Mosaea 19–20

“Ua Faataunuuina [ea] Upu a Apinati”

E finagalo le Tama Faalelagi ia e maua le fiafia ma le saogalemu. O se tasi o auala e mafai ona e maua ai le olioli ma le puipuiga faaleagaga o le mulimuli lea i aoaoga ma lapataiga a Ana perofeta. O le teenaina o Apinati, na le maua ai e le Tupu o Noa ma lona nuu faamanuiaga o le saogalemu ma oo ai i puapuaga tetele. O lenei lesona e mafai ona fesoasoani ia te oe e lagona ai se naunautaiga sili e ua’i atu i lapataiga ma aoaoga a perofeta a le Alii.

Fesoasoani i tagata aoao ia malamalama i le matalalaga o mau. O le matalalaga o tulaga ia o loo siomia ai pe tapue ai le talaaga o fuaitau o mau, mea na tutupu, ma tala. O lenei matalalaga e fesoasoani tatou te malamalama ai i le lalolagi o i latou o loo i tusitusiga paia. O le malamalama i le matalalaga o tala o tusitusiga paia e mafai ona fesoasoani i tagata aoga e faailoa mai ai mataupu faavae ma aoaoga faavae ma faatatau tusitusiga paia ia i latou lava.

Sauniuniga a le tagata aoga: Valaaulia tagata aoga e mafaufau i se faataitaiga mai tusitusiga paia po o o latou lava olaga e lagolagoina le faamatalaga lenei. Fautuaina i latou e o mai saunia i le vasega e faasoa mai a latou faataitaiga.

“Ua faaalia i talafaasolopito o loo i ai le saogalemu, filemu, manuia, ma le fiafia i le gauai atu i fautuaga faaperofeta” (M. Russell Ballard, “His Word Ye Shall Receive,” Ensign, Me 2001, 65).

Gaoioiga e Ono Mafai Ona Aoao Ai

Saogalemu mai tulaga lamatia

Mafaufau a le o le faaali atu o ata nei po o le aumaia o ni mea faitino eseese i le vasega e faaaoga e maua ai le saogalemu. E mafai foi ona e fai atu i tagata aoga e faasoa mai ni faataitaiga o aitema po o tulafono latou te faaaogaina i aso uma e ola saogalemu ai.

• O a ni tulaga lamatia e mafai e nei mea faitino ona puipuia mai ai i tatou?

• Aisea e te manatu ai e filifili nisi tagata e le amanaia meafaigaluega po o taiala mo le saogalemu?

E mafai ona e faaali atu se ata o le perofeta o i ai nei i tafatafa o ata na muamua atu.

E le gata i tulaga lamatia faaletino, o tulaga lamatia faaleagaga o se vaega foi o lo tatou aafiaga faaletino. Ona e alofa o Ia ia i tatou, ua valaauina ai e le Alii ia perofeta e tuuina mai ia i tatou taiala ma meafaigaluega e mafai ona fesoasoani ia i tatou ia maua le saogalemu faaletino, faaleagaga, ma faalelagona i o tatou olaga atoa.

Faaalu sina taimi e toe manatunatu ai i le saogalemu ua ofoina mai e le Alii ia te oe e ala mai i Ana perofeta ma aposetolo. Atonu o le a fesoasoani fesili nei:

Atonu e aoga mo tagata aoga le faamaumauina o a latou tali i a latou api talaaga mo suesuega.

• E faafia ona e vaai atu i perofeta ma aposetolo a le Alii o se auala e maua ai Lana puipuiga faaleagaga?

• O a nisi o faataitaiga o auala e mafai ai e le mulimuli i perofeta a le Alii ona faamanuiaina oe?

A o e suesue, vaavaai mo aoaoga e mafai ona fesoasoani ia te oe e lagona ai se manao sili atu e saili le saogalemu ma le fiafia lea e maua mai le mulimuli i le perofeta a le Alii.

Ua oo le nuu o le Tupu o Noa i taunuuga o a latou agasala

Manatua na auina atu Apinati e lapatai le nuu o le Tupu o Noa e uiga i lo latou amioleaga ina ia mafai ai ona latou aloese mai faamasinoga o le a oo mai a le Alii. (Atonu e fesoasoani le toe iloilo o nisi o lapataiga a Apinati i le Mosaea 11:20–25; 12:1–8.)

Toe iloilo le tali a Noa ma lona nuu i lapataiga a Apinati e ala i le faitauina o le Mosaea 12:13–15; 17:11–20.

• Aisea e te manatu ai na filifili Noa ma ana faitaulaga e le amanaia lapataiga a Apinati?

• O a nisi o faataitaiga o auala e ono le amanaia pe teena ai e tagata ia aoaoga a perofeta i o tatou aso? O le a sou manatu aisea latou te faia ai lenei mea?

