Mosaea 18

O Le Feagaiga o le Papatisoga

O nisi o faaiuga e matua taua tele ona e mafai ona aafia ai isi mea uma i o tatou olaga. O le osia o se feagaiga ma le Atua e ala i le sauniga o le papatisoga o se tasi lea o na faaiuga. Na aoao e Alema lona nuu i tafatafa o vai o Mamona e uiga i le feagaiga tatou te osia ma le Atua pe a papatisoina i tatou. O lenei lesona e mafai ona fesoasoani e te malamalama atili ai i le feagaiga o le papatisoga ma le auala e mafai ai ona aafia ai lou sootaga ma le Atua ma isi.

Fesoasoani i tagata aoga ia iloa le alagatatau. Pe a oo ina iloa e tagata aoga le taua o le afioga a le Atua i tusitusiga paia i o latou lava olaga ma tulaga, e masani lava ona sili atu ona faaosofia i latou e aoao ma faaaoga aoaoga o le talalelei. O se tasi o auala e fesoasoani ai i tagata aoga ia iloa le alagatatau o le fai atu lea ia i latou o fesili e pei o le “E faapefea ona talitutusa lenei mea na tupu po o le aoaoga ma ou aafiaga?” po o le “E faapefea ona faatatau lenei upumoni i lou olaga?”

Sauniuniga a le tagata aoga: Mafaufau e valaaulia tagata aoga e aumai se ata po o se tusiga i le api talaaga mai le aso o lo latou papatisoga i le vasega. E mafai foi ona latou fesili atu i isi o e sa i ai iina [i le papatisoga] i mea latou te manatuaina.

O soo se tasi e lei papatisoina e mafai ona sau saunia e faasoa mai manatu ma lagona na latou oo i ai a o auai i se papatisoga po o ni a latou fesili atonu o i ai e uiga i le papatisoga.

Gaoioiga e Ono Mafai Ona Aoao Ai

O lou papatisoga

Ina ia amata lau suesuega i le aso, mafaufau e uiga i lou papatisoga ma taumafai e manatua auiliiliga mai lena aso. Afai e te lei papatiso, mafaufau i mea ua e iloa e uiga i le papatisoga po o mea e te manatua mai i lou auai i se papatisoga.

Afai e aumai e tagata aoga ni ata e pei ona fautuaina atu i sauniuniga a le tagata aoga, mafaufau e faaali atu ma valaaulia le vasega e taumafai e faailoa mai po o ai i latou o loo i ai i ata. Ona mafai lea ona e valaaulia volenitia e faasoa mai mea latou te manatua e uiga i o latou papatisoga. O fesili nei e mafai ona fesoasoani i tagata aoga e manatua ai ma talanoaina o latou lagona e uiga i le papatisoga.

• O a manatuaga e sili ona e fiafia i ai mai lena aso? Na faape’ī ou lagona?

• Na faapefea e lau filifiliga ina ia e papatisoina ona aafia ai lou sootaga ma le Atua ma isi tagata?

Ua aoao atu e Alema upu a Apinati

O leMosaea 18 o loo i ai le tala ia Alema, o lē sa avea ma se tasi o faitaulaga a le Tupu o Noa, ua ia aoao atu upu a Apinati i isi. Sa faamalosia Alema e aoao atu faalilolilo ona sa manao le Tupu o Noa e fasioti o ia mo le talitonu i le molimau a Apinati e uiga ia Iesu Keriso.

Faitau le Mosaea 18:1–7, ma vaavaai mo mea na aoao atu e Alema i tagata.

• O le a le mea na aoao atu e Alema e uiga i le Faaola ina ua uma ona faalogo i le molimau a Apinati?

• Aisea e te manatu ai na filifili Alema e aoao atu mea sa ia faia i nei fuaiupu?

O le feagaiga o le papatisoga

Ina ua uma ona [ia] aoao atu tagata e uiga i le togiola e ala ia Iesu Keriso, sa aoao atu Alema e uiga i le taua o le papatisoga. Mai ana aoaoga e mafai ona tatou aoao ai e faapea a papatisoina i tatou, tatou te ulu atu i se feagaiga ma le Atua. A o faaauau pea ona e suesue i aoaoga a Alema, mafaufau loloto i mea ua e iloa e uiga i le feagaiga tatou te osia i le papatisoga ma faafou i taimi taitasi tatou te taumamafa ai i le faamanatuga, faapea foi ma soo se fesili atonu o ia te oe. Saili ma le agaga tatalo ia malamalama atili i le auala e mafai ai e lenei feagaiga ona tosinaina ai lou sootaga ma le Atua ma isi.

