Alma 23

Sila “Wala Gayod Mobiya”

Hunahunaa ang daghang mga puwersa sa kalibotan karon nga nagtinguha sa pagguba sa imong hugot nga pagtuo ug pagbira kanimo palayo sa Ginoo. Unsa ang imong mahimo aron makabarog nga lig-on ug mapugngan kini nga mahitabo? Makakat-on kita gikan sa mga ehemplo sa liboan ka mga Lamanite kinsa “[nakabig] ngadto sa Ginoo” ug “wala gayod mobiya” (Alma 23:6). Ang katuyoan niini nga leksiyon mao ang pagtabang kanimo nga magtinguha nga mas hingpit nga makabig ngadto sa Ginoo ug makaila sa bisan unsang mga babag niana nga pagkakabig.

Pagdasig sa mga tigkat-on sa pagpaningkamot sa pagsunod ni Jesukristo. Tabangi ang mga estudyante nga makasabot nga samtang sila maningkamot sa pagsunod sa ebanghelyo ni Jesukristo, sila mahimong mas mahisama sa Manluluwas ug makakita og dugang nga kalipay sa ilang pagkadisipulo.

Pagpangandam sa estudyante: Dapita ang mga estudyante sa pagtambong nga andam sa pagpakigbahin unsa sa ilang hunahuna ang gipasabot sa “makabig ngadto sa Ginoo” (Alma 23:6) ug nganong ang pagkakabig ngadto Kaniya mahinungdanon kaayo. Mahimo nilang tan-awon ang Giya ngadto sa mga Kasulatan ubos sa “Pagkakabig, Kinabig” kon nagkinahanglan sila og tabang.

Posible nga mga Kalihokan sa Pagkat-on

Lig-on nga nagbarog

Kini nga leksiyon ug ang leksiyon sa Alma 24 mahimong magtinabangay aron sa pagtabang sa mga estudyante sa pagpalawom sa ilang pagkakabig. Kini nga leksiyon makatabang sa mga estudyante sa pag-ila sa mga babag sa ilang pagkakabig; ang sunod nga leksiyon gituyo sa pagtabang kanila sa pagbuntog niadtong mga babag.

Ikonsiderar ang pagdapit og duha ka boluntaryo sa pagbuhat sa mosunod nga kalihokan. Pahinumdomi sila nga dili kaayo moduso og kusog.

Kon mahimo, barog gamit ang usa ka tiil sulod sa 30 ka segundo. Hunahunaa kon unsa ka lisod ang pagpabilin nga nagbarog kon adunay nagduso kanimo samtang ikaw nagbarog gamit ang usa ra ka tiil.

Karon barog sa duha ka tiil ug hunahunaa kon unsa ka mas sayon ang pagpabilin nga nagbarog bisan kon adunay magduso kanimo.

Usahay, ang mga kasulatan nagtandi sa pagkamatinud-anon ngadto sa Ginoo ngadto sa pagbarog nga makanunayon (tan-awa sa Mosiah 4:11; Alma 1:25) ug pagtalikod sa Ginoo ngadto sa pagkapukan (tan-awa sa 2 Nephi 18:15; Helaman 5:12).

• Unsa ang pipila ka mga rason nga ang mga tawo mobiya gikan ni Jesukristo ug sa Iyang Simbahan?

Mahimo nimong ipakita kini nga mga pangutana aron pagtugot sa mga estudyante nga makapamalandong niini.

Pamalandongi ang mosunod nga mga pangutana:

• Kon magpadayon ka sa pagpakabuhi sa imong paagi karon, gibati ba nimo nga mas maduol ka ngadto sa Ginoo ug sa Iyang Simbahan o magsugod sa pagbiya? Ngano man?

• Unsa ang imong nahibaloan mahitungod sa Ginoo ug sa Iyang Simbahan nga nakapahimo kanimo nga dili gustong mopahilayo?

Samtang magtuon ka bahin sa mga tawo kinsa “wala gayod mobiya” (Alma 23:6), pangitaa ang mga panabot ug tinguhaa ang giya alang sa imong kinabuhi pinaagi sa pag-ampo ngadto sa Langitnong Amahan ug sa inspirasyon sa Espiritu Santo.

Nakabig ngadto sa Ginoo

Human sa iyang pagkakabig, ang hari sa mga Lamanite mipahayag og kagawasan sa relihiyon diha sa yuta aron ang mga anak nga lalaki ni Mosiah luwas nga makasangyaw sa ebanghelyo.

Basaha ang Alma 23:3–5, mangita sa epekto sa pagsangyaw diha sa mga tawo.

Ikonsiderar ang pagpangutana kon unsa nga mga hugpong sa mga pulong ang mipatigbabaw diha sa imong mga estudyante.

Usahay, ang mga kasulatan magsubli sa mga hugpong sa mga pulong nga mahinungdanon nga atong masabtan. Basaha ang Alma 23:6–13, 15, mangita sa mga hugpong sa mga pulong nga nagsulti kon nganong kining liboan ka mga kinabig “wala gayod mobiya” (bersikulo 6). Ikonsiderar ang pagmarka sa gibalikbalik nga mga hugpong sa mga pulong.

Dapita ang mga estudyante sa pagpakigbahin sa unsay ilang nakaplagan. “Makabig ngadto sa Ginoo” gisubli diha sa Alma 23:6, 8, 13, ug “mihunong sa paggamit sa mga hinagiban sa ilang pagsukol” ug “mihunong sa paggamit sa mga hinagiban sa ilang pagsukol” anaa sa Alma 23:7, 13, ang matag usa.

Usa ka kamatuoran nga atong makat-onan gikan niini nga mga bersikulo mao nga samtang kita nakabig ngadto sa Ginoo ug mihunong sa paggamit sa atong mga hinagiban sa pagsukol, kita sa kanunay makabarog nga matinud-anon ngadto Kaniya.

• Unsa ang gipasabot sa “makabig ngadto sa Ginoo”? (Alma 23:6). (Kon makatabang, ikonsiderar ang pagtuon sa “Pagkakabig, Kinabig” diha sa ang Giya ngadto sa mga Kasulatan).

• Ngano nga mahinungdanon nga makabig “ngadto sa Ginoo” kay sa ngadto sa usa ka misyonaryo o usa ka partikular nga pagtulun-an?

Ipakita ang hulagway sa Manluluwas samtang imong dapiton ang mga estudyante sa pagbuhat sa mosunod.

Hunahunaa kon unsay imong nahibaloan mahitungod sa Manluluwas ug palandonga nganong gusto nimong mamahimo ug magpabiling makabig ngadto Kaniya sa tibuok nimong kinabuhi. Ikonsiderar ang pagbasa sa pipila sa mosunod nga mga bersikulo aron sa pagtabang kanimo:

• Juan 14:6

• Omni 1:26

• Helaman 5:12

• Ether 12:27

Dapita ang mga estudyante sa pagpakigbahin sa ilang mga hunahuna ug unsay ilang nakaplagan.

• Unsa ang nakatabang kanimo ug sa uban nga imong nailhan nga mahimong mas makabig ngadto sa Ginoo?

Paghunong sa paggamit sa atong mga hinagiban sa pagsukol

Aron tinud-anay nga makabig ngadto sa Ginoo ug dili gayod mobiya, kinahanglan nga andam kita nga mohunong sa paggamit sa atong mga hinagiban sa pagsukol. Ang mga hinagiban sa pagsukol sa mga Lamanite literal ug simbolikanhon. Apan alang kanato, kini nga mga hinagiban lagmit nga simbolikanhon lamang.

Ikonsiderar ang pagsulat sa mosunod nga mga pamahayag diha sa pisara.

Si Elder David A. Bednar sa Korum sa Napulog Duha ka Apostoles mitudlo nga ang atong mga hinagiban sa pagsukol mahimong “kahakog, garbo, ug kamasinupakon” (“Nakabig ngadto sa Ginoo,” Liahona, Nob. 2012, 108). Si Elder Dale G. Renlund sa Korum sa Napulog Duha ka Apostoles mitudlo nga ang atong mga hinagiban sa pagsukol mahimong “ang personal nga mga tinguha nga supak sa pagka-angkla diha sa Manluluwas ug pagsubay sa dalan sa pakigsaad” (“Walay Pagkapaling nga Pasalig ngadto kang Jesukristo,” Liahona, Nob. 2019, 22).

