Atamai i Aoaoga Faavae: Alema 7:11–13

“Ma O le a Afio Atu o Ia, Ma Mafatia i Tiga ma Puapuaga ma Faaosoosoga o Ituaiga Eseese Uma”

I lau suesuega o le Alema 7:1–13, sa e aoao ai e uiga i nisi o mea na puapuagatia ai le Faaola o se vaega o Lana Togiola ina ia “mafai ona ia silafia e tusa ai ma la le tino, le ala e fesoasoani ai i ona tagata” (Alema 7:12). O lenei lesona e mafai ona fesoasoani ia te oe e tauloto mau faasino ma le fasifuaitau autu o le mau mo le Alema 7:11–13, faamatala le aoaoga faavae o loo aoao mai i lenei fuaitau, ma faaaoga mataupu faavae o le mauaina o le malamalama faaleagaga i tulaga moni o le soifuaga.

Fesoasoani i tagata aoao e tauave le tiutetauave mo lo latou lava aoaoina. O le aoaoina o le talalelei lea e taitai atu ai i le liua e manaomia ai tagata aoao e faaaoga le faatuatua ma taumafaiga maoa’e. Fesoasoani i tagata aoga ia malamalama o o latou aafiaga i le seminare e tele lava ina faalagolago ia i latou lava. Uunaia tagata aoga e tauave le tiutetauave mo lo latou lava aoaoina, tuu atu ia i latou avanoa e faia ai, ma faailoa atu le talitonuga mautinoa e faapea o le a faamanuiaina a latou taumafaiga.

Sauniuniga a le tagata aoga: Mafaufau e valaaulia tagata aoga e mafaufau loloto ma le agaga tatalo i mea e mafai ona latou faia e maua ai le fesoasoani ma le malosi ua saunia e Iesu Keriso e ala i Lana Togiola.

Gaoioiga e Ono Mafai Ona Aoao Ai

O lenei lesona o le atamai i aoaoga faavae ua mamanuina e aoaoina pe a uma le lesona o le “Alema 7:1–13,” o le lesona faatatau lea mo le fuaitau o le atamai i aoaoga faavae o le Alema 7:11–13. Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.

Tauloto ma faamatala

O le fasifuaitau autu o le mau mo le Alema 7:11–13 o le “Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma.” Mafaufau e faailoga le fuaitau lenei i au tusitusiga paia pe afai e te lei faia.

Ina ia fesoasoani i tagata aoga e tauloto le mau faasino ma le fasifuaitau autu o le mau, mafaufau e valaaulia i latou e toe fai mai le amataga i le faaiuga ma se paga seia oo ina faigofie ona taulotoina mai le mafaufau.

Ona mafai lea ona faaaoga anomea nei e tuu atu ai i tagata aoga se avanoa e faamatala ai le aoaoga faavae o i lenei fuaitau.

O se lesona talu ai, na e aoaoina ai mai le Alema 7:11–13 e faapea na puapuagatia Iesu Keriso ina ia laveai outou mai le agasala ma le oti ma fesoasoani ia te outou i luitau o le olaga faaletino.

Manatu faapea na tesi atu se uo ia te oe e uiga i se mea faigata o loo feagai ma i latou. E te manatu o le savali i le Alema 7:11–13 o le a fesoasoani mo lau uo ae popole o le a latou le faitauina pe afai e te auina atu ia i latou na o le mau faasino.

• E faapefea ona e aoteleina le Alema 7:11–13 i se auala e ono fesoasoani ai i lau uo i o latou faigata?

Mafaufau e tuu atu i tagata aoga se taimi e tusi ai i lalo a latou tali i le fesili na muamua atu. A uma loa, valaaulia ni nai volenitia e faasoa mai mea na latou tusia. E mafai foi e tagata aoga ona faasoa atu a latou tali i se paga po o i ni vaega toalaiti.

Faataitai le faaaogaina

Fesili i tagata aoga pe o latou manatua mataupu faavae e tolu o le mauaina o le malamalama faaleagaga. Afai e le mafai ona latou faia, valaaulia i latou e mulimuli i faatonuga o loo i le parakalafa e sosoo ai.

Sue mataupu faavae o le mauaina o le malamalama faaleagaga i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022). Tusi nei mataupu faavae o ni ulutala i lau api talaaga mo suesuega, ma tuu se avanoa i le va o mataupu taitasi ina ia mafai ona e taliina fesili e uiga i ai i se taimi mulimuli ane o le lesona.

Mafaufau pe faapefea e mataupu faavae o le mauaina o le malamalama faaleagaga ma le aoaoga faavae o loo aoao i le Alema 7:11–13 ona fesoasoani i le tulaga faataitai lenei.

