1 Nifae 6–7

Faailoaina o “Mea a le Atua”

Afai e te tusi se faamaumauga ina ia tausia mo tupulaga i le lumanai e aoao mai ai, o le a se mea e mafai ona e faaaofia ai? Na faaalia e Nifae lona manao ina ia fiafia le Atua i ana tusitusiga ma faatauanau ai isi e mulimuli ia Iesu Keriso. O lenei lesona o le a fesoasoani e te malamalama ai i le ala e mafai ai e faamoemoega o le Tusi a Mamona ona fesoasoani ia te oe i au suesuega ma i lou olaga.

Taulai atu i le faamoemoega o le tusitala. E tusa ai ma lona itulau autu, o le Tusi a Mamona na tusia “e ala i le agaga o valoaga ma faaaliga” e faatalitonu ai tagata uma o Iesu o le Keriso. A o suesue tamaiti aoga, uunaia i latou e mafaufau loloto i le pogai atonu na tusifaamaumauina ai e tusitala taitasi se aoaoga po o se mea faapitona na tupu ma le ala e fesoasoani ai i le aufaitau ia latalata atili atu ia Iesu Keriso.

Sauniuniga a le tamaitiiti aoga: Uunaia tamaiti aoga e fai a latou suesuega faaletagata lava ia i aso taitasi o le Tusi a Mamona. Valaaulia i latou e mafaufau loloto i o latou aafiaga i le suesueina o le Tusi a Mamona i le taimi nei ma mea o loo latou aoaoina.

Gaoioiga e ono Mafai Ona Aoao Ai

Aisea e Suesue ai le Tusi a Mamona?

O mea nei ua faamoemoe e fesoasoani ai i tamaiti aoga e faailoa mai pe aisea na faaaofia ai e Nifae mea sa ia faia i lana talafaamaumau. Afai e te manao e faaaoga se ata, seti se kopi o le Tusi a Mamona faatasi ma isi tusi ma valaaulia tamaiti aoga e faatino lenei tulaga o se vasega po o ni paga.

Mafaufau pe faapefea ona e tali atu pe afai e fesili se tasi ia te oe i fesili nei:

• E tele tusi e uiga i tapuaiga ma le avea ma se tagata e sili atu ona lelei; aisea e tatau ai ona ou faitauina le Tusi a Mamona? O le a lana mea e fai mo au? E faapefea ona ese pe sili atu nai lo isi tusi?

Valaaulia ni nai tamaiti aoga e faasoa mai mea atonu latou fai atu ai. Faafetai atu ia i latou mo a latou tali ma faamalo atu ia i latou i auala latou te tali lelei atu ai. Valaaulia i latou e vaavaai mo nisi malamalamaaga loloto a o latou suesue.

Na faasoa mai e Nifae lona faamoemoe, po o faamoemoega, i le faamaumauina o mea sa ia faia i le Tusi a Mamona. O le iloaina o nei faamoemoega e mafai ona fesoasoani tatou te malamalama ai i le pogai e tatau ai ona tatou faitau i le tusi ma mea e mafai ona ia faia mo i tatou.

Faitau le 1 Nifae 6:3–6 ma mafaufau e faailoga upu po o fasifuaitau e faailoa ai faamoemoega o Nifae i le tausiaina o lana talafaamaumau. Atonu e fesoasoani le iloa e faapea “i le Atua o Aperaamo, … Isaako, ma … Iakopo” (fuaiupu 4) o se faalaniga mo Iesu Keriso.

• E faapefea ona e faamatalaina le pogai na faamaumau ai e Nifae mea sa ia faia?

E tusa ai ma Nifae, o ana tusitusiga sa faamoemoe e faatauanau ai i tatou e o mai ia Iesu Keriso ma o lo o i ai na o mea e fiafia i ai le Atua.

Faaaoga sina taimi e mafaufau ai e uiga i lou aafiaga i le faitauina o le Tusi a Mamona e oo mai i le taimi lenei.

Fuafua pe sili ona lelei mo tamaiti aoga le tali leotele atu i fesili nei, mafaufau e uiga i a latou tali taitoatasi, pe tusi a latou tali i a latou api talaaga mo suesuega.

• O fesoasoani le Tusi a Mamona ia te oe ia iloa mea e fiafia i ai le Atua? Afai o lea, na faapefea?

• O e lagona o le suesueina o le Tusi a Mamona e fesoasoani lea ia te oe e latalata atili atu ai ia Iesu Keriso ma faaolaina ai? Aisea pe aisea foi e leai ai?

• E mafai faapefea e le iloaina o mea a le Atua ma le latalata atili atu ia Iesu Keriso ona avea o se faamanuiaga i lou olaga?

O le omai ia Iesu Keriso ma le iloaina o mea e fiafia i ai le Atua

O se tomai aogā mo le suesueina o tusitusiga paia o le vaavaai lea mo faamoemoega o Nifae a o e faitauina le Tusi a Mamona. O le a e maua le avanoa e faataitai ai le faia o lenei mea a o e suesueina le 1 Nifae 7.

