Alema 5:33–62

“O Loo Valaau Mai le Leoleo Mamoe Lelei ia te Outou”

Ina ua uma ona uunaia tagata o le Ekalesia i Saraemila ia manatunatu loloto i o latou tulaga faatasi ma le Tama Faalelagi ma Iesu Keriso (tagai Alema 5:1–32), sa valaaulia i latou e Alema e o mai ia Keriso e faaaoga ai faatusa mutimutivale e pei o Lona “faaloaloa mai o aao o le alofa mutimutivale” (Alema 5:33), “salamo, ona ou talia lea o outou” (Alema 5:33), ma “o loo valaau mai le leoleo mamoe lelei ia te outou” (Alema 5:38). O lenei lesona e mafai ona fesoasoani ia te oe i au taumafaiga e o mai ia Iesu Keriso ma maua faamanuiaga ua Ia ofoina atu ia te outou.

Taulai atu i matafaioi a Iesu Keriso. Fesoasoani i tagata aoga ia iloa ma alolofa i le Faaola e ala i le iloaina o auala Na te faataunuuina ai Ana matafaioi i le avea ai ma o latou Faaola ma le Togiola. Uunaia i latou e manatunatu pe na faapefea ona faaalia e Iesu Keriso Lona alofa ma le tausiga patino mo i latou.

Sauniuniga a le tagata aoga: Fai i tagata aoga e suesue le Alema 5:33–34 ma o mai saunia i le vasega e faasoa mai mea na latou aoaoina e uiga i le Faaola mai nei fuaiupu.

Gaoioiga e Ono Mafai Ona Aoao Ai

Salamo ma o le a ou talia outou

Mafaufau e faaali atu ni ata se lua atonu e fiafia i ai tagata aoga ma valaaulia le vasega e talanoaina pe aisea e mafai ai ona moni le faaupuga lenei.

Fai mai se faaupuga ua leva, “O se ata e sili atu ma le afe upu e faamatala ai.”

Ia faaali atu nei ata ma valaaulia tagata aoga e faasoa mai mea o taufaamatala mai e nei ata.

Atonu e te manatua o le Alema 5 o loo i ai aoaoga a Alema i tagata o le Ekalesia i Saraemila, o nisi o i latou sa faamaualuga ma pauu atu i le agasala (tagai Alema 4:8–12). Ina ua uma ona fai atu i nei tagata se faasologa o fesili e fesoasoani ai ia i latou e iloilo lo latou alualu i luma faaleagaga, sa aoao atu e Alema ni upumoni taua e uiga i le Faaola.

Faitau le Alema 5:33–34, vaavaai mo mea na manao Alema i lona nuu ia malamalama i ai e uiga ia Iesu Keriso.

E mafai ona avea lenei mea o se avanoa lelei e valaaulia ai tagata aoga e faasoa mai mea na latou aoaoina mai le sauniuniga a le tagata aoga.

• O a upu po o fasifuaitau mai nei fuaiupu na sili le anoa ia te oe? Aisea?

• O a ni mea talitutusa na e vaaia i le va o nei fuaiupu ma ata o le Faaola sa e tilotilo i ai?

• E mafai faapefea e le malamalama ai i mataupu faavae o i nei fuaiupu ona suia le ala e vaai ai se tasi ia Iesu Keriso?

Afai e manuia tagata aoga mai se suesuega loloto atu o le valaaulia a le Faaola e o mai ia te Ia, mafaufau e valaaulia i latou e suesue nisi po o mau uma nei, atonu ma se paga po o se vaega toalaiti: Mataio 11:28–30; 2 Nifae 26:33; 3 Nifae 9:14; ma le Eteru 12:27. E mafai foi e tagata aoga ona faaopoopo nei fuaitau o ni mau-fefaasinoai i le Alema 5:33–34 i a latou tusitusiga paia. A uma ona suesue e tagata aoga nei fuaitau faaopoopo, valaaulia ni volenitia e faasoa mai ni malamalamaaga faaopoopo na latou maua e uiga ia Iesu Keriso mai nei fuaiupu.

