Alema 5:1–32

O Fesili a Alema mo le Iloiloga Faaletagata Lava Ia

O taimi o le iloiloga faaletagata lava ia e mafai ona fesoasoani ia i tatou e iloa manino atili ai le malosi o la tatou sootaga ma Iesu Keriso. O Alema, i le iloaina ai o le auala na avea ai le faamaualuga ma finauga ma se vaega o le Ekalesia, na fesili atu ai i tagata o le Ekalesia i Saraemila i se faasologa o fesili na uunaia ai i latou e manatunatu i le taulaiga o o latou loto ma lo latou tulaga i luma o le Atua. O lenei lesona ua faamoemoe e fesoasoani ia te oe e iloilo ai lou alualu i luma faaleagaga ma faamalosia ai lou liua ia Iesu Keriso.

O le fesoasoani ai i tagata aoao e saili faaaliga faaletagata lava ia. O le tuuina atu i tagata aoga o le taimi e suesue filemu ai ma manatunatu i mau e mafai ona fesoasoani e valaaulia ai le Agaga Paia. A vaavaai ifo tagata aoga i totonu o i latou lava e iloilo lo latou malamalama ma le talitonuga maumaututu o le talalelei, e mafai ona latou nofouta i mea ua uma ona latou iloa ma valaaulia le Agaga Paia e fesoasoani ia i latou e faailoa mea e manaomia ona latou iloa, lagona, ma faia e faalatalata atili atu ai ia Iesu Keriso.

Sauniuniga a le tagata aoga: Valaaulia tagata aoga e faasolo le vaai i le Alema 5 ma faailoga ia faailoga fesili uma o loo i le mataupu. E mafai foi e tagata aoga ona fesili ifo ia i latou lava i nisi o fesili na fai atu e Alema i lona nuu i lenei mataupu.

Gaoioiga e Ono Mafai Ona Aoao Ai

Iloiloga faaletagata lava ia

Mafaufau i avanoa na e maua e faatalanoaina ai e se isi tagata, e aofia ai faatalanoaga o pepa faataga o le malumalu, faatalanoaga faaletausaga ma lou epikopo po o le peresitene o le paranesi, ma faatalanoaga mo galuega.

• O le a le faamoemoega o faatalanoaga?

• E faapefea ona faia sau faatalanoaga ma oe lava ia?

Sa faasoa mai e Peresitene M. Russell Ballard o le Korama a Aposetolo e Toasefululua nisi o faamanuiaga o le faaaluina e le aunoa o se taimi e iloilo ai lo tatou alualu i luma faaleagaga. Atonu e te manao e matamata le vitio “Toefoi Atu ma Mauaina,” o loo maua i le ChurchofJesusChrist.org, mai le faailo taimi 8:14 i le 8:58 pe faitau le faamatalaga o loo i lalo.

Ua ou iloaina o le faatumauina o le taulaiga i le toefoi atu [i le afioaga o le Atua] ma le mauaina o faamanuiaga folafolaina, e manaomia ai ona ou faaalu pea lava pea se taimi e fesili ai ia te au lava ia, “O faapefea mai a’u?”

E tai pei o la e fai sau oe lava ia faatalanoaga patino ma oe lava ia. Ae afai e faalefetaui lena mea, mafaufau i ai: o ai a se isi tagata i lenei lalolagi e sili atu ona ia iloaina oe nai lo oe lava ia? E te iloaina ou mafaufauga, o au amioga lililo, ou manaoga ma au moemitiga, sini ma fuafuaga. Ma e sili atu lou iloa i lo se isi lava tagata o lou lava alualu ai i luma. (M. Russell Ballard, “Toefoi Atu ma Mauaina,” Liahona, Me 2017, 64)

Mafaufau pe faafia ona e faaaluina se taimi e iloilo ai lou alualu i luma faaleagaga.

• O a ituaiga o faamanuiaga e mafai ona oo mai i le faia soo o lenei mea?

O se tomai e mafai ona e faaaogaina pe a suesueina au tusitusiga paia o le faaaluina lea o se taimi e taofi ai ma sei iloilo po o le a le lelei o loo e ola ai i aoaoga po o mataupu faavae o loo e suesueina. O le asō o le a e maua ai se avanoa e faataitai ai lena tomai a o e suesueina le Alema 5. O lenei mataupu o loo i ai le tele o fesili na fesili atu ai Alema i lona nuu. E mafai foi ona e fesili ifo ia te oe lava i fesili nei e iloilo ai lou alualu i luma faaleagaga. A o e suesue, saili le taitaiga mai le Tama Faalelagi e fesoasoani ia te oe e iloa ai le mea o loo lelei ona e faia ma le auala e finagalo o Ia e faaleleia ai oe lava.

Ina ia fesoasoani i tagata aoga ia iloa le aofaiga tele o fesili o loo i ai i le Alema 5, mafaufau e valaaulia tagata aoga e tilotilo vave i le mataupu ma maitau le tele o faailoga fesili. E mafai foi ona e valaaulia tagata aoga e tuuto atu sina taimi a o faia ai a latou suesuega patino o tusitusiga paia e faailoga pe li’o ai faailoga fesili uma i lenei mataupu pe afai latou te lei faia.

Ua talai atu Alema i le nuu o Saraemila

Manatua ina ua uma ona vaaia le faamaualuga ma le faaloloto i lona nuu, sa faamavae Alema i le avea ai o se faamasino sili o sa Nifae ina ia tuuto atoatoa atu o ia lava i le aoaoina atu o le afioga a le Atua (tagai Alema 4:19).

Na amata e Alema lana talaiga i le laueleele o Saraemila. Sa ia faamanatu atu i nei tagata le faatagataotauaina faaleagaga ma le faaletino na oo i ai sa Nifae i ona po o le Tupu o Noa (tagai Alema 5:3–5).

Faitau le Alema 5:6–13, vaavaai mo mea na manao Alema i lona nuu e manatua e uiga i le augatupulaga talu ai o sa Nifae.

• Aisea e te manatu ai na manao Alema i lona nuu ia manatua nei mea?

• O le a le mea na manao Alema i lona nuu ia iloa e uiga ia Iesu Keriso i le fuaiupu 7?

Faitau le Alema 5:14, 26, ma vaavaai mo fesili na fesili atu ai Alema i lona nuu ina ua uma ona faamanatu atu ia i latou lo latou tupuaga faaleagaga.

• O le a sou manatu o le a le mea na manao Alema ia malamalama i ai lona nuu e ala i le fai atu ia i latou o nei fesili?

  Atonu e tali mai tagata aoga e ala i le ta’u mai o upumoni e pei o nei: E finagalo le Alii ia tatou oo i se suiga tele o le loto ma pe a uma ona fanauina i tatou faaleagaga i la le Atua, e manaomia ona tatou galulue e faatumauina le suiga o tatou loto.

• O le a sou manatu e faapefea ona aafia lou olaga i le fesili ifo ia te oe lava i fesili e pei o fesili mai fuaiupu 14 ma le 26?

O le faaaogaina o aoaoga a Alema e faatautaia ai se iloiloga faaletagata lava ia

Faaali atu faatonuga nei ma tuu i tagata aoga se taimi talafeagai (pe tusa ma le 10–15 minute, pe a mafai) e galulue filemu ai i lenei gaoioiga na o i latou lava. E mafai ona e mafaufau e tata lemu ni viiga po o ni musika faaleagaga a o faamaeaina e tagata aoga le gaoioiga.

Faaalu se taimi e suesue ai upu a Alema i le nuu o Saraemila i le Alema 5:14–30 ma manatunatu pe na e, pe o e aafia foi i le suiga na faamatalaina e Alema. A o e suesue, faatautaia lau oe lava iloiloga e ala i le faaaogaina o nisi po o fesili uma na tuuina atu e Alema i nei fuaiupu. O nisi nei o auala e te faia ai lena mea.

1. Taofi ma manatunatu i fuaiupu e lua i le tolu, iloilo pe faapefea ona fesootai fesili a Alema i na fuaiupu i lou olaga.

2. Filifili ni nai fesili a Alema e te lagona e sili ona anoa ma talafeagai ia te oe. Tusi fesili nei i lau api talaaga mo suesuega ma tusi au tali i fesili taitasi faapea foi ma nisi manatu po o lagona atonu o ia te oe.

3. A uma ona faailoa mai fesili na fesili ai Alema i nei fuaiupu, fatu ni fesili se lua pe tolu e mafai ona e faaaogaina e iloilo ai lou lava alualu i luma faaleagaga. Faamaumau au tali i lau api talaaga mo suesuega.

A uma ona faia e tagata aoga lenei gaoioiga suesue, talanoaina ma i latou mea sa latou aoao ma lagonaina a o latou faatautaia a latou iloiloga faaletagata lava ia. O fesili nei e mafai ona faaaoga o se vaega o le talanoaga.

• O le fea o fesili a Alema na e lagonaina sa sili ona anoa ia te oe? Aisea?

• O a upu po o fasifuaitau na e maua mai nei fuaiupu e mafai ona avatu ai ia te oe le manao ma le lototele e salamo ai?

• O le a se mea na e aoaoina e uiga i le Atua ma Lona finagalo mo oe mai mea sa e suesueina?

Mafaufau i mea ua e aoao pe lagonaina i le asō a o e faaaogaina upu a Alema e iloilo ai lou alualu i luma faaleagaga. Faailoa mai se mea se tasi pe lua e te manao e galue ai o se taunuuga o mea sa e suesueina. Mafaufau i mea o le a amata ona e faia i le asō, po o a faafitauli e te lua ono feagai, ma pe faapefea ona e sailia le fesoasoani a le Atua i le faatoilaloina o ou faafitauli. Tusi faamaumau ou manatu ma musumusuga i lau api talaaga mo suesuega.

Manatu ma Talaaga o Faamatalaga

Alema 5:9, 26. O le a se mea e mafai ona taofia i tatou mai le faatumauina o se suiga o le loto?

Na aoao mai Elder Wilford W. Andersen o le Fitugafulu:

Pe a tatou maua le meaalofa o le Agaga Paia ina ua uma ona papatisoina [i tatou], na faatumulia i tatou i musika faalelagi lea e o faatasi ma le liua. Ua i ai se liuga o tatou loto, ma ua “le toe i ai so matou manao e fai mea leaga, ae ia faia mea lelei e le aunoa” (Mosaea 5:2). Peitai o le a le onosaia e le Agaga le le alofa po o le faamaualuga po o le lotoleaga. Afai o le a aveesea mai i o tatou olaga lena aafiaga maaleale, o le a vave ona lavelave tamaoaiga fealofani o le talalelei ma iu lava ina faamutaina. Na fesili Alema i le fesili faamomoiloto: “Afai ua outou lagona le fia pepese i le pese o le alofa togiola, ou te fia fesili atu, e mafai ea ona outou lagonaina nei?” (Alema 5:26). (Wilford W. Andersen, “O Le Musika o le Talalelei,” Liahona, Me 2015, 55)

Alema 5:14. O le a le uiga o le fanauina i la le Atua?

Na faamalamalama mai e Elder David A. Bednar o le Korama a Aposetolo e Toasefululua e faapea:

O loo saga aoao mai pea e auauna tofia a le Alii, o se tasi o faamoemoega autu o lo tatou i ai i lenei olaga, o le suia faaleagaga lea ma liua e ala i le Togiola a Iesu Keriso. …

Ua faatonuina i tatou ina “ia o mai ia Keriso, ina ia faaatoatoaina e ia, ma ia teena e [i tatou] le amioletonu uma” (Moronae 10:32), ina ia avea ma “tagata fou” ia Keriso (tagai 2 Korinito 5:17), ia tuu ese “le tagata o le agasala” (Mosaea 3:19), ma ia iloa ai “faaliliuina o a tatou amio ma o tatou loto, ua le toe i ai so tatou manatu e fai amio leaga, a e fia fai pea lava le amio lelei” (Mosaea 5:2). Faamolemole ia utagia e faapea o le liua o loo ta’ua i nei fuaiupu, e maoae, e le laiti—o se toefanau mai faaleagaga ma le suiga e ala mai i le faavae o mea tatou te lagonaina ma naunau i ai, o mea tatou te mafaufau i ai ma faia, ma o tatou ituaiga tagata. E moni, o le ‘auga moni o le talalelei a Iesu Keriso e afua ai se suiga taua ma le mautu i o tatou lava natura, e mafai i lo tatou faalagolago i “taui, ma le alofa mutimutivale ma le alofa tunoa o le Mesia Paia” (2 Nifae 2:8). A tatou filifili e mulimuli i le Matai, ua tatou filifili ina ia suia—ia toefanauina faaleagaga. (David A. Bednar, “E ao Ina Toe Fanau Mai Outou,” Liahona, Me 2007, 19–20)

Gaoioiga Faaopoopo e Aoao Ai

Alema 5:4–13. “Ua lava ea ona outou manatuaina le faatagataotauaina o o outou tamā?”

Mafaufau e valaaulia tagata aoga e o mai saunia i le vasega e faasoa mai e uiga i se tuaa na tuua se talatuu e mulimuli ai. A o talanoaina le Alema 5:4–13, e mafai ona e valaaulia tagata aoga e faasoa mai a latou tala. E mafai foi ona e mafaufau e faaaoga le saunoaga lenei a Elder William R. Walker o le Fitugafulu o se vaega o lenei talanoaga:

“O le a avea ma se mea matagofie pe afai e silafia e Au Paia taitasi uma o Aso e Gata Ai tala o le liuaina o o latou tuaa. …

“O le tele o lo tatou lagonaina o le fesootai ma o tatou augatuaa amiotonu, o le a atili foi lena o lo tatou faia o filifiliga poto ma le amiotonu.

“Ma e moni lenei mea. O le a matua faamanuiaina i tatou taitoatasi pe afai tatou te iloa tala o le faatuatua ma le ositaulaga sa taitaia ai o tatou augatuaa ia auai i le Ekalesia a le Alii” (William R. Walker, “Ia Tutumau i Faatuatuaga,” Liahona, Me 2014, 97, 99).

Siata faaleagaga o le tata o le fatu

Faamalamalama atu o le siata o le tata o le fatu o se siata lea e faaaoga e fomai i nisi taimi e iloilo ai le tulaga o o tatou fatu faaletino. I se auala talitutusa lava, o fesili na tuuina atu e Alema i le Alema 5 na mamanuina e fesoasoani ai i lona nuu e iloilo le tulaga faaleagaga o o latou loto.

Mafaufau e faaali atu fuaiupu nei: Alema 5:27, 28, 29, 30–31. Valaaulia tagata aoga e suesue fuaiupu taitasi po o seti o fuaiupu e i latou lava ma tali pe o le a le lelei o le faamatalaina e fesili a Alema o i latou i le faaaogaina o le fuafaatatau lenei: “I taimi uma,” “Toeitiiti lava o taimi uma,” “E masani lava,” “O nisi taimi,” po o le “E seāseā lava, pe afai e i ai.” Atonu e te manao e fautua atu i tagata aoga e tali le fesili i le fuaiupu 29 e peiseai e faitauina, “Ua tafiesea ea le mata’ua ma outou?”

A uma ua lava se taimi o tagata aoga e faamaea ai le gaoioiga, valaaulia i latou e tusifaamaumau so o se manatu po o ni uunaiga atonu na latou maua ia latou api talaaga mo suesuega.

O aoaoga a Alema i le toe fanauina

E mafai ona manuia tagata aoga mai le suesueina o le Alema 5 ma se mafaufau o le taumafai ai ia malamalama atili i le liua. Mo se faataitaiga, e mafai e tagata aoga ona suesue le Alema 5:2–7, ma gauai atu i le matafaioi a Iesu Keriso e mafai ona faia e fesoasoani ai ia i tatou ia toe fanauina ma maua se suiga o le loto. E mafai ona latou suesueina le Alema 5:8–16, 21, ma vaavaai mo le aafiaga e mafai ona faia e le Faaola ia i latou o e toe fanauina ma faatino le faatuatua ia te Ia.

Vitio o le Tusi a Mamona

E avea o se vaega o le suesuega a tagata aoga o le Alema 5, mafaufau e faaali atu “Ua Faatulaga e Alema le Itiiti le Ekalesia i Saraemila” mai le faailo taimi 0:00 i le 3:02.