Alema 7:1–13

Ina Ia Fesoasoani o Ia i Ona Tagata

O le galuega ma le mamalu o le Atua ia “aumaia le tino ola pea ma le ola faavavau o le tagata” (Mose 1:39). Ina ia ausia lenei mea, na Ia auina mai ai Lona Alo, o Iesu Keriso, e puapuagatia mo a tatou agasala ma faatoilalo le oti e ala i Lona Toetu. Sa puapuagatia ma le loto i ai le Faaola i mea uma mo i tatou “ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga.” (Alema 7:12). O lenei lesona e mafai ona fesoasoani ia te oe e faalagolago ai ma lagonaina le alofa sili atu mo lou Faaola.

Fesoasoani i tagata aoga ia iloa le faatosinaga a le Agaga Paia. E masani ona fesootai mai le Agaga Paia e ala i lagona o le alofa, olioli, ma le filemu (tagai Kalatia 5:22–23). Ua ia molimau mai foi ia Iesu Keriso (tagai Ioane 15:26). Vaavaai mo avanoa masani e fesoasoani ai i tagata aoga ia malamalama i le sootaga i le va o o latou lagona ma le faatosinaga a le Agaga Paia. Ia manatua e le o tagata aoga uma o le a lagonaina le faatosinaga a le Agaga Paia i le ala lava e tasi.

Sauniuniga a le tagata aoga: Mafaufau e valaaulia tagata aoga e suesue le Alema 7:11–13 ma vaavaai i fuaiupu nei mo mea na puapuagatia ai Iesu Keriso e ala i Lana Togiola ma pe aisea na puapuagatia ai o Ia i nei mea.

Gaoioiga e Ono Mafai Ona Aoao Ai

O mea e pito sili ona taua

E mafai ona e fatuina le lisi lenei ma faavasega faatasi o se vasega, pe e mafai foi ona e tuu atu i tagata aoga e fai se lisi ma se paga po o se vaega toalaiti ma faatusatusa ia tali eseese.

Fai se lisi o mea e te manatu o nisi o mea aupito sili ona taua na tutupu i le talafaasolopito o le lalolagi, ona faatulaga lea i le faasologa mai le mea e pito sili le taua i le mea e itiiti le taua.

• O le a se mea e maoae pe taua ai se mea na tupu?

• Aisea e ono faafaigata ai ona faavasegaina i latou i le faasologa o lo latou taua?

A o tautala atu Alema i tagata i le laueleele o Kitiona, sa ia vavalo atu e ui “e tele mea o le a oo mai; … e i ai se mea e tasi ua sili atu ona taua” nai lo se isi lava mea (Alema 7:7).

Faitau le Alema 7:7, ma vaavaai mo lenei mea aupito sili ona taua na tupu. Mafaufau e faailoga mea e te mauaina.

• Aisea e te manatu ai o le afio mai o le Faaola o se mea e sili ona taua i [le gasologa] atoa o taimi uma?

Mafaufau e valaaulia tagata aoga e faamaumau o latou manatu e uiga i mea nei i a latou api talaaga mo suesuega.

Ina ua uma ona talanoa atu Alema i tagata o Saraemila ma faatulaga le Ekalesia i lena vaega o le laueleele (tagai Alema 6), sa malaga atu o ia i le nuu o Kitiona. O le Alema 7 o loo i ai aoaoga taua mai ia Alema i le nuu o Kitiona e uiga ia Iesu Keriso ma Lana Togiola. Ae e te lei amata suesue, faaalu sina taimi e mafaufau ai pe faapefea ona fesootai le Togiola a Iesu Keriso i lou olaga. O a tulaga o loo e feagai ai i le taimi nei lea e te manaomia ai le fesoasoani e tuuina mai e le Tama Faalelagi ma le Faaola?