Mafaufau i ou manaoga o i ai nei e talia le valaaulia a Iesu Keriso ia salamo ma o mai ia te Ia ma pe a o e feagai ma ni faafitauli e faigata ai ona avea ma Ona soo. A o faaauau pea ona e suesue, vaavaai mo aoaoga e mafai ona fesoasoani ia te oe i au taumafaiga e faatoilalo na faafitauli ma mulimuli ai ia Iesu Keriso.

Faalogo ai i le siufofoga o le Leoleo Mamoe Lelei

Ina ua uma ona aoao atu e uiga i le valaaulia a le Faaola ia salamo ma o mai ia te Ia, sa faasoa atu e Alema ni aoaoga faaopoopo e uiga ia Iesu Keriso e faatauanau ai lona nuu e mulimuli i le Faaola.

Faitau le Alema 5:37–39 ma vaavaai mo le savali a Alema i lona nuu.

Mafaufau e valaaulia tagata aoga e talanoaina le fesili lenei ma se paga.

• O le a sou manatu i le mea na manao Alema i ona tagata ia iloa ma lagona e uiga ia Iesu Keriso (le Leoleo Mamoe Lelei) mai lenei talafaatusa?

• O le a sou manatu o le a le mea na manao Alema i lona nuu ia iloa ma lagona e uiga ia i latou lava (o mamoe) mai lenei talafaatusa?

O se upumoni e tasi e mafai ona tatou aoao mai nei fuaiupu o le, e tatau ona tatou faalogo i le siufofoga o le Leoleo Mamoe Lelei ina ia mafai ai ona avea ma Ana mamoe.

Sa faasoa mai e Peresitene Russell M. Nelson le faauigaga lenei mo le upu faalogo:

O lona uiga “ia faalogo ma le faamoemoe e usiusitai.” Ina ia lagona o lona uiga ia “faalogo ia te Ia”—ia faalogo i mea ua fetalai mai ai le Faaola ona usitai (heed) lea i Lana fautuaga. (Russell M. Nelson, “Faalogo ia te Ia,” Liahona, Me 2020, 89)

• O le a se mea ua e iloa e uiga i le Faaola e te manao ai e faalogo ia te Ia ma faitaulia faatasi ma Ana mamoe?

Na faasoa mai e Elder Gary E. Stevenson o le Korama a Aposetolo e Toasefululua nisi o faamanuiaga ua ofoina mai e le Faaola ia i tatou pe a tatou faatagaina o Ia e avea ma o tatou Leoleo Mamoe Lelei. Faitau le faamatalaga lenei pe matamata le vitio “O Loto ua Fili Faatasi,” o loo maua i le ChurchofJesusChrist.org, mai le faailo taimi 13:56 i le 14:51.

A tatou tilotilo atu i se tioata o le talalelei, tatou te iloa ai o loo tatou i ai foi i le vaavaaiga a se tausitama agaalofa, o le ua tuuina mai o Ia lava i le agalelei ma se agaga e faafailele ai. E silafia e le Leoleo Mamoe Lelei i tatou taitoatasi i le igoa ma e i ai sona naunauga patino mo i tatou. Sa fetalai mai le Alii o Iesu Keriso lava Ia: “O au nei o le leoleo mamoe lelei, ua ou iloa au mamoe. … Ou te tuuina atu foi lo’u ola e sui a’i mamoe.” [Ioane 10:14, 15].

… Ou te maua le filemu tumau i le iloaina “o le Alii o lo’u leoleo mamoe” [Salamo 23:1] ma ua Ia silafia i tatou taitoatasi ma i lalo o Lana tausiga. Pe a tatou fetaiai ma matagi o le olaga, timuga mamafa, ma’i, manu’aga, o le Alii—o lo tatou Leoleo Mamoe, Lē e tuuina mai le Tausiga ia i tatou—o le a faafaileleina i tatou i le alofa ma le agalelei. O le a ia faamalolo o tatou loto ma toefuatai mai o tatou agaga. (Gary E. Stevenson, “O Loto ua Fili Faatasi,” Liahona, Me 2021, 23)

• O le a se mea e tulaga ese ia te oe e uiga i le mafuaaga o le a tatou mananao ai e mulimuli i le Leoleo Mamoe Lelei, o Iesu Keriso?

