“Alema 1:1–18: O le Amioleaga o Faitaulaga Pepelo,” Tusi Lesona a le Faiaoga o le Tusi a Mamona (2024)

“Alema 1:1–18,” Tusi Lesona a le Faiaoga o le Tusi a Mamona

Alema 1:1–18

O le Amioleaga o Faitaulaga Pepelo

Ua tatou ola i se lalolagi e siitia ai e tagata i latou lava ma o latou manatu mo viiga faaletagata lava ia ma le manuia. O le talitonu ai i nei faiga sese e afua ai ona agasala le toatele o tagata ma teena lo latou Faaola, o Iesu Keriso. Sa faapea ona moni foi lenei mea mo sa Nifae. Sa aoao atu e se tagata e igoa ia Ne’oa aoaoga faavae sese na mafua ai ona teena e tagata i ona aso, ma isi i tausaga a sau, lo latou Faaola. O lenei lesona e mafai ona fesoasoani ia te oe e iloa ai ma teena aoaoga sese lea e mafai ona e liliu ese ai mai ia Iesu Keriso.

Taulai atu ia Iesu Keriso. Faasino atu tagata aoga i le Faaola ma Lana talalelei, ae aua le taulai atu ia te oe lava. Na maitauina e Elder Paul V. Johnson o le Korama a Fitugafulu: “Afai e saoloto o tatou faiaoga mai le faitaulaga pepelo, o le a alolofa tagata aoga ia i latou, ae o le a latou le faalagolago ia i latou. O le a latou alolofa ia te oe, ma o le a latou faafetai mo mea na e aoaoina ai i latou, ae o le a latou liliu atu i le Alii” (Paul V. Johnson, “The Dangers of Priestcraft,” Religious Educator 9, no. 3 [2008]: 11).

Sauniuniga a le tagata aoga: E mafai e tagata aoga ona suesue le otootoga “O le afioga a le Atua e mafai ona fesoasoani ia te au ia iloa ma teena aoaoga faavae sese” i le otootoga” 3–9 Iuni. Mosaea 29–Alema 4: ‘Sa Latou Tumau Ma lē Masiʼiʼese ’” i le Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2024.

Gaoioiga e Ono Mafai Ona Aoao Ai

Aoaoga sese

Tuu atu i tagata aoga e faamaea lē faalauaiteleina le gaoioiga lenei o le iloiloga faaletagata lava ia. Faaali atu faamatalaga pe faitau leotele ma fai atu i tagata aoga e mafaufau i a latou tali.

I se fua i le va o le 1 ma le 5 (o le 1 e malosi le lē ioeina ma le 5 e malosi le ioeina), o le a le tele o lou ioeina po o le lē ioeina o faamatalaga nei? Aisea?

O le tele o faamatalaga na tuuina mai ia te au i aso taitasi e moni. (Mo se faataitaiga, i luga o ala faasalalau faaagafesootai, i faalauiloa, mai taitai ma faatosinaga i sosaiete.)

O faamatalaga ou te maua e aafia ai lo’u faatuatua ia Iesu Keriso.

Ua saunia e le Atua le fesoasoani mo a’u ia iloa ai le mea moni mai le mea sese.

Ua tatou ola i se lalolagi e tele savali sese e mafai ona faavaivaia ai lo tatou faatuatua ia Iesu Keriso. A o e suesue i le Alema 1, saili le taitaiga a le Agaga e fesoasoani ia te oe ia iloa aoaoga sese i le lalolagi o siomia ai oe e mafai ona liliu ese ai oe mai ia Iesu Keriso.

A o lei maliu o ia, sa faatuina e le Tupu o Mosaea se ituaiga fou o faigamalo. Nai lo le i ai o ni tupu, sa filifilia e tagata ia faamasino e faamalosia tulafono. Na filifilia Alema le Itiiti e avea ma uluai faamasino sili, po o le kovana (tagai Alema 2:16). O ia foi o le faitaulaga sili ma le taitai o le Ekalesia (tagai Mosaea 29). Sa amata ona mataituina e tagata le [gasologa o] taimi mai le taimi na suia ai lo latou malo.

I le tausaga muamua o le nofoaiga a faamasino, na amata ai e se tagata amioleaga e igoa ia Neoa ona faatosina tagata sa Nifae. Na aoao mai Elder D. Todd Christofferson o le Korama a Aposetolo e Toasefululua e uiga i le mafuaaga ua faaaofia ai le tala ia Neoa i le Tusi a Mamona.