E pei lava ona sa valoia e Apinati (tagai Mosaea 17:15–19), sa oo le nuu o Noa i tofotofoga faigata ina ua uma ona teena afioga a le Alii ma le valaaulia e salamo. Atonu e te manatua mai lau suesuega o le Mosaea 7 e lei leva ona maliu Apinati, ae maua nei tagata e se vaega suesue mai Saraemila na taitaia e se tagata e igoa ia Amona (tagai i le ata o loo i lalo). I le taimi na latou mauaina ai, o sa Nifae i le laueleele o Nifae sa faatagataotauaina e sa Lamana.

O lo latou taitai o Limae, o le atalii o le Tupu o Noa. Faitau upu a Limae i le Mosaea 7:24–29, ma vaavaai mo mafuaaga na ia faailoaina mo le faatagataotauaina na latou oo i ai.

• O le a se mea na e vaaia i nei fuaiupu e mafai ona fesoasoani i se tasi e le lagonaina le taua o le mulimuli i perofeta a le Alii?

Mafaufau e tusi le fuaiupu lē uma lenei i luga o le laupapa. A uma ona tuu atu i tagata aoga se taimi e mafaufau i ai, valaaulia ni tagata aoga e faasoa mai pe faapefea ona latou faaumaina.

O le le amanaiaina po o le teenaina o afioga a le Alii e ala i Ana perofeta e taitai atu ai i le …

E mafai ona vaevae tagata aoga i ni vaega ma valaaulia e suesue se tasi o nei seti o fuaiupu: (1) Mosaea 19:3–8; (2) Mosaea 19:9–15; (3) Mosaea 19:16–21; 20:3, 21. Valaaulia i latou e vaavaai mo ni auiliiliga e faapupula mai ai le upumoni faapea o le le amanaiaina po o le teenaina o afioga a le Alii e ala mai i Ana perofeta e taitai atu ai i mafatiaga ma faanoanoaga.

• O a faamaoniga na e vaaia i mafatiaga po o faanoanoaga na oo i ai tagata taitoatasi i nei fuaiupu?

• Ina ua uma ona vaai i mafatiaga na onosaia e nei tagata ma le iloaina na auina mai e le Alii se perofeta e lapataia i latou, o le a se mea ua e aoaoina e uiga i le Alii?

Na faasoa mai e Peresitene M. Russell Ballard o le Korama a Aposetolo e Toasefululua nisi o faamanuiaga e mafai ona tatou maua pe a tatou faalogo i fautuaga a le Alii e ala mai i Ana perofeta:

O loo faaalia i le talafaasolopito e faapea, e i ai le saogalemu, filemu, manuia ma le fiafia i le ua’i atu i fautuaga faaperofeta. (M. Russell Ballard, “His Word Ye Shall Receive,” Ensign, Me 2001, 65)

• O a nisi o faataitaiga mai lou olaga po o tusitusiga paia e lagolago ai le saunoaga a Peresitene Ballard?

O le apoapoaiga a le Alii mo oe

E pei foi o perofeta i aso anamua, o perofeta i aso nei ua tuuina mai ia i tatou le apoapoaiga, lapataiga, ma faamanuiaga folafolaina a le Alii. O se tasi o nofoaga e mafai ona tatou maua ai nisi o nei apoapoaiga o loo i le Mo Le Malosi o le Autalavou (tamaitusi, 2022).

Mafaufau e vavae tagata aoga i ni vaega toalaiti ma atofa atu i vaega taitasi se autu se tasi pe sili atu e suesue ai mai le Mo Le Malosi o le Autalavou (tamaitusi, 2022). Atonu e te manao e aumai ni kopi i le vasega mo tagata aoga e faaaoga. Valaaulia tagata aoga e vaavaai mo mea nei:

1. Tulaga faatonuina ua valaaulia oe e le Alii e ola ai

2. O tulaga lamatia faaleagaga o le lē amanaiaina o apoapoaiga a le Alii

3. O faamanuiaga folafolaina mo le usitaia o faatonuga ma lapataiga a le Alii

A uma ona fai e tagata aoga, valaaulia i latou e faasoa mai mea na latou maua e fesootai i aitema e tolu na muamua atu.

• E mafai faapefea e le mulimuli i nei aoaoga ona fesoasoani ia te oe e mulimuli atili ai ia Iesu Keriso?

Mafaufau i mea ua e aoaoina i le asō e uiga i le taua o le mulimuli i le perofeta a le Alii. Faaalu sina taimi e mafaufau ai pe mafai faapefea ona e mulimuli atili i le perofeta ma pe aisea o le a taua ai mo oe le faia o lena mea. Faamaumau ou manatu ma uunaiga faaleagaga i lau api talaaga mo suesuega.

Manatu ma Talaaga o Faamatalaga

O a ni mea ua aoao mai e lapataiga faaperofeta ia te au e uiga i le Atua?

