Mosaea 21–24, Vaega 1

Mauaina o Faamoemoega o le Alii mo o Tatou Tofotofoga ma Puapuaga

E faapefea ona e faamalamalama atu i se tasi le mafuaaga e faataga ai e le Alii i tatou e oo i tofotofoga ma puapuaga? O leMosaea 21–24 o loo faamatala mai ai mea na oo i le nuu o Limae ma le nuu o Alema, o e na fetaiai uma ma luitau faigata. O lenei lesona ua faamoemoe e fesoasoani ia te oe e lagona ai le faateleina o le faalagolago i le Tama Faalelagi ma Iesu Keriso pe a e feagai ma tofotofoga ma puapuaga i lou olaga.

Fai fesili e uunaia ai se talanoaga. E tupu ni talanoaga anoa i le vasega pe a fegalegaleai faiaoga ma tagata aoga ma fegalegaleai le tasi tagata aoga ma le isi. Fai fesili e talafeagai ma e maua ai avanoa mo le toatele o tagata aoga e tali mai ai. E mafai foi ona e uunaia le talanoaga e ala i le fai atu i tagata aoga e tali mai i manatu faaalia na faia e tagata o le latou vasega.

Sauniuniga a le tagata aoga: E mafai ona valaaulia tagata aoga e mafaufau e uiga i se tofotofoga ua tuanai po o se luitau na fesoasoani ia i latou e lagona ai le tuputupu ae pe faalatalata atili atu ai i le Alii. Fautuaina tagata aoga e o mai saunia e faasoa mai mea na latou aoaoina po o auala na aafia lelei ai i latou e lenei tofotofoga.

Gaoioiga e Ono Mafai Ona Aoao Ai

O le lesona muamua lenei o lesona e lua o loo talanoaina ai le Mosaea 21–24. O le Vaega 1 o le a taulai atu i le mafuaaga e ono faataga ai e le Alii i tatou e oo i tofotofoga, ma o le vaega 2 o le a taulai atu i le ala e mafai ona tatou faalagolago ai i le Tama Faalelagi ma Iesu Keriso e fesoasoani ai ia i tatou i nei tofotofoga. Afai e utiuti le taimi o le vasega ma e na o le tasi le lesona i le Mosaea 21–24 e mafai ona aoao atu, mafaufau pe faapefea ona tuufaatasi lelei ia lesona e lua.

Tauaveina o avega

Manatu faapea o ou tofotofoga, avega, ma puapuaga o loo faatusa i maa e tatau ona e tauaveina faaletino i se ato po o se atofaafafa.

Atonu e te mafaufau e aumai i le vasega se atofaafafa ma ni mea mamafa e faatusa i avega. Valaaulia se tagata aoga naunautai e fafa le atofaafafa ao ta’u mai e tagata o le vasega ni tofotofoga eseese ma tuu mea mamafa i totonu o le ato. Ia mautinoa ia ’aua nei mamafa tele le atofaafafa e ono afaina ai le tagata aoga o loo fafaina. Afai e mafai, e mafai ona faaauau pea ona fafa e le tagata aoga le atofaafafa a o talanoaina e le vasega fesili nei.

Mafaufau e lisi i luga o le laupapa tali a tagata aoga i fesili nei.

• O a nisi o tofotofoga po o avega e ono oo i ai talavou e mafai ona lagona ai le pei o ni maa mamafa i totonu o se atofaafafa?

• O a ni fesili e ono i ai i tagata e uiga i avega o loo latou tauaveina?

Mafaufau e tuu atu i tagata aoga se taimi e lisi ai nisi o o latou tofotofoga patino ma tusifaamaumau o latou manatu, fesili, ma lagona e uiga i na tofotofoga i a latou api talaaga mo suesuega. E mafai ona fesoasoani lenei mea e saunia lelei ai i latou ia maua se aafiaga patino a o latou suesue i tusitusiga paia.

A o e suesue i le asō, vaavaai mo upumoni e mafai ona fesoasoani ia te oe e malamalama atili ai pe aisea e faatagaina ai oe e le Alii e oo i nei tofotofoga.

