Seminare
Alema 17: “E Tusa ma le Afioga ma le Mana o le Atua”

“Alema 17: ‘E tusa ma le Afioga ma le Mana o le Atua,’” Tusi Lesona a le Faiaoga o le Tusi a Mamona (2024)

“Alema 17,” Tusi Lesona a le Faiaoga o le Tusi a Mamona

Alema 17

“E tusa ma le Afioga ma le Mana o le Atua”

Ua puipuia e Amona le lafumanu a Lamonae

Vaai faalemafaufau i le taumafai ai e talai atu le talalelei i se vaega o tagata e mafai ona faamatalaina o ni tagata aivao, lotomaaa, ma feai. O le mea tonu lava lea na filifili e atalii o Mosaea e fai ina ua latou o atu i le laueleele o sa Lamana e talai atu le talalelei ia i latou. I le Alema 17 o loo faamatala mai ai le fesoasoani na maua e Amona mai le Atua a o ia amataina lana auaunaga i totonu o sa Lamana i le laueleele o Isamaeli. O lenei lesona e mafai ona fesoasoani ia te oe e iloa ai le fesoasoani ma le malosi e tuuina atu e le Alii ia te oe i tulaga faigata o loo feagai ma oe.

Fesoasoani i tagata aoao ia malamalama i le faatatauga ma le anotusi. O le faatatauga ma le anotusi o tusitusiga paia e mafai ona aofia ai ni tala se tele e uiga i tagata ma mea na tutupu e faatatau i ai. Fesoasoani i tagata aoga ia malamalama ma faia ni fesootaiga i le va o nei tala ina ia mafai ai ona latou iloa atili aoaoga faavae, mataupu faavae, ma savali musuia a tusitala.

Sauniuniga a le tagata aoga: Mafaufau e valaaulia tagata aoga e o mai saunia e faasoa ma talanoaina nisi o faafitauli masani po o luitau o feagai ma le autalavou ma pe aisea o le a latou manaomia ai le fesoasoani ma le malosi o le Atua i o latou olaga. Atonu foi latou te mafaufau i taimi na latou maua ai le fesoasoani a le Atua i o latou olaga.

Gaoioiga e Ono Mafai Ona Aoao Ai

O lo tatou manaomia o le fesoasoani a le Atua

Fesoasoani i tagata aoga e mafaufau i faataitaiga o taimi o le a manaomia ai e talavou le fesoasoani po o le malosi o le Atua i o latou olaga. O tulaga faataitai nei e mafai ona fesoasoani i lenei mea, pe mafai foi e tagata aoga ona fatuina ni tulaga faataitai eseese.

Ua lagona e Lusi le manaomia ona salamo ma suia le ala o loo ia ola ai i lona olaga, ae o mea uma sa ia taumafai e suia e foliga mai e lei maua ai lava se suiga.

E lagona e Guillermo le musuia e auauna atu i se misiona, ae e le fiafia ona matua ona la te manaomia lana fesoasoani i le pisinisi a le aiga.

  • O a nisi o auala e mafai ona fesoasoani ai le Atua ia Luci po o Guillermo?

  • O a nisi o auala e mafai ona la sailia ai pe iloa ai Lana fesoasoani?

Mafaufau e faaali atu le palakalafa lenei. Tuu atu i tagata aoga ia lava se taimi e mafaufau loloto ai ma tusi i a latou api talaaga mo suesuega.

Faaalu sina taimi e mafaufau loloto ai ma tusi i lau api talaaga mo suesuega pe o le a sou lagona i le sili ona e manaomia ai o le fesoasoani po o le malosiaga o le Atua i lou olaga. O a nisi o auala e te faamoemoe o le a fesoasoani ai le Atua ia te oe? A o e suesueina le Alema 17 i le asō, vaavaai mo ni auala e mafai ona e iloa ai ma valaaulia le malosi o le Atua i lou olaga.

O atalii o Mosaea

Faamatala i tagata aoga o le isi lua vaiaso e sosoo ai, o le a latou suesue ai e uiga i le malaga faafaifeautalai a atalii e toafa o Mosaea i sa Lamana. Ina ia fesoasoani i tagata aoga ia iloa pe faapefea ona fetaui lenei malaga faafaifeautalai i le faatatauga aoao o le tusi a Alema, mafaufau e aotele le parakalafa lenei.

O mataupu 1–16 i le Alema o loo toefaamatala ai mea na tutupu i le soifuaga o Alema i le 14 tausaga muamua o le nofoaiga a faamasino. I le Alema 17–27, tatou te aoao ai e uiga i le malaga faafaifeautalai a atalii o Mosaea i sa Lamana i lena lava vaitaimi e tasi. O le Alema 17 e amata ia Alema ma ana uo, o atalii o Mosaea, na feiloai ai mo le taimi muamua i le mavae ai o na 14 tausaga o valavala (tagai Alema 17:2–4; 27:16). O igoa o atalii o Mosaea o Amona, Arona, Ominae, ma Himinae.

Mafaufau e vaevae le vasega i ni vaega se fa. Atofa atu i vaega taitasi se tasi o nei fuaitau o mau e suesue i ai. Ona mafai lea e tagata mai vaega taitasi ona lipoti atu i le vasega atoa mea na latou mauaina.

Faitau fuaiupu nei, ma vaavaai mo faamatalaga taua e uiga ia Amona, Arona, Ominae, ma le misiona a Himinae.

  • O le a se mea e tulaga ese ia te oe e uiga i atalii o Mosaea mai nei fuaiupu?

  • O le a se faamaoniga na e maua i le fesoasoani po o le malosi o le Atua o loo galue i o latou olaga? Mafaufau e faailoga lenei faamaoniga i au tusitusiga paia.

Amona ma le Tupu o Lamonae

A o lei tuueseeseina nei faifeautalai e talai atu le talalelei i eria eseese, sa aoao atu ma faamanuiaina i latou e Amona. Ona alu lea o Amona i se nuu e ta’ua o Isamaeli. Ina ua ulu atu o ia i lena laueleele, sa pueina o ia ma aveina atu i luma o le tupu, o lona igoa o Lamonae (tagai Alema 17:17–20).

Faitau le Alema 17:21–25, ma vaavaai mo le ofo na faia e Amona i le Tupu o Lamonae. Atonu foi e te manao e matamata le vitio “Ua Avea Amona ma Auauna a le Tupu o Lamonae” (3:47), o loo maua i le ChurchofJesusChrist.org.

3:47

Ammon Becomes the Servant of King Lamoni | Alma 17

Ammon and the sons of Mosiah go on missions to teach the Lamanites the word of God. Ammon chooses to become King Lamoni’s servant and lives with the Lamanites.

  • Na mafai faapefea e le tauina atu e Amona i le tupu “O le a ou avea ma au auauna” (Alema 17:25) na mafai ai e Amona ona avea ma se faifeautalai e sili atu ona aoga?

A o leoleoina e Amona ma isi o auauna a le tupu ia lafu manu, sa latou fetaiai ma se tulaga faigata.

E mafai ona e valaaulia ni nai tagata aoga naunautai e o mai i luma o le potu e feauauai i le faitauina leotele o fuaiupu nei a o mulimuli ai le vasega i a latou tusitusiga paia.

Faitau le Alema 17:26–39, ma vaavaai pe na faapefea ona tali atu Amona i lenei tulaga. E mafai foi ona e matamata i le “Ua Puipui e Amona le Lafu a le Tupu” mai le faailo taimi 0:00 i le 3:10. O loo maua lenei vitio i le ChurchofJesusChrist.org.

5:25

Ammon Defends the King's Flocks | Alma 17–18

While King Lamoni’s servants and Ammon take care of the sheep, a group of thieves tries to steal them. Ammon defends the flock and saves the king’s sheep. The king believes Ammon is the Great Spirit.

  • E mafai faapefea ona fesootai le talitonuga o Amona i lenei tulaga i le folafolaga na tuu atu e le Alii i le tamā o Amona, o Mosaea, i le Mosaea 28:7?

  • Ana faapea sa e i ai iina, mata o le a sou manatu e uiga ia Amona?

Faitau le Alema 18:1–3, ma vaavaai mo mea na ta’u atu e isi auauna a sa Lamana i le Tupu o Lamonae e uiga i lenei aafiaga.

  • Na faapefea ona faamatala e auauna a le tupu ia Amona?

E ui ina sa faigata i auauna a le tupu ona faamatalaina le mafuaaga na mafai ai e Amona ona faasaoina lafu manu a le tupu i se ala faavavega, ae sa latou iloaina sa ia te ia le mana sa sili atu nai lo le mea e mafai ona maua e se tagata soifua.

Mai le aafiaga o Amona, e mafai ona tatou aoao ai e faapea, e tuuina mai e le Alii Lona malosi ma le mana i Ana auauna o e taumafai e faia Lona finagalo.

Ina ua lata i le faaiuga o lana misiona e 14 tausaga, sa tomanatu Amona i le malosi ma le mana na tuuina atu e le Atua ia te ia i lona taimi atoa na auauna atu ai ia sa Lamana.

Faitau le Alema 26:12, ma vaavaai po o le a le tala a Amona e uiga i le puna o lona malosi.

Mafaufau e vaevae le vasega i ni vaega se tolu ma tofi atu i vaega taitasi se tasi o fesili nei e talanoaina. E mafai e vaega taitasi ona fatu se lisi o ni tali se tele e mafai ona latou mafaufau i ai i se minute se tasi pe lua ona faasoa mai lea o a latou tali i le vasega.

I se isi itu, e mafai ona e tusia fesili i vaega eseese o le laupapa. E mafai ona o mai tagata aoga i le laupapa ma lisi tali i se tasi pe sili atu foi o fesili seia oo ina tele tali e tusia i tafatafa o fesili taitasi. Ona mafai lea ona talanoaina tali a tagata aoga o se vasega.

  • O a nisi o faataitaiga o tulaga lea tatou te manaomia ai le fesoasoani po o le malosi o le Alii i o tatou olaga?

  • O a nisi o auala e ono faamanuiaina ai i tatou e le Alii i Lana fesoasoani po o le malosi?

  • O le a se mea e mafai ona e faia e valaaulia ai pe maua ai le fesoasoani po o le malosi o le Atua i lou olaga?

Valaaulia tagata aoga e mafaufau e uiga i mea ua latou aoaoina e uiga i le Atua i le asō lea e mafai ona fesoasoani ia i latou i o latou olaga patino. Valaaulia i latou e faamaumau o latou manatu ma uunaiga faaleagaga i a latou api talaaga mo suesuega. Uunaia i latou e saili le fesoasoani mai le Tama Faalelagi ina ia mafai ai ona faataunuu mea e le mafai ona latou faia e i latou lava.