O Itulau Tomua o le Tusi a Mamona

Faatomuaga i le Tusi a Mamona

O Le Maa’au’au o La Tatou Tapuaiga

Na ta’ua e Iosefa Samita le Tusi a Mamona o le maa‘au‘au o la tatou tapuaiga. I totonu o le tusi o loo i ai se valaaulia e ole atu i le Atua pe moni. E faitau miliona tagata ua mulimuli i lenei valaaulia ma maua se molimau mai le Agaga Paia i le moni o le Tusi a Mamona. O lenei lesona ua faamoemoe e fesoasoani ia te oe e faateleina ai lou manao e suesue le Tusi a Mamona i aso taitasi e faamalosia ai lau molimau i lona moni.

Uunaia o le suesue i tusitusiga paia i aso taitasi. O se aga masani o le suesue i tusitusiga paia i aso taitasi e mafai ona faamanuiaina ai tamaiti aoga mo aso uma o totoe o o latou olaga. Vaavaai mo ni auala e aoao ai tamaiti aoga e uiga i faamanuiaga o le suesueina o tusitusiga paia i aso taitasi.

Sauniuniga a le tamaitiiti aoga: Valaaulia tamaiti aoga e faitau pe faalogologo i le saunoaga a Elder Gary E. Stevenson “Vaai i le Tusi, Vaai i le Alii” mai le konafesi aoao ia Oketopa 2016.

Gaoioiga e Ono Mafai Ona Aoao Ai

O Faamanuiaga mai le Tusi a Mamona.

Mafaufau e faaali atu le lisi lenei o faamanuiaga e oo mai i le faitauina o le Tusi a Mamona. Talanoa po o a faamanuiaga e sili ona mananao i ai tamaiti aoga ma le ala e mafai ai e faamanuiaga ona aafia ai o latou olaga i aso taitasi. E mafai foi e tamaiti aoga ona faasoa mai mea o le a latou naunau e fai e maua ai ia faamanuiaga. O nei faamanuiaga o loo otooto atu i saunoaga faaperofeta.

O nisi o nei saunoaga faaperofeta o loo maua i le lesona, a o isi o loo i le vaega o “Manatu ma Talaaga o Faamatalaga”.

Faitau ma mafaufau e faailoga le saunoaga a Iosefa Samita i le parakalafa 6 o le faatomuaga i le Tusi a Mamona.

• O le a se mea e tulagaese ia te oe mai le saunoaga a Iosefa Samita?

O le maa’au’au o la tatou tapuaiga

Fesoasoani i tamaiti aoga ia malamalama i le matafaioi o se maa’au’au (o le maa i le ogatotonu pito i luga o se faitotoa faa’ofu’ofu. O se tasi o filifiliga o le faaali atu lea o se ata o se maa’au’au i se faitotoa faaofuofu ma tuu atu i tamaiti aoga e talanoaina po o le fea maa e sili ona taua i le faitotoa faa’ofu’ofu.

Sa aoao mai Peresitene Ezra Taft Benson (1899–1994):

O le Tusi a Mamona o le maa’au’au o la tatou molimau ia Iesu Keriso, o Ia lava o le maatulimanu o mea uma tatou te faia. Na te molimau i Lona moni ma le mana ma le manino. …

… O le Tusi a Mamona o le maa’au’au lea o le molimau. E faapei ona pa’ū le faitotoa faaofuofu pe a aveese le maa’au’au, e faapena foi le tū ma le pa’ū o le Ekalesia atoa ma le moni o le Tusi a Mamona. (Ezra Taft Benson, “O Le Tusi a Mamona—o le Maa‘au’au o Lo Tatou Tapuaiga,” , Nov. 1986, 5, 6)

O le maa’au’au o la tatou molimau ia Iesu Keriso

• O le a sou manatu o le a le uiga o le Tusi a Mamona o le maa’au’au o la tatou molimau ia Iesu Keriso?