O le nuu o Limae ma le nuu o Alema

Ina ia fesoasoani i tagata aoga ia manatua le matalalaga e faatatau i le nuu o Limae ma le nuu o Alema, mafaufau e faaali pe tusi le ata lea ma faasino atu le nofoaga o vaega taitasi o tagata a o e ta’ua i latou.

I le Mosaea 21–24, tatou te aoao ai e uiga i vaega e lua o tagata o e na feagai ma tofotofoga ma puapuaga tetele. O le vaega muamua sa nonofo i le laueleele o Nifae ma sa taitaia e le atalii o le Tupu o Noa o Limae. O le vaega lona lua sa nonofo i le laueleele o Helama ma sa taitaia e Alema.

Valaaulia ni nai volenitia e faasoa mai mea latou te iloa e uiga i tulaga na taitai atu ai i le faatagataotauaina o le nuu o Limae ma le nuu o Alema. Afai e manaomia, faaaoga aotelega nei.

O le nuu o Limae

Ina ua uma ona teena aoaoga ma lapataiga a Apinati, sa ave faatagataotauaina e sa Lamana i le laueleele o Nifae ia sa Nifae, o e ua taitaia nei e le Tupu o Limae, ma sa manaomia ona totogi lafoga mamafa (tagai Mosaea 19:15). E pei ona valoia e le perofeta o Apinati (tagai Mosaea 12:5), na faamalosia e sa Lamana le nuu o Limae e auauna atu ia i latou ma tauave avega mamafa (tagai Mosaea 21:3).

O le nuu o Alema

Ina ua mavae le maliu o Apinati, sa sosola Alema ma e na mulimuli ia te ia i Vai o Mamona, lea na papatisoina ai i latou (tagai Mosaea 17:1–4; 18:1–14). Sa latou sosola mulimuli ane mo lo latou saogalemu ma fausia se nuu amiotonu i le laueleele o Helama (tagai Mosaea 18:32–34; 23:1–4, 19–20). Na iu ina maua le nuu o Alema ma ave faatagataotaua e sa Lamana (tagai Mosaea 23:25–29, 36–37). O Amulona, o se tasi o faitaulaga amioleaga a Noa, sa tuu atu i ai le pule ia i latou ma amata ai ona sauaina Alema ma lona nuu (tagai Mosaea 24:8–9).

Aisea e faatagaina ai e le Alii ia tofotofoga

Mafaufau e vaevae le vasega i ni vaega toalaiti ma suesue e le afa o vaega le nuu o Limae ma le isi afa e suesue le nuu o Alema.

Faitau fuaitau o mau nei, ma vaavaai mo aoaoga e mafai ona fesoasoani ia te oe e malamalama ai pe aisea e faataga ai e le Alii i tatou e oo i tofotofoga ma puapuaga. Atonu e te manao e faailoga upu ma fasifuaitau e tulaga ese ia te oe.

• Nuu o Limae: Mosaea 21:5–16

• Nuu o Alema: Mosaea 23:21–24; 24:8–14

Afai e suesue e tagata aoga nei fuaiupu i ni vaega toalaiti, valaaulia ni volenitia mai vaega taitasi e aotele mai mea sa latou aoaoina mai fuaiupu sa latou suesueina. O fesili nei e mafai ona fesoasoani i tagata aoga e talanoaina ai mea na latou aoaoina mai nei fuaiupu.

• O a ni mea e talitutusa ai ma ni eseesega na e vaaia i le va o vaega e lua o tagata ma mea na latou oo i ai?

• O le a se faamaoniga na e vaaia i nei tala i le alofa ma le popole o le Alii mo tagata?

  I le tali atu i le fesili na muamua atu, atonu e faasino mai e tagata aoga ia fasifuaitau e pei o le “sa faafofoga mai le Alii ia latou tagi” (Mosaea 21:15), “[na] amata ona latou solosolo manuia i le laueleele” (Mosaea 21:16), “O le a Ou faamāmāina foi avega ua tuu i o outou tauʼau,” po o le “o Aʼu, o le Alii le Atua, e asiasi atu i oʼu tagata i o latou puapuaga” (Mosaea 24:14).

