Itulau Tomua o le Tusi a Mamona

O Mau a Molimau e Toatolu ma Molimau e Toavalu

“Sa Matou … Vaai i Papatusi”

Mo se taimi, sa le faatagaina Iosefa Samita e faaali atu papatusi auro i soo se tasi. I le faataunuuina o valoaga, na iu lava ina faaali atu e le Alii ia Iosefa e faapea, o le a faatagaina ni molimau faaopoopo e vaai i papatusi ma molimau atu i lo latou moni (tagai 2 Nifae 27:12–14). O lenei lesona e mafai ona fesoasoani e te malamalama ai i le taua o molimau e toatele o le Tusi a Mamona ma manatunatu ai i lau lava molimau.

Fesoasoani i tamaiti aoga e aoao e ala i le Agaga. O se tasi o auala o le uunaia lea o i latou e mafaufau i o latou aafiaga patino e faatatau i lenei lesona. Tuu atu se taimi e mafaufau loloto ai i faamanuiaga ua latou maua e ala i le ola ai i le talalelei a Iesu Keriso ma auala ua avea atili ai i latou e faapei o Ia.

Sauniuniga a le tamaitiiti aoga: Valaaulia tamaiti aoga e o mai saunia e faasoa mai ni aafiaga na fesoasoani ia i latou po o isi ia iloa ai o le Tusi a Mamona e mai le Atua.

Gaoioiga e ono Mafai Ona Aoao Ai

O molimau o papatusi

Mafaufau e faaaoga le parakalafa lenei e fesoasoani ai i tamaiti aoga ia iloa le faigata atonu na i ai ia Iosefa Samita i le avea ai na o ia o se molimau na vaaitino i papatusi auro mo se taimi.

Vaai faalemafaufau pe atonu e faape’i mo Iosefa Samita le avea ai nao ia na mafai ona vaai i papatusi auro. Mafaufau i le faigata ai mo oe le le talitonuina, tauemuina, ma ta’ua o sē taufaasese ona o le a e lē faaali atu i tagata ia papatusi. Vaai faalemafaufau i lou ta’uina atu ia i latou o e na lagolagoina oe e le mafai ona latou vaai i papatusi.

A o faaliliuina le Tusi a Mamona, sa faalau atu e Iosefa upu o folafolaga na faia e le Alii e faatatau i papatusi. Faitau le 2 Nifae 27:12–14 e vaai ai i folafolaga na faia e le Alii e uiga i papatusi (tagai foi Eteru 5:2–4).

• O le a se mea sa tulagaese ia te oe e uiga i lenei valoaga? Aisea?

• Faamata o a ni lagona o Iosefa a o ia faitauina lenei valoaga? Aisea?

• O a ni mea ua e aoaoina mai lenei fuaitau e uiga i le Alii ma le Tusi a Mamona?

O se tasi o upumoni e mafai ona tatou aoao mai i nei valoaga e faapea na saunia e le Alii ni molimau se tele o papatusi o le Tusi a Mamona.

• Aisea e faigofie ai ona talitonu e moni se mea pe a sili atu ma le tasi se molimau e uiga i ai?

A o faaauau pea ona e suesue, saili le fesoasoani a le Tama Faalelagi e ala i le Agaga Paia ia malamalama ai i le taua o molimau o papatusi auro, ma mafaufau pe faapefea e a latou molimau ona fesoasoani ia te oe e maua pe faamalosia ai lau lava molimau.

Faaali atu le parakalafa lenei pe valaaulia se tagata aoga e faitauina.

Na saunia e le Alii se vaega o alii e toatolu ona sosoo ai lea ma le toavalu e vaai i papatusi. O le toatele o nei molimau na fesoasoani i nisi o auala i le oo mai o le Tusi a Mamona. Mo se faataitaiga, na valaaulia e Tavita Uitimera ia Iosefa ma Ema latou te nonofo a o galue faaliliu Iosefa, sa mokesi e Matini Harisi lana faatoaga e totogi ai le tau o le lolomiina o le Tusi a Mamona, ma sa avea Oliva Kaotui ma tusiupu mo le tele o le faaliliuga. O le tamā o Iosefa ma ona uso o Ailama ma Samuelu o ni molimau foi o papatusi ma sa fesoasoani ia Iosefa i ni auala taua. E ui ina sa mulimuli ane tuua e nisi o nei alii le Ekalesia, ae sa leai se tasi o i latou na faafitia a latou molimau o le Tusi a Mamona. (Tagai Autu o le Talalelei, “O Molimau o le tusi a Mamona,” topics.ChurchofJesusChrist.org.)

Faitau le “O Le Mau a Molimau e Toatolu” ma le “O Le Mau a Molimau e Toavalu,” ma vaavaai mo mea na latou vaaia, lagonaina, ma iloa.

Atonu foi e te manao e maimoa i le ‘O Se Aso mo le Faavavau” mai le faailotaimi 15:00 i le 18:37 e vaai ai i se ata o mea atonu na i ai i nei aafiaga.

Mafaufau e tuu atu i tagata aoga le pepa e tufa atu lenei ma valaaulia i latou e faatumu le siata taitoatasi, o se vasega, po o ni vaega toalaiti.

O Mau a Molimau e Toatolu ma Molimau e Toavalu

	Molimau e Toatolu:	Molimau e Toavalu:
O mea na vaaia ma lagonaina e molimau.
O mea na oo ina iloa e molimau.
O mea sa faia e molimau.

• O a ni mea e tutusa ma eseese ai na e vaaia i aafiaga o vaega e lua?

• Aisea e ono taua ai ia eseesega?

E ui atonu o nisi taimi tatou te mananao ai ia maua ni aafiaga e pei o nei molimau, ae sa molimau mai le Alii e oo lava i le vaaia o nei mea o le a le faatalitonuina ai tagata e uiga i le upumoni (tagai Mataupu Faavae ma Feagaiga 5:7). Na faamalamalama mai e Peresitene James E. Faust (1920–2007) o le Au Peresitene Sili:

E tatau ona tatou iloa i lenei vaitaimi, le moni o mea sa i ai i papatusi auro, e aunoa ma le vaai i ai. E le o i ai nei ina ia tatou vaai ma fetagofi i ai e faapei ona faia i Molimau e Toatolu, ma Molimau e Toavalu. O nisi o i latou sa vaai tino i ai ma fetagofi i na papatusi auro, e le i tumau lo latou faamaoni i le Ekalesia. O le vaai i se agelu, o se aafiaga tele lea, ae e sili atu le i ai o se malamalama i le paia o le Faaola e ala i le faatuatua ma le molimau a le Agaga. [tagai Ioane 20:29]. (James E. Faust, “E Le Mafai Ona Tupu ia te Au,” Ensign, Me 2002, 48)

• Aisea e taua ai ia te oe mea o loo aoao mai i lenei faamatalaga?

O lau molimau ia Iesu Keriso ma le Tusi a Mamona

O se tasi faamoemoega autu o le Tusi a Mamona o le faatalitonu lea o tagata o Iesu o le Keriso (tagai i le itulau autu o le Tusi a Mamona). Mafaufau pe o lau molimau patino ia Iesu Keriso ma le Tusi a Mamona e malosi e pei ona e manao i ai. Mafaufau loloto pe faapefea e le mauaina po o le faamalosia o lena molimau ona avea o se faamanuiaga ia te oe ma isi.

Mafaufau e tuu atu i tamaiti aoga se taimi e toe tomanatu ai i a latou lava tapenaga mo le vasega. Ona faaali atu lea o le parakalafa lenei ma uunaia i latou e mafaufau loloto ma tusi o latou lagona.

Tusi i lalo lau molimau ia Iesu Keriso ma le Tusi a Mamona. Afai e te le lagonaina [ok] i ai sau molimau, tusi i lalo mea e mafai ona e faia [ok] maua ai se molimau. Ia aofia ai le ala e mafai ai e molimau a isi ona tosinaina ai lau oe lava molimau. Mafaufau e faaopoopo atu i lenei mea a o faaauau pea ona e suesue i le Tusi a Mamona.

A ua lava loa se taimi e tusitusi ai tamaiti aoga, valaaulia nisi e faasoa mai a latou molimau ia Iesu Keriso ma le Tusi a Mamona.

Manatu ma Talaaga o Faamatalaga

Aisea e taua tele ai mau a Molimau e Toatolu ma Molimau e Toavalu?

Na molimau mai Peresitene Henry B. Eyring o le Au Peresitene Sili:

E lei teenaina lava e molimau e toatolu la latou mau e uiga i le Tusi a Mamona. Latou te lei mafaia aua sa latou iloa e moni. Sa latou faia ni osigataulaga ma feagai ma faigata e sili atu nai lo mea ua iloa e le toatele o tagata. Na tuuina atu foi e Oliva Kaotui lena lava molimau i le paia o le pogai o le Tusi a Mamona a o taoto o ia ua latalata ina oti. Ae i taimi o faigata, sa maluelue ai lo latou faatuatua e uiga ia Iosefa o le perofeta lava a le Atua ma e na o le pau le ala e o mai ai i le Faaola, o Lana Ekalesia toefuataiina lea. Sa latou faaauau pea ona faamautuina le mea na latou vaai ma faalogo i ai i lena aafiaga ofoofogia, i le faagasologa o vaitaimi uumi o le o ese mai le Ekalesia ma Iosefa, sa faateleina ai le malosi o le latou molimau. (Henry B. Eyring, “O Se Molimau Malosi i le Misiona a le Perofeta o Iosefa,” Liahona, Nov. 2003, 90)

Maimoa le “Molimau o le Tusi a Mamona Papatusi Auro” (4:16) ma le “O Mau o Molimau e Toatolu” (3:00) ma vaavaai mo ni malamalamaaga faaopoopo i le pogai o le taua tele ma le mamana o nei molimau.

Aisea atonu na saunia ai e le Alii nei ituaiga aafiaga eseese e lua mo molimau o le Tusi a Mamona?

Afai e tuuaia e le aufaitio a le Ekalesia ia Molimau e Toatolu i le faafoligaina o le latou faaaliga, o le a le mafai la e lena mea ona faamatala le aafiaga na maua e Molimau e Toavalu i papatusi. I le isi itu, afai e tuuaia e le aufaitio ia Iosefa Samita i lona faia o papatusi auro e faasese ai Molimau e Toavalu, o le a le mafai e lena mea ona faamatalaina le faaaliga faalelagi, e aofia ai le afio mai o se agelu, lea na aafia ai Molimau e Toatolu.

O a ni lagona o Iosefa ina ua uma ona vaai isi i papatusi?

Sa tusia e lona tina, o Lusi Maka Samita e faapea, i le mavae ai o lenei molimau paia, sa ta’u atu e Iosefa ia te ia:

E te le o iloa lo’u fiafia o iai. Ua faia e le Alii ia faaali atu papatusi i isi e toatolu e ese mai ia te au, o e na vaai foi i se agelu ma o le a molimau atu i le moni o mea ua ou fai atu ai, aua ua latou iloa mo i latou lava ou te le alu atu e faasese tagata, ma ou te lagona e pei ua ou mapu mai se avega matautia lea sa toetoe lava a mamafa tele mo a’u e onosaia, ae o le a latou tauaveina nei se vaega, ma ua olioli ai lo’u agaga ona ua ou le o toe tuuatoatasi atoa i le lalolagi. (Lusi Maka Samita, Talafaasolopito, 1844–1845, tusi 8, itulau 11, josephsmithpapers.org; sipelaina ma faailoga ua faaonapo nei)

O a ni tala faaopoopo e mafai ona fesoasoani ia te au e malamalama atili ai i aafiaga o molimau a papatusi auro?

Na faasoa mai e Elder Ulisses Soares o le Korama a Aposetolo e Toasefululua le tala i molimau. Maimoa le “O Le Oo Mai o le Tusi a Mamona” mai le faailotaimi 7:58 i le 10:30 e vaai ai i lona toe faamatalaina.

O aafiaga a Molimau e Toatolu ma Molimau e Toavalu o loo auiliiliina foi i le Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tagavai o le Upumoni, 1815–1846 [2018], 73–75).

Sa faaali atu foi ia Maria Uitimera ia papatusi. O le tala i lona aafiaga o loo maua i itulau 70–71 o le Au Paia, vol. 1, ma i le tusiga “A Bit of Old String: Mary Whitmer’s Unheralded Contributions” (history.ChurchofJesusChrist.org).

Gaoioiga Faaopoopo e Aoao Mai Ai

Isi molimau

E mafai ona aoga mo tamaiti aoga le mafaufau i le ala e mafai ai e molimau a isi o le Tusi a Mamona ona aafia ai a latou lava molimau. Valaaulia i latou e fai se lisi o tagata na latou faalogo i ai o molimau pe tautino atu le moni o le Tusi a Mamona. Fai atu ia i latou e faasoa mai pe na faapefea ona aafia i latou e na molimau. Ona fai atu lea ia i latou e tusi a latou lava molimau pe faamatala faapuupuu pe faapefea e le mauaina o a latou lava molimau ona aafia ai o latou olaga ma sootaga ma Iesu Keriso.

Mary Elizabeth Rollins Lightner

A o i ai i lona talavou, sa maua ai e Mary Elizabeth Rollins le Tusi a Mamona ma maua ai se molimau i lona moni. Mafaufau e faasoa atu le aafiaga a Mary i le vasega. E mafai ona e faitauina pe aotele ia parakalafa muamua e tolu o le “Mary Elizabeth Rollins: A Young Girl Strong and Courageous” (history.ChurchofJesusChrist.org).

Afai o le a manuia tamaiti aoga mai le aoao atili e uiga i nofoaga na tutupu ai mea autu e faatatau i le oo mai o le Tusi a Mamona, e mafai e le vasega ona faia se maimoaga faatekinolosi o nei nofoaga faasolopito, o loo maua i le ChurchofJesusChrist.org.