Ալմա 5․33–62

«Բարի հովիվը կանչում է ձեզ»

Զարահեմլայի Եկեղեցու անդամներին խրախուսելով խորությամբ մտածել Երկնային Հոր և Հիսուս Քրիստոսի առաջ իրենց ունեցած դիրքի մասին (տես Ալմա 5.1–32)՝ Ալման առաջարկեց նրանց դարձի գալ դեպի Քրիստոսը՝ օգտագործելով այսպիսի քնքուշ պատկերներ․ «[Նրա] ողորմության բազուկները մեկնված են» (Ալմա 5.33), «ապաշխարե՛ք, և ես կընդունեմ ձեզ» (Ալմա 5.33) և «բարի հովիվը կանչում է ձեզ» (Ալմա 5.38)։ Այս դասը կօգնի ձեզ դեպի Հիսուս Քրիստոսը դառնալու և Նրա առաջարկած օրհնությունները ստանալու ձեր ջանքերում։

Կենտրոնացեք Հիսուս Քրիստոսի դերերի վրա։ Օգնեք ուսանողներին ճանաչել և սիրել Փրկչին՝ հասկանալով, թե Նա ինչպես է կատարում Իր դերերը՝ որպես իրենց Փրկիչ և Քավիչ։ Խրախուսեք նրանց մտածել, թե Հիսուս Քրիստոսն ինչպես ցուցադրեց Իր սերն ու հոգատարությունն անձամբ իրենց հանդեպ։

Ուսանողի նախապատրաստում․ ուսանողներին առաջարկեք ուսումնասիրել Ալմա 5.33–34 հատվածները և դասին պատրաստվել՝ կիսվելու, թե այդ հատվածներից ինչ սովորեցին Փրկչի մասին։

Հնարավոր ուսումնական վարժություններ

Ապաշխարե՛ք, և ես կընդունեմ ձեզ

Կարող եք ցուցադրել ուսանողներին հետաքրքրող մի քանի նկար և առաջարկել դասարանին քննարկել, թե ստորև ներկայացվող ասացվածքն ինչու կարող է ճշմարիտ լինել։

Մի հին ասացվածքում ասվում է․ «Լավ է մեկ անգամ տեսնել, քան հազար անգամ լսել»։

Այժմ ցուցադրեք ստորև ներկայացվող պատկերները և ուսանողներին առաջարկեք կիսվել իրենց մտքերով։

Հավանաբար կհիշեք, որ Ալմա 5 գլխում ներկայացված են Ալմայի ուսմունքները՝ ուղղված Զարահեմլայի Եկեղեցու անդամներին, որոնցից ոմանք հպարտացել ու մեղանչել էին (տե՛ս Ալմա 4.8–12)։ Այդ մարդկանց հոգևոր առաջընթացը գնահատող մի շարք հարցեր տալուց հետո Ալման կարևոր ճշմարտություններ էր ուսուցանում Փրկչի մասին։

Կարդացեք Ալմա 5.33–34 հատվածները և փնտրեք, ինչ էր ցանկանում Ալման, որ իր ժողովուրդը հասկանա Հիսուս Քրիստոսի մասին։

Սա կարող է լավ հնարավորություն լինել առաջարկելու ուսանողներին կիսվել, թե ինչ են սովորել ուսանողի նախապատրաստման առաջադրանքից։

• Այս հատվածներում ո՞ր բառերը կամ արտահայտություններն էին ամենից կարևոր ձեզ համար։ Ինչո՞ւ։

• Ի՞նչ նմանություններ տեսաք այս հատվածների և ձեր դիտած՝ Փրկչի նկարների միջև։

• Այս հատվածների սկզբունքների ըմբռնումը ինչպե՞ս կարող է փոխել Հիսուս Քրիստոսի մասին պատկերացումը։

Եթե ուսանողները կարողանան օգուտ քաղել Փրկչի՝ դեպի Իրեն գալու հրավերի ավելի խորը ուսումնասիրությունից, կարող եք նրանց առաջարկել դասընկերոջ հետ կամ փոքր խմբով ուսումնասիրել հետևյալ սուրբ գրություններից մի քանիսը կամ բոլորը․ Մատթեոս 11.28–30, 2 Նեփի 26.33, 3 Նեփի 9.14 և Եթեր 12.27։ Ուսանողները կարող են իրենց սուրբ գրքերում Ալմա 5.33–34 հատվածին ավելացնել նաև այս հատվածները՝ որպես խաչաձև հղումներ։ Երբ ուսանողներն ավարտեն այս լրացուցիչ հատվածների ուսումնասիրությունը, ցանկացողներին առաջարկեք կիսվել այս հատվածներից իրենց ստացած լրացուցիչ գաղափարներով Հիսուս Քրիստոսի մասին։