Na molimau mai e le aunoa tusitala o le Tusi a Mamona ia Iesu Keriso. Ina ia iloa pe faapefea ona maua e tagata eseese ni mau faasino ia Iesu Keriso i itulau o le tusi, matamata le vitio “Book of Mormon Experiment Honolulu” (2:35). E mafai ona maua lenei vitio i le ChurchofJesusChrist.org.

E tele auala mo tamaiti aoga e auai ai i le faatinoga lenei. Ia fatufatua’i, ma vaavaai mo auala e faaaofia ai tamaiti aoga taitasi. O se tasi o manatu o le tuu atu lea i tamaiti aoga taitasi o se itulau ua kopiina mai le Tusi a Mamona ma fai atu ia i latou e maka mau faasino taitasi i le Faaola i a latou itulau. Ona mafai lea ona faaali atu itulau mo isi tamaiti aoga e vaai i ai.

Filifili soo se itulau mai le Tusi a Mamona, ma vaavaai mo mau taitasi uma e faasino i le Faaola i lena itulau.

• O a mea na e mauaina e uiga i le Faaola?

• O a ni mea ua fesoasoani ai ia te oe ia fuaitau na e mauaina e malamalama ai pe lagona ai e uiga i le Faaola?

Mafaufau pe o le a faapefea ona faamanuiaina oe e ala i le i ai o se molimau sili atu ona malosi ia Iesu Keriso. A o e suesue i le Tusi a Mamona, vaavaai mo mau faasino ia Iesu Keriso ma mo mea ua e aoaoina e uiga ia te Ia. A o e faia, o le a tuputupu ae lou malamalama ma le molimau i le Faaola.

O Le maa’au’au o la tatou molimau

Valaaulia tamaiti aoga e taitoatasi ona manatunatu i faamatalaga nei.

• O le fea o faamatalaga nei e sili ona faamatalaina ai ou lagona e uiga i le Tusi a Mamona?

  • Ou te faatuatuaina isi o e ua mauaina a latou lava molimau patino ma faamautinoa mai ia te au e moni le Tusi a Mamona.

  • Ou te le o mautinoa pe ua ou iloa e moni le Tusi a Mamona.

  • Ua ou mauaina se molimau mai le Agaga Paia e faapea e moni le Tusi a Mamona.

• Aisea e te manatu ai atonu e finagalo le Tama Faalelagi ia e iloa e moni le Tusi a Mamona?

Faitau le parakalafa lona lua i le parakalafa mulimuli i le faatomuaga, faapea foi le Moronae 10:3–5, ma vaavaai mo mea e mafai ona e faia ia iloa ai pe moni le Tusi a Mamona.

• E tusa ai ma mea na e faitauina, o le a le mea e manaomia e se tasi ona fai ia iloa ai pe moni le Tusi a Mamona?

Fesoasoani i tamaiti aoga e faailoa mai se mataupu faavae e talitutusa ma lenei: Afai ou te faitauina le Tusi a Mamona, mafaufau loloto i lana savali, ma ole atu i le Atua pe moni, ona mafai lea ona ou maua se molimau mai le Agaga Paia.

Na faasoa mai e Elder Ulisses Soares o le Korama a Aposetolo e Toasefululua le ala na tuputupu ae ai lana molimau i le Tusi a Mamona a o ia auai i le seminare. Atonu e te manao e maimoa le “The Coming Forth of the Book of Mormon,” o loo maua i le ChurchofJesusChrist.org, mai le faailotaimi 12:03 i le 14:12.

Faitau le parakalafa mulimuli i le faatomuaga o le Tusi a Mamona, ma vaavaai po o le a le isi malamalama e oo mai faatasi ma se molimau o le Tusi a Mamona.

• E mafai faapefea e le i ai o se molimau o le Tusi a Mamona ona aafia ai lou olaga?

Mafaufau e faasoa atu lau molimau o le Tusi a Mamona ma valaaulia tamaiti aoga naunautai e molimau atu foi.