Na aoao mai Elder D. Todd Christoffferson o le Korama a Aposetolo e Toasefululua:

Ua leva ona faagaeetia a’u, ma ou lagonaina foi, le alofa naunau o perofeta a le Atua i a latou lapataiga e faasaga i le agasala. E le o faaosofia i latou e se manao ia ta’usalaina. O lo latou naunautaiga moni e faapei o le alofa o le Atua; o le mea moni, o le alofa lava lea o le Atua. Latou te alolofa ia i latou e auina i ai i latou, po o ai lava i latou ma pe o a foi lava o latou uiga. E faapei lava foi o le Alii, e le mananao Ana auauna ia mafatia se tasi i tiga o le agasala ma filifiliga lē lelei. (D. Todd Christofferson, “O Le Alofa o le Atua,” Liahona, Nov. 2021, 17)

Aisea e le vave lagona ai e nisi tagata ia aafiaga le lelei o le le amanaiaina o le perofeta?

Sa aoao mai Peresitene Henry B. Eyring o le Au Peresitene Sili:

Ua auina mai e le Atua ni auauna faaletino o e e mafai, e ala i le Agaga Paia, ona fesoasoani ia i tatou ia iloa mea ua Ia finagalo tatou te faia ma mea ua Ia faasaina. Ua faia e le Atua ia tosina atu i le filifilia o le mea sa’o e ala i le faatagaina o i tatou ia lagonaina aafiaga o a tatou filifiliga. Afai tatou te filifilia le mea sa’o, o le a tatou mauaina le fiafia—i le taimi e mulimuli. Afai tatou te filifilia le leaga, o le a oo mai le faanoanoa ma le maasiasi—i le taimi mulimuli. Ua mautinoa lava na aafiaga. Ae e tele lava ina faatuai mai ona o se faamoemoega. Afai e vave maua faamanuiaga, o le filifilia o le mea sa’o o le a le fausia ai le faatuatua. Ma e talu ai o le faanoanoa i nisi taimi foi e matua tuai ai lava ona oo mai, ae e manaomia le faatuatua e lagona ai le manaomia ona saili atu i le faamagaloga o agasala i se taimi vave i lo le tatou lagonaina o ona aafiaga faanoanoa ma le tiga. (Henry B. Eyring, “O Se Tofi o le Faamoemoe e Le Mafaatauina,” Liahona, Me 2014, 24–25)

Gaoioiga Faaopoopo e Aoao Ai

Mulimuli i le perofeta

Mafaufau e usu se viiga po o se pese a le Peraimeri e uiga i perofeta e amata ai le vasega. Valaaulia le vasega e faailoa mai mataupu faavae e faatatau i le mulimuli i perofeta mai upu o le pese. Uunaia tagata aoga e vaavaai mo faamaoniga o nei mataupu faavae a o latou suesue i taunuuga na feagai ma le Tupu o Noa ma lona nuu i le maea ai ona latou teena le apoapoaiga faaperofeta a Apinati.

Atiae i luga o le faavae o aoaoga a Iesu Keriso

E le suia mataupu faavae o le talalelei. E faaopoopo atu i le faaaogaina o mataupu faavae mai tusitusiga paia anamua ma le faaaogaina i o tatou aso nei, e mafai ona tatou faaaogaina aoaoga faaperofeta i ona po nei ma faatatau i tala o tusitusiga paia. Valaaulia tagata aoga e vaavaai pe faapefea e parakalafa 6–8 o le “O Le Aiga: O Se Folafolaga i le Lalolagi” (ChurchofJesusChrist.org) ona faaaoga i tulaga faaleaiga o loo maua i le Mosaea 19:6–24; 20:3.

E mafai foi ona e fuafua e faaali le vitio “O le Faamagaloga pe a uma le Faalataina o se Faagasologa” (5:21). Valaaulia tagata aoga e vaavaai mo auala e mafai ona faatatau ai lenei vitio i aiga na toe foi mai o latou tamā ina ua latou tuua le Tupu o Noa.

O le mulimuli ai i tagata amioletonu e mafai ona taitai atu ai i tatou i le faia o faaiuga o le a tatou faanoanoa ai

Valaaulia tagata aoga e faitau le Mosaea 19:18–21, ma vaavaai mo mea na tutupu i le va o le Tupu o Noa ma i latou na mulimuli ia te ia. Valaaulia tagata aoga e lipoti mai mea sa latou mauaina.

Mafaufau po o le a se mea e mafai ona e faia e fesoasoani ai i tagata aoga e iloilo pe o i ai ni faatosinaga i o latou olaga e ono taitai atu ai i latou e faia filifiliga o le a latou faanoanoa mulimuli ane ai.

Vitio fesootai

Ina ia fesoasoani i tagata aoga ia iloa le saogalemu lea e sau mai le mulimuli i aoaoga a le Alii e ala mai i Ana perofeta, mafaufau e faaali atu le “O Se Taula Saogalemu“ (3:36).