Mauaina o le Malamalama Faaleagaga, Vaega 4

Sailia o Tali i Fesili Faaleagaga

E i ai taimi, atonu e i ai ni au fesili faaleagaga po o ni atugaluga e uiga i mataupu faaleaoaoga faavae, faaletagata lava ia, faaleagafesootai, pe faaletalafaasolopito. Pe a i ai ni au fesili poo atugaluga faapena, e mafai ona e faatino i le faatuatua, iloilo manatu ma fesili faatasi ma se vaaiga e faavavau, ma saili le malamalama atili e ala i punaoa paia ua filifilia. O lenei lesona ua faamoemoe e fesoasoani ia te oe e toe faamanatu ai mataupu faavae o le mauaina o le malamalama faaleagaga.

O le aoaoina o mataupu faavae o le mauaina o le malamalama faaleagaga. O le aoaoina ma le iloiloina o nei mataupu faavae e mafai ona fesoasoani i tagata aoga e tali atu ai pe a tulai mai ni fesili faaleagaga. O le iloiloina e le aunoa o i latou o le a mafai ai e tagata aoga ona teuloto lelei ma faaaoga nei mataupu faavae i aso taitasi.

Sauniuniga a le tagata aoga: E mafai ona valaaulia tagata aoga e mafaufau e uiga i a latou fesili faaleagaga sa i ai pe o i ai i le taimi nei ma mea sa latou faia e sue ai tali i a latou fesili.

Gaoioiga e Ono Mafai Ona Aoao Ai

Luitau i le faatuatua

Faitau tulaga faataitai nei. Pe atonu e te manao e matamata le vitio “O Punavai Paia ua Filifilia” mai le faailo taimi 2:43 i le 4:19, o loo maua i le ChurchofJesusChrist.org.

E mafai ona e filifili e faaaoga se tasi pe sili atu o tulaga faataitai fautuaina pe fatu sau oe lava tulaga faataitai e faasoa atu i le vasega. Mafaufau e tuu atu i tagata aoga se tulaga faataitai se tasi e galulue ai a o faaauau pea le lesona pe atofa atu ni tulaga faataitai i ni vaega toalaiti ma fai atu ia i latou e talanoaina fesili i le taimi o le lesona.

O Ashlyn o se tamaitai talavou na faalogo i se mea mai se uo na faapopoleina ai o ia e uiga i le Ekalesia. Sa ia lagonaina ua natia le faamatalaga mai ia te ia ma sa pelogia o ia i le le ta’uina atu o nei mea i le amataga o lona olaga. Sa amata ona ia talanoa atu i isi o e sa faapena foi le le fiafia, ma sa ia faitau i faamatalaga le lelei e uiga i le mataupu.

Sa aoao Hugo e uiga i se autu luitauina faaleaoaoga faavae i le seminare ma alu atu i luga o le initoneti e aoao atili i ai. Sa ia vaai i punavai sa faitioina ai le Ekalesia e faatatau i lenei mataupu. Ona o le fiailoa, sa ia matamata ai i se vitio sa faaalia ai le le lelei o aoaoga a le Ekalesia e uiga i le mataupu. O lenei aafiaga na tuua ai o ia e fesiligia le moni o le Ekalesia mo le taimi muamua i lona olaga.

• O le a sou lagona i nei tulaga?

• O le a sou manatu o le a faape’i ona e tali atu?

O le i ai o fesili faaleagaga e lei taliina e uiga i mataupu faaleaoaoga faavae, faaletagata lava ia, faaleagafesootai, pe faaletalafaasolopito e mafai ona faigata. Mafaufau i ni fesili faapena atonu o ia te oe ma mafaufau e tusi i lalo mo lenei lesona.

E i ai mea e mafai ona e aoaoina ma faia e mafai ona fesoasoani ia te oe e tali atu ai i fesili po o atugaluga i le amio sa’o ma le faatuatua. A o e suesue i lenei lesona, mafaufau pe mafai faapefea e faamatalaga ua e aoaoina ona fesoasoani ia te oe e tali atu ai i au lava fesili faatasi ai ma le faalagolago i le Tama Faalelagi ma Iesu Keriso.

O mataupu faavae o le mauaina o le malamalama faaleagaga

O mataupu faavae nei e mafai ona taiala ai oe i au taumafaiga e maua le taitaiga ma le malamalama e faatatau i fesili faaleagaga:

• Faatino i le faatuatua.

• Iloilo manatu faavae ma fesili faatasi ai ma se vaaiga e faavavau.

