“Mauaina o le Malamalama Faaleagaga, Vaega 3: Saili le Malamalama Atili e ala i Punavai Paia ua Atofaina” Tusi Lesona a le Faiaoga o le Tusi a Mamona (2024)
“Mauaina o le Malamalama Faaleagaga, Vaega 3: Saili le Malamalama Atili e ala i Punavai Paia ua Atofaina” Tusi Lesona a le Faiaoga o le Tusi a Mamona
Mauaina o le Malamalama Faaleagaga, Vaega 3
Saili le Malamalama Atili e ala i Punavai Paia ua Atofaina
O se tasi o faamoemoega o le atamai i aoaoga faavae o le fesoasoani lea ia te oe e aoao ma faaaoga mataupu faavae o le mauaina o le malamalama faaleagaga. E mafai ona fesoasoani lenei lesona ia te oe e malamalama ai i le taua o le saili o le mea moni mai punavai ua tuuina mai ma le alofa e le Tama Faalelagi ma Iesu Keriso.
Faaaogaina o punavai paia ua atofaina. Aoao tamaiti aoga e liliu atu i punavai paia ua atofaina pe a sailia tali i fesili faaleagaga. O se tasi auala e faia ai lenei mea o le faataitai lea o le faagasologa mo tamaiti aoga. Fesoasoani ia i latou e aoao e iloa le eseesega o le mea moni mai le mea sese ma ia malamalama o nisi o punavai o faamatalaga e le faatuatuaina pe saili e faatamaia le faatuatua.
Sauniuniga a le tamaitiiti aoga: Valaaulia tamaiti aoga e mafaufau e uiga i fesili taua po o atugaluga o ia i latou ma punavai eseese e mafai ona latou liliu atu i ai mo ni tali. Uunaia i latou ia saunia e faasoa mai se faataitaiga o se tasi o nei punavai pe aumai foi se tasi i le vasega.
Gaoioiga e Ono Mafai Ona Aoao Ai
E taua punavai
Mafaufau e faaaoga le suavai e fai ma se lesona faatino. O se tasi o filifiliga o le sasaa o se ipu vai manino ma valaaulia se tamaititi aoga e inuina i luma o le vasega. O le isi filifiliga o le valaaulia lea o se tamaititi aoga e fufulu o latou lima i se pesini vai.
Mafaufau mo sina taimi i le taua o le suavai i lou olaga.
-
O le a le taimi e sili ai ona taua ia te oe le i ai o le suavai?
-
Aisea e taua ai le puna o le vai e te inuina?
O le sailia o le upumoni e mafai ona pei o le inuina o le vai: e taua le punavai. Mafaufau i punavai e te liliu atu i ai pe a i ai ni au fesili po o ni atugaluga. O le a sou talitonuga mautinoa o nei punaoa e maua ai tali moni?
Mafaufau e uunaia tamaiti aoga e faasoa mai mea latou te mafaufau i ai mo le sauniuniga a le tamaitiiti aoga.
O le sailia o tali mai punavai faatuatuaina e mafai ona faia ai le eseesega i le va o le aoaoina o le upumoni ma le faaseseina e manatu sese. Atonu tatou te le iloaina i taimi uma pe a i ai i punavai ni faamatalaga sese. O nisi o punavai e ono fuafuaina e faatupu ai le le talitonu, fefe, ma le masalosalo. E finagalo le Tama Faalelagi e tali au fesili faamaoni ma ua saunia ni punavai faatuatuaina e taiala ai oe. O lenei lesona ua faamoemoe e fesoasoani ia te oe e aoao ai ma saili tali e ala i punavai paia ua atofaina.
Sailia o le upumoni
I le Tusi a Mamona, sa faafetauia ai e se tagata e igoa ia Serema ia Iakopo, le uso o Nifae, i se taumafaiga e “lulu ese [Iakopo] mai le faatuatuaga” (Iakopo 7:5). Sa finau Serema o loo aoao atu e Iakopo mataupu sese e uiga ia Iesu Keriso: “E leai se tagata na te iloaina ni mea faapena; ona e le mafai ona iloa e ia e uiga i mea e oo mai” (Iakopo 7:7). Sa tali atu Iakopo e ala i le folafola atu o le auala na ia iloa ai le upumoni e uiga i le Faaola o le lumanai.