Suesue le Tusi a Mamona i aso taitasi

Na fofogaina mai e Peresitene Russell M. Nelson ia i tatou uma ia folafolaga pe afai tatou te suesue i le Tusi a Mamona i aso uma. Faitau le faamatalaga lenei, pe matamata le vitio “The Book of Mormon: What Would Your Life Be Like without It?” i le ChurchofJesusChrist.org mai le taimi 11:52 i le 13:05.

Ou te folafola atu a outou suesueina ma le agaga tatalo le Tusi a Mamona i aso uma, o le a outou faia ni faaiuga lelei atu i—aso uma. Ou te folafola atu a outou mafaufau loloto i mea tou te suesueina, o le a matala mai pupuni o le lagi, ma o le a outou mauaina tali i a outou lava fesili ma le taitaiga mo o outou lava olaga. Ou te folafola atu a e faatofuina oe lava ia i le [suesueina o le] Tusi a Mamona i aso taitasi, e mafai ona puipuia oe mai mea leaga o le aso, e aofia ai ma le mala faataumaoi o ponokalafi ma isi vaisu faagase mafaufau.

Soo se taimi lava ou te faalogo ai i se tasi, e aofia ai ma a’u lava ia, o faapea, “Ou te iloa e moni le Tusi a Mamona,” e oso lava lo’u fia alaga atu, “E manaia tele, ae le lava lena!” E manaomia ona tatou lagonaina, i le loloto i le ‘taele’ o o tatou loto [Alema 13:27], o le Tusi a Mamona ele taumasalomia o le afioga lava a le Atua. E tatau ona tatou lagonaina le o’oo’o lea tatou te le mananao ai lava e ola i se aso e aunoa ma le tusi. (Russell M. Nelson, “O Le Tusi a Mamona: Faamata e Faape’i Lou Olaga e aunoa ma Ia?,” Liahona, Nov. 2017, 62–63)

• O le a se mea ua faagaeetia ai oe mai lenei faamatalaga?

• O le a sou lagona e uiga i le valaaulia e faitau le Tusi a Mamona i aso uma?

Talanoaina faafitauli i le suesueina o tusitusiga paia i aso taitasi ma auala e foia ai.

Afai e lei faatuina e tamaiti aoga se sini patino o le suesueina o tusitusiga paia lea e faatatau i togi a le seminare mo le faauuga, atonu o se avanoa lea mo i latou e faia ai. Afai e mananao ai tamaiti aoga, e mafai ona latou faasoa atu a latou sini i se tagata o le aiga, taitai o le Ekalesia, po o se faiaoga seminare. Mafaufau e faasoa atu faamanuiaga patino mai le faitauina o le Tusi a Mamona ma valaaulia tamaiti aoga naunautai e faia foi lena mea.

Manatu ma Talaaga o Faamatalaga

O le a le maa’au’au?

Ina ia aoao atili e uiga i le matafaioi a se maa’au’au, matamata le vitio “Look to the Book, Look to the Lord” mai le faailotaimi 5:16 to 6:41.

E faafia ona ta’ua e le Tusi a Mamona ia Iesu Keriso?

Na aoao mai Elder Gary E. Stevenson o le Korama a Aposetolo e Toasefululua e faapea:

O le a e faitauina toto’a fuaitau o lenei tusi taua ma fetaiai ai ma lou Faaola pele, le Alii o Iesu Keriso, toetoe lava i ona itulau uma. O se faatatau i le faaaogaina o nisi ituaiga o suafa mo Lona suafa pe tusa o se averesi o le faatasi i le 1.7 fuaiupu taitasi. (Gary E. Stevenson, “Vaai i le Tusi, Vaai i le Alii,”,” Liahona, Nov. 2016, 47)

E faapefea ona faamanuiaina au e ala i le suesueina o le Tusi a Mamona?