• Saili nisi faamatalaga e ala i punavai paia ua filifilia.

E mafai ona e filifili e fetuunai lenei lesona, e faalagolago i le masani o au tagata aoga i mataupu faavae o le mauaina o le malamalama faaleagaga. Mo se faataitaiga, afai e i ai ni au tagata aoga e masani i mataupu faavae ae o isi e leai, e mafai ona e tuu atu ia i latou e masani i mataupu faavae e faamalamalama atu i le vasega. Afai e fou uma au tagata aoga i nei mataupu faavae, o le a manaomia ona e faaaluina se taimi tele e faailoa atu ai mataupu faavae. E mafai ona e faasino i le “Mauaina o le Malamalama Faaleagaga,” Vaega 1, 2, ma le 3 mai le amataga o lenei tusi lesona.

Faatino i le faatuatua

Faitau tulaga faataitai nei. Pe atonu e te manao e matamata le vitio “O Punavai Paia ua Filifilia” mai le faailo taimi 4:19 i le 5:35, o loo maua i le ChurchofJesusChrist.org. Atonu foi e te manao e faitau ia parakalafa 5–7 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022) a o lei faitauina tulaga faataitai pe matamata le vitio.

O se tasi o auala e toe iloilo ai parakalafa o loo ta’ua i le fuaiupu na muamua atu o le tuu lea o tagata aoga i ni vaega taitoafa. Valaaulia ni tagata se toatolu o le vaega e faitau leotele se tasi o parakalafa e tolu i le vaega. Ona valaaulia lea o le tagata lona fa o le vaega e aotele mai mea na faitauina e le isi toatolu.

E mafai ona e tuu atu i tagata aoga e tali fesili nei e faavae i le tulaga faataitai na latou filifilia i luga.

Ina ua uma ona iloa le mea na ia faia, sa matua le fiafia Ashlyn ma sa le toe auai o ia i le lotu. Mo le silia ma se tausaga, sa ia faataumamao mai le Ekalesia. Mulimuli ane, sa fesili atu se uo mamae ia te ia pe aisea ua le toe auai ai o ia. Sa ia faasoa atu ia te ia se lauga o le konafesi aoao sa ia manatu o le a aoga ma valaauliaina o ia e tatalo e uiga i mea sa ia faitauina.

Sa teu pea e Hugo ona masalosaloga ma popolega ia te ia lava ae sa faaauau pea ona auai i le lotu. Ae o ona lagona o le le mautonu sa lei aluese. I se taimi faapitoa, sa ia maua se lagona malosi e tatau ona ia talanoa atu i ona matua e uiga i ona popolega. O le uluai lagona faaleagaga lea na ia iloaina talu mai lona aafiaga i luga o le initoneti.

• O faapefea ona e vaaia Ashlyn ma Hugo o faatino pe le faatinoina i le faatuatua?

• O le a se mea e mafai ona e fai atu e ono uunaia ai i laua e liliu atu i le Atua e tali atu ai i o laua luitau?

• O a mau e mafai ona fesoasoani i se tagata e faatino i le faatuatua pe a i ai sana fesili e le faigofie ona taliina?

Atonu e te manao e tuu atu i tagata aoga sina taimi e sue ai mau e tali ai le fesili na muamua atu. O nei mau e mafai ona aofia ai le 2 Nifae 31:20 ma le Faataoto 3:5–6. A uma ua lava se taimi, ona mafai lea ona latou faasoa atu i se tasi o nofo i o latou autafa. I se isi faiga, e mafai ona latou tusia fuaiupu na latou maua i luga o le laupapa ae o isi tagata o le vasega e mafai ona faitauina fuaiupu latou te le masani ai. Ona mafai lea e tagata aoga ona faasoa mai mea na latou aoaoina mai mau na maua e tagata o le latou vasega.

Iloilo manatu faavae ma fesili mai se vaaiga e faavavau

O se tasi o auala e toe iloilo ai parakalafa nei o le tuu lea o tagata aoga i ni vaega toalaiti ma valaaulia tagata taitasi o le vaega e faitau parakalafa uma e tolu. Ona valaaulia lea o i latou e faasoa mai se laina se tasi i la latou vaega na sili ona faagaeetia ai i latou mai parakalafa.

Iloilo parakalafa 8–10 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae.

• E faapefea e le iloiloina o manatu ma fesili ma i se vaaiga e faavavau ona fesoasoani ia Ashlyn po o Hugo i le taimi muamua na aliae ai o la masalosaloga?

• E mafai faapefea ona fesoasoani ia i laua i o laua tulaga oi ai nei?

• O le a se mea e te manao ia Hugo po o Ashlyn ia malamalama ai e uiga i le Atua ma Lana fuafuaga i lenei taimi i o laua olaga?

Atonu o se isi lea nofoaga lelei e faataitai ai e tagata aoga le faaaogaina o tusitusiga paia. E mafai ona e fai i tagata aoga e sue ni mau e lagolago ai a latou tali i le fesili na muamua atu. Mo se faataitaiga, afai e ta’u mai e se tagata aoga e le o taimi uma e tuuina mai ai e le Tama Faalelagi ia i tatou se tali atoa i le taimi e tasi, e mafai ona ia faaaogaina le 2 Nifae 28:30 e lagolago ai lena faamatalaga.

Saili le malamalama atili e ala i punavai paia ua filifilia

Iloilo parakalafa 11–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae.

O se tasi o auala e iloilo ai parakalafa o loo ta’ua i le fuaiupu na muamua atu o le valaaulia lea o ni tagata aoga se toalua e faitau leotele ia parakalafa i le vasega. Ona valaaulia lea o se volenitia e tusi i luga o le laupapa a o faasoa mai e tagata aoga ni punavai paia ua filifilia sa latou faalogo o ta’ua.

Faitau tulaga faataitai nei. Pe atonu e te manao e matamata le vitio “O Punavai Paia ua Filifilia” mai le faailo taimi 5:35 i le 7:01, o loo maua i le ChurchofJesusChrist.org.

Sa filifili Ashlyn e faitau le lauga o le konafesi aoao na fautuaina atu ia te ia e lana uo. A o ia faitau, sa ia lagonaina se lagona o le filemu ma le faamalieina lea sa matuai ese lava mai le mea sa ia lagonaina ina ua faitau i faamatalaga le lelei e uiga i le Ekalesia. Sa ia lagonaina se faamautinoaga patino e faapea o loo i ai le lelei ma le upumoni i mea sa ia faitauina. I se taimi, e ala i le tatalo ma le suesue faamaoni, sa ia lagonaina le faamalosia o lana molimau, e ui o loo i ai pea ni ana fesili e lei taliina.

Sa talanoa Hugo i ona matua ma iloa ai sa agalelei tele ma malamalama i laua e uiga i ona atugaluga. Sa la faailoa atu o ia i le punaoa o Autu o le Talalelei i le Gospel Library, ma sa latou faitau faatasi e uiga i autu na faapopoleina ai o ia. Sa ia maua le mafanafana i le iloaina o loo i ai ni tali faaperofeta e mafai ona ia vaavaai i ai mo tali i ana fesili.

• O a punavai na maua ai e tagata taitoatasi i tulaga faataitai ia faamatalaga? O a punavai sa faatuatuaina? Aisea pe aisea foi e leai ai?

  E ui o loo i ai punavai paia ua filifilia ua manino ona faauigaina, e pei o tusitusiga paia, perofeta, ma le Agaga Paia, o loo i ai isi punavai faatuatuaina e faasino atu ai foi i tatou ia Iesu Keriso ma ogatusa ma aoaoga a perofeta o aso nei.

• O le a le eseesega na i ai ina ua liliu atu Ashlyn ma Hugo i punavai paia ua filifilia?

• O a punavai paia ua filifilia e te lotofaafetai ai? Aisea?

Mafaufau i mea ua e aoaoina i le aso ma pe faapefea ona fesoasoani i fesili faaleagaga po o luitau o ia te oe po o isi. Mafaufau e tusi i lau api talaaga mea ua e aoaoina e ono fesoasoani ia te oe e maua ai le filemu ma le malamalama. Valaaulia le faatosinaga a le Tama Faalelagi e musuia oe a o e manatunatu ma tusitusi.

Mafaufau e valaaulia ni nai volenitia e faasoa mai ni o latou malamalamaaga i le vasega. Molimau atu i upumoni sa outou talanoaina i le asō ma uunaia tagata aoga e faaaoga nei mataupu faavae pe a latou feagai ma fesili faaleagaga.

Manatu ma Talaaga o Faamatalaga

E mafai faapefea ona fesoasoani le Atua ia i latou o e lagonaina ua luluina lo latou faatuatua ia te Ia po o Lana talalelei?

Na aoao mai Peresitene Dieter F. Uchtdorf:

Sa ou aoaoina i lo’u olaga e faapea e le tau manaomia ona tatou “maoae” i so o se mea ina ia amata ona avea ai ma tagata ua faamoemoe le Atua tatou te avea ai.

O le a ave oe e le Atua i le tulaga o e i ai i lenei lava taimi ma amata ona galueaiina oe. Pau lava le mea e te manaomiaina o se loto naunau, o se manao ia talitonu, ma le faalagolago i le Alii. …

A e faatinoina sina faatuatua itiiti ma amata lau savaliga o se soo filemu a lo tatou Alii o Iesu Keriso, o le a suia lou loto [see 1 Samuelu 10:9]. O le a faatumulia lou tagata atoa i le malamalama [tagai Mataio 6:22].

O le a fesoasoani le Atua ia te oe ia avea o se tagata sili atu i lo le tagata sa e manatu e mafai ona avea ai oe. Ma o le a e iloaina ai o le talalelei a Iesu Keriso, e moni lava o loo galue i lou olaga. E aoga. (Dieter F. Uchtdorf, “E Aoga!,” Liahona, Nov. 2015, 22–23)

Gaoioiga Faaopoopo e Aoao Ai

O le faaaogaina o le tala ia Iakopo ma Serema e aoao atu ai e uiga i le sauniaina e taulima le taufaasese

E mafai ona e faaaogaina lenei tala e faaali atu ai ni nai mataupu faavae e faatatau i le manaomia o le mauaina o le malamalama faaleagaga. E mafai e tagata aoga ona faitau le Iakopo 7:1–4, ma vaavaai mo mea ua latou aoaoina e uiga ia Serema. Mafaufau e lisi mea e maua e tagata aoga i luga o le laupapa. Aisea atonu e taua ai le malamalama i na faamatalaga auiliili? Ina ua uma ona faafetaiai ma faafememeaiina e Iakopo ia Serema, sa oo ina iloa e tagata ua faaseseina Serema ma sa faaseseina i latou. Faitau le Iakopo 7:23, ma vaavaai mo malamalamaaga e uiga i le teenaina o tosinaga taufaasese. Atonu e mafai ona e fesili i tagata aoga pe na faapefea ona fesoasoani tusitusiga paia ia i latou e aloese ai mai le taufaasese.

O le sauniaina a o lei tulai mai luitau o le faatuatua

O mataupu faavae o le mauaina o le malamalama faaleagaga e le gata ina aoga mo taimi po o tulaga lea e luitauina ai le faatuatua ae e mafai foi ona fesoasoani i le fausiaina o le faatuatua i soo se taimi. Atonu e mafai ona e fesili i tagata aoga pe mafai faapefea e mataupu faavae o le mauaina o le malamalama faaleagaga ona fesoasoani ia i latou a o lei oo mai se luitau i lo latou faatuatua. Mafaufau e valaaulia tagata aoga e faitau le Alema 32:37–38, ma vaavaai pe faapefea ona fesootai le talafaatusa o le fatulaau i nei fuaiupu i le faaaogaina o mataupu faavae o le mauaina o le malamalama faaleagaga a o lei tulai mai luitau o le faatuatua (le vevela o le la).

Faamuamua mea e tatau ona faamuamua

I le taulimaina o luitau i le faatuatua, fesoasoani i tagata aoga e faatumauina se taulaiga i mataupu faavae o le talalelei e liua ai. O le upusii lenei e mafai ona fesoasoani e aoao atu ai lenei manatu.

A o auauna ai o se tasi o le Au Fitugafulu, sa faasoa mai ai e Elder Lawrence E. Corbridge le malamalamaaga lenei:

“Amata i le taliina muamua o uluai fesili. E i ai uluai fesili ma e i ai foi fesili lona lua. Tali muamua uluai fesili. E le tutusa uma fesili ma e le tutusa uma upumoni. O uluai fesili e aupito sili ona taua. O isi mea uma o loo i lalo ifo. E itiiti lava ni nai uluai fesili. O le a ou ta’ua le fa o i latou.

1. O i ai ea se Atua o lo tatou Tama?

2. O Iesu Keriso ea o le Alo o le Atua, le Faaola o le lalolagi?

3. O Iosefa Samita ea o se perofeta?

4. Pe O Le Ekalesia a Iesu Keriso o le Au Paia o Aso e Gata Ai o le malo lea o le Atua i le lalolagi?

“O le eseesega, o fesili lona lua e le muta. …

“Afai e te taliina fesili autu, e taliina foi fesili lona lua” (Lawrence E. Corbridge, “Stand Forever,” [Brigham Young University devotional, Ian. 22, 2019], 2–3, speeches.byu.edu).