• O le a se mea na e aoaoina e uiga i le mafuaaga e faataga ai e le Alii ia tagata e mafatia i tofotofoga ma puapuaga?

Mafaufau e valaaulia tagata aoga e tusi i luga o le laupapa a latou tali i le fesili na muamua atu. O nisi nei o faataitaiga o upumoni atonu na maua e tagata aoga.

• E faatagaina i tatou e le Alii ia oo i tofotofoga e fesoasoani ia i tatou ia lotomaualalo ma faalagolago atili ia te Ia (tagai Mosaea 21:5–14).

• O nisi o tofotofoga ma puapuaga e oo mai o se taunuuga o le le usiusitai (tagai Mosaea 21:15).

• O o tatou tofotofoga e mafai ona tatou maua ai avanoa e saili atu ai ma lagonaina le mana o le Alii i o tatou olaga (tagai Mosaea 21:15–16; 24:14).

• E aoai e le Alii Lona nuu ma tofotofoina lo latou onosai ma le faatuatua (tagai Mosaea 23:21).

E toatele tagata e manatu o le aoaiina (tagai Mosaea 23:21) e tutusa lava le uiga ma le faasalaina. Na faamalamalama mai e Elder Lynn G. Robbins o le Fitugafulu, “O le upu aoaiina e sau mai le upu Latina castus, o lona uiga o le ‘ola mama po o le mama,’ ma o le uiga o le aoaiina o le ‘ia faamamaina’ [tagai Merriam-Webster’s Collegiate Dictionary, 11th ed. (2003), “chasten”]” (“O le Faamasino Tonu,” Liahona, Nov. 2016, 97). Mafaufau mo sina taimi pe faapefea ona faamamaina oe e le Alii e ala i ou tofotofoga ma puapuaga.

O fesili nei (po o isi e te mafaufau i ai) e mafai ona faaaoga e fesoasoani e fatu ai le taua mo tagata aoga. E mafai ona e mafaufau e tuu atu i tagata aoga se taimi e tusi ai a latou tali i a latou api talaaga a o lei talanoaina fesili o se vasega. Ia mautinoa e te faafetai i tagata aoga mo le faasoaina mai o o latou manatu.

• E mafai faapefea e le malamalama i nei upumoni ona aafia ai le ala e te tali atu ai i ou tofotofoga?

• O a ni aafiaga na fesoasoani ia te oe e iloa ai faamoemoega o le Alii mo le faatagaina o oe e oo i tofotofoga?

  Ina ia faaali atu se faataitaiga e faapupula ai le fesili talu ai, mafaufau e faaali le vitio “The Will of God“ (3:02), o loo maua i le ChurchofJesusChrist.org.

• O le a se mea ua e aoaoina i le asō e mafai ona fesoasoani e te malamalama atili ai i tofotofoga e te oo i ai?

Molimau atu i upumoni na outou talanoaina i le asō.

Manatu ma Talaaga o Faamatalaga

O le a se mea e mafai ona ou faia pe afai ou te lagona e le talafeagai o’u tofotofoga?

Matamata le vitio “The Will of God” (3:02). Mafaufau loloto pe faapefea ona e faaaogaina le aafiaga a Elder Brown i le mea atonu o loo tupu i lou olaga.

Matamata le vitio “Trial of Adversity” (2:40). Mafaufau pe na faapefea e le faatuatuaina o le fuafuaga a le Atua mo ia ona fesoasoani ia Katie e feagai ai ma ona tofotofoga.

Pe mafai ona ou tuputupu ae mai tofotofoga uma o feagai ma a’u?