Na faamalamalama mai e Elder D. Todd Christofferson o le Korama a Aposetolo e Toasefululua le uiga o le feagaiga:

O se feagaiga o se maliega i le va o le Atua ma le tagata, o se maliega ua faatulagaina e le Atua ona tuutuuga. (tagai Lomifefiloi o le Tusi Paia, “Feagaiga,” 651). I nei maliega paia, ua noatia e le Atua Ia lava e lagolagoina, faapaia, ma faaeaina i tatou o se taui mo la tatou tautinoga e auauna atu ia te Ia ma tausi Ana poloaiga. (D. Todd Christofferson, “O le Mana o Feagaiga,” Liahona, Me 2009, 20)

Mo le gaoioiga suesue lea, mafaufau e valaaulia tagata aoga e galulue i paga. Fai atu i se paga se tasi e vaavaai mo mea tatou te folafola atu pe a tatou papatiso ae vaavaai le isi mo faamanuiaga e ofoina mai e le Tama Faalelagi ia i tatou. Ona valaaulia lea o tagata aoga e faasoa i le tasi ma le isi ni mea sa latou mauaina.

I le Mosaea 18:8–10, na faamatala ai e Alema le feagaiga o le papatisoga. Faitau le Mosaea 18:8–10 ma mafaufau e faailoga mea tatou te tautino atu e fai pe a tatou papatiso ma, i se lanu po o se faiga ese, faailoga ia faamanuiaga ua ofoina mai e le Tama Faalelagi ia i tatou.

O leMosaea 18:8–10 o se fuaitau o le atamai i aoaoga faavae. Mafaufau e maka fuaitau o le atamai i aoaoga faavae i se ala iloga ina ia mafai ai ona e mauaina gofie. O le a e maua se avanoa i le lesona o sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

Mafaufau e fatu ni koluma se lua i luga o le laupapa ma tusi ai le “Tatou te osifeagaiga e …” i le pito i luga o le tasi ma le “Ua ofoina mai e le Atua …” i le pito i luga o le isi. Valaaulia tagata aoga e o mai i le laupapa ma faatumu mea latou te maua mai le Mosaea 18:8–10.

• O le a sou manatu o le a le uiga o le “faanoanoa faatasi ma e e faanoanoa” ma le “faamafanafana atu ia te i latou o e e manaomia le faamafanafanaga”? (fuaiupu 9).

• O a nisi o auala e mafai ona tatou “tutū o ni molimau a le Atua i taimi uma ma i mea uma, ma i nofoaga uma”? (fuaiupu 9). O ai e te iloa o se faataitaiga lelei lea o le faia o lenei mea?

• Na faapefea ona e vaai ua faamanuiaina oe e le Atua po o isi i folafolaga na Ia faia ma i tatou e ala i le papatisoga?

Tausia o au feagaiga o le papatisoga

O le vaega o totoe o le lesona ua faamoemoe e fesoasoani i tagata aoga ia malamalama pe faapefea ona tausia tautinoga o le papatisoga lea na faamatalaina e Alema i le Mosaea 18:8–10.

O vitio nei e mafai ona faaaoga e faaali ai faataitaiga. Valaaulia tagata aoga e matamata ma faasoa mai fasifuaitau mai fuaiupu 8–10 latou te vaai o faataitai i vitio. (O loo maua vitio i le ChurchofJesusChrist.org.) Ona mafai lea e tagata aoga ona o mai i luga ma vase lalo o se faamatalaga i luga o le laupapa sa latou lagonaina na faataitaiina i le vitio. Ona mafai lea ona e fesili atu ia i latou pe aisea na latou filifilia ai lena faamatalaga.

• “No Cussing Club” (4:56)

  No Cussing Club

  One boy’s crusade to encourage clean language has far-reaching effects.