Մտածեք Հիսուս Քրիստոսի՝ ապաշխարելու և դեպի Իրեն դարձի գալու հրավերն ընդունելու ձեր ցանկության մասին, ինչպես նաև՝ խոչընդոտների մասին, որոնց պատճառով ձեզ համար դժվար է Նրա հետևորդը լինել։ Ուսումնասիրությունը շարունակելիս փնտրեք ուսմունքներ, որոնք կարող են օգնել ձեզ այդ խոչընդոտները հաղթահարելու ու Հիսուս Քրիստոսին հետևելու ձեր ջանքերում։

Ականջ դրեք բարի Հովվի ձայնին

Ապաշխարելու և դարձի գալու Փրկչի հրավերի մասին ուսուցանելուց հետո Ալման կիսվեց Հիսուս Քրիստոսի մասին լրացուցիչ ուսմունքներով՝ համոզելու իր ժողովրդին հետևել Փրկչին։

Կարդացեք Ալմա 5.37–39 հատվածները և փնտրեք Ալմայի ուղերձն իր ժողովրդին։

Ուսանողներին առաջարկեք որևէ դասընկերոջ հետ քննարկել հետևյալ հարցերը։

• Ըստ ձեզ՝ Ալման ի՞նչ էր ցանկանում, որ իր ժողովուրդն իմանա և զգա Հիսուս Քրիստոսի (Բարի հովվի) մասին այս համանմանությունից։

• Ըստ ձեզ՝ Ալման ի՞նչ էր ցանկանում, որ իր ժողովուրդն իմանա և զգա իր (հոտի) մասին այս համանմանությունից։

Ճշմարտություններից մեկը, որ կարող ենք սովորել այս հատվածներից, այն է, որ մենք պետք է ականջ դնենք Բարի հովվի ձայնին՝ Նրա ոչխարը լինելու համար։

Նախագահ Ռասսել Մ. Նելսոնը ականջ դնել արտահայտության վերաբերյալ կիսվել է հետևյալ սահմանումով․

Դա նշանակում է «լսել՝ հնազանդվելու մտադրությամբ»: Ականջ դնել նշանակում է՝ «լսել Նրան»․ լսել, թե ինչ է Փրկիչն ասում, իսկ հետո ուշք դարձնել Նրա խորհրդին։ (Ռասսել Մ. Նելսոն, «Լսի՛րՆրան», Լիահոնա, մայիս 2020թ., 89)։

• Ի՞նչ գիտեք Փրկչի մասին, որը ձեզ մոտ ցանկություն է առաջացնում ականջ դնել Նրան և լինել Նրա ոչխարների թվում։

Տասներկու Առաքյալների Քվորումից երեց Գարի Ի. Սթիվենսոնը կիսվել է, թե ինչ օրհնություններ է առաջարկում մեզ Փրկիչը, երբ թույլ ենք տալիս Նրան մեր Բարի հովիվը լինել։ Կարդացեք ստորև ներկայացվող հայտարարությունը կամ դիտեք «Միավորելով իրենց սրտերը» տեսանյութի 13:56-14:51 հատվածը, որը հասանելի է այստեղ՝ ChurchofJesusChrist.org։

Hearts Knit Together

Նայելով ավետարանի տեսանկյունից, մենք գիտակցում ենք, որ մենք նույնպես գտնվում ենք կարեկից խնամողի հսկողության ներքո, Ով բարությամբ ու բարեհոգությամբ է վերաբերվում մեզ: Բարի Հովիվը մեզնից յուրաքանչյուրին գիտի անունով և անհատապես հետաքրքրված է մեզանով։ Տեր Հիսուս Քրիստոսն ասել է. «Ես եմ բարի Հովիվը, և ես իմ ոչխարներին ճանաչում եմ»: … Եվ իմ անձը [կ]դնեմ հոտի համար» [Հովհաննես 10.14, 15]։

…Ես տևական խաղաղություն եմ գտնում՝ իմանալով, որ «Տէրն է իմ հովիւը» [Սաղմոս 23.1], և որ Նա ճանաչում է յուրաքանչյուրիս ու հոգում է մեր մասին։ Երբ դիմակայենք կյանքի քամիներին ու փոթորիկներին, հիվանդություններին ու վնասվածքներին, Տերը՝ մեր Հովիվը, կսնուցի մեզ սիրով ու բարությամբ: Նա կբժշկի մեր սրտերը և կվերականգնի մեր հոգիները: (Գարի Ի. Սթիվենսոն, «Միավորելով իրենց սրտերը», Լիահոնա, մայիս 2021թ․, 23)

