitaiga, tali i fesili, ma le lagolago. Afai o tagata aoga o le a “taumamafa fiafia i afioga a Keriso,” o upumoni latou te maua o le a “taʼu mai ia te i [latou] mea uma e tatau ona [latou] faia” (2 Nifae 32:3).

Sauniuniga a le tagata aoga: Valaaulia tagata aoga e o mai i le vasega ma se lisi o mea e tolu i le lima latou te talitonu i ai e uiga i le Atua.

Gaoioiga e Mafai Ona Aoao Ai

O le aafiaga o o tatou talitonuga

O nisi nei o manatu sese sa manatu muamua tagata e moni. Mafaufau loloto i aafiaga o nei talitonuga i olaga o na tagata taitoatasi.

Mafaufau e faaali atu faamatalaga nei i luga o le laupapa.

• O le lalolagi e mafolafola.

• O lane e te maua ai lafitoga.

• E faataamilomilo fetu i le lalolagi.

• O a faafitauli e mafai ona oo mai i le talitonu i manatu sese?

• O faapefea ona e vaaia ou talitonuga po o talitonuga o isi o faatosinaina uiga po o faatinoga?

• E mafai faapefea e mea tatou te talitonu i ai ona aafia ai i tatou faaleagaga?

Ia Talitonu i le Atua

Na aoao mai e le Tupu o Peniamina le taua o le talitonu i le Atua. A o lei amataina lau suesuega, faaalu sina taimi e toe manatunatu ai i mea ua e talitonu i ai e uiga i le Atua. E faapefea e ou talitonuga e uiga i le Atua ona aafia ai au faatinoga? Mafaufau e lisi i lau api talaaga mo suesuega nisi o nei talitonuga ma mafaufau loloto pe aisea e te talitonu ai i mea e te faia. I le gasologa atoa o au suesuega, faaopoopo i ai soo se manatu po o ni uunaiga atonu o ia te oe.

Mafaufau foi e tusi le ata lenei i luga o le laupapa ma valaaulia tagata aoga e fesoasoani i le faatumuina o lio i aoaoga mai le Mosaea 4:9–10

Kopi le ata lenei i lau api talaaga mo suesuega. I le lio ogatotonu, tusi ai le ia talitonu i le Atua ma le Mosaea 4:9–10.

Faitau le Mosaea 4:9–10, ma vaavaai mo mea eseese na valaaulia e le Tupu o Peniamina lona nuu e talitonu i ai e uiga i le Atua. Tusi mea taitasi nei i lio pito i fafo. Afai e manaomia, e mafai ona e faaopoopo nisi lio i lau ata.

• I se fuaiupu faigofie e tasi, e mafai faapefea ona e aoteleina aoaoga a le Tupu o Peniamina i le Mosaea 4:9–10? Mafaufau e faaaoga lau fuaiupu o le aotelega e fai ma ulutala o le ata vaaia na e fatuina.

Tuu atu i le toatele o tagata aoga se avanoa e faasoa mai ai a latou aotelega o nei fuaiupu i le vasega. O upumoni e ono mafai ona latou faailoa mai o se vaega o lenei aotelega e aofia ai mea nei: Ua valaaulia i tatou e perofeta a le Alii ia talitonu i le Atua. O le Atua na foafoaina mea uma ma e i ai le mana ma le poto uma. E mafai ona tatou faaalia lo tatou talitonuga i le Atua e ala i a tatou faatinoga.

Mafaufau e vaevae le vasega i ni vaega toalaiti ma tofi vaega taitasi e taulai atu i se tasi pe sili atu foi o aoaoga a le Tupu o Peniamina mai fuaiupu 9–10. E mafai e tagata aoga ona talanoaina fesili nei e uiga i upumoni ua tofia i ai i latou e taulai i ai ona faasoa mai lea o a latou tali i le vasega.

• E mafai faapefea e le malamalama ma le talitonu i nei aoaoga mai le Tupu o Peniamina ona aafia ai lou olaga?

• O faapefea ona e vaai i nei aoaoga o teena pe lē amanaiaina e le lalolagi i aso nei?

Sa faasoa mai e Peresitene Russell M. Nelson le fautuaga lenei mo i latou o e e lē o mautinoa ua latou talitonu i le Atua:

Afai e te lē o mautinoa pe e te talitonu moni i le Atua, amata la iina. Ia malamalama o le leai o ni aafiaga ma le Atua, e mafai ai e se tasi ona masalosalo i le i ai moni o le Atua. O lea la, tuu oe lava ia i se tulaga e amata ai ona maua aafiaga faatasi ma Ia. … Ōle atu ia te Ia e ta’u atu ia te oe o loo i ai moni lava o Ia iina—pe afai Na te silafia oe. Ōle atu ia te Ia po o a ni Ona lagona e uiga ia te oe. Ona e faalogo lea. (Russell M. Nelson, “Sau, Mulimuli Mai ia te Au,” Liahona, Me 2019, 90)

• O a ni aafiaga na e maua na faamalosia ai lou talitonuga i le Tama Faalelagi ma Iesu Keriso?