Ang tuyo sa mosunod nga kalihokan mao ang pagtabang sa mga estudyante sa pag-ila sa mga ehemplo sa mga hinagiban sa pagsukol nga may kalabotan sa atong panahon. Mahimong bahinon ang klase ngadto sa ginagmay nga mga grupo. Human ang igong panahon, dapita ang matag grupo sa pagpili og usa ka miyembro nga moduol diha sa pisara ug magdrowing ug sulatan og ngalan ang hinagiban sa pagsukol samtang ang laing miyembro mopresentar og daklit sa pipila ka mga tubag sa grupo sa mosunod nga mga pangutana. Samtang sila mopakigbahin, pangita og mga paagi sa pagdayeg sa mga estudyante sa paghimo sa mga kasulatan nga may kalabotan sa atong panahon, ug pasalamati sila sa ilang mga paningkamot.

Pagdrowing og duha ka yano nga mga hinagiban (espada, bangkaw, o ubang mga hinagiban) diha sa imong journal sa pagtuon o sa usa ka piraso nga papel. Sunod o sa matag hinagiban, pagsulat og usa ka piho ug tinuod nga ehemplo sa usa ka kinaiya o lihok nga supak sa ebanghelyo ni Jesukristo nga mahimong anaa sa usa ka tin-edyer sa atong panahon. Sama pananglit, ang usa ka tawo nga nanlimbasog sa garbo mahimong dili maminaw sa tambag sa iyang mga ginikanan o mahimong mobati nga ang mga propeta tigulang na ug wala na sa panahon ang ilang tambag. O usa ka tawo nga makahimo og piho nga mga sala tungod kay siya naghunahuna nga ang mga sugo sa Dios hilabihan ka higpit.

• Sa unsang paagi nga kini nga mga kinaiya o mga lihok makaapekto sa pagkakabig niini nga tawo ngadto sa Ginoo?

• Sa unsang paagi nga ang paghunong o pagbiya niini nga mga kinaiya o mga lihok makatabang sa usa ka tawo nga mas makabig ngadto sa Ginoo?

Imong mga hinagiban sa pagsukol

Ikonsiderar ang pagdapit sa mga estudyante sa pagbuhat sa mosunod nga kalihokan diha sa ilang mga journal sa pagtuon.

Sa pagtapos niini nga leksiyon, tinguhaa ang tabang sa Langitnong Amahan pinaagi sa Espiritu Santo sa pag-ila kon unsa nga mga hinagiban sa pagsukol nga mahimong anaa kanimo. Kon makaila ka og usa, ikonsiderar ang pagsulat niini diha sa imong journal sa pagtuon ug pagdrowing og hinagiban tupad niini.

Pamalandongi kon unsay imong mahimo sa paghunong sa paggamit sa imong mga hinagiban sa pagsukol ug sa unsang paagi kana nga pasalig makatabang kanimo nga makabig ngadto sa Ginoo ug dili gayod mobiya.

Ikonsiderar ang pagpamatuod bahin sa mga baroganan nga gitudlo niini nga leksiyon.

Komentaryo ug Background nga Impormasyon

Alma 23:6. Unsa ang gipasabot sa makabig ngadto sa Ginoo?

Tan-awa ang “Nakabig ngadto sa Ginoo” gikan sa time code 10:43 hangtod sa 11:41 aron makita si Elder David A. Bednar sa Korum sa Napulog Duha ka Apostoles nga mipasabot.

Tan-awa ang “Magpakabig Kamo” gikan sa time code 0:48 hangtod sa 3:21 ug “Kamo Mahimo nga Gawasnon” gikan sa time code 6:43 hangtod sa 8:52 aron makita ang mga ehemplo sa pagkakabig.

Unsa nga mga panalangin ang moabot samtang atong ipadaplin ang atong mga hinagiban sa pagsukol?