O auala e mafai ona e faalogo ai i le siufofoga o le Leoleo Mamoe Lelei

Na fautuaina e Alema ni nai auala e mafai ai e le nuu o Saraemila ona faalogo i le siufofoga o le Leoleo Mamoe Lelei. Faitau le Alema 5:40–41, 50–51, 57 ma vaavaai mo mea na fautuaina e Alema.

A o tali e tagata aoga fesili nei, atonu e te manao e lisi a latou tali i luga o le laupapa pe valaaulia tagata aoga e o mai ma tusi a latou tali.

• O le a se mea na e aoaoina mai nei fuaiupu e uiga i auala e mafai ona e faalogo ai i le siufofoga o le Leoleo Mamoe Lelei?

• O a nisi o auala e mafai ona tatou “o ese … mai i e amioleaga” ma “aua le pai atu ia latou mea le mamā”? (fuaiupu 57).

Mafaufau e valaaulia ni nai volenitia e faasoa mai ni aafiaga na latou maua i o latou olaga ina ua latou filifili e faalogo i le siufofoga o le Leoleo Mamoe Lelei ma pe o a faamanuiaga na latou maitauina mo le faia o lena mea. Atonu e te mafaufau e faasoa atu se aafiaga mai lou lava olaga.

• O nisi o mafuaaga ou te fia mulimuli ai ia Iesu Keriso o

• O se tasi o auala o le a ou faalogo ai i Lona siufofoga o le

Manatu ma Talaaga o Faamatalaga

E mafai faapefea ona faamanuiaina i tatou mai le faalogo atu i le siufofoga o Iesu Keriso?

Na tuuina mai e Peresitene Russell M. Nelson malamalamaaga nei e uiga i le faalogo i le siufofoga o Iesu Keriso:

Ua silafia e lo tatou Tama pe a siomiaina i tatou e le lē mautonu ma le fefe, o le mea o le a sili ona fesoasoani tele ia i tatou, o le faalogo lea i Lona Alo.

Ona a tatou saili atu e faalogo—faalogo moni lava—i Lona Alo, o le a taialaina i tatou ia iloa po o le a le mea e fai i soo se tulaga.

… Ua aumai ai e le Atua ia i tatou se mamanu mo le manuia, fiafia, ma le olioli i lenei olaga. E ao ona tatou faalogo i afioga a le Alii, lagona ia mea, ma usitai i mea ua Ia faatonu ai i tatou!

A o tatou saili e avea ma soo o Iesu Keriso, o a tatou taumafaiga ia faalogo ia te Ia e manaomia ona matua faia ma le faamoemoe sili i ai. E manaomia ai le lotofuatiaifo ma taumafaiga tumau e faatumu o tatou olaga i aso taitasi i Ana afioga, Ana aoaoga, Ana upumoni. (Russell M. Nelson, “Faalogo ia te Ia,” Liahona, Me 2020, 89)

O le vitio lenei, “#FaalogoiateIa: Faalogo i le Siufofoga o Iesu Keriso,” o loo faapupula mai ai le taua o le faafilemuina o le leo o loo siomia ai i tatou ina ia mafai ona tatou lagona le siufofoga o Iesu Keriso.

Alema 5:57. E faapefea ona silasila le Faaola i mea le mama i o tatou olaga?