Afai o le a aogā i tagata aoga se talanoaga faaopoopo e uiga i le filifili e talitonu i le Atua, mafaufau e faaaoga le saunoaga a Elder L. Whitney Clayton i le vaega o “Manatu ma Talaaga o Faamatalaga”.

Faaloloto atili

O se tasi o auala e mafai ona tatou faamalosia ai lo tatou talitonuga ma le faalagolago i le Atua o le aoao mai lea i aoaoga ma aafiaga musuia a isi (tagai Bible Dictionary, “Faith”). Filifili ia le itiiti ifo ma le tasi o gaoioiga nei e tolu e fesoasoani ia oe e faamalosia ai lou talitonuga i le Atua:

Faaali atu filifiliga nei e tolu ma tuu atu i tagata aoga ia lava se taimi e faamaea ai se tasi o gaoioiga. O nei gaoioiga e mafai ona faamaeaina taitoatasi, pe mafai foi e tagata aoga ona faamaea faatasi ma isi o e na filifili e taulai atu i le gaoioiga lava e tasi. Mafaufau e faaaofia ni gaoioiga eseese e tusa ai ma manaoga ma tomai o au tagata aoga.

• Viiga: Suesue i le tusipese mo upu, fasifuaitau, fuaiupu, po o viiga uma o lo o aoao mai e uiga i le natura ma uiga o le Atua pe e mafai ona faamalosia ai lou talitonuga ia te Ia.

• O isi tala o tusitusiga paia: Saili ma suesue tala i tusitusiga paia lea na molimau mai ai isi e faatatau i o latou talitonuga e uiga i lo tatou Tama Faalelagi po o Lona Alo, o Iesu Keriso. O faataitaiga o fuaitau e mafai ona e suesueina e aofia ai le Alema 26:16, 35–37; 34:8–10; ma le Mataupu Faavae ma Feagaiga 76:22–24.

  Mafaufau e tuu atu i tagata aoga ni kopi o i ai nei o le lomiga o le konafesi aoao o le Liahona pe afai e faaaoga le filifiliga lenei. E mafai foi e tagata aoga ona faaaoga le polokalama o le Potutusi o le Talalelei.

• Konafesi aoao: I le faaaogaina o saunoaga talu ai nei o le konafesi aoao, vaavaai mo upu, fasifuaitau, tala, po o tala o loo aoao mai e uiga i le Tama Faalelagi ma Iesu Keriso ma faamalosia ai lou talitonuga ia i Laua. (Mafaufau e saili i saunoaga o le konafesi aoao e ala i autu e pei o le “Tama Faalelagi,” “Aiga Atua,” po o “Iesu Keriso.”)

Tuu atu i le toatele o tagata aoga se avanoa e faasoa mai ai mea sa latou aoaoina pe lagonaina mai a latou suesuega.

A uma ona valaaulia tagata aoga e faasoa mai o latou manatu, mafaufau e tuu atu ia i latou ni fasipepa laiti, ma valaaulia tagata aoga naunautai e tusi se mea latou te talitonu i ai e uiga i le Atua. O nei faamatalaga o le talitonuga e mafai ona tuuina i totonu o le potuaoga mo le vaiaso a sau mo isi e vaai ma mafaufau loloto i ai.

O au laasaga e sosoo ai

Pe o i ai sou talitonuga malosi i le Atua pe o loo e taumafai e fuafua mea e te talitonu i ai, e i ai mea e mafai e i tatou taitoatasi ona fai e faamalosia ai lo tatou talitonuga ma le alofa mo le Atua. Faaaalu sina taimi e toe manatunatu ai i mea e te lagona o lau laasaga e sosoo ai ia iloa lelei ai le Atua. Tusi faamaumau ou manatu ma uunaiga i lau api talaaga mo suesuega.

Mafaufau e faaiu le lesona i le faasoa atu o lau molimau i le Atua. Uunaia tagata aoga e faatino ia uunaiga ua latou lagonaina i le aso.

Manatu ma Talaaga o Faamatalaga

E sese ea le na o le “talitonu” pe afai tatou te le o toafimalie e fai atu “Ua ou iloa”?

Na aoao mai Elder Jeffrey R. Holland o le Korama a Aposetolo e Toasefululua:

Na fai mai talu ai nei ma sina faalotolotolua se tamaitiiti e 14 tausaga, “Brother Holland, e le o mafai ona ou fai atu ua ou iloa e moni le Ekalesia, ae ou te talitonu e moni.” Sa ou matua opoina lena tamaitiiti seia tulioso mai ona mata i fafo. Sa ou fai atu i ai ma le lagona naunautai mai lo’u loto, o le talitonu o se upu taua, o se taga e sili atu ona taua, ma e le tatau ai ona faatoese i le “na ona talitonu.” Sa ou fai atu ia te ia o Keriso lava Ia na fetalai, “Aua e te mata’u, tau lava ina e talitonu,” [Mareko 5:36], o se fasifuaitau na tauaveina e le alii talavou o Gordon B. Hinckley i le galuega faamisiona. Sa ou faamatala i lenei tamaitiiti, o le talitonu o le laasaga muamua lava lea i le talitonuga maumaututu, ma o mataupu faavae patino o lo tatou faatuatua autasi o faamalosia mai le fasifuaitau, “Matou te talitonu.” Ma sa ou ta’u atu foi ia te ia lo’u mitamita tele mo ia ona o le faamaoni o lana sailiga. (Jeffrey R. Holland, “Le Alii e, Ua Ou Faatuatua,” Liahona, Me 2013, 94-95)

O le a le matafaioi e faia e sauniga o le talalelei i lo tatou faatumauina o se faamagaloga o a tatou agasala?

