Alema 7:14–27

“O Le Ala e Tau Atu i le Malo o le Atua”

E masani ona faasino atu perofeta i le “ala lauitiiti ma le vaapiapi” (2 Nifae 31:19), o le “ala o feagaiga,” po o “le ala e tau atu i le malo o le Atua” (Alema 7:19). Na iloa e Alema sa i ai le nuu o Kitiona i luga o lenei ala ma aoao i latou i le ala e faaauau ai pea ma avea atili ai e faapei o le Atua. O lenei lesona ua faamoemoe e fesoasoani ia te oe i au taumafaiga ia maua uiga faaKeriso a o e mulimuli i le ala e tau atu i le Atua.

Fatu se lagona o le alofa ma le faaaloalo. Uunaia tagata aoga e faailoa atu le alofa faaKeriso ma le taliaina aloaia i tagata taitoatasi o le vasega. O le faia o lena mea e mafai ona faamaluluina ai loto o tagata o le vasega o loo tauivi.

Sauniuniga a le tagata aoga: Valaaulia tagata aoga e mafaufau i uiga faaKeriso latou te mananao e atiina ae atoatoa ma ia o mai saunia e faasoa mai pe aisea.

Gaoioiga e Ono Mafai Ona Aoao Ai

O se ala e mulimuli ai

Mafaufau e faaali atu le ata lenei (po o se ata talitutusa) a o fai atu le fesili lenei.

• O a tulaga lelei o le i ai o se ala e mulimuli ai?

Mafaufau e matamata i le “Toefuataiga i Aso Taitasi” mai le faailo taimi 1:40 i le 3:25 e vaavaai ai ia Elder Dieter F. Uchtdorf o le Korama a Aposetolo e Toasefululua o faamalamalama mai le mea e tupu i tagata o loo malaga e aunoa ma se ala po o ni faasinoala faatuatuaina. O loo maua lenei vitio i le ChurchofJesusChrist.org.

Ina ua uma ona vavalo atu i tagata o Kitiona e uiga i le soifuaga ma le Togiola a Iesu Keriso, sa faasoa atu e Alema upu faamalosiau ia i latou.

Faitau le Alema 7:19–20 e vaai ai i mea na fai atu ai Alema e uiga i le Atua, Lona ala, ma le nuu o Kitiona.

Mafaufau e maka le fasifuaitau “o le ala e tau atu i le malo o le Atua” i le fuaiupu 19. O le asō o le a e aoao atili ai e uiga i lenei ala.

• O le a sou manatu e mafai faapefea ona e iloa pe o e i ai i luga o le ala e tau atu i le malo o le Atua?

Mafaufau e tusi le ata lenei i luga o le laupapa ma faaigoa “O le ala e tau atu i le malo o le Atua.” Valaaulia tagata aoga e tusi se ata o se mea talitutusa i a latou api talaaga.

Tusi se ata e talitutusa ma le ata lenei ma faaigoa “O le ala e tau atu i le malo o le Atua.”

O le ala e tau atu i le malo o le Atua e tele ina faasino i ai o le ala lauitiiti ma le vaapiapi po o le ala o feagaiga. O loo tatou i ai i lenei ala pe a tatou mulimuli i le faataitaiga ma aoaoga a Iesu Keriso. O le faaauau ai pea i lenei ala o le a taitai atu ai i tatou i le ola e faavavau (tagai 2 Nifae 31:19–20).

A o e suesue, mafaufau loloto pe e te vaai ia te oe lava i luga o le ala e tau atu i le malo o le Atua. Vaavaai mo aoaoga e fesoasoani e te malamalama atili ai i lenei ala ma faamanuiaga ua ofoina atu e le Alii ia te oe a o e mulimuli ai.

“O le ala e tau atu i le malo o le Atua”

Na faamatalaina e Alema ia faatinoga e mafai ona tatou faia o le a taitai atu ai i tatou i le afioaga o le Atua.

Faitau le Alema 7:14–16, ona faamaumau lea o nei faatinoga i luga po o tafatafa o le ala i lau ata.

• O a mea na fesoasoani nei fuaiupu ia te oe e malamalama ai i le uiga o le i ai i luga o le ala e tau atu i le Atua?

Mafaufau e valaaulia ni nai tagata aoga e tusi a latou tali i le fesili talu ai i luga o le laupapa. Ona mafai lea e nei tagata aoga ona valaaulia isi e mafai ona o mai i luga ma lio se tali i luga o le laupapa e foliga mai e faapitoa le taua ia i latou. O le tagata aoga na lioina le tali e mafai ona fesiligia e faamatala mai pe aisea latou te lagona ai o se faatinoga taua lenei e fesoasoani ia i tatou e toe foi atu ai i le afioaga o le Atua.

O se upumoni e tasi e mafai ona tatou aoao mai nei fuaiupu o le, a tatou salamo, osia feagaiga ma le Atua, ma maua sauniga o le talalelei a Iesu Keriso, ua tatou mulimuli i le ala e tau atu i le malo o le Atua.

• E faapefea ona fesoasoani nei faatinoga e saunia ai i tatou e toe foi atu i le afioaga o le Atua?

• O a faamanuiaga e mafai ona tatou oo i ai i lenei olaga e ala i le mulimuli i le ala a le Atua?

Mafaufau e valaaulia tagata aoga e faasoa mai faamanuiaga na latou maua i o latou olaga e ala i le mulimuli ai i le ala a le Atua. E mafai foi ona e faasoa atu ni faataitaiga mai lou lava olaga patino.

Atiina a’e o uiga faaKeriso a o savavali i Lona ala

Sa faamalamalama mai e Elder Dale G. Renlund o le Korama a Aposetolo e Toasefululua e faapea, o se tasi o faamanuiaga o le mulimuli i le ala o feagaiga a le Atua o le, “e taitai atu i i tatou ia avea e faapei o Ia” (Ina Filifili ia o Outou i le Aso Nei,” Liahona, Nov. 2018, 104).

Mafaufau e faaali atu nei ata o le Faaola (po o isi e te filifilia) a o fai atu i tagata aoga fesili nei. E mafai ona e faasoa atu uiga o Iesu Keriso e sili ona e faamemelo i ai a o lei fai atu fesili.

• O a uiga auaumama e sili ona e faamemelo i ai e uiga ia Iesu Keriso? Aisea?

• O a ni auala e te manao e avea atili ai e faapei o le Faaola? O le a se mea o faafaigata ai? E mafai faapefea ona tatou faatoilaloina nei faigata faatasi ai ma le fesoasoani a le Alii?

• O anafea na e lagonaina ai le manao silisili ia avea e faapei o Ia? O le a se mea na tupu i lou olaga na mafua ai ona e maua se lagona faapena?

Na faailoa mai e Alema nisi o uiga faaKeriso e tatau ona tatou taumafai ia maua a o tatou savavali ai i le ala e tau atu i le malo o le Atua.

Faitau le Alema 7:22–25 ma vaavaai mo uiga ma amioga faaKeriso e te vaaia o ta’ua mai pe faamatalaina. Mafaufau e faailoga mea nei i au tusitusiga paia. E mafai foi ona e mafaufau e lisi nei uiga ma amioga i luga po o tafatafa o le ala i lau ata.

O le gaoioiga lenei ua faamoemoe e fesoasoani ai i tagata aoga e aoao atili i uiga faaKeriso o loo ta’ua i le Alema 7:22–25 ma fai se fuafuaga e atiina ae se tasi pe sili atu foi o nei uiga. Atonu e aoga mo oe le faamaeaina o lenei gaoioiga a o lei amataina le vasega ina ia saunia lelei ai oe e fesoasoani i tagata aoga a o latou galulue. Ia mautinoa ua lava se taimi e tuuina atu i tagata aoga e faamaea ai lenei gaoioiga.

Mafaufau e faaali atu faatonuga nei.

Filifili ma le agaga tatalo se uiga o loo taua i le Alema 7:22–25 e te lagona e finagalo le Tama Faalelagi e te atiae, ona faamaea lea o le gaoioiga lenei. Faamaumau ou manatu i le pito i lalo o lau ata po o se isi mea i lau api talaaga mo suesuega.

1. Aoao atili e uiga i lenei uiga. Mafaufau e faaaoga punaoa o mau e pei O le Taiala i Tusitusiga Paia, Taiala i Autu, po o le Bible Dictionary e fesoasoani ai i lenei mea. Tusi i lalo mea na e aoaoina.

2. Lisi ni luitau o le atiina a’e o le uiga na e filifilia ma pe aisea e te manatu ai e faataga oe e le Atua e oo i na luitau.

3. Lisi ni auala eseese se lua pe tolu o le a sili atu ai ona lelei lou olaga pe a uma ona e mauaina lenei uiga.

4. Faailoa mai se faataitaiga mai le soifuaga o le Faaola lea na Ia faataitaia ai lenei uiga. I se isi foi faiga, lisi se faataitaiga mai le olaga o se tasi e te iloa lea na latou faataitaia ai lenei uiga faaKeriso.

5. Faailoa se tasi pe sili atu foi o faatinoga e mafai ona e faia e valaaulia ai le fesoasoani a le Atua a o e taumafai e atiina a’e lenei uiga. Fai se fuafuaga mo le auala e faatino ai lena faatinoga i lou olaga. O se tasi o auala atonu e te taumafai ai e faatino lenei faatinoga o le talanoa lea i le Tama Faalelagi i au tatalo o aso taitasi e uiga i lou alualu i luma ma talosagaina Lana fesoasoani i le mea e te le o atoatoa ai.

Mafaufau e tuu tagata aoga i ni vaega toalaiti. E mafai e tagata taitoatasi i le vaega ona faamatala faapuupuu mai mea sa latou aoao ma lagonaina e uiga i le uiga sa latou filifilia ma pe aisea latou te mananao ai e atiina a’e lea uiga. I se isi itu, e mafai ona latou faasoa atu le uiga sa latou filifilia ma le faataitaiga mai le soifuaga o le Faaola po o se faataitaiga mai le olaga o se tasi latou te iloa. Uunaia tagata aoga e faatino a latou fuafuaga. Molimau atu o le a fesoasoani le Tama Faalelagi ma Iesu Keriso ia i latou i a latou taumafaiga.

Manatu ma Talaaga o Faamatalaga

Aisea ua ta’ua ai foi le ala i le malo o le Atua o le “ala o feagaiga”?

Na faamalamalama mai e Elder D. Todd Christofferson o le Korama a Aposetolo e Toasefululua:

O le a le ala o feagaiga? O le ala lea e tasi e taitai atu ai i le malo selesitila o le Atua. Tatou te o atu i luga o le ala i le faitotoa o le papatisoga ona “fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma [o poloaiga sili e lua] … e oo i le iuga.” [2 Nifae 31:20]. I le aluga o le ala o feagaiga (lea e oo i talaatu o le olaga nei), tatou te maua ai sauniga ma feagaiga e faatatau i le faaolataga ma le faaeaga. (D. Todd Christofferson, “Aisea i le Ala o Feagaiga,” Liahona, Me 2021, 116)

E mafai faapefea ona ou atina a’e uiga faa-Keriso?

Matamata i le “O Uiga FaaKeriso—o le Matagi i Lalo ifo o o Tatou Apaau” mai le faailo taimi 12:08 i le 16:19 e tagai ai ia Elder Dieter F. Uchtdorf o le Korama a Aposetolo e Toasefululua o taliina lenei fesili.

Na faamalamalama mai e Elder Lynn G. Robbins o le Fitugafulu:

Aua o uiga faa-Keriso o ni meaalofa mai le Atua ma e le mafai ona maua e aunoa ma Lana fesoasoani, i taimi o tatalo faaleaiga ma faaletagata lava ia, ia tatalo mo na meaalofa. (Lynn G. Robbins, “Alii [ma Tamaitai] Pe Faapefea La Outou Amio e Tatau Ai?,” Liahona, Me 2011, 105)

Sa faaopoopo mai e Elder L. Whitney Clayton o le Fitugafulu nei malamalamaaga:

O uiga paia o Keriso e maua i le “gasologa o taimi” [Mose 7:21] e ala i le agaigai i luma ma le loto atoa i le ala o feagaiga. O uiga paia faa-Keriso e teuteuina ai olaga o i latou e taumafai e ola i le amiolelei. Latou te faatutumuina fale i le malamalama o le talalelei, pe o le fola e faia i palapala pe o le maa. Tusa lava pe na o oe i lou aiga e mulimuli i le poloaiga e “saili i nei mea,” [Mataupu Faavae o le Faatuatua 1:13], e mafai lava ona e saofaga i le faatotogaina faaleagaga o le fale o lou aiga. (L. Whitney Clayton, “O Fale e Sili ona Matagofie,” Liahona, Me 2020, 108)

Gaoioiga Faaopoopo e Aoao Ai

Salamo, sauniga, ma le ala o feagaiga

A uma ona faailoa mai le upumoni a’ia’i, mafaufau e tuu atu i tagata aoga se avanoa e faamalamalama ai le taua o le salamo, sauniga, ma feagaiga. E mafai ona faatino e tagata aoga le faamatalaina atu i se tasi e le o se tagata o le Ekalesia le uiga o le salamo, po o a sauniga o le talalelei a Keriso, ma pe aisea e taua tele ai.

E mafai e tagata aoga ona tagai i tusiga i le O le Taiala i Tusitusiga Paia i lalo o le “Salamo” ma le “Sauniga” pe afai latou te manaomia le fesoasoani.

Faatusatusaina o le Alema 7 ma le 2 Nifae 31

Afai o le a manuia tagata aoga mai le suesue atili e uiga i le ala e tau atu i le malo o le Atua, mafaufau i le gaoioiga lenei.

Valaaulia tagata aoga e fatu se siata e pei o lenei:

2 Nifae 31:13–21 faamatalaga o le ala ma le auala e tumau ai	2 Nifae 31:13–21 faamatalaga o le ala ma le auala e tumau ai

Valaaulia tagata aoga e galulue i paga. E mafai e le tasi paga ona suesue le Alema 7 ma le isi e mafai ona suesueina le 2 Nifae 31. E mafai e i latou taitoatasi ona faatumu le vaega talafeagai o a latou siata. A uma, e mafai ona latou faasoa mai a latou itu o le siata a o faamaumau e le isi paga mea na faasoa mai e a latou paga. A uma ua lava se taimi na atofa, valaaulia tagata aoga e faasoa mai i le vasega mea na latou aoaoina e uiga i le Faaola ma Lona ala a o latou faia lenei gaoioiga. Valaaulia i latou e fuafua se mea se tasi e mafai ona latou faia ina ia o ai i luga pe tumau ai i lenei ala lauitiiti ma le vaapiapi.