Alema 26

“O Le a Tatou Mitamita i le Alii”

Na i ai se taimi na e maua ai se aafiaga sa le mafai ona e faatali e ta’u atu i se tasi? O le a se mea na e manao ia iloa e tagata? E faapena foi, sa olioli Amona ma ona uso e uiga i la latou misiona e 14 tausaga i sa Lamana, ma sa latou mananao e faasoa mai o latou aafiaga. Sa latou molimauina le mana ma le alofa o le Atua a o aumaia le faitau afe o sa Lamana i le malamalama o le upumoni. O lenei lesona e mafai ona fesoasoani ia te oe e lagona ai le loto faafetai loloto ma le alofa mo le Alii ma mo faamanuiaga Na te faaee mai i lou olaga.

Saunia e avea ma se meafaigaluega mo le Agaga Paia. A o e taumafai e mulimuli i le faataitaiga a le Faaola o le usiusitai ma ola i le talalelei ma lou loto atoa, o le a faatasi le Agaga ma oe. E le faapea e tatau ona e atoatoa—tau lava o le taumafai ma le filiga. Saili le faamagaloga e ala i le Togiola a le Faaola i so o se taimi lava e te tautevateva ai.

Sauniuniga a le tagata aoga: E mafai e tagata aoga ona faitau le Alema 26:11–16 ma mafaufau loloto po o le a so latou manatu i le uiga o le “mitamita i le Alii.”

Gaoioiga e Ono Mafai Ona Aoao Ai

O le a se mea e te faananau lava i ai?

E mafai e tagata aoga ona talanoaina mea nei o ni paga po o ni vaega toalaiti. I se isi faiga, e mafai ona e valaaulia se tagata aoga se toatasi pe toalua e faasoa faapuupuu mai i le vasega.

Manatunatu mo ni nai minute i se mea e te fiafia i ai pe faananau i ai—o se mea e amata loa ona e talanoa i ai, e faigata lava ona taofi!

• Aisea e matua malosi ai lou lagona i lenei mea?

• O le a se mea e te faamoemoe o le a lagonaina e isi pe a e talanoa e uiga i ai? Aisea?

Ina ua toe foi mai atalii o Mosaea mai la latou misiona e 14 tausaga i sa Lamana, sa talanoa Amona ma ona uso e uiga i o latou aafiaga. Faitau le Alema 26:8, 16, ma vaavaai mo mea na naunau ma faananau i ai Amona.

I le Alema 26:16, na faaaoga ai e Amona ia upu mitamita, olioli, ma le viia a o tautala e uiga i le Alii. O le mitamita o lona uiga o le olioli po o le tuuina atu o le “neetaga, mamalu, ma le faafetai” (Merriam-Webster.com, “Glory”; tagai foi O le Taiala i Tusitusiga Paia, “Glory”; scriptures.ChurchofJesusChrist.org). Atonu e te manao e faailoga upu nei i le fuaiupu 16 ma i isi fuaiupu e te suesueina i le asō.

Mafaufau e valaaulia tagata aoga e tusi le faauigaga o le mitamita i a latou api talaaga pe tusi se faamatalaga i tafatafa o le Alema 26:16. Atonu o loo i ai i tagata aoga ni faauigaga faaopoopo po o ni manatu e faasoa mai e tusa ai ma a latou sauniuniga o le vasega.

Faaalu sina taimi e tomanatu ai i mea nei:

• O a ni ou lagona e uiga i lou sootaga ma le Tama Faalelagi? Aisea?

• E te talanoa atu i isi e uiga ia te Ia ma le fiafia ma le olioli? Aisea pe aisea foi e leai ai?

A o e suesue i le Alema 26 i le aso, mafaufau loloto pe mafai faapefea e le faataitaiga a Amona o le faasoa atu o ona lagona e uiga i le Atua ona faateleina lou alofa ma le lotofaafetai mo le Tama Faalelagi ma Iesu Keriso.

“Faamanuiaga tetele faapenei”

Fuafua pe o le a sili atu ona aoga i tagata aoga le faitauina o poloka o mau nei (ma isi poloka i se taimi mulimuli ane o le lesona) o se vasega, i ni vaega toalaiti, pe i ni paga. Faaaoga fesili ua tuuina atu po o isi atonu e te mafaufau i ai e fesoasoani ai i tagata aoga ia malamalama ma faavasega le anotusi ma le faatatauga.

Faitau le Alema 26:1–4, 8–16, ma vaavaai pe na faapefea ona tautala Amona e uiga i le Atua ma mea na Ia faia mo ona uso ma sa Lamana.

• O le a se mea na tulaga ese ia te oe e uiga i le ala na talanoa atu ai Amona e uiga i le Atua?

• O a upumoni na e maua e mafai ona musuia ai se tasi ia mitamita i le Alii?

Mafaufau e tuu atu i tagata aoga e tusi i luga o le laupapa upumoni na latou mauaina. Pe e mafai foi e tagata aoga ona tusi nei upumoni i luga o fasipepa pipii ma faitau leotele a o lei faapipiiina i luga o le laupapa. Mo se faataitaiga, e tuuina mai e le Atua faamanuiaga (fuaiupu 1–3); E mafai e le Atua ona galue e ala mai ia i tatou e faataunuu ai Lana galuega tele ma faamanuia ai isi (fuaiupu 3); i le malosi o le Alii e mafai ai ona tatou faia o mea uma (fuaiupu 12); ma o le Atua e mamana, alofa mutimutivale, ma onosai i Ana fanau (fuaiupu 16).

Atonu e te manao e faaali atu ata nei e faamanatu ai i tagata aoga ia aafiaga o Amona o se faifeautalai lea na taitai atu ai o ia e vivii atu i le Atua. E mafai ona e valaaulia tagata aoga e toe faamatala faapuupuu nisi o mea na tutupu o loo tusia i le Alema 17–21.

E ui e ese o tatou aafiaga mai aafiaga o Amona, ae atonu e i ai foi ni a tatou mafuaaga talitutusa e vivii atu ai i le Atua.

Ina ia fesoasoani i tagata aoga e mafaufau e uiga i mafuaaga atonu o loo ia i latou mo le viia o le Atua, atonu e te manao e faaali atu fesili nei. Tuu atu i tagata aoga se taimi e tali ai se tasi o fesili i totonu o a latou api talaaga mo suesuega, ona valaaulia lea o tagata aoga naunautai e faasoa mai a latou tali i le vasega.

• Mafaufau pe na faapefea ae pe mafai foi faapefea ona avea oe ma se “[mea faigaluega] i aao o le Atua” (Alema 26:3) e faamanuia ai isi. E mafai faapefea e nei aafiaga ona taitai atu ai oe e vivii atu i le Atua?

• O a nisi o mafuaaga ua e maua mo le vivii atu ai i le Atua?

• O a ni suiga e mafai ona faia i le olaga o se tasi e mitamita ai i mea ua faia e le Atua mo ia?

“Se pogai tele naua latou te olioli ai”

Ina ua manatua e Amona lona taimi o se faifeautalai ma ana fegalegaleaiga ma le Atua, sa ia vivii atu ma olioli i lē ua avea ma Atua ma le mea ua mafai ona faia e le Atua i lona olaga.

Mafaufau e tuuina atu se pepa mo tagata aoga e faauma ai le gaoioiga suesue lenei. Ina ia aua nei tusapau, o le vaega muamua o le gaoioiga e mafai ona faamaeaina o se vasega. E mafai e tagata aoga ona suesue i vaega eseese ma tusi mea latou te maua i luga o le laupapa. Mafaufau e faaaoga le fesili ua faailogaina po o isi e te manatu e fesoasoani ai i tagata aoga ia mitamita i le Alii.

Gagau se fasipepa i ni vaega se tolu pe fai ni koluma se tolu i luga o se itulau i lau api talaaga mo suesuega. Faaigoa le pito i luga o koluma taitasi i se tasi o vaega nei o tagata:

• Amona ma ona uso (Alema 26:17–22)

• O sa Lamana (Alema 26:23–24, 31–34)

• Fanau uma a le Atua (Alema 26:35–37)

Faitau fuaitau o mau mo vaega taitasi ma faamaumau i le koluma mea na faia e le Atua mo i latou.

• O le a se mea na tulaga ese ia te oe e uiga i le mea na faia e le Atua mo nei vaega o tagata? Aisea o le a avea ai lenei mea ma mafuaaga e mitamita ai tagata ia te Ia?

Tuu atu i tagata aoga ia lava se taimi e faauma ai le vaega patino lenei o lenei gaoioiga. Uunaia tagata aoga ia manatunatu loloto ma maua le agaga tatalo a o latou galulue.

Liliu i luga leisi itu o le pepa ua gaugau, pe fai ni koluma fou se tolu i lau api talaaga mo suesuega. Tuu atu i koluma taitasi se tasi o ulutala nei:

• Auala na faamanuiaina ai au e le Atua

• Auala na faamanuiaina ai e le Atua i latou ou te alofa i ai

• O mea ua ou iloa ma lagonaina e uiga i le Atua

Atonu e te manao e tatalo i le Tama Faalelagi, ma ole atu ia te Ia e aumai manatu ma manatuaga i lou mafaufau. A o e manatua le ala na faamanuiaina ai oe ma isi e le Atua ma manatunatu i ou lagona mo Ia, e mafai ona fesoasoani le Agaga Paia ia e lagonaina le alofa o le Atua mo oe.

Tusi au tali i koluma taitasi, ma faamatala pe aisea ua mafua ai ona e mitamita i le Atua.

Mafaufau e faaaoga fesili nei e fesoasoani ai i tagata aoga ia malamalama i le moni ma le taua o lagona sa latou oo i ai. Uunaia tagata aoga naunautai e faasoa mai mea na latou lagonaina a o latou manatunatu i a latou mafuaaga e mitamita ai i le Alii.

• Na faapefea ona fesoasoani lenei gaoioiga ia te oe e lagona ai le olioli sili atu i le Atua pe faateleina ai le alofa ma le loto faafetai mo Ia?

• O le a sou manatu o le a faapefea ona suia lou sootaga ma le Alii pe afai e te faaaluina se taimi e manatua ai ma mitamita soo ia te Ia?

Uunaia tagata aoga e faatino le valaaulia lenei.

A o e tomanatu i mea ua e aoaoina ma lagonaina i le asō, atonu e te manao e fai se sini e faaalu se taimi e manatua ai ma mitamita ai i le Atua. Atonu foi e te lagona le uunaiga e faasoa atu ou manatu i se isi tagata e pei ona sa faia e Amona. Vaavaai mo se avanoa e faasoa atu ai, ma mafaufau pe mafai faapefea ona e fesoasoani i le isi tagata ia lagonaina ou lagona mo le Tama Faalelagi ma Iesu Keriso.

Manatu ma Talaaga o Faamatalaga

O le a se mea e mafai ona ou aoaoina e uiga i le Atua e ala i le tomanatu ai i o’u aafiaga faaleagaga?

Ua aoao mai Elder Neil L. Andersen o le Korama a Aposetolo e Toasefululua:

Mafaufau i lou lava olaga. I le tele o tausaga, sa ou faalogo ai i le fia afe o aafiaga maoae faaleagaga mai le Au Paia o Aso e Gata Ai i le salafa o le lalolagi, e faamautu mai ai ia te a’u e aunoa ma se fesiligia e faapea e silafia ma alofa le Atua ia i tatou taitoatasi, ma e finagalo ma le naunautai o Ia e faaalia mai o Ia lava ia i tatou. O nei aafiaga e mafai ona oo mai i taimi iloga i o tatou olaga, pe i taimi atonu e foliga muamua mai o ni mea tutupu e faaleano i ai, ae e o mai faatasi lava o se faamautuuga tulagaese faaleagaga malosi o le alofa o le Atua. (Neil L. Andersen, “O Manatuaga Musuia Faaleagaga,” Liahona, Me 2020, 19)

E mafai faapefea ona ou mitamita i le Atua i aso uma?

Na faamanatu mai ia i tatou e Sister Joy D. Jones, sa avea muamua ma Peresitene Aoao o le Peraimeri:

Sa apoapoai mai le Alii, “Vaai mai ia te a’u i mafaufauga uma.” [Mataupu Faavae ma Feagaiga 6:36]. Ma ua tatou osifeagaiga ai i vaiaso taitasi e faia lena mea—ia “manatua pea o ia.” [Mataupu Faavae ma Feagaiga 20:77, 79]. E mafai ona faaaoga lea taulaiga faaleatua i mea uma tatou te faia? E mafai ona avea le faia e oo lava i se galuega faatauvaa ma se avanoa e faatino ai lo tatou alolofa ma le tuuto ia te Ia? Ou te talitonu e mafai ma o le a mafai.

E mafai ona tatou avea mea taitasi i le tatou lisi o mea e fai ma se auala e faamamalu ai o Ia. E mafai ona tatou vaai i galuega taitasi o se faamanuiaga ma se avanoa e auauna atu ai ia te Ia, e tusa po o tatou i ai i le lotolotoi o mea tuutapulaa, tiute, po o napekini eleelea. (Joy D. Jones, “Mo Ia,” Liahona, Nov. 2018, 51)

Gaoioiga Faaopoopo e Aoao Ai

O se isi auala e amata ai le lesona

Fai atu i tagata aoga e faaviivii i se tasi latou te iloa. Uunaia i latou e faailoa mai pe aisea ae poo a foi mea na ausia e lenei tagata e tatau ai le viia pe faagaeetia. Ona fesili lea i tagata aoga po o le a se mea e mafai ona latou fai atu ai i viiga e uiga i le Atua. E faapefea ona tutusa pe ese le talanoa ai e uiga ia te Ia mai le talanoa e uiga i se isi tagata? Aisea? Ona valaaulia lea o i latou e faitau le Alema 26:8, 16, ma vaavaai po o ai na viia e Amona ma pe aisea foi.

Alema 26:11–12. “Ona o lona malosi e mafai ai ona ou faia o mea uma”

Atonu e te manao e fesoasoani i tagata aoga e tomanatu i aoaoga a Amona i nei fuaiupu. Ina ia faia lenei mea, e mafai ona e tuuina atu i tagata aoga se tulaga faataitai e uiga i se talavou o le ua tuuina atu i ai se galuega e faigata pe taufaamatau mai se taitai o le Ekalesia pe mai le Atua e ala i faaaliga. Ona mafai lea e tagata aoga ona mafaufau pe mafai faapefea e le tautinoga a Amona ona fesoasoani i le talavou i le tulaga faataitai e tali atu ai i lona le mautonu.

Alema 26:22. Folafolaga a Amona

Tusi le fuaiupu faafuainumera lenei i luga o le laupapa: + = . Valaaulia tagata aoga e faatumu avanoa i mea latou te mananao i ai, ae ia sa’o lava le faatulagaga. Ona valaaulia lea o i latou e faauma se isi mea e sili atu ona faigata: + + = . Faailoa atu i tagata aoga na tuuina atu e Amona se folafolaga i le Alema 26:22 lea e mafai foi ona tusia o se faatulagaga. Valaaulia i latou e faitau le fuaiupu ma tusi le faatulagaga na aoao atu e Amona. Atonu e fesoasoani i tagata aoga le iloa e faapea, “o mealilo a le Atua o upumoni faaleagaga ia e naʼo faaaliga e mafai ai ona malamalama i ai (O le Taiala i Tusitusig Paia, “Mealilo a le Atua,” scriptures.ChurchofJesusChrist.org). Mafaufau e valaaulia tagata aoga e faasoa mai po o le fea faamanuiaga o le a sili ona latou mananao i ai mai le folafolaga a Amona ma pe aisea foi. Ona talanoaina lea o le uiga o le faia o faatinoga taitasi ia maua ai na faamanuiaga.