1 Nifae 8:19–38

Pipiimau i le Afioga a le Atua

E toatele tagata i le lalolagi e mananao e lagona le olioli ma le alofa ae le iloa le mea e maua ai. E ala i lana faaaliga o le laau o le ola, na aoao ai Liae e uiga i le auala e tatau ona tatou malaga ai ma le ala e tumau ai i luga e olioli ai i faamanuiaga o le alofa o le Atua. O lenei lesona e mafai ona fesoasoani ia te oe e mulimuli ai i le afioga a le Atua e taiala ai oe i Ana faamanuiaga silisili.

Tatalo e le aunoa mo au tamaiti aoga. E silafia e le Tama Faalelagi au tamaiti aoga taitoatasi. A o e tatalo atu ia te Ia, e mafai ona Ia fesoasoani ia te oe e iloatino manaoga o au tamaiti aoga ma musuia oe i auala e taulima ai na manaoga. Faalogo mo uunaiga a o e sauni e aoao atu ma i le taimi o le lesona.

Sauniuniga a le tamaitiiti aoga: Tatalo e le aunoa mo au tamaiti aoga. E silafia e le Tama Faalelagi au tamaiti aoga taitoatasi. A o e tatalo atu ia te Ia, e mafai ona Ia fesoasoani ia te oe e iloatino manaoga o au tamaiti aoga ma musuia oe i auala e taulima ai na manaoga. Faalogo mo uunaiga a o e sauni e aoao atu ma i le taimi o le lesona.

Gaoioiga e Ono Mafai Ona Aoao Ai

Faaaliga a Liae

Faaaaoga sina taimi e tilotilo ai i lenei atavali o le faaaliga a Liae. O loo aofia ai le laau, lea e faatusa i le alofa o le Atua, ma ona fua, lea e faatusa i faamanuiaga na ofoina mai e ala i le Togiola a Iesu Keriso (tagai David A. Bednar, “Miti a Liae: Piimau Pea i le Ai Uamea,” Liahona, Oke. 2011, 32–37). O loo aofia ai foi nisi o elemene faaopoopo.

• O le a le mea e tulagaese ia te oe e uiga i lenei atavali?

• O le a se mea e mafai ona e aoao mai i le mea na e matauina?

Sa faamalamalama mai e Peresitene Boyd K. Packer (1924–2015) o le Korama a Aposetolo e Toasefululua:

Atonu e te manatu o le miti a Liae po o le faaaliga e leai sona uiga faapitoa mo oe, ae e i ai. O loo e i ai i totonu; o loo tatou i ai uma lava i totonu. (Boyd K. Packer, “Mauaina o i Tatou Lava i le Miti a Liae,” Liahona, Aok. 2010, 22)

A o e suesueina lenei lesona, saili le taitaiga mai le Tama Faalelagi ia malamalama ai i le auala e ono fesootai ai le faaaliga a Liae i lou olaga. Vaavaai mo upumoni e ono fesoasoani ia te oe e maua ai le olioli folafolaina e ala i le Faaola, faapea foi ma mea faalavefau atonu e manaomia ona e aloese mai ai pe faatoilaloina.

E toatele tagata o loo fetaomi atu i luma

I lana miti, na vaai ai Liae i “motu o tagata e lē masino,” (1 Nifae 8:21) o taumafai e agai atu i le laau o le ola. Sa latou fetaiai ma le tele o elemene na aafia ai lo latou gafatia e o mai i le laau: puao o le pogisa, le ai uamea, ma tagata i se fale tele ma le ateatea. E mafai ona e vaai i nei elemene e tolu i le atavali o i luga.

Atonu e te manao e valaaulia tamaiti aoga e tusi ata o a latou lava faatusa o le faaaliga a o latou suesue. E mafai e tamaiti aoga ona faaopoopo auiliiliga i le gasologa o le lesona.

O le gaoioiga faitau lenei e umi. Valaaulia tamaiti aoga o e atonu o loo tauivi e faitau na o i latou lava ina ia faitau taitoalua. Uunaia le vasega e faasoa mai mea latou te maua ma o latou lagona i le tasi ma le isi.

A o e faitau i le 1 Nifae 8:22–34, vaavaai mo nei elemene ma mea e te manatu e ono faatusa i ai. Atonu foi e te manao e maimoa le “Lehi Sees an Iron Rod and Those Who Fall Away” (3:30), o loo maua i le ChurchofJesusChrist.org.

• O le a sou manatu i le mea e ono faatusa i ai nei elemene o le faaaliga a Liae?

Mulimuli ane, na vaaia e Nifae i se faaaliga le mea na vaai i ai lona tama ma faamalamalama mai nei faatusa. Faitau le 1 Nifae 12:17–18 e vaai ai i mea na aoao atu e Nifae. Faamaumau mea ua e aoaoina.

Afai e tusia e tamaiti aoga a latou lava faatusa o le faaaliga, e mafai ona latou faaigoaina a latou ata i mea na latou aoaoina mai le faamalamalamaga a Nifae.

Ina ia fesoasoani i tamaiti aoga e talanoaina mea sa latou aoaoina ma faaaoga i o latou olaga, mafaufau e fai atu fesili e pei o nei:

• O a foliga o le fale tele ma le ateatea ma puao o le pogisa i o tatou aso?

• E faapefea e nei mea faalavefau ona mafua ai ona faaseseina le auala o tagata i aso nei?

• O le a se mea na e aoaoina e taua ona malamalama i ai e uiga i lau malaga i le olaga?

E mafai ona aoga i tamaiti aoga le talanoaina atili o puao o le pogisa ma le fale tele ma le ateatea e ala i le fai atu o fesili nei:

• Aisea atonu na faatusaina ai e le Alii nei faalavefau i lenei auala?

• Aisea e te manatu ai e toatele tagata na saili ia i ai i totonu o le fale tele ma le ateatea?

Mafaufau e uiga i faaosoosoga e te feagai ma po o a ni auala e ono aafia ai oe i le faamaualuga. Mafaufau loloto pe mafai faapefea e nei mea ona faalavelave ia te oe pe taofia ai lou gafatia e sau ia Keriso ma lagonaina le alofa o le Atua.

O le fesoasoani ua ofoina mai e le Atua ia i tatou

I le faaaliga a Liae, sa saunia ai foi e le Atua ni auala e fesoasoani ai i Ana fanau e o mai i le laau. Sa i ai “se ala lauitiiti ma le vaapiapi” (1 Nifae 8:20) na tau atu i le laau. I luga o le ala, sa Ia saunia ai se “āi u’amea” lea na taialaina ai tagata (1 Nifae 8:19, 24, 30).

• O le a sou manatu o le a se mea e sili ona taua e uiga i le ai uamea?

Faitau le 1 Nifae 15:23–25 e iloa ai le mea na aoao mai e Nifae e uiga i le ai uamea ma ana folafolaga e uiga i ai.

• O le a se mea sa tumatila ia te oe mai nei fuaiupu?

O tamaiti aoga o loo tusia ata o le faaaliga e mafai ona faaopoopo i ai le ala ma le ai uamea ma le mea e faatusa i ai. Valaaulia tamaiti aoga e aotele mai mea sa latou aoaoina e uiga i le ai uamea ma pe faapefea ona fesoasoani ia i latou. O se tasi lenei o upumoni e mafai ona fesoasoani.

O se tasi upumoni e mafai ona tatou aoaoina o le afai tatou te faalogo ma pipiimau i le afioga a le Alii, o le a le faatoilaloina i tatou e faaosoosoga a le fili.

• E mafai faapefea e afioga a le Alii i tusitusiga paia ma afioga na fetalai ai Ana perofeta ona maua ai le saogalemu ma le malosi i taimi o faaosoosoga?

• O a nisi o faataitaiga o le ala e mafai ai e le afioga a le Atua ona taitai atu i tatou ia maua faamanuiaga ma le olioli ua ofoina mai e le Faaola e ala i Lana Togiola?

• O le a se mea ua aoao atu e lenei upumoni ia te oe e uiga i le Alii?

Afai o le a aoga i tamaiti aoga le talanoa atili i le ai uamea, e mafai ona aoga se tasi pe sili atu foi o fesili nei:

• Aisea atonu na faatusa ai e le Alii Lana afioga i se ai uamea?

• Faamata o le a le uiga o le “faalogo i le afioga a le Atua, ma … pipiimau i ai”? (1 Nifae 15:24).

• O a nisi o auala eseese e mafai ona tatou faitau ai, faalogo, pe maua ai le afioga a le Atua?

O tamaiti aoga o loo tusia ata o le faaaliga e mafai ona faaopoopo i ai ni nai mau faasino i luga o le ai uamea lea e fesoasoani patino ia i latou e tumau ai i luga o le ala, manumalo i faaosoosoga, po o le mauaina o faamanuiaga o le Togiola a le Faaola. Afai latou te manaomia le fesoasoani i le sueina o se mau, e mafai ona latou sueina mau faasino e faaaoga ai le faaupuga “afioga a le Atua” (Taiala i Tusitusiga Paia, scriptures.ChurchofJesusChrist.org). Mafaufau e faasoa atu se faataitaiga patino i le vasega pe fai atu i se tamaititi aoga e volenitia.

Ina ia faaiuina lenei lesona, mafaufau loloto po o fea o e i ai i lena faaaliga. Na faapefea ona e sau i le Faaola, ma o faapefea ona e taumafai pea e sau ia te Ia? O a ni faalavefau ma faaosoosoga o feagai ma oe? O faapefea ona fesoasoani le Alii ia te oe e ala i Lana afioga?

Mafaufau e iloilo lau sini o le suesueina o tusitusiga paia ma le auala e fesoasoani ai ia te oe, faapea foi ma soo se alualu i luma po o suiga e te manao e fai. Afai e leai sau sini o suesuega, mafaufau e faaaoga ni nai minute e faia ai se sini.

Manatu ma Talaaga o Faamatalaga

E faapefea ona ou pipiimau i le ai uamea?

Na faamalamalama mai e Elder David A. Bednar o le Korama a Aposetolo e Toasefululua e faapea:

Sei ou fautua atu e faapea o le piimau i le ai uamea e aofia ai, se fuafaatatau tele, le agaga tatalo, faifai pea, ma le faaaoga faamaoni o tusitusiga paia o se punavai mautinoa o upu moni faaalia ma o se taiala faamoemoeina mo le malaga i le ala sao ma le vaapiapi i le laau o le ola—faapei o le Alii o Iesu Keriso. (David A. Bednar, “Miti a Liae: Piimau Pea i le Ai Uamea,” Liahona, Oke. 2011, 36)

E faapefea ona ou aloese mai le faatauasoina e puao o le pogisa?

Na aoao mai Elder Jeffrey R. Holland o le Korama a Aposetolo e Toasefululua:

E taua tele le matau o lenei puao o le pogisa e alu ifo i luga o tagata malaga uma—o tagata faamaoni ma naunautai (e ua filifilia, atonu tatou te faapea atu foi) faapea foi ma tagata vaivai ma faigata. O le manatu autu lava o le tala e faapea o tagata malaga faamanuiaina e tetee atu i mea faalavefau uma, e aofia ai mailei o ala faasaina ma tauemuga mai e faatauemu ma faamaualuga o e na uia na ala. (Jeffrey R. Holland, “Saogalemu mo le Agaga,” Nov. 2009, Liahona, 88)

Na fautua mai Elder Kevin W. Pearson o le Fitugafulu:

Vagana ua tatou “piimau pea” [1 Nifae 8:30] i le afioga a le Atua ma ola ai, o le a oo ina tatou tauaso faaleagaga nai lo le mafaufau faaleagaga. Sailiili i le Tusi a Mamona ma upu a perofeta soifua i aso uma, i aso uma, i aso uma! O le ki lea i le ola faaleagaga ma aloese ai mai le faaseseina. A aunoa ma lena, ua tatou leiloloa faaleagaga. (Kevin W. Pearson, “Tumau i le Laau,” Liahona, Me 2015, 115)

O a isi punaoa e mafai ona fesoasoani ia te au e vaai faalemafaufau ai ma malamalama ai i le faaaliga vaaia a Liae i le laau o le ola?

O loo maua vitio nei i le ChurchofJesusChrist.org ma e mafai ona fesoasoani ia te oe e vaai faalemafaufau ai ma malamalama i vaega o le faaaliga a Liae: “Lehi Invites His Family to Partake of the Fruit of the Tree” (3:23) ma le “The Faithful Partake of the Fruit of the Tree” (3:28).

Aoaoga Faaopoopo

O se isi amataga i le lesona

Tusi se laau i luga o le laupapa. Fai i tamaiti e vaai faalemafaufau i se tasi o malaga mai le pito i tua o le potu i le laau e faatusa i le o mai ia Keriso. E mafai e tamaiti aoga ona fesiitai mea faitino ma tagata ina ia i ai i vaega eseese o le potu e faatusa i le fesoasoani e tuuina mai e le Alii ia i tatou e taunuu ai i le laau, faapea foi ma faafitauli atonu tatou te feagai e ono taofia ai i tatou.

Fesili o talanoaga e uiga i tagata i le faaaliga a Liae

Ina ia fesoasoani i tamaiti aoga e faaalu se taimi e mafaufau ai i mea e mafai ona aoaoina mai vaega eseese o tagata i le faaaliga a Liae, mafaufau e fai atu ni nai fesili e pei o nei:

• O le a se fautuaga o le a e tuuina atu i se tasi e le o i ai i le ala pe a mavae ona leiloa i puao o le pogisa? Aisea?

• Aisea e te manatu ai na pauu ese nisi o tagata ina ua uma ona aai i le fua o le laau o le ola?

• O le a se mea e mafai ona e faia e taofia ai oe lava mai le pau ese atu pe a uma ona maua ni aafiaga faaleagaga?

• O le a le mea na malamalama i ai tagata sa nonofo i le laau e lei malamalama i ai i latou o e na o ese mai?