1 Nifae 8:1–18

O Le Alofa o le Atua ua Silisili Ona Manaomia i Mea Uma

E faapefea ona e faamatalaina le alofa o le Atua? Sa maua e Liae se faaaliga vaaia lea na ia vaai ai i se laau matagofie. Sa ai o ia i le fua o lena laau, ma sa “sili ona suamalie, nai lo o mea uma” sa ia tofo muamua i ai (1 Nifae 8:11). O lenei laau ma ona fua e faatusa i le alofa o le Atua, ua faaalia i le soifua mai, soifuaga, auaunaga, ma le taulaga togiola a Iesu Keriso. O lenei alofa na “faatumulia le agaga [o Liae] i le olioli tele” (1 Nifae 8:12). O lenei lesona ua faamoemoe e fesoasoani ia te oe e faateleina ai lou manao ia iloa le alofa o le Atua ma le Togiola a Iesu Keriso.

Uunaia tagata aoao e faasoa mai ni aafiaga. O tagata taitoatasi o i lau vasega ua i ai se punavai faa’oaina o le molimau, malamalamaaga, ma aafiaga i le ola ai i le talalelei. Tuu atu ni avanoa mo tamaiti aoga e faasoa mai ai ni aafiaga patino talafeagai. Faailoa atu le lotofaafetai mo tamaiti aoga pe a latou naunau e faasoa mai na aafiaga.

Sauniuniga a le tamaitiiti aoga: Valaaulia tamaiti aoga e mafaufau loloto i fesili nei: O a ni auala e mafai ai e se tasi ona lagonaina le alofa o le Atua? O anafea na e lagona ai Lona alofa mo oe? E mafai foi e tamaiti aoga ona talanoa i se tagata o le aiga po o se taitai o le Ekalesia e uiga i le auala latou te lagonaina ai le alofa o le Atua mo i latou.

Gaoioiga e Ono Mafai Ona Aoao Ai

Pouliuli ma le malamalama

Mafaufau e faaali atu se vitio o se tasi o nei tala na faasoa mai i le konafesi aoao. E mafai foi ona e faasoa atu se aafiaga patino e fesoasoani ai i tamaiti aoga e amata ona lagonaina pe faapei le i ai i le pogisa ma le mananaomia o le malamalama. E mafai ona fesoasoani lenei mea i tamaiti e saunia ai e aoao e uiga i lo latou manaomia o Iesu Keriso e faatoilaloina le pogisa i o latou olaga.

Tietie i se uila vilivae e ui atu i se ana e 15 maila le umi (tagai Vern P. Stanfill, “Filifili le Malamalama,” Liahona, Nov. 2015, 55–57).

O moli o le Malumalu o Sate Leki e le o ola i le po (tagai Sharon Eubank, “O Keriso: O Le Malamalama e Susulu i le Pogisa,” Liahona, Me 2019, 73–76).

Faasee i le maea i se ana maualalo (tagai Timothy J. Dyches, “O Le Malamalama e Pipii i le Malamalama,” Liahona, Me 2021, 112–15).

Ua tatalo Liae mo le alofa mutimutivale o le Alii

A o nofo ai i le vao, sa faasoa atu ai e Liae ia auiliiliga o se faaaliga vaaia sa ia maua i lona aiga. I lenei faaaliga, sa i ai o ia i “se vao pouliuli ma le pagatia” (1 Nifae 8:4).

Ina ia fesoasoani i tamaiti aoga e vaai faalemafaufau i fuaiupu nei, atonu e aoga le fai atu ia i latou e faitau lemu pe mo oe e faitau fuaiupu ma valaaulia tamaiti aoga e moeiini o latou mata ma mafaufau i mea o loo faamatala mai e fuaiupu.

Faitau le 1 Nifae 8:5–8, ma vaavaai mo le mea na tupu ia Liae ma ona lagona. E mafai ona fesoasoani le vaai faalemafaufau i mea sa e faitauina. Vaavaai mo faamatalaga auiliili e mafai ona fesoasoani ia te oe e fatu ai se ata faalemafaufau pe vaai faalemafaufau ai i mea na tutupu e pei o se ata tifaga.

• O a ituaiga o mafaufauga po o lagona e te manatu na mafua ai ona tatalo Liae mo le alofa mutimutivale?

Faaaoga sina taimi e mafaufau loloto ai i auala eseese tatou te ono lagonaina ai le pogisa i o tatou olaga ma mafuaaga atonu tatou te tagi atu ai i le Alii mo le alofa mutimutivale.

Faitau le 1 Nifae 8:9–12, ma vaavaai pe na faapefea ona fesoasoani le Alii ia Liae.

Ina ia fesoasoani i tamaiti aoga e faaauau pea ona vaai faalemafaufau i mau, mafaufau e faaali le vitio “Lehi Discovers the Tree of Life” (4:32) mai le taimi 1:52 i le 4:32.

I lau api talaaga mo suesuega, fai se ata faigofie e faatusa i le laau na vaai i ai Liae. Tusi le fua i luga o le laau, ma faaigoa le fua e faavae i faamatalaga a Liae i le 1 Nifae 8:10–12. (Mo nisi faamatalaga e faaigoa ai le fua o le laau, faitau le 1 Nifae 15:36 ma le Alema 32:42.) A o e tusia se ata, mafaufau po o le a le mea e ono faatusa i ai lenei laau ma lona fua.

Mulimuli ane, sa manao Nifae ia iloa patino ma malamalama i le faaaliga, e aofia ai le uiga o le laau na vaai i ai Liae. A o mafaufau loloto i mea na aoaoina ai o ia, sa faaali atu ia Nifae, e ala i le Agaga, se faaaliga o le Taupou o Maria o sapasapaia le pepe o Iesu i ona lima (tagai 1 Nifae 11:13, 20).

Vaai i le ata lenei ma mafaufau pe aisea atonu na faaalia ai lenei mea ia Nifae ina ua Ia manao ia iloa le uiga o le laau.

Faitau le 1 Nifae 11:21–23, ma vaavaai po o le a le isi mea na faaali atu ia Nifae ma pe na faapefea ona fesoasoani ia te ia e aoao ai i le uiga o le laau. E mafai ona e faaigoaina le laau e fua i mea e te aoaoina.

• O le a sou manatu e faapefea ona fesoasoani le Faaola ia i tatou ia lagonaina le alofa o le Atua?

Na aoao mai Elder David A. Bednar o le Korama o Aposetolo e Toasefululua:

O le faailoaga aupito silisili lava o le alofa o le Atua mo Lana fanau, o le galuega i la le tino, taulaga togiola, ma le Toetu o le Alii o Iesu Keriso. O le fua o le laau e mafai ona manatu i ai o se faatusa mo faamanuiaga o le Togiola a le Faaola. (David A. Bednar, “O Mai Ia Ina Matamata,” Liahona, Nov. 2014, 109)

• Mai le faaaliga a Liae ma le saunoaga a Elder Bednar, o a upumoni e mafai ona e faailoa mai e uiga i le alofa o le Atua?

E mafai e tamaiti aoga ona faailoa mai ni nai upumoni eseese. Uunaia tamaiti aoga e faamatala mai pe aisea e taua ai ia i latou le upumoni sa latou faailoa mai.

Lagonaina o le alofa o le Atua ma le olioli sili e ala ia Iesu Keriso

O se tasi upumoni e mafai ona tatou aoaoina o le alofa o le Atua, e faaalia e ala ia Iesu Keriso, e sili atu ona manaomia i mea uma ma aumaia ai le olioli sili.

O gaoioiga nei e mafai ona fesoasoani ia te oe e iloa ai pe faapefea ona e lagonaina le alofa o le Atua mo oe ona o Iesu Keriso. A o e faia nei gaoioiga, taumafai e faailoa ni faamanuiaga se tele e oo mai e ala ia Iesu Keriso ma Lana Togiola ma tusi i luga po o autafa o le fua na e tusia.

Atonu e aoga le faia eseese o gaoioiga taitasi nei. E mafai ona galulue tamaiti aoga i ni paga po o ni vaega toalaiti mo le Gaoioiga 1. O le gaoioiga 2 atonu e sili ona lelei le faia e ala i le filifilia o se vitio se tasi ma maimoa i ai o se vasega. O le gaoioiga 3 e mafai ona faia e tagata taitoatasi.

Gaoioiga 1

Faitau le mea na molimau atu ai Liae ina ua uma ona vaai i lenei faaaliga i le 1 Nifae 10:5–6. Faitau foi nisi o mau nei pe sue isi e faapupula mai ai faamanuiaga e mafai ona tatou maua e ala i le Togiola a Iesu Keriso: Isaia 53:4–5; Ioane 1:17; Mosaea 4:2–3; Alema 7:11–12; Helamana 5:12.

Gaoioiga 2

Maimoa i se tasi o vitio nei, o loo maua i le ChurchofJesusChrist.org, ma vaavaai mo faamanuiaga e oo mai e ala mai ia Iesu Keriso:

“Atonement—Not a One-Time Thing” (3:00)

“Ona o Ia” (2:36)

“Filemu ia Keriso” (4:09)

Gaoioiga 3

Mafaufau loloto i auala na e mauaina ai faamanuiaga ua ofoina mai e Iesu Keriso pe na faapefea ona e vaaia lenei mea i olaga o isi tagata. E mafai ona aofia ai auala na faamanuiaina ai oe e le Alii i taimi o le pogisa.

O le a se mea na e aoaoina?

Faaaoga sina taimi e iloilo ai faamanuiaga e mafai ona tatou maua e ala i le Togiola a Iesu Keriso lea na e tusia i lau atatusi o le fua. Mafaufau loloto pe aisea e mafai ai e nei faamanuiaga ona “faafiafia ai le tagata” (1 Nifae 8:10), ia “sili ona suamalie, nai lo mea uma” (1 Nifae 8:11), ma faatumuina oe “i le olioli tele” (1 Nifae 8:12).

Valaaulia ni nai tamaiti aoga e faasoa mai mea ua latou aoaoina ma pe aisea e taua ai ia i latou. E mafai ona fesoasoani fesili nei:

• O le a se mea na e aoaoina e uiga i le alofa o le Atua mo oe?

• O a faamanuiaga o loo avanoa e ala mai ia Iesu Keriso e sili ona e manao i ai i lou olaga? Aisea?

• Ua faapefea ona faamanuiaina oe ona o le alofa ua faaalia e le Atua i le auina mai o Lona Alo o Iesu Keriso e togiola mo oe?

A uma ona faalogo i aafiaga a tamaiti aoga, mafaufau e faasoa atu ou lava manatu ma le molimau i le alofa o le Atua ma faamanuiaga e mafai ona tatou maua e ala i le Faaola ma Lana Togiola.

Manatu ma Talaaga o Faamatalaga

O a faamanuiaga e mafai ona tatou maua e ala i le Togiola a Iesu Keriso?

Ua molimau mai tusitusiga paia i le tele o faamanuiaga ua ofoina mai e le Faaola ia i tatou e ala i Lana Togiola. E mafai ona faamagaloina i tatou i a tatou agasala, ma e mafai ona faamamaina o tatou loto (tagai Mosaea 4:2–3). E mafai ona tatou faalelei ma le Atua (tagai Iakopo 4:11). Tatou te maua le “alofa tunoa ma le mea moni” (Ioane 1:17). E mafai ona tatou manumalo i le lalolagi ma lagona le filemu (tagai Ioane 16:33). E mafai ona tatou maua le fesoasoani faalelagi ma le faamalologa i o tatou puapuaga, tiga, faanoanoaga, ma ma’i (tagai Isaia 53:4–5; Alema 7:11). Na te silafia o tatou vaivaiga ma o le a fesoasoani ia i tatou i ia vaega (tagai Alema 7:12). E mafai ona Ia faamalosia i tatou e tetee atu i faaosoosoga (tagai Mataupu Faavae ma Feagaiga 62:1). O Ia o se faavae mautinoa, ma afai tatou te fausia o tatou olaga ia te Ia, o le a tatou le pauu lava (tagai Helamana 5:12). O le a toetutu tagata uma mai le oti (tagai Mosaea 16:7–8; Alema 7:12; 1 Korinito 15:22). E mafai ona avea i tatou e faapei o le Faaola ma maua le ola e faavavau (tagai Moronae 7:48; 2 Nifae 2:27).

Aoaoga Faaopoopo

Faataitaiga mai tusitusiga paia e uiga i le mauaina o le olioli e ala ia Iesu Keriso

O lenei gaoioiga e mafai ona aoga e fesoasoani ai i tamaiti aoga ia malamalama i le upumoni e faapea, o le alofa o le Atua, e faaalia e ala ia Iesu Keriso, e sili atu ona manaomia i mea uma ma aumaia ai le olioli sili. O loo i ai se mamanu faifaipea i le Tusi a Mamona ma isi tusitusiga paia o tagata sa manaomia le fesoasoani o e na liliu atu i le Atua ma maua Lona alofa ma le olioli (e ala i le aai faafaatusa i le fua o le laau o le ola). Mafaufau e tuu atu i tamaiti aoga se taimi e faitau ai se faataitaiga se tasi ma vaavaai mo mea e mafai ona latou aoaoina mai le faataitaiga.

Faataitaiga 1: Nuu o le Tupu o Peniamina

• Na pauu tagata i le eleele ona o le matatau i le Alii (Mosaea 4:1).

• Sa latou tatalo mo le alofa mutimutivale (Mosaea 4:2).

• Sa faatumulia i latou i le olioli e ala ia Iesu Keriso (Mosaea 4:3).

• Na tau mai e le Tupu o Peniamina ua latou tofo i le alofa o le Atua (Mosaea 4:11).

Faataitaiga 2: Alema

• Na lagona e Alema le fefe ma le tausalaina (Alema 36:11–16).

• Sa ia tatalo mo le alofa mutimutivale (Alema 36:17–18).

• Sa ia lagonaina le olioli e ala ia Iesu Keriso (Alema 36:19–21).

Faataitaiga 3: Iosefa Samita

• Na lofituina Iosefa Samita i le pogisa ma lagonaina le fefe (Iosefa Samita—Talafaasolopito 1:15).

• Sa tatalo o ia mo le laveaiga (Iosefa Samita—Talafaasolopito 1:16).

• Na faaali mai le Tama Faalelagi ma Iesu Keriso ia te ia i le mamalu sili (Iosefa Samita—Talafaasolopito 1:17).

• E uiga i lona aafiaga i le Vao Paia, na tusia ai e Iosefa Samita, “Sa faatumulia lo’u agaga i le alofa ma mo aso e tele sa mafai ona ou fiafia i le olioli tele” (History, circa Summer 1832, 3, josephsmithpapers.org).

• O isi faataitaiga e aofia ai Enosa (tagai Enosa 1:1–8), Tupu o Lamonae (tagai Alema 18: 20–21, 41; 19:6, 12–13), ava a le Tupu o Lamonae (tagai Alema 19:4, 8–11, 29–30), o se vaega o sa Lamana (tagai Helamana 5:23–28, 40–48), ma sa Nifae i le afio mai o Iesu Keriso (tagai 3 Nifae 8:19–25; 11:1–17; 4 Nifae 1:16).

O se manao e faasoa atu le olioli i isi

Ina ua ’ai Liae i le fua o le laau ma maua ai le olioli tele, sa ia te ia se manao e faasoa atu lenei olioli i lona aiga (tagai 1 Nifae 8:12). Na aoao mai Elder David A. Bednar, “O le tali vave atu a Liae e ai i le fua o le laau ma le lagonaina o le olioli tele o se manao faateleina lea e faasoa atu ma auauna atu i lona aiga. O lea, a o ia liliu atu ia Keriso, sa ia liliu atu foi i isi i le alofa ma auauna atu i ai.” (“O Mai ia Ina Matamata,” Liahona, Nov. 2014, 109).

Atonu e manuia tamaiti aoga mai se talanoaga e uiga i le olioli na latou maua i le mulimuli i le Faaola o Iesu Keriso ma le auala o loo latou faasoa atu ai lenei olioli i o latou aiga ma isi.