A o e suesue i le asō, vaavaai mo aoaoga e uiga ia Iesu Keriso ma Lana Togiola lea e mafai ona fesoasoani e te malamalama atili ai i mea sa Ia faia mo oe ma le auala e mafai ona Ia fesoasoani ai ia te oe.

Ua aoao atu Alema e uiga i le Togiola a le Faaola

Mafaufau e valaaulia tagata aoga e kopi le siata lenei i a latou api talaaga mo suesuega. I se isi foi faiga, e mafai ona e faaali atu pe kopi i luga o le laupapa ina ia mafai ona faatumu faatasi o se vasega.

O le mea na puapuagatia ai le Faaola mo au	O le mafuaaga na puapuagatia ai le Faaola mo au

O le Alema 7:11–13 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala iloga ina ia mafai ai ona e mauaina gofie. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

Faitau le Alema 7:11–13, vaavaai mo aoaoga a Alema e uiga i mea na puapuagatia ai Iesu Keriso pe tauaveina i Ona lava luga mo oe o se vaega o Lana Togiola. Faamaumau mea nei i le koluma muamua o lau siata. Atonu e fesoasoani le iloa o le upu vaivai e faasino i vaivaiga ma faaletonu tatou te oo i ai i le olaga faaletino.

Afai na e filifili e faaaoga le siata i luga o le laupapa, mafaufau e valaaulia tagata aoga e faamaumau mea na latou maua mai nei fuaiupu. Ona valaaulia lea o i latou e faitau fuaitau o mau nei ma faamaumau faamatalaga faaopoopo auiliili latou te aoaoina e uiga i puapuaga o le Faaola.

Faitau le 2 Nifae 9:21; Mosaea 3:5–8; ma le Mataupu Faavae ma Feagaiga 19:16–19. O nei fuaitau e aofia ai isi faamatalaga auiliili e uiga i puapuaga o le Faaola. Faaopoopo soo se upu po o fasifuaitau e te iloa e taua i le koluma muamua i lau siata. Mafaufau e faaopoopo se mau-fefaasinoai po o se sootaga mai nei fuaitau i le Alema 7:11–13.

• O a manatu po o ni lagona na e maua a o e aoao e uiga i puapuaga o le Faaola?

• Aisea e te manatu ai e taua le malamalama i le mea na puapuagatia ai le Faaola ma tauaveina i Ona lava luga o se vaega o Lana taulaga togiola?

O le mafuaaga na puapuagatia ai Iesu Keriso i nei mea

Toe faitau le Alema 7:11–13, ma vaavaai mo le mafuaaga na puapuagatia ai le Faaola mo oe. Taulai atu i fasifuaitau o loo amata i le “ina ia mafai ona ia” po o le “ina ia mafai e lana” a o e faitau. I le koluma lona lua o lau siata, tusi ai mea e te mauaina. Atonu e mafai ona aoga le iloa o le upu fesoasoani o lona uiga o le tuuina atu lea o le mapusaga poo le fesoasoani.

• O le a se mea na e aoaoina e uiga i le mafuaaga na puapuagatia ai Iesu Keriso i nei mea mo oe?

  E mafai e tagata aoga ona faamaumau a latou tali i le fesili talu ai i le siata i luga o le laupapa.

• E faapefea ona e aoteleina mea sa e suesueina i le Alema 7:11–13 i se faamatalaga o le upumoni?

Mai le Alema 7:11–13, atonu na e faailoaina se upumoni e pei o lenei: Na puapuagatia Iesu Keriso e laveai a’u mai le agasala ma le oti ma fesoasoani ia te au i aluga o luitau o le olaga faaletino.

Mafaufau e tusi le upumoni lenei i luga o le laupapa.

Sa faasoa mai e Peresitene Dallin H. Oaks o le Au Peresitene Sili nisi o luitau o le olaga faaletino e mafai e le Faaola ona fesoasoani ai ia i tatou. Faitau le faamatalaga lenei pe matamata le vitio “Faamalosia e Ala i le Togiola a Iesu Keriso,” o loo maua i le ChurchofJesusChrist.org, mai le faailo taimi 3:13 i le 4:01.

