Atamai i Aoaoga Faavae: Mosaea 18:8–10

“Ua Outou Ulu Atu i se Feagaiga Faatasi ma Ia”

I se lesona talu ai, na e aoao ai e uiga i le auala e mafai ai e la tatou feagaiga o le papatisoga ma le Faaola ona aafia ai le ala tatou te ola ai. O lenei lesona e mafai ona fesoasoani ia te oe e tauloto le mau faasino ma le fasifuaitau autu o le mau mo le Mosaea 18:8–10, faamatala le aoaoga faavae o loo aoao mai i nei fuaiupu, ma faaaoga mataupu faavae o le mauaina o le malamalama faaleagaga i tulaga moni o le soifuaga e faaaoga ai lenei fuaitau o mau.

Aoaoina o tagata aoga i mataupu faavae o le mauaina o le malamalama faaleagaga. O le a sili atu le ausiaina e tagata aoga o faamoemoega o le atamai i aoaoga faavae pe afai latou te iloa ma malamalama i mataupu faavae o le mauaina o le malamalama faaleagaga. Ia mautinoa e fesoasoani i tagata aoga ia malamalama i nei mataupu faavae ma ia toe iloiloina e le aunoa.

Sauniuniga a le tagata aoga: Mafaufau e valaaulia tagata aoga e taumafai e tauloto le mau faasino ma le fasifuaitau autu o le mau mo le Mosaea 18:8–10.

Gaoioiga e Ono Mafai Ona Aoao Ai

O lenei lesona o le fuaitau o le atamai i aoaoga faavae ua mamanuina ia aoaoina pe a uma le lesona o le “Mosaea 18,” o le lesona faatatau lea mo le fuaitau o le atamai i aoaoga faavae o le Mosaea 18:8–10. Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.

Tauloto ma faamatala

Faaaoga soo se metotia aoga e fesoasoani ai i tagata aoga e tauloto le mau faasino ma le fasifuaitau autu o le mau mo le Mosaea 18:8–10 ma ia faamatala upumoni o loo maua i lenei fuaitau. O gaoioiga nei o ni fautuaga mo le auala e faataunuuina ai.

A o lei amataina le vasega, tusi upu o le fasifuaitau autu o le mau mo le Mosaea 18:8–10 i luga o le laupapa i se faasologa faafefiloi. Fai atu i tagata aoga e toe faatulaga tonu le fasifuaitau i a latou api talaaga mo suesuega ona fai atu lea i se volenitia e tusi faasa’o i luga o le laupapa faatasi ai ma le mau faasino. A manaomia, valaaulia tagata aoga e fesoasoani mai.

O le fasifuaitau autu o le mau mo le Mosaea 18:8–10 o le “Ia papatisoina i le suafa o le Alii, o se molimau … ua outou ulu atu i se feagaiga faatasi ma ia.’”

O se isi filifiliga o le tusi lea o vaega o le fasifuaitau autu o le mau i ni fasipepa eseese ma tuu pepa i luga o le laupapa i se faasologa faafefiloi. Ona mafai lea ona o mai tagata aoga i le laupapa ma toe faatulaga ia pepa i le faasologa sa’o.

Toe faatulaga tonu le mau faasino ma le fasifuaitau autu o i lalo mo le Mosaea 18:8–10 e ala i le tusia i lau api talaaga mo suesuega i le faasologa sa’o. Afai e manaomia, siaki le sa’o o lau faatulagaga e ala i le faasino atu i le lisi o mau faasino o le atamai i aoaoga faavae ma fasifuaitau autu o mau i le faaiuga o le Pepa Autu o le Atamai i Aoaoga Faavae (2022).

A uma ona e tusia faasa’o le fasifuaitau, faaaoga sina taimi e taumafai ai e tauloto le mau faasino ma le fasifuaitau autu o le mau e ala i le toe taulotoina pea mo ni nai taimi.

I se lesona talu ai, sa e aoaoina ai e faapea pe a tatou papatiso, tatou te ulu atu i se feagaiga ma le Atua o le a tatou auauna ia te Ia ma tausi Ana poloaiga. Mafaufau faapea na talosagaina oe e lauga i se sauniga papatisoga a se tamaitiiti e valu tausaga e uiga i le feagaiga sa latou osia. Faamaumau pe mafai faapefea e le Mosaea 18:8–10 ona fesoasoani ia te oe e faamatala le feagaiga ma pe faapefea e le tausia o le feagaiga ona fesoasoani i le tamaitiiti ia avea atili e faapei o Iesu Keriso.

A uma ona tusitusi tagata aoga, valaaulia i latou e faasoa atu i se tasi o le vasega mea na latou tusia. Ona valaaulia lea o nisi o volenitia e faasoa mai i le vasega mea na latou aoaoina po o a latou molimau i le feagaiga o le papatisoga ma le vasega.

Faataitai le faaaogaina

Mafaufau e tusi mataupu faavae e tolu o le mauaina o le malamalama faaleagaga i luga o le laupapa. O loo maua i parakalafa 5–12 o le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae (2022). Ina ia fesoasoani i tagata aoga e toe iloilo nei mataupu faavae, valaaulia i latou e o mai i le laupapa ma tusi i lalo o ulutala le tele o mea latou te mafai ona manatua e uiga i mataupu faavae taitasi.