Na faasoa mai e Elder L. Whitney Clayton, Fitugafulu Pulega Aoao ua malolo, mea nei:

Ua uunaia i tatou e perofeta i augatupulaga uma ma aioi mai ia i tatou ia talitonu ia Keriso. O a latou apoapoaiga o loo atagia mai ai se mea moni faavae: E le faamalosia i tatou e le Atua e talitonu. Ae Na te valaaulia i tatou ia talitonu e ala i le auina mai o perofeta soifua ma aposetolo e aoao i tatou, e ala i le aumaia o tusitusiga paia, ma faatauanau mai ia i tatou e ala i Lona Agaga. O i tatou lava e tatau ona filifili e talia na valaaulia faaleagaga, filifili e vaai i mata faaleagaga le malamalama faaleagaga lea Na te valaauina ai i tatou. O le faaiuga e talitonu, o le filifiliga aupito taua lea e mafai ona tatou faia. E mamanuina ai isi a tatou faaiuga uma tatou te faia. (L. Whitney Clayton, “Filifili e Talitonu,” Liahona, Me 2015, 38)

E mafai faapefea ona ou fesoasoani i isi o e e lē talitonu ia Iesu Keriso?

Ua aoao mai Elder Neil L. Andersen o le Korama a Aposetolo e Toasefululua:

E toatele o i le lalolagi, e itiiti so latou iloa e uiga ia Iesu Keriso, ma i nisi o itu o le lalolagi lea ua fia seneturi o folafolaina ai Lona suafa, ua faaitiitia ai le faatuatua ia Iesu Keriso. … Ua faaalia i se suesuega lata mai nei, o le 10 tausaga ua mavae atu e 30 miliona tagata i le Iunaite Setete ua laa ese mai le talitonu i le paia o Iesu Keriso. A tilotilo i le lalolagi atoa, ua valoia e se isi suesuega e faapea, o le tele o tausaga o lumanai, e sili atu i le faaluaina le toatele o le a tuua le faaKerisiano nai lo ē o le a taliaina. …

O outou ma a’u o lo o tautalatala e uiga ia Iesu Keriso, ae e mafai ona tatou faia ma sina lelei teisi atu. Afai o le a faaitiitia ona tautalatala le lalolagi e uiga ia te Ia, o ai o le a talanoa atili e uiga ia te Ia? O i tatou! Faatasi ai ma isi au Kerisiano tuuto! (Neil L. Andersen, “Ua Matou Tautalatala e uiga ia Keriso,” Liahona, Nov. 2020, 88, 89)

Gaoioiga Faaopoopo e Aoao Ai

O se isi auala e amata ai le lesona

Mafaufau e fatu se tulaga faataitai mo tagata aoga lea e fesili ai se tasi, “O a ni talitonuga o tagata o lau Ekalesia e uiga i le Atua?” ona valaaulia lea o tagata aoga e tali mai a o lei tusia o latou lava talitonuga e uiga i le Atua.

O “uiga faaletagata, tulaga atoatoa ma uiga auaumama” o le Atua

O leLectures on Faith o loo taua ai e faapea “o se manatu sa’o e faatatau i uiga, tulaga atoatoa ma uiga auaumama o le [Atua]” e faatosinaina ai lo tatou gafatia e faaali le faatuatua ia te Ia (Lectures on Faith [1985], 38). Mafaufau e fesoasoani i tagata aoga ia malamalama i lenei mataupu faavae e ala i le valaaulia o i latou e lisi tonu mea latou te iloa ma talitonu i ai e fesootai ma uiga o le Atua, tulaga atoatoa, ma uiga auaumama. E mafai faapefea e le malamalama ma le talitonu i nei mea ona aafia ai lou sootaga ma Ia? E mafai faapefea ona latou faaleleia lou faatuatuaina ma le faalagolago ia te Ia?

“Ou te talitonu” ma le “Ou te iloa”

Fesili i tagata aoga pe faapefea ona latou tali atu i se tasi o taumanatunatu pe i ai se afaina o le fai atu “Ou te talitonu” o se faailoaga o a latou molimau nai lo o le “Ou te iloa.” Mafaufau e faaaoga le saunoaga a Elder Jeffrey R. Holland i le vaega o “” ma fesili atu i tagata aoga po o le a le mea e tumatila ia i latou mai lenei faamatalaga.