Alema 5–7

Vaaiga Aoao

Sa fesili Alema i tagata o le Ekalesia i Saraemila i se faasologa o fesili na uunaia ai i latou e manatunatu i le taulaiga o o latou loto ma o latou tulaga i luma o le Atua. Sa ia valaaulia i latou e o mai ia Keriso e faaaoga ai faatusa agamalu e pei o le “Ua faaloaloa mai [Ona] aao alofa mutimutivale” (Alema 5:33), “salamo, ona Ou talia lea o outou” (Alema 5:33), ma “ua valaauina outou e le leoleo mamoe lelei” (Alema 5:38). Na ia aoao atu faapea na puapuagatia ma le loto i ai le Faaola i mea uma mo i tatou “ina ia mafai ona ia silafia e tusa ai ma la le tino le ala e fesoasoani ai i ona tagata e tusa ma o latou vaivaiga” (Alema 7:12). Sa ia aoao atu foi le ala e faaauau ai i “le ala e tau atu i le malo o le Atua” (Alema 7:19).

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

Alema 5:1–32

Faamoemoega o le lesona: O lenei lesona ua faamoemoe e fesoasoani i tagata aoga e iloilo ai lo latou alualu i luma faaleagaga ma faamalosia ai lo latou liua ia Iesu Keriso.

Sauniuniga a le tagata aoga: Valaaulia tagata aoga e faasolo le vaai i le Alema 5 ma faailoga fesili uma o loo i le mataupu. E mafai foi e tagata aoga ona fesili ifo ia i latou lava nisi o fesili na fai atu e Alema i lona nuu i lenei mataupu.
Vitio: “Toefoi Atu ma Mauaina” (16:10; matamata mai le faailo taimi 8:14 i le 8:58)
Fautuaga faafaiaoga faavitio: O se faamoemoega autu o lenei lesona o le faataga lea o tagata aoga e faitau ma manatunatu i se aofaiga o ni fesili e uiga i le Alema 5. O se tasi o auala e faia ai lenei mea o le tuu atu lea i tagata aoga o se taimi i le vasega e tape ai a latou masini faaleotele leo ma meapueata, suesue, manatunatu, ma tusi a latou tali i fesili i a latou api talaaga mo suesuega. E mafai ona fesoasoani le faailoa atu ia i latou pe afai toe lua minute o totoe ma pe a toe 30 sekone o totoe.

Alema 5:33–62

Faamoemoega o le lesona: O lenei lesona e mafai ona fesoasoani i tagata aoga ia latou taumafaiga e o mai ia Iesu Keriso ma maua faamanuiaga ua Ia ofoina atu ia i latou.

Sauniuniga a le tagata aoga: Fai i tagata aoga e suesue le Alema 5:33–34 ma o mai saunia i le vasega e faasoa mai mea na latou aoaoina e uiga i le Faaola mai nei fuaiupu.
Ata: O ni nai ata atonu e aoga mo tagata aoga e tilotilo i ai; o ni nai ata o Iesu Keriso ma Ona aao o loo faaloaloa mai
Vitio: “O Loto ua Fili Faatasi” (15:10; matamata mai le faailo taimi 13:56 i le 14:51)

Alema 7:1–13

Faamoemoega o le lesona: O lenei lesona e mafai ona fesoasoani i tagata aoga e faalagolago ai ma lagonaina le alofa sili atu mo lo latou Faaola.

Sauniuniga a le tagata aoga: Mafaufau e valaaulia tagata aoga e suesue le Alema 7:11–13 ma vaavaai i fuaiupu nei mo mea na puapuagatia ai Iesu Keriso e ala i Lana Togiola ma pe aisea na puapuagatia ai o Ia i nei mea.
Anotusi e faaali atu: O le siata e uiga i puapuaga o le Faaola, a le o le faaalia po o le kopiina i luga o le laupapa ina ia mafai e tagata aoga ona kopi i a latou api talaaga
Vitio: “Faamalosia e ala i le Togiola a Iesu Keriso” (15:54; matamata mai le faailo taimi 3:13 i le 4:01)
Fautuaga faafaiaoga faavitio: Mafaufau e faaaoga se laupapa paepae faaeletonika po o se pepa o faamatalaga fefaasoaai e mafai ai e tagata aoga ona faatumu faatasi le siata.

Atamai i Aoaoga Faavae: Alema 7:11–13

Faamoemoega o le lesona: O lenei lesona o le a fesoasoani i tagata aoga e tauloto lenei mau faasino o le atamai i aoaoga faavae ma fasifuaitau autu o le mau mo le Alema 7:11–13, faamatala le aoaoga faavae o loo aoaoina i lenei fuaitau, ma faaaoga mataupu faavae o le mauaina o le malamalama faaleagaga i tulaga masani o le olaga.

Sauniuniga a le tagata aoga: Mafaufau e valaaulia tagata aoga e mafaufau loloto ma le agaga tatalo i mea e mafai ona latou faia e maua ai le fesoasoani ma le malosi ua saunia e Iesu Keriso e ala i Lana Togiola.
Fautuaga faafaiaoga faavitio: Ina ia fesoasoani i tagata aoga e tauloto le mau faasino ma le fasifuaitau autu o le mau, mafaufau e valaaulia i latou e ta i totonu o le talanoaga le tele o mau faasino ma fasifuaitau e mafai ona latou manatua. Ona toe iloilo lea o le mau ma le fasifuaitau mo ni nai taimi, ma valaaulia tagata aoga e toe ta le mau faasino ma le fasifuaitau i totonu o le talanoaga e iloa ai pe o le a le tele o mea latou te manatua. Faaauau lenei mea seia oo ina mafai e le toatele o tagata aoga ona tauloto le mau ma le fasifuaitau sa’o mai le mafaufau.

Alema 7:14–27

Faamoemoega o le lesona: O lenei lesona ua faamoemoe e fesoasoani i tagata aoga i a latou taumafaiga ia maua uiga faaKeriso a o latou mulimuli ai i le ala e toe foi atu ai i le Atua.

Sauniuniga a le tagata aoga: Valaaulia tagata aoga e mafaufau i uiga faaKeriso latou te mananao e atiina ae atoatoa ma ia o mai saunia e faasoa mai pe aisea.
Anotusi e faaali atu: Faatonuga mo le gaoioiga o uiga faaKeriso i le faaiuga o le lesona
Ata: O se ala; o se faatusa o le ala e tau atu i le malo o le Atua; ata eseese o Iesu Keriso
Vitio: “Toefuataiga i Aso Taitasi” (13:43; matamata mai le faailo taimi 1:40 i le 3:25)
Fautuaga faafaiaoga faavitio: Mafaufau e faaaoga le vaega o le laupapa paepae o loo i lau polokalama faavitio. Tuu le ata o le ala i ona luga, ma valaaulia tagata aoga e tusi faatinoga, uiga, ma amioga i tafatafa o le ata i le taimi o le lesona, e pei ona faatonuina ai.