Ona faaali atu lea o le tulaga faataitai lenei pe tuu atu i tagata aoga se kopi e faasino atu i ai i le taimi atoa o totoe o le lesona. E mafai ona e fetuunaia le tulaga faataitai e fesootai lelei ai i manaoga o tagata aoga pe fai i tagata aoga e fatu ni a latou lava tulaga faataitai e uiga i le tausia o feagaiga o le papatisoga.

Ua maitauina e Ana o Paula, o se teineitiiti i lana vasega i le lotu, o loo tauivi ia fiafia pe faia ni uo. Na faalogo Ana o nisi taimi e filifili ai Paula e le auai i gaoioiga a le autalavou po o sauniga lotu ona na te lagona e le tutusa o ia ma isi teineiti. E manao Ana e fesoasoani ia Paula ia lagona atili le taliaina, ae na te lei talanoa moni lava ia Paula ma popole atonu e faigata pe le talafeagai le aapa atu ia te ia.

Mafaufau e valaaulia tagata aoga e galulue i ni vaega toalaiti e tali le fesili lenei ma saunia ni fautuaga e mafai ona latou faasoa atu ia Ana. E mafai ona e tuu atu i vaega taitasi se tasi o mataupu faavae o le mauaina o le malamalama faaleagaga e taulai atu i ai. Ona valaaulia lea o tagata aoga e faasoa mai a latou tali i le vasega.

• E faapefea ona e faaaogaina mataupu faavae taitasi e tolu o le mauaina o le malamalama faaleagaga ma aoaoga o i le Mosaea 18:8–10 e fesoasoani ai ia Ana i lona tulaga?

Fautuaina tagata aoga e talanoaina le fesili talu ai e faaaoga ai le Mosaea 18:8–10 ma mea latou te manatua mai le suesueina o mataupu faavae o le mauaina o le malamalama faaleagaga i lenei semesa. Afai latou te manaomia pea le fesoasoani, e mafai ona e faaali atu pe tuu atu i tagata aoga se kopi o fesili nei i lalo o mataupu faavae taitasi. Afai na e fetuunaia le tulaga faataitai ina ia lelei atili ai le taulimaina o manaoga o tagata aoga, fetuunai foi ma fesili.

Saili nisi malamalamafaaopoopo e ala i punaoa mamana ua filifilia

• O a nisi o fuaitau o mau po o saunoaga a taitai o le Ekalesia e te iloa e mafai ona fesoasoani ai ia Ana? E mafai faapefea ona fesoasoani aoaoga o loo i le Mosaea 18:8–10?

• E mafai faapefea e le talanoa atu i le au peresitene o le vasega a Tamaitai Talavou ona maua ai e Ana le malamalama sili atu e uiga i le tulaga o Paula?

Iloilo manatu faavae ma fesili faatasi ma se vaaiga e faavavau

• O le a se mea e manaomia ona malamalama i ai Ana e uiga i le ala e silasila ai le Alii i feagaiga o le papatisoga lea e mafai ona fesoasoani ia te ia e faatoilalo ai ona lagona o le musuā?

• E ono mafai faapefea e le manatuaina o lagona o le Alii e uiga ia Paula ona fesoasoani ia Ana?

• E ono mafai faapefea e le faamalosiauina o Paula ona fesoasoani ia Ana ia avea atili e faapei o le Tama Faalelagi ma Iesu Keriso?

Faatino i le faatuatua

• O le a se mea e mafai ona fai e Ana e tausia ai ni folafolaga patino o le papatisoga na aoao mai e Alema i le Mosaea 18:8–10?

  Mafaufau e valaaulia tagata aoga e toe iloilo a latou faamatalaga e uiga i mea sa latou aoaoina i le Mosaea 18, ma vaavaai mo ni malamalamaaga faaopoopo e uiga i le ala e mafai ai e Ana ona faanoanoa faatasi, faamafanafana, pe tauave avega a Paula. Ona valaaulia lea o i latou e faasoa mai mea na latou maua ma mea o le a latou fautuaina atu ia Ana.

• O a ni faataitaiga o le fesoasoani ai o Iesu Keriso i isi o le a e faasoa atu ia Ana e fesoasoani ai ia te ia e faatino i le faatuatua?

Toe faamanatu o le atamai i aoaoga faavae

E ao ona faaaoga le gaoioiga toe faamanatu lenei i se lesona e aoao atu i se taimi lata mai.

Toe faamanatu le mau faasino ma le fasifuaitau autu o le mau mo le Mosaea 18:8–10 e ala i le valaaulia o tagata aoga e toe fai faatasi o se vasega mo ni nai taimi. Ona mafaufau lea e toe faamanatu mau faasino ma fasifuaitau autu o mau mo isi fuaitau o le atamai i aoaoga faavae sa latou suesueina e ala i le toe faia foi.

O le fasifuaitau autu o le mau mo le Mosaea 18:8–10 o le “Ia ‘papatisoina i le suafa o le Alii, o se molimau … ua outou ulu atu i se feagaiga faatasi ma ia.’”

E mafai foi ona e mafaufau e faaaoga le gaoioiga toefaatulaga sa’o o loo fautuaina atu i le amataga o lenei lesona.

Gaoioiga Faaopoopo e Aoao Ai

O se isi vaaiga faataitai

Afai o le a sili atu ona aoga mo au tagata aoga le taulai atu i le tutu “o ni molimau a le Atua i taimi uma ma i mea uma, ma i nofoaga uma” (Mosaea 18:9), mafaufau e faaaoga se tulaga faataitai e pei o lenei mo le faaaogaina faataitai.