Mafaufau e faaali atu faatonuga nei, mau faasino, ma aotelega ma valaaulia tamaiti aoga e filifili se vaega e suesue. Fuafua pe sili ona lelei mo tamaiti aoga le suesue taitoatasi, i ni paga, pe i ni vaega toalaiti. Atonu e aoga le savalivali solo i totonu o le potu ma fesoasoani i soo se tamaitiiti aoga o e atonu e i ai ni fesili pe manaomia foi se fesoasoani ia malamalama pe faapatinoina mea o loo latou faitauina.

O mea na tutupu na toe faamatalaina e Nifae i le 1 Nifae 7 e mafai ona vaevaeina i ni vaega taua se tolu. Faitau aotelega nei o vaega taitasi. Filifili se tasi ma suesue atili i ai, ma vaavaai mo soo se mea e fiafia i ai le Atua ma fesoasoani ia i tatou e omai ai ia Keriso.

Vaega 1. 1 Nifae 7:1–5. Na toe foi atu Nifae ma ona uso i Ierusalema e tauanau le aiga o Isamaeli e auai i la latou malaga i le nuu folafolaina. O lenei mea na mafai ai e Nifae ma ona uso ona faaipoipo ma fai ni aiga.

Vaega 2. 1 Nifae 7:6–18. Sa saisai e Lamana ma Lemuelu Nifae, ma le faamoemoe e tuua o ia e oti i le vao. Ae sa faatino e Nifae le faatuatua tele, ma sa laveaiina faavavega o ia e le Alii.

Vaega 3. 1 Nifae 7:17–22. Sa faamagalo ma le faamaoni e Nifae ona uso i lo la taumafai e fasioti o ia, ma sa toe foi atu i latou ia Liae ma Sarai.

A uma ona suesue tamaiti aoga, tuu atu ia i latou e talanoaina mea na latou aoaoina ma tusi a latou tali i le fesili lenei i luga o le laupapa.

• O le a se mea na e aoaoina mai lau suesuega e te manatu o le a fiafia i ai le Atua ma fesoasoani ia te oe e sau ia Keriso?

E mafai e tamaiti aoga ona faasoa mai mataupu faavae e pei o le faaipoipoga ma le aiga e totonugalemu i le fuafuaga a le Atua; afai tatou te faatinoina le faatuatua i le Alii, e mafai e Ia ona faia mea uma mo i tatou e tusa ai ma Lona finagalo; ma o le faamagalo atu o isi e aumaia ai le filemu.

• E mafai faapefea e mea ua e aoaoina ona fesoasoani ia te oe i lou olaga?

Afai e manaomia, mafaufau e fai atu fesili tulitatao e pei o nei: Faamata e faape’i le faaaogaina o mea na e aoaoina i lou olaga? O a isi laasaga e mafai ona e faia?

Mafaufau i lou aafiaga i le suesueina i le asō a o e vaavaai faapitoa mo mea o le a fesoasoani ia te oe e sau ai ia Iesu Keriso ma e fiafia i ai le Atua.

• E mafai faapefea ona faaleleia lau suesuega o tusitusiga paia pe afai e te faia e le aunoa au suesuega i lenei auala?

Mafaufau e faaiu i le molimau patino po o le faatagaina o tamaiti aoga e faasoa mai mea na latou aoaoina pe lagonaina mai a latou suesuega.

Manatu ma Talaaga o Faamatalaga

O a faamanuiaga e mafai ona oo mai ona o le suesueina ma le faamaoni o le Tusi a Mamona ma le faamaumauina o upumoni o loo i ai?

Mafaufau e matamata le vitio lenei o loo faaalia ai le autalavou mai Europa i sasae o loo faamatalaina o latou aafiaga i le faitauina o le Tusi a Mamona ma le tusifaamaumauina o mea sa latou aoaoina.

Aisea e taua tele ai aiga i le Alii? O le a se eseesega e mafai ona ou faia i lo’u lava aiga i le taimi nei?

O loo talanoa mai tusitusiga paia e uiga i le manaomia ona faaipoipo atalii o Liae ina ia mafai ai ona maua ni fanau i le nuu folafolaina, ma e ala mai i perofeta o ona po nei ua tatou aoao ai o le aiga e totonugalemu i le fuafuaga a le Alii e faataunuu ai lo tatou taunuuga e faavavau. O punaoa nei e mafai ona fesoasoani ia te oe e malamalama atili ai i le taua o le aiga ma le aafiaga e mafai ona maua e aiga.

• “O Le Aiga: O Se Folafolaga i le Lalolagi,” ChurchofJesusChrist.org

• Julie B. Beck, “Aoaoina o [ok] Faavae o le Aiga,” Ensign, Mat. 2011, 12–17

• Autu o le Talalelei, “Aiga,” topics.ChurchofJesusChrist.org

E mafai faapefea ona ou faamagalo atu i isi?