Faitau le Iakopo 7:8–12, ma vaavaai mo punavai na fesoasoani ia Iakopo e aoao ai e uiga ia Iesu Keriso.
-
Aisea e te manatu ai na faatuatuaina e Iakopo nei punavai e tuuina mai ai le upumoni?
Mafaufau e amata se lisi o punavai paia ua atofaina i luga o le laupapa. A uma punavai o loo maua i le Iakopo 7:8–12, atonu e te manao e fai atu i tamaiti aoga e lisi mai isi punavai faatuatuaina o loo latou iloa. Uunaia tamaiti aoga ina ia saunia e faaopoopo i le lisi pe a maea le gaoioiga lenei.
Faitau palakalafa 1, 11–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022), ma vaavaai mo faamatalaga e uiga i punavai o le atamai. Mafaufau e faailoga ia upu po o fasifuaitau e anoa ia te oe.
-
O le a se mea sa tumatila ia te oe mai nei parakalafa?
-
E mafai faapefea e punavai o loo e faaaogaina ona faia se eseesega i faamatalaga e te maua?
-
E faapefea e punavai paia ua atofaina ona faaalia ai le alofa o le Tama Faalelagi ma Iesu Keriso mo i tatou?
O le gaoioiga lenei, lea o loo faaauau ai le tala faataitai a Adry mai le “Mauaina o le Malamalama Faaleagaga, Vaega 2,” o le a fesoasoani i tamaiti aoga e faataitai ai le faaaogaina o punavai paia ua atofaina. Afai ua talitonu tamaiti aoga i le faaaogaina o nei punavai, mafaufau e faaauau le gaoioiga suesue faaletagata lava ia.
E mafai e tamaiti aoga ona galulue taitoatasi, i paga, po o ni vaega toalaiti. Mafaufau e tusi le fesili i luga o le laupapa ma faaali atu punavai fautuaina po o le tuuina atu i se pepa e tufa atu. Fesoasoani i tamaiti aoga e faaaoga lelei o latou taimi ina ia maua se taimi mo le gaoioiga suesue faaletagata lava ia.
Faaaogaina o punavai paia ua atofaina.
Tusi Lesona a le Faiaoga o le Tusi a Mamona(2024)—“Mauaina o le Malamalama Faaleagaga, Vaega 3”
O se lesona na muamua atu na faailoa atu ai ia Adry, o lē sa fesili i le fesili “Afai e i ai moni lava se Atua alofa, aisea o le a Ia faatagaina ai tagata ia puapuagatia?” Ina ia faataitai le sailia o le upumoni mai punavai paia ua atofaina, faaalu ni nai minute e faamaea ai ia le itiiti ifo ma le lua ni gaoioiga nei. Faamaumau i totonu o lau api talaaga o suesuega mea na e aoaoina.
-
Matua ma taitai o le Ekalesia: Tesi atu i se matua poo se taitai o le Ekalesia le fesili a Adry, ma faamatala atu o loo e talanoaina le fesili i le seminare ma e te fia iloa po o le a so latou manatu e uiga i ai.
-
Tatalo: I se tatalo patino le leoa, ole atu i le Alii mo le taitaiga ma musumusuga mai le Agaga Paia i lenei fesili. Tusifaamaumau manatu ma lagona e oo mai ia te oe.
-
Tusitusiga Paia: Saili ni mau e mafai ona fesoasoani ia Adry. Mo se faataitaiga, e mafai ona e faitau e uiga i le nuu o Alema i le Tusi a Mamona o e na oo i mafatiaga o le faatagataotauaina faaletino (tagai Mosaea 23:21–23; 24:8–15).