O loo i ai i le Tusi a Mamona le tala i se alii e igoa ia Neoa. E faigofie lava ona malamalama i le mafuaaga na mafaufau ai Mamona, i le otootoina o se faamaumauga e afe tausaga a sa Nifae, e taua le faaaofia ai o se mea e uiga i lenei alii ma le faatosinaga tumau o ana aoaoga faavae. Sa saili Mamona e lapatai i tatou, ma le iloaina o lenei filosofia o le a toe aoaoina foi i o tatou aso. (D. Todd Christofferson, “O Le Meaalofa Paia o le Salamo,” Liahona, Nov. 2011, 38)

Faitau le Alema 1:2–6, ma vaavaai mo mea na aoao atu e Neoa i tagata. Fai se lisi o aoaoga a Neoa. Faailoga i latou “Sa’o,” “Sese,” po o le “Fefiloi.”

Ina ia fesoasoani e faaauai tagata aoga, e mafai ona e tuu atu ia i latou e lisi ma faaigoa ia aoaoga a Neoa i luga o le laupapa. Valaaulia nisi o tagata aoga e faasoa mai o latou manatu.

Atonu na e maitauina na faafefiloi e Neoa ana aoaoga sese ma faamatalaga moni. Ua faapupula mai i lenei mea se auala e faaaoga foi e Satani. A o tatou faatusatusaina Neoa ia Satani, ua tatou aoao ai e faaaoga e Satani pepelo ua fefiloi ma le upumoni e faasese ai tagata ma liliu ese mai ai i latou mai ia Iesu Keriso.

O a ni faamaoniga ua e vaaia o lenei mataupu i aso nei?

Na faapupula mai e Elder Dale G. Renlund o le Korama a Aposetolo e Toasefululua le aafiaga o manatu sese o Neoa i nisi o tagata i aso nei:

15:45

[O se aoaoga sese e taofia ai i tatou mai le salamo] o le mafaufau lea o a tatou agasala e le afaina ona e alofa le Atua ia i tatou e tusa lava po o a a tatou mea e fai. E taufaaosooso le talitonu i mea na aoao e le taufaasese lea o Neoa i le nuu o Saraemila: “O le a faaolaina tagata uma i le aso mulimuli; ma e le tatau ona latou fefefe pe tetete, … ma, i le iuga, o le a maua e tagata uma le ola e faavavau.” [Alema 1:4] Ae o lenei manatu taufaa’ole’ole e sese. E alofa le Atua ia i tatou. Peitai, o mea tatou te faia e taua lea ia te Ia, ma ia i tatou foi. Ua Ia tuuina mai ni faatonuga manino e uiga i le auala e tatau ona tatou amio ai. Ua tatou ta’ua nei mea o poloaiga. O Lana faamaoniga ma lo tatou ola e faavavau e faalagolago lea i a tatou amioga, e aofia ai lo tatou naunautaiga e saili ma le faamaulalo i le salamo moni. (Dale G. Renlund, “Salamo: O se Filifiliga Fiafia,” Liahona, Nov. 2016, 123)

Iloaina o aoaoga sesē

O le iloaina o aoaoga sesē, e pei o aoaoga a Neoa, e mafai i nisi taimi ona faigata. O le mea e lelei ai, e mafai ona e iloaina i latou. Na aoao mai Mamona afai e faatauanauina i tatou e se savali po o se aoaoga “ia [latou] faia le leaga, ma ia le talitonu ia Keriso, ma faafitia o ia, ma ia le auauna i le Atua,” e mafai ona tatou iloa e sese ma e sau mai le tiapolo (Moronae 7:17).

O le fea o aoaoga a Neoa e mafai ona lagona ai e se tasi latou te le manaomiaina le Faaola?

O le fesili lenei e mafai ona fesoasoani ai i tagata aoga ia iloa aoaoga sese. Valaaulia tagata aoga e faasoa mai o latou manatu.
O a isi aoaoga sese i aso nei e liliuese ai tagata mai ia Iesu Keriso?

O fesili nei ua fuafuaina mo manatunatuga-faaletagata lava ia ae e le mo talanoaga a le vasega.

Mafaufau i savali e te faalogo pe faitau soo i ai. E faapefea ona latou faatosinaina oe? Pe o i ai se tasi o i latou e le lelei le faatosinaina o lou faatuatua ia Iesu Keriso?

Afai o loo e faaaogaina savali sese i ala o faasalalauga e aafia leaga ai lou faatuatua ia Iesu Keriso, tape pe aveese le punavai o na savali mai lou olaga. Suitulaga i latou i ni savali o le a fausia ai lou faatuatua ia Iesu Keriso. Mo se faataitaiga, Mo le Malosi o le Autalavou ma le Liahona o loo maua i le ChurchofJesusChrist.org, ia i ai le anotusi e fausia ai le faatuatua.