Sa mafatia ma oo lo tatou Faaola i le atoaga o luitau uma faaletino “e tusa ai ma la le tino” ina ia mafai ai ona Ia silafia “e tusa ai ma la le tino” le auala e “fesoasoani atu ai [lona uiga o le tuu atu o le toomaga po o le fesoasoani i] ona tagata e tusa ai ma o latou vaivaiga.” O le mea lea ua Ia silafia ai o tatou tauiviga, o tatou lototiga, o tatou faaosoosoga, ma o tatou mafatiaga, aua na Ia loto e oo i ai i na mea uma e fai ma vaega taua o Lana Togiola. Ma ona o lenei mea, ua Ia maua ai le mana o Lana Togiola e fesoasoani mai ai ia i tatou—e tuu mai ia i tatou le malosi e tauaveina ai ia mea uma. (Elder Dallin H. Oaks, “Faamalosia e Ala i le Togiola a Iesu Keriso,” Liahona, Nov. 2015, 61–62)

• O le a se mea ua fesoasoani ai lenei faamatalaga e te malamalama ai pe lagonaina e uiga i le Faaola?

Faatatau i lou olaga

Fesoasoani i tagata aoga e faafesootai mea na latou aoaoina i lenei lesona i o latou olaga. O se tasi o auala e faia ai lenei mea o le tuu atu lea ia i latou o se taimi e mafaufau loloto ai ma faauma mea nei e i latou lava.

Mafaufau loloto mo sina taimi i le mea na puapuagatia ai le Faaola mo oe lava ia. Mo se faataitaiga, o a ni mafatiaga patino, faaosoosoga, vaivaiga, po o puapuaga o feagai ma oe pe na e oo i ai? Mafaufau e tusi ou manatu i le pito i lalo o lau siata.

O le isi, ia mafaufau loloto ma le agaga tatalo pe na faapefea ona faamalosia oe e le Faaola pe e mafai foi ona faamalosia oe i nei faigata taitasi. Ole atu i le Tama Faalelagi e musuia oe a o e tusia ou manatu ma lagona.

Mafaufau e valaaulia ni volenitia e faasoa mai nisi o manatu na latou faamaumauina. O fesili nei e mafai foi ona faaaoga e taiala ai se talanoaga a le vasega. A o lei faia le fesili muamua, mafaufau e faasoa atu se faataitaiga patino mai lou olaga. Pe a fai atu i tagata aoga e faasoa mai, faamanatu ia i latou e aua nei faasoaina mai ni aafiaga e ono patino tele pe paia.

• O anafea na e lagonaina ai le malosi ua tuuina mai e Iesu Keriso e ala i Lana Togiola?

• O le a se mea ua e aoaoina pe lagonaina e uiga ia Iesu Keriso i au suesuega i le asō e te manao e manatua?

Molimau atu i upumoni na outou talanoaina i le asō.

Manatu ma Talaaga o Faamatalaga

O le a le finagalo o le Alii e uiga i agasala po o vaivaiga o loo ou taumafai e faatoilalo?

Na aoao mai Elder Richard G. Scott (1928–2015) o le Korama a Aposetolo e Toasefululua:

O le tala fiafia mo soo se tasi e manao ina ia aveese taunuuga o filifiliga le lelei o le tuanai e faapea, e ese le silasila a le Alii i vaivaiga nai lo Lana silasila i le fouvale. O lea e lapatai mai le Alii e faapea o le fouvale e aunoa ma le salamo o le a aumaia ai faasalaga, pe a fetalai le Alii e uiga i vaivaiga, o taimi uma lava e fetalai mai ma le alofa mutimutivale. (Richard G. Scott, “Malosi Patino e ala i le Togiola a Iesu Keriso,” Liahona, Nov. 2013, 83)

O silafia moni lava e Iesu Keriso lo’u tulaga?

Na aoao mai Elder Jeffrey R. Holland o le Korama a Aposetolo e Toasefululua:

Na savalia e Keriso le ala ua valaauina tagata uma e savavali ai ina ia mafai ai ona silafia e ia le ala e fesoasoani ma faamalosia ai i tatou i o tatou taimi sili ona faigata. Na te silafia avega sili ona loloto ma patino tele o loo tatou tauaveina. Na te silafia le tele o tiga lautele ma matautia ua tatou tauaveina. Na ia afio i lalo ifo o na ituaiga o faanoanoaga uma ina ia mafai ona ia siitia i tatou i luga ae. E leai se lototiga po o se faavauvau po o se faanoanoaga i le olaga e lei tiga ai o ia mo i tatou, ma sa tauaveina i ona lava tauau totoa ma mutimuti alofa. (Jeffrey R. Holland, Christ and the New Covenant: The Messianic Message of the Book of Mormon [1997], 223–24)

Na aoao mai Elder Matthew S. Holland o le Fitugafulu:

Mo soo se tasi i le asō o loo i ai ni tiga matuā matuitui pe tulaga ese ua e lagona e leai lava se tasi e talisapaiaina atoatoa, atonu e sa’o a oe. Atonu e leai se tagata o le aiga, uo, po o se taitai perisitua—po o le a lava le gaualofa ma ni faamoemoega lelei e ono i ai i tagata taitasi—e na te iloa lelei lava le mea o loo e lagonaina pe o i ai foi ni upu tonu e fesoasoani e te malolo ai. Ae ia iloa le mea lenei: o loo i ai le toatasi e malamalama atoatoa i mea o loo e aafia ai, e “silisili atu lona malosi i le lalolagi,” [1 Nifae 4:1], ma o lē e “mafaia ona faia o mea uma e faasilisili lava i mea [e te] ole atu ai pe mafaufau i ai.” [Efeso 3:20]. O le a faaalia mai le faagasologa i Lana ala ma i Lona taimi faatulagaina, ae ua sauni pea Keriso e faamaloloina so o se aunese ma so o se vaega o lou tiga. (Matthew S. Holland, “O Le Meaalofa Silisili o le Alo,” Liahona, Nov. 2020, 46)

Gaoioiga Faaopoopo e Aoao Ai

O le fesoasoani a le Faaola mo le atuatuvale ma le gasegase faalemafaufau

A o outou talanoaina le aoaoga faavae e faapea na puapuagatia Iesu Keriso e laveai i tatou mai le agasala ma le oti ma fesoasoani ia i tatou i luitau o le olaga nei (tagai Alema 7:11–13), atonu e te manao e faaali le vitio “Peiseai o se Ipu ua Nutililii” (11:36). I lenei vitio, o loo molimau mai ai Elder Jeffrey R. Holland o le Korama a Aposetolo e Toasefululua ma isi i le ala e mafai ai e le Faaola ona fesoasoani ia i latou o e oo i le faanoanoa ma isi gasegase faalemafaufau. O loo maua lenei vitio i le ChurchofJesusChrist.org.

Alema 7:13. “Ma o lenei faauta, o le molimau lenei ua i ai ia te au”

Na faaiuina e Alema ana aoaoga e uiga i le Togiola a le Faaola i le faapea atu, “Ma o lenei faauta, o le molimau lenei ua i ai ia te au.” (Alema 7:13). E mafai ona valaaulia tagata aoga e faasoa mai a latou molimau patino e uiga i le Faaola e pei lava ona sa faia e Alema i tagata o Kitiona. Valaaulia i latou e mafaufau e uiga i mea o le a latou faasoa mai pe afai e talosagaina i latou e aoao atu manatu ma lagona o o latou loto e faatatau i le Faaola. O le a “le molimau lenei ua i ai [ia i latou]”?