Toeiloiloga O le Atamai i Aoaoga Faavae Iloiloga 10

Faaaoga Fuaitau o le Atamai i Aoaoga Faavae

O se tasi faamoemoega o le atamai i aoaoga faavae o le fesoasoani lea ia te oe e aoao auala e faaaoga ai aoaoga faavae o loo aoaoina i fuaitau o mau o le atamai i aoaoga faavae i tulaga masani o le olaga. O lenei lesona o le a tuuina atu ai ia te oe o avanoa e faataitai ai le faaaogaina o ni fuaitau o le atamai i aoaoga faavae na e suesueina i lenei tausaga i lou olaga.

Fesoasoani i tagata aoao e faafesootai mataupu faavae o le talalelei i le olaga o aso taitasi. Nai lo le ta’u atu i tagata aoga o auala e faaaoga ai upumoni o le talalelei, fesoasoani i tagata aoga e aoao mo i latou lava le auala e faaaoga ai le talalelei i o latou tulaga patino. Valaaulia tagata aoao e ole atu i le Atua ma faalogo mo uunaiga mai le Agaga ia iloa ai le auala latou te faaaoga ai le talalelei i o latou lava olaga.

Sauniuniga a le tagata aoga: Valaaulia tagata aoga e filifili se tasi o fuaitau muamua e 12 o le atamai i aoaoga faavae latou te manatu e anoa. Uunaia tagata aoga e o mai saunia e faasoa mai pe aisea e anoa ai ia i latou a latou fuaitau filifilia.

Gaoioiga e Ono Mafai Ona Aoao Ai

Atonu e manaomia ona aoao atu se lesona o fuaitau o le atamai i aoaoga faavae e suitulaga i lenei lesona toe faamanatu. Tagai i le faasologa faatulagaina ua saunia e le faatonu po o le taitai faamaopoopo o le eria po o le itulagi ina ia mautinoa o lesona taitasi o fuaitau o le atamai i aoaoga faavae o le a aoaoina a o faia vasega seminare.

Toeiloilo fuaitau o le atamai i aoaoga faavae

Faaali pe avatu i tagata aoga se kopi o le siata lenei.

E ala i le faaaogaina o le siata lenei, toe iloilo mau faasino muamua e 12 o le atamai i aoaoga faavae ma fasifuaitau autu mai le Tusi a Mamona. Ona filifili lea o se tasi e te iloa e anoa ma faitau le fuaitau atoa.

Fuaitau ma Fasifuaitai Autu Muamua e 12 o le Atamai i Aoaoga Faavae

Tusi Lesona a le Faiaoga o le Tusi a Mamona (2024)

Mau Faasino	Fasifuaitau Autu o le Mau
Mau Faasino 1 Nifae 3:7	Fasifuaitau Autu o le Mau “O le a ou alu ma fai mea ua poloaiina e le Alii.”
Mau Faasino 2 Nifae 2:25	Fasifuaitau Autu o le Mau “Na pa’ū Atamu ina ia i ai tagata; ma ua i ai tagata, ina ia latou maua le olioli.”
Mau Faasino 2 Nifae 2:27	Fasifuaitau Autu o le Mau “Ua latou saoloto e filifili le saolotoga ma le ola e faavavau … pe … [o] le faatagataotauaina ma le oti.”
Mau Faasino 2 Nifae 26:33	Fasifuaitau Autu o le Mau “Ua tutusa tagata uma i le Atua.”
Mau Faasino 2 Nifae 28:30	Fasifuaitau Autu o le Mau O le Atua e “tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu.”
Mau Faasino 2 Nifae 32:3	Fasifuaitau Autu o le Mau “Ia taumamafa fiafia i afioga a Keriso; aua faauta, o afioga a Keriso o le a taʼu mai ai ia te outou mea uma e tatau ona outou faia.”
Mau Faasino 2 Nifae 32:8–9	Fasifuaitau Autu o le Mau “E ao ina outou tatalo e le aunoa.”
Mau Faasino Mosaea 2:17	Fasifuaitau Autu o le Mau “Pe a outou auauna atu i o outou uso a tagata, ua na’o lo outou auauna atu lava lea i lo outou Atua.”
Mau Faasino Mosaea 2:41	Fasifuaitau Autu o le Mau “O i latou o e e tausi i poloaiga a le Atua … e faamanuiaina i latou i mea uma.”
Mau Faasino Mosaea 3:19	Fasifuaitau Autu o le Mau “[Tuu] ese le tagata natura ma [avea] ma tagata paia e ala i le togiola a Keriso le Alii.”
Mau Faasino Mosaea 4:9	Fasifuaitau Autu o le Mau “Ia talitonu i le Atua; … ia talitonu ua ia te ia le poto uma.”
Mau Faasino Mosaea 18:8–10	Fasifuaitau Autu o le Mau Ia “papatisoina i le suafa o le Alii, o se molimau … ua outou ulu atu i se feagaiga faatasi ma ia.”