• “Eyes to See” (mai le faailotaimi 4:55 i le 6:53)

  Mata e Vaai

  Ua aoao mai Sister Craig e faapea, faatasi ai ma le fesoasoani a le Agaga Paia, e mafai ona tatou aoao e vaai atu i isi ma vaai ia i tatou lava e pei ona silasila mai ai le Faaola.

• “Dayton’s Legs” (3:02)

  Dayton's Legs

  Na faataunuu e se tamaitiiti e 13 tausaga i Arisona lana Tiute i le Atua e ala i lona uunaia o ia lava seia oo i le mea na gata ai lona mafai, ina ia mafai e lana uo, o le e maua i le ma’i supa ona o le faaletonu o lona faiai, ona auai faatasi ma ia

Filifili ia le itiiti ifo ma le tasi se folafolaga tatou te faia i le papatisoga na faasoa mai e Alema i le Mosaea 18:8–10. Mo se faataitaiga, e mafai ona e filifili e “tauave avega a le tasi” (fuaiupu 8) po o le “tausi ana poloaiga” (fuaiupu 10).

Mafaufau e faaali atu fesili nei ma tuu atu i tagata aoga se taimi ia lava e mafaufau loloto ai i a latou tali. Ona valaaulia lea o i latou e faasoa mai a latou tali ma nisi malamalamaaga i ni vaega toalaiti.

• O a nisi o auala e mafai ai e se talavou ona tausia lena folafolaga?

• Aisea e te manatu ai na faaaofia e le Tama Faalelagi lena mea o se vaega o a tatou feagaiga o le papatisoga?

• Na faapefea ona faaalia e le Faaola e ala i faataitaiga le ala e tausia ai lena folafolaga?

• O anafea na e tausia ai po o se tasi e te iloa lena folafolaga? O a ni mea ua e aoaoina mai i na aafiaga?

Faaaoga sina taimi e tusifaamaumau ai i lau api talaaga ou lagona pe o faapefea lou tausiaina o folafolaga o le papatisoga na faasoa mai e Alema i le Mosaea 18:8–10. Na faapefea ona faamanuiaina lou tausia o nisi o nei folafolaga? O a ni tulaga e mafai ai ona e tausia atili ma le loto i ai se tasi o na folafolaga? O le a sou manatu o le a faapefea ona aafia ai lou sootaga ma le Alii ma isi tagata pe afai e te faia?

Manatu ma Talaaga o Faamatalaga

Aisea e taua ai le malamalama i la’u feagaiga o le papatisoga?

Na aoao mai Elder Joseph B. Wirthlin (1917–2008) o le Korama a Aposetolo e Toasefululua:

Ua ou maitauina i lo’u olaga atoa, a oo ina malamalama atoa tagata i faamanuiaga ma le mana o a latou feagaiga o le papatisoga, pe o se tagata fou faatoa liliu mai po o tagata ua leva ona auai i le Ekalesia, e oo mai le olioli tele i o latou olaga ma latou te faia o latou tiute i le malō ma le naunautaiga ia aafia ai isi. (“Alma the Elder: A Role Model for Today,” i le Heroes from the Book of Mormon [1995], 84)

Mosaea 18:14. Pe na papatisoina e Alema o ia lava?

Na faamalamalama mai e Peresitene Iosefa Filitia Samita (1876–1972):

E mafai ona tatou faaiuina faapea na umia e Alema le perisitua a o lei faalavelaveina o ia, faatasi ma isi, e le Tupu o Noa. Pe sa faapea pe leai foi, e leai lava se eseesega ona o le Tusi a Mosaea o loo taua mautinoa ai sa ia te ia le pule [tagai Mosaea 18:13]. Afai sa ia te ia le pule e papatiso ai o se faamaoniga lea ua papatisoina o ia.

O le mea lea, ina ua papatisoina e Alema o ia lava faatasi ma Helama e le o se tulaga lea o le papatisoina e Alema o ia lava, ae ua na o se faailoga i le Alii o lona lotomaualalo ma le salamo atoatoa. Tali i Fesili o le Talalelei, comp. Joseph Fielding Smith Jr., 5 vols. [1957–66], 3:203)

E mafai faapefea ona ou tausia la’u feagaiga ia tausia isi?