• Ի՞նչն է ձեզ համար առանձնահատուկ այն հարցում, թե մենք ինչու ենք ցանկանում հետևել Բարի հովվին՝ Հիսուս Քրիստոսին։

Բարի հովվի ձայնին ականջ դնելու եղանակներ

Ալման մի քանի եղանակ էր առաջարկում, որոնցով Զարահեմլայի ժողովուրդը կարող էր ականջ դնել Բարի հովվի ձայնին։ Կարդացեք Ալմա 5.40–41, 50–51, 57 հատվածները և փնտրեք, թե ինչ խորհուրդ էր տվել Ալման։

Երբ ուսանողները պատասխանեն հետևյալ հարցերին, կարող եք նրանց պատասխանները գրել գրատախտակին կամ ուսանողներին առաջարկել գալ ու գրատախտակին գրել իրենց պատասխանները։

• Ի՞նչ սովորեցիք այս հատվածներից այն եղանակների մասին, որոնցով կարող եք ականջ դնել Բարի հովվին։

• Որո՞նք են այն եղանակները, որոնցով կարող ենք «դուրս գալ ամբարիշտների միջից» և «չդիպչել նրանց անմաքուր բաներին» (հատված 57)։

Կարող եք մի քանի ցանկացողի առաջարկել կիսվել, թե ինչ փորձառություններ են ունեցել իրենց կյանքում, երբ որոշել են ականջ դնել Բարի հովվի ձայնին, և ինչ օրհնություններ են նկատել այդպես անելու համար։ Կարող եք կիսվել նաև ձեր կյանքի փորձառությամբ։

• Ահա մի քանի պատճառ, որոնց համար ցանկանում եմ հետևել Հիսուս Քրիստոսին

• Ահա մի եղանակ, որով ականջ կդնեմ Նրա ձայնին

Բացատրական և պատմական տեղեկություններ

Ինչպե՞ս կարող ենք օգուտ քաղել՝ լսելով Հիսուս Քրիստոսի ձայնին։

Նախագահ Ռասսել Մ. Նելսոնը հետևյալ գաղափարներն է տվել Հիսուս Քրիստոսի ձայնը լսելու մասին․

Մեր Հայրը գիտի, որ երբ մենք շրջապատված ենք անորոշությամբ և վախով, այն, ինչը մեզ կօգնի ամենից շատ` Նրա Որդուն լսելն է:

Քանի որ, երբ մենք ձգտում ենք լսել, իսկապես լսել Նրա Որդուն, մենք առաջնորդվում և իմանում ենք, թե ինչ անել ցանկացած պարագայում:

… Աստված մեզ տալիս է հաջողության, երջանկության և ուրախության օրինակն այս կյանքում։ Մենք պետք է լսենք Տիրոջ խոսքերը, ականջ դնենք դրանց և ուշք դարձնենք, թե Նա ի՛նչ է ասել մեզ։

Երբ ձգտում ենք դառնալ Հիսուս Քրիստոսի աշակերտները, Նրան լսելու մեր ջանքերը պետք է լինեն ավելի գիտակցված: Պահանջվում է աչալուրջ և հետևողական աշխատանք, որպեսզի մեր առօրյա կյանքը լցվի Նրա խոսքով, Նրա ուսմունքներով և Նրա ճշմարտություններով: (Ռասսել Մ. Նելսոն, «Լսի՛րՆրան», Լիահոնա, մայիս 2020թ., 89)։

«#ԼսիրՆրան․ Լսիր Հիսուս Քրիստոսի ձայնը» տեսանյութում ներկայացվում է մեզ շրջապատող աղմուկը լռեցնելու կարևորությունը, որպեսզի կարողանանք լսել Հիսուս Քրիստոսի ձայնը։

#HearHim: Listen to the Voice of Jesus Christ

Ալմա 5.57 Փրկիչն ինչպե՞ս է տեսնում մեր կյանքի անմաքուր բաները։

Հիսուսի մասին որպես Բարի հովիվ խոսելով՝ Տասներկու Առաքյալների Քվորումից երեց Դեյլ Գ. Ռենլանդն ուսուցանել է․