Atonu e fesoasoani le ta’u atu faapea o aoaoga a Neoa sa i ai se faatosinaga maoae mo le leaga. I le aluga atoa o le Tusi a Alema, sa teena ai e vaega eseese o tagata le Faaola ona o aoaoga a Neoa. Afai e te lagona e mafai ona manuia tagata aoga mai le aoao atili e uiga i lenei mea, tagai i le “O le aafiaga o aoaoga a Neoa” i le vaega o Gaoioiga Faaopoopo e Aoao ai.

Faitaulaga Pepelo

Mafaufau e talanoaina le faamaoni o Kitiona i le puipuia o Keriso. E mafai ona e faamamafaina le Alema 1:7. E mafai foi ona e faasino i le Alema 1:8 ma faamanatu i tagata aoga ia faatinoga faamaoni a Kitiona i le Mosaea 22:3–9.

I se tasi aso na fetaiai ai Neoa ma se taitai matua o le Ekalesia e igoa ia Kitiona. A o taumafai Ne’oa e taitai ese tagata o le ekalesia, “sa tetee malosi atu [Kitiona] ia [Neoa], ma aoai o ia i le afioga a le Atua” (Alema 1:7). Na ita Neoa ia Kitiona ma fasioti ia te ia. Ona aveina lea o Neoa i luma o Alema ma fasiotia ai e tusa ai ma le tulafono (tagai Alema 1:9–15).

Faitau le Alema 1:12, ma vaavaai pe na faapefea ona faamatalaina e Alema ia aoaoga a Neoa.

Atonu e te manao e fesoasoani i tagata aoga e faataitai le faaaogaina o vaefaamatalaga. E mafai e tagata aoga ona faasoa mai ni auala eseese e aoao ai po o le a le faitaulaga pepelo. Afai e leai se tasi na te ta’uina mai, faasino tagata aoga i le vaefaamatalaga 12a.

Faitau le Alema 1:16 ma le 2 Nifae 26:29, ma vaavaai mo se faamatalaga o le faitaulaga pepelo.

E faapefea ona e vaai i le talaiga a Neoa o se faataitaiga o faitaulaga pepelo?
Aisea e te manatu ai ua lauiloa nisi o manatu sese?
Aisea e te manatu ai e matautia tele le faitaulaga pepelo?

Teteeina o aoaoga sese

E faapei o Kitiona, e mafai ona tatou faaaogaina afioga a le Atua e fesoasoani ai ia i tatou e teena aoaoga sese (tagai Alema 1:7, 9). Filifili se tasi pe sili atu o aoaoga sese a Neoa po o nisi ua e faalogo i ai i o tatou aso. Ona sue lea o se mau e faasa’o ai le mea sese. Mo se faataitaiga, e mafai ona e faafetaiaia aoaoga a Neoa i le Alema 1:3 ma le aoaoga a le Faaola i le Mataio 23:11.

O nisi o faataitaiga o mau e mafai ona faaaoga e tagata aoga e aofia ai le Mataio 7:15–23; 2 Nifae 26:29–31; Mosaea 18:24–26; Helamana 12:25–26; ma le Mataupu Faavae ma Feagaiga 1:31–32.

Faasoa atu (se/ni) aoaoga sese na e filifilia ma (se/ni) mau e te lagona e faasa’oina ai.
Faasoa atu mea ua e aoaoina mai le Alema 1 e uiga i le auala e iloa ai ma teena aoaoga sese.

Manatu ma Talaaga o Faamatalaga

O le a se mea e mafai ona fesoasoani ia te au e iloa ai aoaoga sese?

Sa aoao mai Peresitene Henry B. Eyring o le Au Peresitene Sili:

17:16

O le mafutaga a le Agaga Paia e faia mea lelei ia sili ona faatosina ae faaitiitia le faatauanau o faaosoosoga. E tatau ona lava lea mafuaaga ia tatou naunau ai e agavaa mo le Agaga ina ia faatasi pea ma i tatou.

E pei lava ona faamalosia i tatou e le Agaga e tetee atu i le leaga, Na te aumaia foi ia i tatou le mana e iloatino ai le mea moni mai le mea sese. O le upumoni e sili ona taua ua na o faaaliga mai le Atua e faamaonia ai. O a tatou mafuaaga faaletagata ma le faaaogaina o o tatou lagona faaletino o le a le lava lea. Ua tatou ola i se taimi e oo lava foi i tagata sili ona atamamai e matua faigata lava ona iloa le eseesega i le va o le mea moni mai togafiti poto. (Henry B. Eyring, “O Le Agaga Paia e Fai ma Au Soa,” Liahona, Nov. 2015, 104)

Na aoao mai Elder Ulisses Soares o le Korama a Aposetolo e Toasefululua:

E le mafai ona tatou faatagaina i tatou lava ia lē mautonu i savali lauiloa ia ua faigofie ona taliaina e le lalolagi ma ua feteenai ma le aoaoga faavae ma mataupu faavae moni o le talalelei a Iesu Keriso. O le tele lava o nei savali faalelalolagi e leai se mea e sili atu ona faatatau i ai nai lo se taumafaiga o lo tatou lalolagi e tauamiotonuina le agasala. E ao ona tatou manatua, i le iuga lava, o le a tutu tagata uma i luma o Keriso ina ia faamasinoina i a tatou galuega, pe ua lelei, pe ua leaga (3 Nifae 27:14). A o tatou fetaiai ma nei savali faalelalolagi, o le a manaomia le lototele maoae ma se malamalama mausali o le fuafuaga a lo tatou Tama Faalelagi e filifili ai le mea tonu. (Ulisses Soares, “Ioe, Tatou Te Mafaia ma O Le A Tatou Manumalo!,” Liahona, Me 2015, 75)

O le a le tulaga o le Ekalesia i le faasalaga oti?

E manatu Le Ekalesia a Iesu Keriso o le Au Paia o Aso e Gata Ai i le fesili pe o a foi tulaga e tatau ona tuuina atu ai e le setete le faasalaga oti e avea o se mataupu e filifilia patino lava e ala i faiga faatonuina o tulafono faalemalo. Tatou te le uunaia pe tetee i le faasalaga oti. (Tagai i le https://newsroom.churchofjesuschrist.org/article/capital-punishment-in-utah.)

Gaoioiga Faaopoopo e Aoao Ai

O faamatalaga sese e fefiloi ma le upumoni

O se mea taatele mo faiaoga pepelo le faafefiloi o a latou aoaoga sese ma faamatalaga moni. Mo se faataitaiga, sa sese ona aoao mai e Neoa e faapea “o le a maua e tagata uma le ola e faavavau” faatasi ai ma le upumoni e faapea “na foafoa e le Alii tagata uma” (Alema 1:4). E mafai e tagata aoga ona faailoa mai isi aoaoga sese masani ua fefiloi ma le upumoni. Mafaufau e faasoa atu le faamatalaga lenei mai ia Peresitene Dallin H. Oaks o le Au Peresitene Sili: “O Satani o le taufaasese sili, o le tamā o pepelo (tagai Ioane 8:44). E le faapea ona e na o pepelo e ta’u mai e Satani. O ana pepelo e sili ona aoga o ni nai upumoni po o ni pepelo e o faatasi ma le upumoni” (Dallin H. Oaks, “Reading Church History” [lauga i faiaoga faalelotu o le Ofisa o Aoga a le Ekalesia, Aok. 16, 1985], 3).

Faatusatusa aoaoga a Neoa ma faatinoga a tagata o le Ekalesia

E mafai e tagata aoga ona faatusatusa ia aoaoga ma faatinoga a Neoa (tagai Alema 1:2–6) ma faatinoga faaKeriso a tagata faamaoni o le Ekalesia (tagai Alema 1:19–20, 25–30). Valaaulia tagata aoga e faasoa mai ni faataitaiga o tagata faamaoni o le Ekalesia i o tatou aso. E mafai foi ona e faamamafaina le tomai o le suesueina o tusitusiga paia o le faatusatusa ma le eseesega.

O le aafiaga o aoaoga a Neoa

E mafai ona fesoasoani lenei manatu i tagata aoga e iloa ai pe na faapefea e aoaoga a Neoa ona aafia ai le tele o tala i le Tusi a Mamona. E mafai e tagata aoga ona faitau se tasi pe sili atu foi o tala nei, vaavaai i aafiaga le lelei o aoaoga a Neoa: Alema 2:1–4; 14:8–18; 15:15; 21:2–12; 24:20–30. E mafai e tagata aoga ona faia lenei mea i ni vaega toalaiti, faatasi ai ma vaega taitasi e lipoti mai i fuaitau filifilia.

Mosaea 29

Ina ia fesoasoani i tagata aoga ia maua se aafiaga i le Mosaea 29, e mafai ona e aoteleina fuaiupu 1–25. Ona mafai lea ona e fai i tagata aoga e faitau le Mosaea 29:26–27, 30–34, 37–39, ma vaavaai mo tiutetauave o tagata i le malo na fautuaina mai e le Tupu o Mosaea. E mafai e tagata aoga ona talanoaina le aogā o le faia o faaiuga e ala i le leo o tagata ma taunuuga o le a oo mai pe afai e filifili e tagata le amioletonu. E mafai ona outou talanoaina se tasi po o upumoni uma e lua nei: Afai e filifili e le leo o tagata le amioletonu ona oo mai lea o faamasinoga a le Atua i o latou luga (fuaiupu 27). Ua i ai i tagata taitoatasi se tiute e lagolagoina mataupu faavae amiotonu, tulafono, ma taitai.