Itulau Tomua o le Tusi a Mamona

Vaaiga Aoao

Na ta’ua e Iosefa Samita le Tusi a Mamona o le maa‘au‘au o la tatou tapuaiga. Na oo mai e ala “i le meaalofa ma le mana o le Atua” (Mataupu Faavae ma Feagaiga 135:3), ma molimau e toatele ua faamaonia lona tupuaga faavavega. O nei lesona e mafai ona fesoasoani ia te oe e malamalama ai ma faamatala le faamoemoega o le Tusi a Mamona, faateleina lou manao e suesue i ai i aso taitasi, ma manatunatu i lau lava molimau i lona moni.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

Itulau Autu

Faamoemoega o le lesona: O lenei lesona ua faamoemoe e fesoasoani i tamaiti aoga ia malamalama ma faamatala ia faamoemoega o le Tusi a Mamona.

• Sauniuniga a le tamaitiiti aoga: Valaaulia tamaiti aoga e mafaufau loloto pe aisea ua faamamafaina ai le Tusi a Mamona ma faaaoga soo i Le Ekalesia a Iesu Keriso o le Au Paia o Aso e Gata Ai.

• Anotusi e faaali atu: O se meafaigaluega po o se ata o se meafaigaluega atonu e le masani ai tamaiti aoga

• Fautuaga faafaiaoga faavitio: Mafaufau e vaevae tamaiti aoga ma faataape i ni potu e talanoaina ai faamoemoega o le Tusi a Mamona. Atonu e sili atu le to’a o tamaiti aoga e fefaasoaai i paga po o vaega toalaiti.

Faatomuaga i le Tusi a Mamona

Faamoemoega o le lesona: O lenei lesona ua faamoemoe e fesoasoani i tamaiti aoga ia faateleina lo latou manao e suesue le Tusi a Mamona i aso taitasi e faamalosia ai a latou molimau i lona moni.

• Sauniuniga a le tamaitiiti aoga: Valaaulia tamaiti aoga e faitau pe faalogologo i le saunoaga a Elder Gary E. Stevenson “Vaai i le Tusi, Vaai i le Alii” mai le konafesi aoao ia Oketopa 2016.

• Vitio: “Book of Mormon Experiment Honolulu” (2:35); “The Coming Forth of the Book of Mormon” (17:12; maimoa mai le faailotaimi 12:03 i le 14:12)

• Aitema e saunia: O se kopi o se itulau mai le Tusi a Mamona mo tamaiti aoga taitasi

• Fautuaga faafaiaoga faavitio: Valaaulia ni tamaiti aoga naunautai e faasoa mai pe na faapefea ona latou makaina mau faasino i le Faaola i la latou itulau o le Tusi a Mamona. E mafai ona latou uu i luga a latou tusitusiga paia pe faasoa atu se atapue o le lau pe afai o faaaogaina tusitusiga paia faaeletonika. E mafai foi ona latou faasoa atu i le talanoaga tusitusi se igoa mo le Faaola po o se fuaiupu e tulagaese ia i latou.

O le Molimau a Iosefa Samita o le Tusi a Mamona

Faamoemoega o le lesona: O le lesona lenei e mafai ona fesoasoani i tamaiti aoga ia malamalama atili ma faamatala le ala na oo mai ai le Tusi a Mamona “e ala i le meaalofa ma le mana o le Atua” (Mataupu Faavae ma Feagaiga 135:3).

• Sauniuniga a le tamaitiiti aoga: Valaaulia tamaiti aoga e o mai saunia e faasoa mai mea ua latou iloa e uiga i le oo mai o le Tusi a Mamona ma po o a ni a latou fesili e uiga i ai.

• Anotusi e faaali atu: O ata o loo i le amataga o le lesona (E mafai ona faaalia nei ata i le potuaoga, po o kopi e mafai ona lolomiina ma tufatufa atu i tamaiti aoga e faatulaga i le faasologa tonu o taimi ma mea na tutupu ai.)

• Vitio: “Days of Harmony” (25:01; maimoa mai le faailotaimi 5:44 i le 9:24)

• Fautuaga faafaiaoga faavitio: O lenei lesona e maua ai le tele o avanoa mo gaoioiga i le upegatafailagi. Mo se faataitaiga, mafaufau e fai se suega puupuu i le upegatafailagi e faaaoga ai ata mai le lesona ma valaaulia tamaiti aoga e fai le suega puupuu i le taimi o le vasega. E mafai foi ona fesoasoani le faaaogaina o se faigapalota e le faalauaiteleina i luga o le upegatafailagi e faataga ai tamaiti aoga e auina mai a latou fesili e uiga i le faaliliuga o le Tusi a Mamona.

O Mau a Molimau e Toatolu ma Molimau e Toavalu

Faamoemoega o le lesona: O lenei lesona e mafai ona fesoasoani i tamaiti aoga ia malamalama i le taua o molimau e toatele o le Tusi a Mamona ma manatunatu ai i a latou lava molimau.

• Sauniuniga a le tamaitiiti aoga: Valaaulia tamaiti aoga e o mai saunia e faasoa mai ni aafiaga na fesoasoani ia i latou po o isi ia iloa ai o le Tusi a Mamona e mai le Atua.

• Vitio: “A Day for the Eternities” (23:09; maimoa mai le faailotaimi 15:00 i le 18:37)

• Pepa e tufa atu: “O Le Mau a Molimau e Toatolu ma Molimau e Toavalu”

• Fautuaga faafaiaoga faavitio: Mafaufau e valaaulia ni nai tamaiti aoga e aumai se tagata o le aiga po o se uo i le vasega i luga o le upegatafailagi e faasoa mai lana molimau ia Iesu Keriso ma le Tusi a Mamona. E mafai e nei tagata ona faasoa mai a latou molimau a o lei oo i le faaiuga o le lesona, pe a valaaulia tamaiti aoga e tusi a latou lava molimau.

Mauaina o le Malamalama Faaleagaga, Vaega 2

Faamoemoega o le lesona: O lenei lesona e mafai ona fesoasoani i tamaiti aoga e iloilo ai manatu faavae ma fesili faatasi ma se vaaiga e faavavau ma vaai atili i ai e pei ona faia foi e le Faaola.

• Sauniuniga a le tamaitiiti aoga: Valaaulia tamaiti aoga e faafetai i le Tama Faalelagi i a latou tatalo faaletagata lava ia mo le malamalama o loo ia i latou e uiga i le fuafuaga o le faaolataga. Mafaufau e valaaulia i latou e ole atu ia te Ia pe mafai faapefea ona latou faaaogaina lena malamalama mo le lelei.

• Vitio: “Examining Questions with an Eternal Perspective” (2:56)

• Fautuaga faafaiaoga faavitio: A o matamata tamaiti aoga i le vitio “Examining Questions with an Eternal Perspective,” atonu e fesoasoani le taofi i ni vaega faapitoa e faataga ai i latou e faataitai ona toe faaupu le fesili a Adry. Mo se faataitaiga, i le faailotaimi 1:12, mafaufau e fesili, “Mata o a nisi manatu po o talitonuga na taitai atu ai Adry e fai lenei fesili?” I le faailotaimi 1:57, mafaufau e fesili, “O a upumoni ua e iloa e mafai ona talanoaina ai mafaufauga po o talitonuga i tua atu o le fesili a Adry?”