© 2023 by Intellectual Reserve, Inc. Ua taofia aiā tatau uma.

Mafaufau e valaaulia tagata aoga e fealuai solo i le potu ma faasoa atu le fuaitau na latou filifilia ma isi tagata e toalua pe toatolu o le vasega. E mafai foi ona e faasoa atu i tagata aoga se fuaitau o le atamai i aoaoga faavae e taua patino ia te oe.

Faafesootaiina o upumoni o le talalelei i lou olaga ma tulaga

A o e suesue i tusitusiga paia, o se tasi o auala e faapatino ai ma faaaoga mea o loo e aoaoina o le taumafai lea e fai ni fesootaiga i lou lava olaga ma tulaga. Mo se faataitaiga, atonu o loo e tauivi ma se fesili po o se luitau faapitoa. O le sailia o tali a o e faitau i tusitusiga paia o se auala aoga lea e faateleina ai le taua o au suesuega.

Gaoioiga A

Mafaufau e valaaulia tagata aoga e lisi i luga o le laupapa ni luitau eseese o loo i le lalolagi. Vaevae tagata aoga i paga, ma atofa i paga taitasi se tasi o ia luitau. E mafai e tagata aoga ona fatu se tulaga faataitai ona faatino lea e le tasi ma le isi. E mafai e se tasi tagata aoga ona faamatala le luitau, ae o le isi e mafai ona filifili se fuaitau o le atamai i aoaoga faavae mai le siata ma taumafai e foia le luitau e faaaoga ai upumoni mai lena fuaitau. Ona mafai lea e tagata aoga ona fesuiai matafaioi, pe e mafai foi ona e valaaulia i latou e faatino a latou tulaga faataitai i luma o le vasega.

O le isi filifiliga o le atofa lea o se fuaitau o le atamai i aoaoga faavae i tagata aoga ona fatu lea o ni tulaga faataitai e faavae i luitau e mafai ona talanoaina e le fuaitau.

• O i ai ni fuaitau o le atamai i aoaoga faavae e te manatu e taliina ai le faafitauli? O le a faapefea ona ese le lalolagi pe afai e faaaoga e le toatele o tagata upumoni mai lau fuaitau filifilia? Faasoa atu se faataitaiga faapitoa se tasi pe lua.

• I le faaaogaina ai o le aoaoga faavae mai lau fuaitau filifilia, o le a sau tala e fai atu i se tasi o loo feagai ma lenei luitau?

Gaoioiga E

Mafaufau e valaaulia tagata aoga e faauma lemu lenei gaoioiga e i latou lava. Afai e le patino tele, e mafai ona e valaaulia tagata aoga e faasoa mai o latou manatu ma lagona e uiga i a latou fuaitau o le atamai i aoaoga faavae na filifilia ma pe faapefea ona fesoasoani ia i latou ia avea atili e faapei o Iesu Keriso.

Mafaufau i ou tulaga o i ai nei, e aofia ai soo se fesili patino, luitau, po o amioga atonu o loo e sailia se fesoasoani. Iloilo le lisi o fuaitau o le atamai i aoaoga faavae, ma vaavaai mo upumoni e mafai ona fesoasoani ia te oe i nei fesili, luitau, po o amioga. Filifili ia le itiiti ifo ma le tasi se fuaitau e ono fesoasoani ia te oe i se mea o loo e feagai ai i le taimi nei.

• E mafai faapefea e le faaaogaina o le aoaoga faavae mai lau fuaitau filifilia ona avea o se faamanuiaga i lou olaga ma tulaga?

• E mafai faapefea e le faaaogaina o upumoni mai lena fuaitau ona fesoasoani e te lagona ai le latalata atili ia Iesu Keriso ma avea atili ai e faapei o Ia?

• O a ni laasaga laiti se tasi pe lua e mafai ona e faia e amata faaaoga ai nei upumoni i lou olaga?