Na maitauina e Elder Orson F.Whitney (1855–1931) o le Korama a Aposetolo e Toasefululua:

E leai se tiga tatou te feagai, leai se tofotofoga tatou te oo i ai e maumau. E aogā mo lo tatou aotauina, i le atinaega o na uiga auaumamā e pei o le onosai, faatuatua, lototoa ma le lotomaulalo. O mea uma tatou te mafatia ai, ma mea uma tatou te onosaia, ae maise lava pe a tatou onosaia ma le faapalepale, e atiina ae ai o tatou tagata, faamama ai o tatou loto, faalautele ai o tatou agaga, ma faia ai i tatou ia sili atu ona agamalu, ma agaalofa, ma sili atu ona agavaa e ta’ua o fanau a le Atua … ma e ala mai i faanoanoaga ma mafatiaga, tiga ma puapuaga, tatou te maua ai le aotauina lea ua tatou o mai ai iinei ina ia maua, ma o le a avea atili ai i tatou e pei o lo tatou Tama ma Tina oi le lagi. (Orson F. Whitney, e pei ona ta’ua i le Spencer W. Kimball, Faith Precedes the Miracle [1972], 98)

O le a se mea e mafai ona ou faia e liliu ai a’u avega i ni faamanuiaga?

Matamata le vitio “Tauaveina a Tatou Avega ma le Faamoemoe” (8:46). Mafaufau pe mafai faapefea e avega tatou te tauaveina i le olaga ona avea ma o tatou lelei faaleagaga ma faaletino.

Sa faasoa mai e Peresitene Henry B. Eyring o le Au Peresitene Sili se fautuaga e mafai ona fesoasoani ia i tatou a o tatou feagai ma tofotofoga:

Atonu tou te mafaufau pe aisea e faataga ai e se Atua alofa ma mamana le tofotofoina faaletino o i tatou ia matua faigata. Ona Na te silafia e tatau ona tatou tuputupu ae i le mama ma le malosi faaleagaga ia mafai ai ona nonofo i Lona afioaga i ni aiga e faavavau. Ina ia mafai ona tupu lena mea, ua tuuina mai ia i tatou e le Tama Faalelagi se Faaola ma le mana e filifili ai mo i tatou lava e ala i le faatuatua e tausia Ana poloaiga ma ia salamo ma ia o atu ia te Ia.

Pe a e mafaufau po o le a le tele o le tiga e mafai ona e onosaia lelei, ia manatua o Ia. Sa Ia puapuagatia i mea o loo e puapuagatia ai ina ia Ona silafia le ala e siitia ai oe i luga. Atonu Na te le aveesea le avega, ae Na te tuuina atu ia te oe le malosi, faamafanafanaga, ma le faamoemoe. Na te silafia le ala. Sa Ia inuina le ipu oona. Sa Ia onosaia puapuaga mo tagata uma. (Henry B. Eyring, “Faaosoosoina, Tofotofoina, ma Faaiilaina,” Liahona, Nov. 2020, 97)

Gaoioiga Faaopoopo e Aoao Ai

O se isi filifiliga mo le amataga o le lesona

Nai lo le faaaogaina o le gaoioiga fautuaina faatasi ma le atofaafafa ma mea faitino, fai i tagata aoga e lisi nisi o tofotofoga po o avega e ono oo i ai talavou. Talanoaina pe mafai faapefea e nei tofotofoga ona tosina ai le sootaga a se tagata ma le Tama Faalelagi ma auala e mafai ai ona latou latalata atu ia te Ia i taimi faigata.

Aotelega o vitio

Ina ia fesoasoani i tagata aoga ia manatua tala o le nuu o Limae ma Alema, e mafai ona e faitau i tala pe faaaoga aotelega nei o vitio mai Tala o le Tusi a Mamona:

• “Ua Sosola le Tupu o Limae ma Lona Nuu,” mai le faailotaimi 0:00 i le 0:34

• “Ua Sosola Alema ma Lona Nuu,” mai le faailotaimi 0:00 i le 1:13

Aoao atili e uiga i tofotofoga mai tusitusiga paia

Atonu e i ai ni fesili faaopoopo a tagata aoga e uiga i le mafuaaga e faataga ai e le Alii Lana fanau e feagai ma tofotofoga. Mafaufau e faitau ma talanoaina le 2 Korinito 12:7–10 ma le Mataupu Faavae ma Feagaiga 101:1–9; 121:1–8; ma le 122:1–9. Valaaulia tagata aoga e vaavaai mo se malamalamaaga faaopoopo i faamoemoega o le Alii ma faamaoniga o Lona alofa tumau.