Na saunoa Sister Sharon Eubank o le Au Peresitene Aoao o le Aualofa:

I le avea ai ma tagata ua papatisoina o le Ekalesia, ua noatia ai i tatou i se feagaiga e tausi i latou ua lē tagolima. O a tatou taumafaiga taitoatasi e lē manaomia ai se tupe po o ni nofoaga mamao; latou te manaomia le taitaiga a le Agaga Paia ma se loto naunautai e fai atu ai i le Alii, “O A‘u lenei; auina atu a’u.” (Sharon Eubank, “Ou te Tatalo Ia Ona Faaaogaina i Tatou,” LiahonaNov. 2021, 55)

Gaoioiga Faaopoopo e Aoao Ai

Nofoaga paia

A uma ona faitau le faamatalaga o vai o Mamona i le Mosaea 18:30, fai i tagata aoga e toe manatunatu i nofoaga e paia ia i latou ona sa latou “o atu i le malamalama o lo latou Togiola” iina. Atonu e te tuuina atu ia i latou se taimi e faamaumau ai manatuaga ia latou api talaaga ma fesili atu mo ni volenitia e faasoa mai ni nofoaga sa latou mafaufau i ai e aunoa ma le faasoaina atu o faamatalaga e patino tele.

Agalelei o le Atua

Mafaufau e faaaoga le manatu lenei i le vaega o le lesona i lalo o le ulutala “O le feagaiga o le papatisoga.” Uu i luga se aitema e ono fiafia i ai tagata aoga, ma fesili pe fia se mea latou te naunau e totogi mo lena aitema. Fesili atu ia i latou pe o le a so latou lagona ia te oe pe a e tuuina atu ia i latou le aitema o se meaalofa pe afai latou te malilie e taumafai i le mea sili latou te mafaia e talisapaia ma faaaoga. A o suesue e tagata aoga mea ua ofoina mai e le Atua ia i tatou e ala i feagaiga o le papatisoga ma mea Na te manaomia mai ia i tatou, fesoasoani ia latou malamalama i Lona alofa ma le agalelei i le ofoina mai o mea e tele pe a faatusatusa i mea ua Ia fetalai mai tatou te toe faia. (Tagai foi i le Roma 8:16–17; Mataupu Faavae ma Feagaiga 84:38.)

O le faamanatuga

Mafaufau e valaaulia tagata aoga e lisi i luga o le laupapa folafolaga tatou te faafouina pe a tatou taumamafa i le faamanatuga. O nei folafolaga o loo maua i le Mataupu Faavae ma Feagaiga 20:77, 79.

Ona fesili atu lea ia i latou pe mafai faapefea e le tausia o nei folafolaga ona fesoasoani ia i tatou e tausia folafolaga o loo otooto mai i le Mosaea 18:8–10. Mo se faataitaiga, e mafai ona e fesili, “E mafai faapefea e le manatuaina pea o Ia ona fesoasoani ia i tatou e tauave avega a le tasi ma le isi?” po o le “E mafai faapefea e le tauaveina o Lona suafa i o tatou luga ona fesoasoani ia i tatou e tutu atu ai o ni Ana molimau i nofoaga uma?”

Na aoao e Alema lona nuu i le auala e faataunuu ai feagaiga o le papatisoga

Tusi mau faasino nei i luga o le laupapa: Mosaea 18:21; Mosaea 18:18–19; Mosaea 18:23, 25; Mosaea 18:27–29.

Vaevae tagata aoga i ni vaega se fa. Valaaulia tagata aoga taitasi e faitau le leoa se tasi o fuaitau o mau, ao mafaufau e uiga i fesili nei. Ona valaaulia lea o i latou e lipoti mai mea na latou aoaoina i a latou vaega.

• E faapefea ona fesoasoani le fuaitau ia te oe ia malamalama atili i le ala e ola ai e tusa ma feagaiga tatou te osia i le papatisoga?

• E mafai faapefea e le tausia o lau feagaiga i lenei auala ona aafia ai isi i lau uarota po o le paranesi?

• E faapefea e le mulimuli i le fautuaga o loo i lenei fuaitau ona fesoasoani e te maua ai le Agaga o le Alii e faatasi ma oe?