Na aoao mai e Elder Jeffrey R. Holland o le Korama a Aposetolo e Toasefululua le mea lenei:

“Faamagalo atu, ona faamagaloina ai lea o outou,” [Luka 6:37], sa aoao mai ai Keriso i le vaitaimi o le Feagaiga Fou. Ma i o tatou aso: “O A’u, o le Alii, Ou te faamagalo i le o le a Ou faamagaloina, ae o outou ua poloaiina ia faamagalo atu i tagata uma” [Mataupu Faavae ma Feagaiga 64:10]. Ae peitai, e taua mo nisi o outou o loo ola i le tiga moni e matau mea sa le’i fetalai ai o Ia. Sa le’i fetalai mai o Ia, “E le faatagaina outou e lagonaina le tiga moni po o le faanoanoaga moni mai aafiaga matuitui na e oo i ai mai lima o isi.” Pe na Ia fetalai foi, “Ina ia mafai ona faamagalo atu atoatoa e ao ona e toe faia se sootaga faatiga pe toe foi atu i se tulaga faasaua ma faataumaoi.” Ae e ui i ni faatiga sili ona matuitui e ono oo mai ia i tatou, e mafai lava ona tatou tutulai ae i o tatou tiga pe afai tatou te savavali i luga o le ala i le faamalologa moni. O lena ala o le ala o le faamagaloga sa savalia e Iesu o Nasareta, lea o loo valaau mai ia i tatou taitoatasi, “Sau, mulimuli mai ia te a’u” [Luka 18:22]. (Jeffrey R. Holland, “O le Galuega o le Faaleleiga,” Liahona, Nov. 2018, 78–79)

A o auauna ai o se Fitugafulu, sa faasoa mai ai e Elder Larry J. Echo Hawk le mea lenei:

Uso e ma tuafafine, o i ai ni tagata i o tatou olaga ua faatiga ia te i tatou? Pe o tatou teulotoina ea ni mea ua foliga mai e faamaonia atoatoa ai lagona o le lototiga ma le ita? O tatou faatagaina ea le faamaualuga e taofia i tatou mai le faamagalo atu ma le faagalo? Ou te valaaulia i tatou uma ina ia faamagalo atu atoatoa ma faataga le faamalologa e tupu mai i totonu. E tusa lava foi pe le oo mai le faamagaloga i le aso nei, ae ia iloa a tatou mananao i ai, ma galulue i ai, o le a oo mai lava—e pei lava foi ona mulimuli ane ona faia mo a’u. (Larry J. Echo Hawk, “Faapei Ona Faamagalo mai Keriso ia te Outou, ia Faapea Foi Outou,” Liahona, May 2018, 16)

Gaoioiga Faaopoopo e Aoao Mai Ai

O se isi amataga

E mafai e tamaiti aoga ona talanoaina gaoioiga ia e masani ona le amanaiaina ai le faamoemoega autu. Mo se faataitaiga, o le alu i le aʻoga e mafai ona faatatau i le faamaeʻaina o galuega nai lo le mauaina o se aoaoga. Fai i tamaiti aoga e mafaufau loloto i taunuuga o le le amanaiaina o le faamoemoega autu o se mea. Fesoasoani ia latou malamalama o le toatele o tagata e le malamalama i le faamoemoega o le Tusi a Mamona ma o lenei lesona o le a talanoaina ai lena faamoemoega.

Sailia o mataupu faavae o le talalelei

E mafai e tamaiti aoga ona vaavaai mo mataupu faavae o le talalelei a o latou faitauina vaega e tolu o le 1 Nifae 7. A uma ona faitau, e mafai ona latou fesili ifo ia i latou lava ni fesili e pei o le “O le a se tasi o lesona autu na ou aoaoina mai nei fuaiupu?”

Afai e manaomia e tamaiti aoga le fesoasoani ia malamalama ma le faailoaina o mataupu faavae, mafaufau pe faapefea ona fesoasoani punaoa nei:

• “Parable of the Gems” (vitio, 6:47), o loo maua i le ChurchofJesusChrist.org

• David A. Bednar, “O Mataupu Faavae o La’u Talalelei,” Liahona, Me 2021, 123–26

• Richard G. Scott, “Mauaina o le Malamalama Faaleagaga,” Ensign, Nov. 1993, 86–88

Faamamafaina o aoaoga faavae o le aiga

Ina ia fesoasoani i tamaiti aoga ia malamalama i lagona o le Alii e uiga i le taua o le faaipoipoga ma le aiga, mafaufau e valaaulia i latou e mafaufau loloto pe faapefea ona latou tali atu i le fesili lenei: “Aisea e popole tele ai le Au Peresitene Sili ia te oe ma tuuina atu le tele o punaoa mo oe?” (Julie B. Beck, “Aoaoina o [ok] Faavae o le Aiga,” Ensign, Mat. 2011, 12). A o suesueina e tamaiti aoga le 1 Nifae 7:1–5, mafaufau e faasoa atu ni vaega faaopoopo o le saunoaga a Sister Beck po o le “O Le Aiga: O Se Folafolaga i le Lalolagi” (ChurchofJesusChrist.org).