Si Elder Patrick Kearon sa Seventy mitudlo:

Ato lamang makit-an ang pag-ayo ug paghupay sa higayon nga atong dad-on ang atong kaugalingon ngadto sa tiilan sa Bantogan nga Mananambal, atong Manluluwas, si Jesukristo. Kinahanglan atong ibutang ang atong mga hinagiban sa pagsukol (ug matag usa nato nakahibalo unsa kini). Kinahanglan atong ibutang ang atong sala, hambog, ug garbo. Kinahanglan atong undangon ang atong mga tinguha sa pagsunod sa kalibotan ug aron respetohan ug daygon sa kalibotan. Kinahanglan atong hunungon ang pakig-away batok sa Dios ug hinoon, ihatag ang atong tibuok nga kasingkasing ngadto Kaniya, sa walay pagpanuko. Dayon, Siya makaayo kanato. Dayon, Siya makalimpyo kanato gikan sa makahilong ikos sa sala. (Patrick Kearon, ““Duol ngari Kanako Uban sa Hingpit nga Katuyoan sa Kasingkasing, ug Ako Moayo Kaninyo,” Liahona, Nob. 2010, 52)

Unsa ang gipasabot sa ngalan nga Anti-Nephi-Lehi?

Ang ngalan nga Anti-Nephi-Lehi mahimong magpakita sa paghiusa sa mga kaliwat ni Nephi ug niadtong misunod kaniya uban sa laing kaliwatan ni Lehi. Busa, imbes nga adunay sentido nga ‘batok,’ kini adunay kahulugan nga ‘ang usa nga kauban ni Nephi ug Lehi’” (Stephen D. Ricks, “Anti-Nephi-Lehi,” ni Dennis L. Largey, ed., Book of Mormon Reference Companion [2003], 67).

Dugang nga mga Kalihokan sa Pagkat-on

Usa ka alternatibo nga pagsugod

Hangyoa ang mga estudyante sa pagpamalandong kon unsay makatabang kanila nga magpabiling matinud-anon sa Ginoo ug sa Iyang ebanghelyo sa tibuok nilang kinabuhi, bisan pa sa mga babag.

Pagkakabig

Kon makabenepisyo ang mga estudyante gikan sa pagtuon og dugang mahitungod sa unsay gipasabot sa pagkakabig ug unsa kini tan-awon, ikonsiderar ang pagpakigbahin sa bidyo gikan ni Elder Bednar ingon man usab sa usa o duha sa mga bidyo nga naghulagway sa mga ehemplo sa pagkakabig gikan sa seksiyon sa “Komentaryo ug Background nga Impormasyon”. Dapita ang mga estudyante sa pagpakigbahin og mga ehemplo sa pagkakabig ngadto sa Ginoo nga nahibaloan usab nila. Hangyoa sila sa pagtino sa mga lihok nga ilang mahimo aron sila mahimong mas makabig ngadto sa Ginoo mismo.

Kagawasan sa relihiyon

Ang mga lider sa Simbahan mihatag og gibug-aton sa kamahinungdanon sa kagawasan sa tinuohan dinhisa atong panahon. Kon makabenepisyo ang mga estudyante gikan sa pagtuon og dugang mahitungod niining mahinungdanon nga hilisgotan, ikonsiderar ang pagdapit sa mga estudyante sa pagtuon sa Alma 23:1–7 ug sa pagpakigbahin unsa nga mga panalangin ang miabot tungod kay ang kagawasan sa tinuohan gihatag ngadto sa mga Lamanite. Hangyoa ang mga estudyante sa pagpakigbahin nganong gusto sa Ginoo nga makabaton kita og kagawasan sa tinuohan ug unsay gitudlo niana mahitungod Kaniya. Dapita ang mga estudyante sa paghunahuna kon unsay ilang mahimo aron mapreserbar ang kagawasan sa tinuohan sa ilang mga komunidad ug sa unsang paagi kini makatabang sa buluhaton sa Ginoo nga magpadayon. (Tan-awa usab ang Ronald A. Rasband, “Aron sa Pag-alim sa Kalibotan,” Liahona, Mayo 2022, 91–94.)