Itulau Tomua o le Tusi a Mamona

Mauaina o le Malamalama Faaleagaga, Vaega 2

Iloilo Manatu Faavae ma Fesili faatasi ma se Vaaiga e Faavavau

O se tasi o faamoemoega o le atamai i aoaoga faavae o le fesoasoani lea ia te oe i le aoaoina ma le faaaogaina o mataupu faavae mo le mauaina o le malamalama faaleagaga ina ia avea atili ai e pei o Iesu Keriso. O lenei lesona e mafai ona fesoasoani ia te oe e iloilo ai manatu faavae ma fesili faatasi ma se vaaiga e faavavau ma vaai atili ai ia i latou e pei ona faia e le Faaola.

Malamalama i lau matafaioi i le atamai i aoaoga faavae. I lana saunoaga i faiaoga Seminare ma Inisitituti e uiga i le atamai i aoaoga faavae, na aoao mai ai e Peresitene M. Russell Ballard o le Korama a Aposetolo e Toasefululua, “O lenei taumafaiga e musuia ma talafeagai. O le a maua ai se aafiaga matagofie i o tatou tagata talavou. Peitai, o le manuia o le Atamai i Aoaoga Faavae, ma isi polokalama uma o suesuega i le [seminare ma inisitituti], o le a faalagolago lea i se taua tele ia te oe” (“O Avanoa ma Tiute o Faiaoga CES i le Seneturi 21” [afiafi ma se Pulega Aoao, 26 Fep. 2016], broadcasts.ChurchofJesusChrist.org).

Sauniuniga a le tamaitiiti aoga: Valaaulia tamaiti aoga e faafetai i le Tama Faalelagi i a latou tatalo faaletagata lava ia mo le malamalama ua latou maua e uiga i le fuafuaga o le faaolataga. Mafaufau e valaaulia i latou e fesili atu foi ia te Ia pe faapefea ona latou faaaogaina lena malamalama mo le lelei.

Gaoioiga e ono Mafai Ona Aoao Ai

Mataupu Faavae o le mauaina o le malamalama faaleagaga

A aafia i tatou luitau o le olaga pe feagai foi ma ni fesili e lei taliina, e mafai ona fesoasoani ia i tatou mataupu faavae nei o le mauaina o le malamalama faaleagaga:

1. Faatino i le faatuatua.

2. Iloilo manatu faavae ma fesili faatasi ma se vaaiga e faavavau.

3. Saili le malamalama atili e ala i punavai mamana ua atofaina.

I lenei lesona o le a tatou taulai atu ai i le iloiloina o manatu faavae ma fesili faatasi ma se vaaiga e faavavau.

O se vaaiga faatapulaaina

Faaaoga se gaoioiga e pei o lenei e fesoasoani ai i tamaiti aoga e talanoaina pe faapefea ona taua le vaaiga ma le talaaga e malamalama ai:

Valaaulia ni volenitia se toalua e o mai i luma o le vasega. Tuu atu ia tofu ma le fasipepa o iai se pu laitiiti se tasi i le ogatotonu. Fai atu ia i latou e uu i luga le pepa i le mata e tasi, ma fesili i ai pe mafai ona ati ai la latou vaai. Ona lu’i lea o i latou e taaalo se taaloga saposapo i se mea faitino vaivai a o tilotilo atu i le pu i le pepa. Afai latou te tauivi, fesili atu ia i latou pe aisea na faigata tele ai ina ua uma ona latou faamaonia mai na mafai ona latou vaai.

• E faapefea ona pei lenei mea o le faia o faaiuga e suia ai le olaga po o le taliina o fesili taua ma se malamalama faatapulaa i le fuafuaga o le faaolataga?

O le i ai o se vaaiga e sili atu ona atoatoa e aoga pe a fegalegaleai ma le lalolagi o loo siomia ai i tatou. E faapena foi, o se vaaiga e faavavau e mafai ona fesoasoani ia i tatou ao tatou maua le malamalama faaleagaga.

Mafaufau e faailoga le fuaiupu lenei mai le parakalafa 8 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022): Ina ia iloiloina manatu faaleaoaoga faavae, fesili, ma tulaga faaagafesootai ma se vaaiga e faavavau, tatou te mafaufau i ai o ni tusiga o le fuafuaga o le faaolataga ma aoaoga a le Faaola.

A o lei faitauina e tamaiti ia parakalafa nei, valaaulia i latou e aotele mai mea ua uma ona latou iloa e uiga i lenei mataupu faavae o le mauaina o le malamalama faaleagaga.

Suesue palakalafa 8–10, ma vaavaai mo mea e mafai ona fesoasoani ia te oe e iloilo ai manatu faavae ma fesili ma se vaaiga e faavavau.

Valaaulia tamaiti aoga e maka ni upu ma ni fasifuaitau patino ma lipoti mai mea na latou mauaina. Fai atu ni fesili tulitatao e fesoasoani ai ia i latou ia malamalama o le Tama Faalelagi ma Iesu Keriso e silasila i mea i se vaaiga e faavavau. O le aoao e faia lenei mea i o tatou olaga e fesoasoani tatou te avea atili ai e faapei o i Laua. Atonu o le a fesoasoani fesili nei.

• O a nisi o faafitauli ma fesili e te manatu e ono ese le silasila i ai o le Faaola nai lo le vaai a le toatele o tagata i le lalolagi?

• E faapefea e le iloiloina o manatu faavae ma fesili i le matalalaga o le fuafuaga o le faaolataga ona fesoasoani ia i tatou e vaai ai i mea e pei o le silasila a le Tama Faalelagi ma Iesu Keriso? (tagai Mosaea 4:9).

• Aisea e ono avea ai lenei mea ma se tomai taua mo oe e aoao ai, faataitai, ma faaaoga i lou olaga?

O se faataitaiga mai tusitusiga paia

Sa faaali mai e Alema le Itiiti ia i tatou le ala e vaai ai i mea ma se vaaiga e faavavau a o ia taliina fesili faigata na tauivi ma lona atalii o Korianetona.

Faitau le Alema 40:1; 42:1, ma vaavaai mo popolega e lua na i ai ia Korianetona. Mafaufau e toe faaupu ona popolega i au lava upu.

Ia faitau nei ulutala o mataupu mo le Alema 40; 41; 42 e vaai ai i se aotelega o mea na aoao atu e Alema ia Korianetona a o ia talanoaina ona popolega. Vaavaai mo elemene o le fuafuaga o le faaolataga na aoao mai e Alema.

• O a elemene o le fuafuaga na e vaaia?

• Faamata na fesoasoani faapefea lenei mea ia Korianetona e vaai ai i ona popolega mai se vaaiga e faavavau?

Toefaaupuina

Fai se siepi o se faavaa o se ata e faaaoga ai ou limatusi ma limamatua. Filifili soo se mea i totonu o le potu e fai ma mataupu o lau ata.

• O le a se mea na e filifili e faaaofia i lau faavaa? Aisea?

• O le a se mea na e tuuesea mai lau tala? Aisea?

E pei o ata, o fesili foi e i ai se faavaa po o se matalalaga. O le faavaa e mafai ona faatusa i talitonuga ma mafaufauga o se tagata lea e taitai atu ai i latou e vaavaai i fesili i se auala faapitoa. O nisi taimi o na talitonuga ma mafaufauga e faavae i se le malamalama po o se mea e le moni. I na tulaga, e mafai ona fesoasoani e toefaaupuina ai i latou. O le toefaaupuina o le taimi tatou te iloiloina ai na talitonuga po o mafaufauga i le matalalaga o le fuafuaga o le faaolataga ma aoaoga a le Faaola.

Sa aoao mai Peresitene Dallin H. Oaks o le Au Peresitene Sili:

Ona o lo tatou malamalama i lenei fuafuaga ma isi upumoni ua faaalia mai e le Atua, tatou te amata ai i ni mafaufauga e ese ai nai lo i latou e le tutusa o tatou malamalama. O se taunuuga, tatou te oo i ai i ni faaiuga eseese i le tele o mataupu taua ia e na ona faamasinoina e isi i tuutuuga o o latou manatu e uiga i le olaga faaletino. (Dallin H. Oaks, “As He Thinketh in His Heart” [afiafi ma se Pulega Aoao, 8 Fep., 2013], broadcasts.ChurchofJesusChrist.org)

Manatu faapea e i ai sau uo e igoa ia Adry na fesili, “Afai e i ai moni lava se Atua alofa, aisea o le a Ia faatagaina ai tagata ia mafatia?”

Atonu e te manao e matamata le vitio “Examining Questions with an Eternal Perspective” (2:55), o loo maua i le ChurchofJesusChrist.org, e vaai ai i se faataitaiga o le auala e mafai ai ona toefaamatalaina lenei atugaluga.

Atonu e fesoasoani le taofi o le vitio i nisi taimi ina ia mafai ai e tamaiti aoga ona faataitai le toefaaupuina o le fesili a Adry. O faailotaimi ma fesili nei e lua ua fautuaina atu.

• 1:12: Mata o a nisi manatu po o talitonuga na taitai atu ai Adry e fai lenei fesili?

• 1:57: O a upumoni ua e iloa e mafai ona talanoaina ai mafaufauga po o talitonuga i tua atu o le fesili a Adry?

O fesili e pei o nei e mafai ona faaaoga e fesoasoani ia te oe e iloa ai pe o le a le lelei o le malamalama o tamaiti aoga i le tomai o le toe faaupuina.

• Aisea e te manatu ai e aoga le mafaufau e uiga i talitonuga ma manatu ia atonu na aafia ai le fesili a Adry e uiga i le Atua?

• E faapefea e le matalalaga o mea ua tatou iloa e uiga i le Tama Faalelagi ma Lana fuafuaga ona faatagaina i tatou ia ese le ala tatou te vaai ai i le fesili?

• O le a sou lagona e uiga i lou tomai e foia ai fesili faigata e ala i le toefaaupuina? O a ni fesili po o ni atugaluga o ia te oe e uiga i ai, pe afai e i ai?

Pe a lava le taimi, mafaufau e tuu atu i tamaiti aoga e faataitai le tomai o le toefaaupuina i a latou lava fesili po o atugaluga. Tagai i le vaega o “Gaoioiga Faaopoopo e Aoao Ai” mo manatu e uiga i le auala e mafai ona faia ai lenei mea.

Mafaufau e faasoa atu se aafiaga patino o le vaai i faafitauli po o atugaluga ma se vaaiga e faavavau.

O le a e maua le tele o avanoa e faataitai ai le toefaaupuina i le seminare ma i lou olaga. A o e sailia le fesoasoani a le Agaga Paia ma faalautele lou malamalama i le fuafuaga o le faaolataga ma le aoaoga faavae a Keriso, o le a faateleina lou tomai e iloilo ai manatu faavae ma fesili faatasi ma se vaaiga e faavavau. O le a fausia ai foi e lenei mea lou to’a i le faasoaina atu o mea e te iloa ma fesoasoani ai i isi i fesili ma atugaluga faigata.

Manatu ma Talaaga o Faamatalaga

E faapefea ona fesoasoani le i ai o se malamalamaaga i le fuafuaga o le faaolataga?

Sa aoao mai Peresitene Dallin H. Oaks o le Au Peresitene Sili:

Ona ua iloa e le Au Paia o Aso e Gata Ai le fuafuaga a lo tatou Tama Faalelagi mo Ana fanau, ua tatou iloa o le olaga nei e le o se tala faatino e tasi se vaega ua fafao faatasi i le va o se taimi tuanai e le mailoa ma se lumanai e le mautinoa. O le olaga nei ua pei o le vaega lua o se tala faatino e tolu vaega. O lona faamoemoega ua faamatalaina e ala i mea ua faaalia e uiga i lo tatou i ai faaleagaga i le vaega 1 ma lo tatou faasinomaga e faavavau i le vaega 3. (Dallin H. Oaks, “As He Thinketh in His Heart” [afiafi ma se Pulega Aoao, 8, Fep. 2013], broadcasts.ChurchofJesusChrist.org)

Na aoao mai Peresitene M. Russell Ballard o le Korama a Aposetolo e Toasefululua:

E ala mai i le Perofeta o Iosefa Samita, na tuu atu i ai e le Atua le Tusi a Mamona, le Mataupu Faavae ma Feagaiga, ma le tele o isi mau aoaoga faaopoopo i le Ekalesia. Sa aofia ai ma se malamalama o le ata o le faaolataga, o lona uiga o le faafanua o le mea na tatou o mai ai, lo tatou faamoemoega iinei i le lalolagi, ma le mea tatou te o i ai pe a tatou feoti. Ua tatou maua foi i le fuafuaga se vaaiga tulagaese e faavavau, o tatou o fanau agaga a le Atua. E ala mai i le malamalama po o ai lo tatou Tama Faalelagi atoa ai ma lo tatou sootaga ia te Ia ma Lona Alo Pele, o Iesu Keriso, o le a tatou taliaina ai a La poloaiga ma osia ni feagaiga ma i Laua ia o le a taitai atu ai i tatou e toe foi atu i lo La afioaga e faavavau. (M. Russell Ballard, “O le Atua o loo i le Foeuli,” Liahona, Nov. 2015, 25)

Gaoioiga Faaopoopo e Aoao Mai Ai

Fatu se suega puupuu

Vaevae le vasega i ni vaega toalaiti ma atofa atu i vaega taitasi le parakalafa8,9,po i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022).

Valaaulia vaega taitasi e tusi se fesili e taliina e a latou parakalafa atofaina. Tufa atu fesili i isi vaega, ma valaaulia tamaiti aoga e sue ia tali i fesili.

Faataitai le toefaaupuina

E toatele le autalavou e faigata ona faailoa manatu faavae ma manatu autu. Atonu e faigofie ona latou aoao mai i faataitaiga e i ai se elemene manino o le le malamalama po o le sese. Afai e faataitai le toefaaupuina ma tamaiti aoga, ia mautinoa e faaaoga fesili e talafeagai ia i latou, ma ia saunia e fesoasoani ia i latou e faailoa mai le le malamalama po o manatu sese.

Pe a faataitai, mafaufau e lisi fesili e ono i ai i luga o le laupapa ma faatagaina le vasega e galulue faatasi i ai pe i ni vaega toalaiti. Afai o loo latou galulue i ni vaega, mafaufau e faataga se vaega se tasi e faailoa mai manatu autu po o manatu faavae ona pasi atu lea o le fesili ma manatunatuga i se isi vaega e iloilo faatasi ma se vaaiga e faavavau.