I le talanoa ai e uiga ia Iesu o le Leoleo Mamoe Lelei, na aoao mai ai Elder Dale G. Renlund o le Korama a Aposetolo e Toasefululua:

Talu ai e faaaoga e le Atua faama’i e fai ma faatusa mo agasala i tusitusiga paia, e talafeagai lava le fesili faapea, “E faapefea ona tali mai Iesu Keriso pe a feagai ma o tatou faama’i faafaatusa—a tatou agasala?” Ae e pei ona fetalai le Faaola Na te “le mafai ona vaai i luga o le agasala ma sina tikeri itiiti e ono tali ai”; [Mataupu Faavae ma Feagaiga 1:31]; e mafai la faapefea ona Ia silasila mai ia i tatou, i lo tatou le atoatoa, e aunoa ma le aluese atu i le inoino ma le ita?

O le tali e faigofie lava ma manino. I le avea ai ma Leoleo Mamoe Lelei, e silasila mai Iesu Keriso i faama’i o Ana mamoe o se tulaga e manaomia ia togafitiga, tausiga, ma le agaalofa. O lenei leoleo mamoe, lo tatou Leoleo Mamoe Lelei, e mauaina le olioli i le silasila mai i Ana mamoe mama’i o agai atu i luma i le faamalologa.

Na muai ta’u mai e le Faaola o le a Ia “fafagaina lana lafu e pei o le leoleo mamoe,” [Isaia 40:11], “sailia foi le ua se, … [toe] aumaia le ua tulia, … fusia le ua gau, ma … faamalosia le [ua] vaivai.” [Esekielu 34:16]. E ui ina faaalia Isaraelu fouvale i se tulaga ua faataugaina i “manu’a, ma faalavalava, atoa ma le papala ua aati,” [Isaia 1:6], o le agasala, ae sa faamalosiau pea le Faaola, apoapoai, ma folafola mai le faamalologa. [tagai Isaia 1:18]. (Dale G. Renlund, “O Lo Tatou Leoleo Mamoe Lelei,” Liahona, Me 2017, 30)

Gaoioiga Faaopoopo e Aoao Ai

Alema 5:45–48. “Ua ou iloa mo au lava ia ua moni nei mea”

E mafai e tagata aoga ona faitau nei fuaiupu, ma vaavaai pe na faapefea ona maua e Alema lona malamalama i le upumoni. E mafai ona e ta’u atu e ui lava ina sa vaai Alema i se agelu, ae sa ia ta’ua lona malamalama ma lana molimau o le upumoni i faaaliga na ia mauaina e ala i le Agaga Paia. Mafaufau e faitau le faamatalaga lenei a Peresitene Iosefa Filitia Samita (1876–1972).

“A maua e se tagata se faaaliga mai le Agaga Paia, e tuua ai se lagona e le matineia i lona agaga, o se lagona e le faigofie ona tineia ese. O le Agaga e tautala mai i le agaga, ma e oo mai ma se mana malosi e talitonu ai. O se faaaliga o se agelu, po o le Alo o le Atua lava ia, o le a faagaeetia ai mata ma le mafaufau, ma iu ai ina faanenefu, ae o musumusuga a le Agaga Paia e goto ifo i le taele o le agaga ma sili atu ona faigata ona tapeese” (Iosefa Filitia Samita, Answers to Gospel Questions, tuufaatasia e Iosefa Filitia Samita Jr. [1958], 2:151).

Mafaufau e fai atu fesili e pei o nei: Aisea e taua tele ai faaaliga e ala mai i le Agaga Paia? Aisea e te manatu ai e taua mo i tatou taitoatasi ona maua se molimau ia Iesu Keriso e ala i faaaliga e ala mai i le Agaga Paia? Na faapefea ona faaalia e Alema le faalogo i le Leoleo Mamoe Lelei?

Alema 5:53–55. “E mafai ea ona outou tetee atu i nei fetalaiga?”

E mafai ona e tuu atu i tagata aoga e faitau fuaiupu nei ma vaavaai mo amioga ma faatinoga e faigata ai mo se tasi ona lagona le siufofoga o le Faaola. Mafaufau e lisi a latou tali i luga o le laupapa. O le fea o na luitau e foliga mai e faafaigata tele mo le autalavou i aso nei? O a ni faataitaiga o le ala na aoao mai ai e le Faaola i tatou e tali atu ai i nei luitau?