Mafaufau e faaali atu le tulaga faataitai lenei ina ia mafai ai e tagata aoga ona tagai i ai i le taimi atoa o totoe o le lesona. Afai e manaomia, mafaufau e fetuunai le tulaga faataitai e faaaofia ai tulaga e sili ona talafeagai i au tagata aoga.

Talu lava ona tatala le faaipoipoga a matua o Peteru i ni nai tausaga ua mavae, sa ia lagona ua atili faigata lava lona olaga. Sa tauivi o ia i le aoga, ma o nisi o ana uo e foliga mai ua latou le faaleamanaia o ia e pei ona sa latou masani ai. E tele foi ina le toe alu Peteru i le lotu, faitau ana tusitusiga paia, ma tatalo i le Atua. I se tasi aso, na talanoa atu ai Peteru i se tasi o ana uo e uiga i ona tauiviga. Sa ia fai mai, “Ou te manao i mea ia lelei atili, ae ou te le iloa po o fea e liliu atu i ai. Ua ou lagona le tuuatoatasi ma le taotaomia ai i loʻu tulaga o loo o’u iai nei.”

Manatu faapea o oe o le uo lea sa talanoa atu i ai Peteru ma sa ia fesili atu foi ia te oe mo se fautuaga e uiga i le auala e foia ai lona tulaga faigata. Faaaoga aoaoga o i le Alema 7:11–13 ma mataupu faavae o le mauaina o le malamalama faaleagaga e fesoasoani ai ia Peteru i lona luitau.

E tele auala e mafai ai e tagata aoga ona faamaea lenei gaoioiga faataitai o le faaaogaina. O se tasi o auala o le suesue lea o le Alema 7:11–13 ma parakalafa 5–8, 11–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae, ma vaavaai mo aoaoga e mafai ona fesoasoani ia Peteru. Ona mafai lea e tagata aoga ona faasoa mai ni malamalamaaga i le vasega, i ni paga, po o ni vaega toalaiti.

O fesili ma punaoa nei e mafai ona fesoasoani ia latou talanoaga. E le manaomia ona e faaaogaina uma nei punaoa ma fesili; ua o ni faataitaiga o mea e mafai ona mafaufau i ai tagata aoga a o latou galulue i lenei tulaga faataitai.

Faatino i le faatuatua

Faitau parakalafa 5–7 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae. Mafaufau e faailoga mea e te iloa e aoga.

• O le a se mea e mafai ona e aoao atu ia Peteru e uiga ia Iesu Keriso ma Lana Togiola e ono mafai ona fesoasoani ia Peteru e faatino ai i le faatuatua?

• O le a se mea e mafai ona fai e Peteru e maua ai le fesoasoani lea e mafai ona tuuina mai e Iesu Keriso?

Iloilo manatu faavae po o fesili faatasi ma se vaaiga e faavavau

Faitau le palakalafa 8 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae. Mafaufau e faailoga mea e te iloa e aoga

• O le a sou manatu e faapefea ona finagalo le Tama Faalelagi ia Peteru e mafaufau ai i lona tulaga?

• Aisea e te manatu ai o le a aoga ia Peteru le vaai atu i lona tulaga ma se vaaiga e faavavau?

Saili le malamalama atili e ala i punaoa mamana ua filifilia

• O a ituaiga o punaoa mamana ua filifilia e mafai ona e faasino i ai Peteru lea e mafai ona maua ai le fesoasoani na te manaomia?

O se tasi o punavai mamana ua filifilia lea e mafai ona fesoasoani i lenei tulaga o le Alema 7:11–13. Toe faitau fuaiupu nei, ma vaavaai mo aoaoga e mafai ona fesoasoani ia Peteru.

• O le a se mea e te manao ia malamalama ma lagonaina e Peteru mai nei fuaiupu?

• E mafai ona e mafaufau i nisi fuaitau o mau o loo aoao mai ai mea atonu e finagalo le Tama Faalelagi ia iloa e Peteru?

A uma ona faia e tagata aoga, mafaufau e valaaulia i latou e mafaufau i o latou lava tulaga latou te manaomia ai le fesoasoani a le Faaola. E mafai ona e fai atu ia i latou e mafaufau pe mafai faapefea e mataupu faavae o le mauaina o le malamalama faaleagaga ma le aoaoga faavae o loo aoaoina i le Alema 7:11–13 ona fesoasoani ia i latou ia maua le fesoasoani a le Faaola i o latou olaga. E mafai e tagata aoga ona faamaumau nei manatu i a latou api talaaga mo suesuega.

Iloiloga o le atamai i aoaoga faavae

O le gaoioiga toe faamanatu lea e tatau ona faaaoga i se lesona e aoao atu pe a uma le lesona lenei.

Mafaufau e valaaulia tagata aoga e toe fai le mau faasino ma le fasifuaitau autu “Alema 7:11–13: ‘Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma’” i tua ma luma faatasi ma se paga, seia oo ina faigofie ona tauloto mai le mafaufau.