Քանի որ Աստված սուրբ գրություններում հիվանդություն բառը փոխաբերաբար օգտագործում է մեղքն անվանելու համար, ողջամիտ կլինի հարցնել․ «Ինչպե՞ս է արձագանքում Հիսուս Քրիստոսը, երբ բախվում է մեր փոխաբերական հիվանդություններին՝ մեր մեղքերին»։ Չէ որ Փրկիչն ասել է, որ Նա «չի կարող մեղքը նվազագույն իսկ աստիճանով թույլատրելի համարել» [Վարդապետություն և Ուխտեր 1.31], ուրեմն, Նա ինչպես կարող է նայել մեզ՝ անկատարներիս, առանց ընկրկելու սարսափով ու զզվանքով ։

Պատասխանը պարզ է և հստակ։ Որպես Բարի հովիվ՝ Հիսուս Քրիստոսը Իր հոտում հիվանդությունը դիտում է որպես մի վիճակ, որը բուժման, խնամքի ու գթության կարիք ունի։ Այս հովիվը՝ մեր Բարի հովիվը, ուրախանում է, երբ տեսնում է, որ Իր հիվանդ հոտը գնալով առողջանում է։

Փրկիչը կանխագուշակել էր, որ «հովիւի նման հովուելու է նա իր հօտին» [Եսայիա 40.11], «կորածը որոնելու է, … մոլորուածը ետ է բերելու, … կոտրածը պիտի կապի եւ … հիւանդը պիտի զօրացնի» [Եզեկիել 34.16]։ Չնայած ուրացած Իսրայելը պատկերված էր որպես քայքայված մեղսավոր «հարուածներից եւ վէրքերից եւ շարաւալի խոցերից» [Եսայիա 1.6], Փրկիչը քաջալերեց, հորդորեց և խոստացավ բժշկում [տես Եսայիա 1.18]: (Դեյլ Գ. Ռենլանդ, «Մեր Բարի Հովիվը», Լիահոնա, մայիս 2017թ․, 30)

Օժանդակ ուսումնական վարժություններ

Ալմա 05.45–48 «Ես ինքս գիտեմ, որ դրանք ճշմարիտ են»

Ուսանողները կարող են կարդալ այս հատվածները՝ փնտրելով, թե Ալման ինչպես ստացավ ճշմարտության մասին իր գիտելիքը։ Կարող եք մատնանշել, որ թեև Ալման հրեշտակ էր տեսել, նա ճշմարտության մասին իր գիտելիքն ու վկայությունը վերագրում էր Սուրբ Հոգու միջոցով ստացած հայտնությանը։ Կարող եք կարդալ նախագահ Ջոզեֆ Ֆիլդինգ Սմիթի (1876–1972) ստորև ներկայացվող խոսքերը։

«Երբ մարդ Սուրբ Հոգուց տեսիլք է ունենում, դա անմոռանալի տպավորություն է թողնում նրա հոգում՝ մի բան, որը հեշտությամբ չի ջնջվում։ Դա Հոգին է խոսում հոգու հետ, և դա գալիս է համոզիչ ուժով։ Հրեշտակի կամ նույնիսկ հենց Աստծո Որդու երևալը տպավորում է աչքն ու միտքը և ի վերջո կարող է աղոտվել, բայց Սուրբ Հոգու տպավորությունները խորասուզվում են հոգու մեջ, և դրանք ջնջելն ավելի դժվար է» (Ջոզեֆ Ֆիլդինգ Սմիթ, Պատասխաններ ավետարանի հարցերին, կազմել է Ջոզեֆ Ֆիլդինգ Սմիթ Կրտսերը [1958], 2:151)։

Կարող եք տալ նմանատիպ հարցեր. Սուրբ Հոգու միջոցով հայտնությունն ինչո՞ւ է այդքան ազդեցիկ։ Ձեր կարծիքով, ինչո՞ւ է մեզանից յուրաքանչյուրի համար կարևոր վկայություն ստանալ Հիսուս Քրիստոսի մասին Սուրբ Հոգու հայտնության միջոցով: Ալման ինչպե՞ս էր Բարի հովվին ականջ դնելու օրինակ հանդիսանում։

Ալմա 05.53–55։ «Կարո՞ղ եք դուք դեմ կանգնել այս ասածներին»

Կարող եք ուսանողներին հանձնարարել, որ կարդան այս հատվածները և փնտրեն, թե որոնք են այն հատկանիշներն ու գործողությունները, որոնք դժվարացնում են Փրկչի ձայնին ականջ դնելը։ Պատասխանները կարող եք գրել գրատախտակին։ Այս մարտահրավերներից ո՞րն է այսօր հատկապես դժվար երիտասարդության համար: Որո՞նք են այն օրինակները, թե ինչպես է Փրկիչը ուսուցանել մեզ արձագանքել այս մարտահրավերներին: