“Alema 19: ‘Ua Faaloaloa Mai Lona Aao i Tagata Uma O E e Salamo ma Talitonu,’” Tusi Lesona a le Faiaoga o le Tusi a Mamona (2024)
“Alema 19,” Tusi Lesona a le Faiaoga o le Tusi a Mamona
Alema 19
“Ua Faaloaloa Mai Lona Aao ia i Latou Uma O E e Salamo ma Talitonu”
A o e mafaufau e faasoaina atu le talalelei i isi, pe o e lagonaina ea e pei o loo i ai nisi o tagata o le a le taliaina lava aoaoga a le Faaola? O le a sou manatu i le silasila a le Tama Faalelagi i nei tagata? Mai aafiaga faafaifeautalai a Amona ma sa Lamana, ua tatou iloa ai o loo saunia e le Alii loto o tagata mai so o se ituaiga matata o le olaga ina ia maua Lana talalelei. E mafai ona fesoasoani ia te oe lenei lesona ia malamalama ai e alofa le Alii i tagata uma ma finagalo ia latou o mai ia te Ia.
Faaaloalogia o talitonuga ma manatu o isi. Saili e faafailele se siosiomaga lea e faaaloalo ai tagata i talitonuga ma manatu o isi. Uunaia tagata aoga e faalogologo ma taumafai ia malamalama pe aisea e ono ese ai talitonuga o isi nai lo i latou. Fesoasoani i tagata aoga e aoao e aloaia talitonuga o isi ma faataitai le faasoa atu o o latou lava talitonuga i le agalelei ma le amanaia. O lenei faiga e mafai ona saunia ai i latou e faasoa atu ma le faaaloalo le talalelei i isi.
Sauniuniga a le tagata aoga: Valaaulia tagata aoga e suesue le Alema 19 ma vaavaai mo le aafiaga o le talalelei a le Faaola i luga o sa Lamana ia na aoao e Amona.
Gaoioiga e Ono Mafai Ona Aoao Ai
Suesue oe lava
Faaali atu le suesuega lenei ma tuu atu i tagata aoga se taimi e tali atu ai ma le manatunatu loloto ma le faamaoni. Afai e le patino tele, valaaulia tagata aoga e faasoa mai a latou tali.
Faatulaga oe lava i se fua o le 1–5 pe faamata e te manatu o le a e valaaulia tagata nei e aoao atili e uiga i le talalelei a Iesu Keriso.
-
O se tasi e te iloa sa faaalia lona fiafia i le Ekalesia
-
O se uo po o se tagata o le aiga e masani ona mulimuli i tulaga faatonuina o le talalelei ae e le o se tagata o le ekalesia
-
O se uo po o se tagata o le aiga e le mulimuli i tulaga faatonuina o le talalelei
-
O se tasi e te iloa na teenaina valaaulia muamua mai isi e aoao atili e uiga i le talalelei
Mafaufau loloto i mafuaaga na e tali atu ai i le ala na e faia ai.
-
E mafai faapefea e o tatou manatu patino e uiga i isi ona aafia ai a tatou taumafaiga e faasoa atu le talalelei?
Ina ua amata e atalii o Mosaea la latou misiona i sa Lamana, e toatele tagata na talie ia i latou ma masalosalo pe o le a manuia le latou talaiga i totonu o na tagata amioleaga. (tagai Alema 26:23–25). Peitai, sa faamanuiaina Amona ma ona uso. Atonu e te manatua ina ua uma ona aoao atu e Amona le talalelei i le Tupu o Lamonae, sa talitonu le tupu i upu a Amona, tatalo mo le alofa mutimutivale, ma pau fao i le eleele ina ua lofituina o ia e le Agaga (tagai Alema 18:40–43).
O le asō o le a e aoao ai e uiga i mea na tutupu i le aiga o Lamonae ina ua uma ona aoao atu e Amona le tupu. A o e suesue, vaavaai mo upumoni e mafai ona fesoasoani e te malamalama atili ai i le ala e silasila mai ai le Tama Faalelagi i Ana fanau, e aofia ai i latou atonu e foliga mai e le taliaina le talalelei.
Sa faaauau pea ona aoao e Amona le aiga o Lamonae
O le faamoemoega o lenei vaega o le lesona o le fesoasoani lea i tagata aoga e suesue mea na tutupu o loo tusia i le Alema 19 ma faailoa mai le mataupu faavae o loo aoao mai i le fuaiupu 36. E mafai ona e mafaufau e faaaoga metotia eseese mai metotia o loo lisi atu i lenei vaega e fesoasoani ai i tagata aoga e suesue le mataupu lenei a o lei faailoaina le mataupu faavae.
Mo se faataitaiga, e mafai ona e tuuina atu lenei mataupu o se ata faitau lea e te filifilia ai ni tagata aoga se toaono ma atofa atu se vaega i tagata taitasi. E mafai e se tagata aoga se toatasi ona avea ma faamatalaupu (o lē o le a faitauina fuaiupu 1, 6–7, 11–12, 15, 33–36), ma le isi toalima e mafai ona faitauina upu a, pe e uiga i le masiofo (fuaiupu 2, 4–5, 9, 29–30), Amona (fuaiupu 3, 6–8, 10, 14, 22–23), Tupu o Lamonae (fuaiupu 12–13, 31), Apiso (fuaiupu 16–17, 28), ma isi sa Lamana (fuaiupu 18–21, 24–27, 32). E mafai ona fesoasoani le faia o nei galuega a o lei amataina le vasega ina ia mafai ai e tagata aoga ona faailoa mai fuaiupu o le a latou faitauina.
O le isi faiga o le faaali atu lea o le vitio “Ua Auauna ma Aoao Atu Amona i le Tupu o Lamonae” mai le faailo taimi 15:18 i le 23:04. O lenei vitio, o loo maua i le ChurchofJesusChrist.org, o loo faaalia ai mea na tutupu o loo tusia i le Alema 19:1–36. E mafai e tagata aoga ona mulimuli i a latou tusitusiga paia a o latou matamata i le vitio.
Ina ua iloa e le masiofo o sa Lamana le maliu o lana tane, sa ia aami ia Amona ina ia mafai ona ia talanoa atu ia te ia (tagai Alema 19:1–3).
Faitau le Alema 19:4–17, ma vaavaai mo mea na oo i ai le masiofo ma isi ina ua uma ona talanoa ma Amona. Atonu foi e te manao e matamata le “Ua Auauna ma Aoao Atu e Amona le Tupu o Lamonae” mai le faailo taimi 15:18 i le 20:06. O loo maua lenei vitio i le ChurchofJesusChrist.org.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F8c%2F25%2F8c256fb3f050f7506f69031cf5f5f41e4c1dbc2d%2F8c256fb3f050f7506f69031cf5f5f41e4c1dbc2d.jpeg/full/!250,/0/default)
-
O a ni mea ua e aoaoina e uiga i le masiofo mai nei fuaiupu?
-
O le a se mea na aoaoina e Lamonae e uiga ia Iesu Keriso i aso e tolu na faatoa mavae atu?
-
Aisea e te manatu ai o lenei malamalama na aumaia ai ia Lamonae lena olioli?
Ina ua uma ona faapotopoto atu isi i le fale o le tupu, sa faateia ma faanoanoa le auauna a le masiofo o Apiso ina ua amata ona finau tagata ia i latou lava e uiga i le mafuaaga na taooto ai le tupu ma isi i luga o le fogaeleele e peiseai ua feoti (tagai Alema 19:18–28).
Faitau le Alema 19:29–36, ma vaavaai mo mea na faia e Apiso i lenei taimi o le fefinauai ma le mea na tupu mulimuli ane ia sa Lamana. Atonu foi e te manao e matamata le “Ua Auauna ma Aoao Atu e Amona le Tupu o Lamonae” mai le faailo taimi 20:07 i le 23:04. O loo maua lenei vitio i le ChurchofJesusChrist.org.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F8c%2F25%2F8c256fb3f050f7506f69031cf5f5f41e4c1dbc2d%2F8c256fb3f050f7506f69031cf5f5f41e4c1dbc2d.jpeg/full/!250,/0/default)
-
O le a le aafiaga o le talalelei a Iesu Keriso i le toatele o sa Lamana o e na filifili e talitonu?
-
O le a le upumoni e uiga i le Alii na aoao mai e Mamona i le fuaiupu 36 ina ua uma ona faasoa atu lenei tala?
O le finagalo o le Alii mo tagata uma ia o mai ia te Ia
Mai upu a Mamona i le fuaiupu 36, ua tatou aoao ai o le aao o le Alii ua faaloaloa mai i tagata uma o e o le a salamo ma talitonu i Lona suafa. Mafaufau e faailoga lenei upumoni i au tusitusiga paia.
I lenei faatatauga, o le faaloaloa mai o le aao o le Alii e aofia ai Lona alofa mutimutivale ma le naunau e faamagalo atu.
-
O a ni aafiaga na fesoasoani ia te oe e iloa ai le moni o lenei mataupu faavae i lou lava olaga po o olaga o isi?
Valaaulia tagata aoga e faasoa atu aafiaga e le patino tele. Atonu e te manao foi e faasoa atu se aafiaga.
Atonu foi e aoga le faaalu o le taimi e saili ai faataitaiga mai le soifuaga o le Faaola lea na Ia faaalia ai Lona naunau e aapa atu i tagata mai soo se ituaiga o matata o le olaga e fesoasoani ai ia i latou ia o mai ia te Ia. Faatasi ai ma le tele o isi [faataitaiga], o nisi o faataitaiga o fuaitau o mau e mafai ona e faasino i ai tagata aoga e aofia o le Mataio 9:10–13; Mareko 5:25–34; Luka 5:18–25; ma le Ioane 8:2–11. E mafai foi ona e tuu atu i tagata aoga e suesue le 2 Nifae 26:33 ma tuu atu ia i latou e faafesootai lenei fuaiupu ma le Alema 19:36 i a latou tusitusiga paia.
O nisi taimi atonu tatou te filifili sese ai o le a le fiafia se tasi i le talalelei ona o foliga o lena tagata po o mea sa ia faia i le taimi ua tuanai. Faaalu sina taimi e vaai faalemafaufau ai i se tasi i lenei tulaga. Atonu o se tagata patino e te iloa, pe e mafai foi ona e mafaufau e uiga i tagata e masani ona fetaui i ai lenei faamatalaga.
E mafai ona e fai i tagata aoga e tusi se atatosi i totonu o a latou api talaaga mo suesuega e faatusa i le tagata o loo faamatalaina i le parakalafa na muamua atu. E mafai ona latou faamaumauina a latou tali i fesili nei i lalo ifo o le atatosi na latou tusia. Ona talanoaina lea o mea na tusia e tagata aoga.
-
E faapefea le lagona o le Atua e uiga i lenei tagata?
-
E mafai faapefea e le malamalama i lagona o le Atua e uiga i lenei tagata ona aafia ai ou lagona ia i latou?
Molimau atu i upumoni sa outou talanoaina i le aso, ma uunaia tagata aoga e saili e vaai atili atu i isi e pei ona faia e le Atua.