-
O perofeta a le Alii: Sue se faamatalaga faaperofeta e mafai ona fesoasoani ia Adry. Mo se faataitaiga, faitau le saunoaga lenei a Elder Joseph B. Wirthlin (1917–2008) o le Korama a Aposetolo e Toasefululua:
O le aoao e onosaia taimi o faanoanoaga, mafatiaga, ma le faavauvau o se vaega o lo tatou aotauina i mea moni o le olaga. O nei aafiaga, e ui ina e masani ona faigata ona onosaia i le taimi e tupu ai, ae o ituaiga aafiaga moni ia e faalauaiteleina ai o tatou malamalamaaga, fausia o tatou tagata, ma faateleina lo tatou agaalofa mo isi.
Talu ai ona sa matuai ogaoga puapuaga o Iesu Keriso, o lea e malamalama ai o Ia i o tatou mafatiaga. E malamalama o Ia i o tatou tiga. Tatou te oo i mea faigata ina ia tatou maua foi le faateleina o lo tatou agalelei ma le malamalama i isi. (Joseph B. Wirthlin, “Ia Tuu Po o le A Lava se Mea e Tupu, Ia Fiafia Pea,” Liahona, Nov. 2008, 27)
Faaaoga fesili nei po o isi e mafai ona fesoasoani ai i tamaiti aoga ia malamalama atili i le ala e mafai ai e punavai paia ua atofaina ona tuuina mai tali i fesili faigata.
-
O a ni mea na aoao mai e nei punavai o le a e manao e faasoa atu ia Adry?
-
O le a se mea ua e aoaoina o le a faia ai se eseesega i le auala e te sailia ai tali i fesili faigata?
© 2023 Puletaofia e le Intellectual Reserve, Inc. Ua taofia aiā tatau uma.
Fesili o le agaga
I le taimi o le gaoioiga lenei, ia nofouta i tamaiti aoga o e atonu e manaomia le fesoasoani patino. Mafaufau e faasino atu i latou i punaoa aoga po o le fai atu o fesili tulitatao e fesoasoani ai ia i latou e taulai atu i a latou taumafaiga.
Na taua e Elder David A. Bednar o le Korama a Aposetolo e Toasefululua ia fesili faigata ma atugaluga o le olaga o ni “fesili o le agaga” (tagai “Ana Iloa e Outou o Au,” Liahona, Nov. 2016, 103). I lau api talaaga mo suesuega, lisi ni “fesili o le agaga.” O fesili nei e mafai ona i ai ia te oe po o fesili atonu o i ai i au uo po o tagata o le aiga.
Filifili se fesili e te manaomia ai le fesoasoani a le Tama Faalelagi ia malamalama ai. Faaalu sina taimi e saili ai le malamalama atili mai punavai paia ua atofaina. Valaaulia le Agaga Paia e taiala oe, ma faamaumau i lau api talaaga mo suesuega le malamalama e te mauaina.
Ina ia amata, e mafai ona e sailia le ChurchofJesusChrist.org, le polokalama o le Gospel Library, po o lomiga o konafesi i mekasini a le Ekalesia e saili ai faamatalaga mai taitai o le Ekalesia o loo talanoaina ai lau fesili. O le Taiala i Tusitusiga Paia, o le Taiala i Autu, ma le faasino upu i le fusi tolu e mafai foi ona faailoa mai ai mau aoga.
Manatua, o le sailia o tali i fesili faaleagaga e alu ai le taimi. A o e mulimuli i le mamanu a le Alii o le mauaina o le malamalama faaleagaga, e mafai e le Agaga Paia ona aoao oe i “lea fuaitau i luga o lea fuaitau, … o sina mea itiiti i i ma sina mea itiiti i o” (2 Nifae 28:30). Vaavaai mo avanoa e faasoa atu ai mea o loo e aoaoina i tagata o le aiga po o taitai o le Ekalesia.
Uunaia tamaiti aoga naunautai e faasoa mai pe faapefea e le sailia o tali mai punavai paia ua atofaina ona fesoasoani ia i latou e faalatalata atili atu ai i le Tama Faalelagi ma Iesu Keriso. Mafaufau e molimau atu i lenei upumoni.