Sa molimau mai Peresitene Ezra Taft Benson (1899–1994):

Ua le na o le faapea ua aoao mai e le Tusi a Mamona ia i tatou upu moni, e ui o le mea moni lena na te faia. E le na o le faapea ua molimau le Tusi a Mamona ia i tatou e uiga ia Keriso, e ui lava ina moni foi lena mea. Ae o loo i ai se isi mea. O loo i ai se mana i le tusi e amata ona oo mai i lou olaga i le taimi lava e amata ai ona e suesue maelega i le tusi. O le a e maua le mana sili atu e tetee atu ai i faaosoosoga. O le a e maua le mana e aloese ai mai mea tau faasese. O le a e maua le mana e tumau ai i le ala sa’o ma le vaapiapi. O tusitusiga paia ua ta’ua o “afioga o le ola” [Mataupu Faavae ma Feagaiga 84:85], ma e leai se isi mea e sili atu ai ona moni lena faaupuga nai lo le Tusi a Mamona. A amata loa ona e matelaina ma galala i le fia maua o na afioga, o le a e maua le faamanuiaga tele ma le faateleina i le olaga. (Ezra Taft Benson, “O Le Tusi a Mamona—o le Maa‘au’au o Lo Tatou Tapuaiga,” , Nov. 1986, 7)

Na molimau mai Peresitene Thomas S. Monson (1927–2018):

Ou te augani atu ia i tatou uma ia suesue ma le agaga tatalo ma mafaufau loloto i le Tusi a Mamona i aso taitasi. A tatou faia lea mea, o le a tatou i ai i se tulaga e lagona ai le siufofoga o le Agaga, e tetee atu ai i faaosoosoga, e faatoilalo ai le masalosalo ma le fefe, ma maua ai le fesoasoaniga a le lagi i o tatou olaga. Ou te molimau atu ai ma lo’u loto atoa. (Thomas S. Monson, “O Le Mana o le Tusi a Mamona,” Liahona, Me 2017, 87)

E faapefea ona ou faaavanoa se taimi e suesue ai le Tusi a Mamona?

Na aoao mai Elder Gary E. Stevenson o le Korama a Aposetolo e Toasefululua e faapea:

Ina ia fesoasoani e avea le Tusi a Mamona ma maa’au’au o lau molimau, ou te tuu atu ia te outou se lu’i. Talu ai nei sa ou iloa ai o le tele o atunuu i le lalolagi, e faaalu e le autalavou se averesi e fitu itula i le aso e matamata ai i le TV, komepiuta, ma telefonipoto. I le iloaina ai o lenei mea, e mafai ona e faia sina suiga itiiti? E mafai ona e suitulaga nisi o na taimi i aso taitasi—ae patino lava i taimi o loo faaalu i alafaasalalau faaagafesootai, le initoneti, taaloga, po o televise—i le faitauina o le Tusi a Mamona? Afai o suesuega ia ou te faasino atu i ai e sa’o, e faigofie lava la ona maua se taimi i aso taitasi e suesue ai le Tusi a Mamona e tusa lava pe na o se 10 minute i le aso. Ma e mafai ona e suesue i se ala e faatagaina ai oe e te mauaina ai le fiafia ma malamalama ai—pe o luga o lau tamai masini po o le tusi lava ia. (Gary E. Stevenson, “Vaai i le Tusi, Vaai i le Alii,” Liahona, Nov. 2016, 46)

Gaoioiga Faaopoopo e Aoao Ai

Tusi se ata o se faitotoa faaofuofu ma se maa’au’au. Faaigoa le maa’au’au i le “O Le Tusi a Mamona.” Valaaulia tamaiti aoga e faaigoa isi maa i le faaofuofu i elemene o le talalelei a le Faaola. Ona talanoaina lea pe mafai faapefea e se molimau o le Tusi a Mamona ona fesoasoani ia i tatou ia maua foi se molimau i isi elemene o le talalelei a le Faaola. Pe a manaomia, tagai i le parakalafa mulimuli i le faatomuaga o le Tusi a Mamona.

E mafai e tamaiti aoga ona fatu se faitotoa faaofuofu e foliga tutusa ma lenei: