Alma 31:12–38

Ang Atong Pagsimba sa Langitnong Amahan ug ni Jesukristo

Ang pagsimba sa Langitnong Amahan ug ni Jesukristo gituyo aron pagpaduol kanato ngadto Kanila. Apan unsa kaha kon makalimtan nato ang tinuod nga rason sa pagsimba? Ang mga Zoramite, kinsa kanhi sakop sa tinuod nga Simbahan sa Dios, misugod sa pagtuo sa sayop nga mga pagtulun-an. Ang ilang sayop nga matang sa pagsimba nagpahilayo sa ilang mga kasingkasing gikan sa Dios ug nagdala kanila sa paghukom nga dili matarong ug pagmaltratar sa uban. Kini nga leksiyon makatabang nimo sa pagpalambo sa imong relasyon sa Langitnong Amahan ug ni Jesukristo samtang imong susihon kon sa unsang paagi ang garbo ug pagpaubos makaimpluwensiya sa imong relasyon uban Kanila ug sa uban.

Pagtandi ug pagpangita og kalainan. Diha sa mga kasulatan, ang usa ka doktrina o baroganan kasagaran nga maklaro kon gitandi o gipangita ang kalainan sa laing butang. Ang pagpaniid sa mga pagkaparehas ug mga kalainan tali sa mga pagtulun-an, mga tawo, o mga panghitabo makadala sa mga kamatuoran sa ebanghelyo ngadto sa mas klaro nga pagsabot. Paningkamoti ang paghatag og gibug-aton sa mga ehemplo sa dihang ang dinasig nga mga magsusulat naglakip sa maong mga pagtandi.

Pagpangandam sa estudyante: Sa pagpangandam sa pagtuon sa Alma 31, dapita ang mga estudyante sa pag-ampo, nga magtutok sa mga panginahanglan sa uban.

Posible nga mga Kalihokan sa Pagkat-on

Pagtimbang-timbang sa mga epekto sa atong pagsimba

Aron matabangan ang mga estudyante sa paghunahuna mahitungod sa pagsimba isip usa ka paagi sa pagpakita og gugma ug debosyon ngadto sa Dios, ikonsiderar ang pagpakita sa mosunod nga mga hulagway o sa uban nga imong mapilian. Dapita ang mga estudyante sa pagpamalandong kon sa unsang paagi nga ang pagsimba niini nga mga paagi mahimong nakaapekto sa ilang relasyon sa Dios.

Mahimong hangyoon ang mga estudyante sa pagpamalandong sa mosunod nga mga pangutana ug sa pagsulat og bisan unsa nga mga hunahuna diha sa ilang mga journal sa pagtuon mahitungod sa pagpalambo sa ilang indibidwal nga mga relasyon sa Dios pinaagi sa pagsimba. Ayaw dapita ang mga estudyante sa pagpakigbahin sa ilang mga tubag.

• Unsa ka sagad nimong gibati nga ikaw sinserong naningkamot sa pagpakita sa imong gugma ngadto sa Dios pinaagi sa pagsimba?

• Sa unsang mga paagi, kon aduna man, gibati nimo nga ang imong pagsimba mahimong dili kaayo sinsero o nakatutok sa sayop nga mga butang?

Ang mga Zoramite misimba diha sa Balaan nga Tinduganan [Rameumptom]

Sa dihang nahibaloan ni Alma ug sa iyang mga kaigsoonan nga ang mga Zoramite mituis sa mga paagi sa Ginoo, sila mipanaw ngadto sa Antionum. Didto ilang nakaplagan ang mga Zoramite nga nagsimba sa paagi nga wala pa nila makita sukad (tan-awa sa Alma 31:12).

Ikonsiderar ang pagpakita sa mosunod nga hulagway ug dapita ang mga estudyante sa pagpasabot kon unsay gibuhat sa mga tawo. Mahimong basahon sa mga estudyante ang Alma 31:21 aron makita ang ngalan sa tinduganan diin sila nag-ampo.

Tabangi ang mga estudyante nga mapalambo ang kahanas sa pagtuon sa kasulatan sa pagtandi ug pagpangita og kalainan. Mahimong bahinon ang mga estudyante ngadto sa mga grupo ug dapiton nga itandi ang mga pag-ampo sa mga Zoramite ug ang pag-ampo nga gihalad ni Alma. Mahimo kang maghimo og tsart diha sa pisara sama sa mosunod ug dapita ang mga estudyante sa pagsulat unsay ilang nadiskobrehan sa tibuok leksiyon. Tabangi sila sa pagtandi tali sa (1) gihatagan og gibug-aton sa mga pag-ampo, (2) unsay gipangsulti, ug (3) ngano.

Ang pag-ampo sa mga Zoramite	Pag-ampo ni Alma

Basaha ang Alma 31:13–23, ug sulati ang wala nga kolum sa tsart sa unsay labing mipatigbabaw diha kanimo mahitungod sa paagi sa pagsimba sa mga Zoramite. Mahimo usab nimong tan-awon ang bidyo nga “Si Alma ug ang Iyang Kaigsoonan Nagsangyaw sa Pulong sa Dios taliwala sa mga Zoramite” gikan sa time code 0:22 hangtod sa 3:58, anaa sa ChurchofJesusChrist.org.

• Unsa ang imong namatikdan kon giunsa pagsimba sa mga Zoramite? Sa imong hunahuna sa unsang paagi kini nakaapekto sa ilang relasyon sa Dios?

Alma nag-ampo alang sa mga Zoramite

Sa pagkakita sa kasaypanan taliwala sa mga Zoramite, si Alma nag-ampo alang kanila.

Basaha ang Alma 31:24–38, mangita sa gitutokan, mga pagbati, ug mga tinguha ni Alma sa iyang pag-ampo. Sulati ang tuo nga kolum sa tsart base sa imong nakaplagan. Makatabang kini kanimo sa pagpangita sa kalainan sa pag-ampo ni Alma ngadto sa pag-ampo sa mga Zoramite.

Mahimo nimong tan-awon ang bidyo nga “Si Alma ug ang Iyang Kaigsoonan Nagsangyaw sa Pulong sa Dios taliwala sa mga Zoramite” gikan sa time code 4:03 hangtod sa 5:55, anaa sa ChurchofJesusChrist.org. Niini nga bahin sa bidyo, madungog nimo ang pag-ampo ni Alma samtang makita ang mga paningkamot ni Alma ug sa iyang mga kauban sa pagtudlo sa mga Zoramite.

Ikonsiderar ang pagdapit sa mga estudyante sa paggamit sa tsart aron ipakigbahin kon unsay ilang nakat-onan pinaagi sa pagpangita sa kalainan sa mga pag-ampo ni Alma ug sa mga Zoramite.

Mahimo nimong andamon ang mga estudyante sa pagkat-on gikan sa mosunod nga pamahayag ni Presidente Uchtdorf pinaagi sa pagpangutana sama sa “Sa unsang paagi naapektohan ang mga Zoramite sa garbo?” ug “Unsa ang kalahian sa kinaiya ni Alma?”

Si Presidente Dieter F. Uchtdorf, niadtong anaa sa Unang Kapangulohan, mitudlo:

Kon ang atong mga kasingkasing napuno sa garbo, nakahimo kita og dako nga sala, kay atong gisupak ang duha ka dagko nga sugo. Imbis mosimba sa Dios ug mohigugma sa atong silingan, atong gipakita ang tinuod nga tuyo sa atong pagsimba ug gugma—sa panagway nga atong makita sa samin. Ang garbo usa ka dako nga sala sa pagkamapahitas-on. Kini sa kadaghanan, usa ka personal nga Rameumptom, usa ka balaan nga tinduganan nga maghatag og katarungan sa kasina, kadawo, ug paghambog. (Dieter F. Uchtdorf, “Garbo ug ang Priesthood,” Liahona, Nob. 2010, 56)

Basaha ang Alma 32:1–5, mangita kon giunsa pagtratar sa mga Zoramite ang mga tawo.

• Giunsa pagtratar sa mga Zoramite ang uban?

• Unsa ang gibati ug ang pagtratar ni Alma sa uban? (tan-awa sa Alma 31:1–2, 24–25, 34–35).

• Unsa nga mga baroganan ang atong makat-onan mahitungod sa mga epekto sa garbo o pagpaubos?

Usa ka baroganan nga atong makat-onan mao nga ang atong garbo o pagpaubos makaapekto sa atong relasyon sa Dios ug sa uban.

• Sa imong hunahuna sa unsang paagi ang atong garbo o pagpaubos makaimpluwensiya kon sa unsang paagi nato gisimba ang Langitnong Amahan ug si Jesukristo?

• Sa imong hunahuna sa unsang paagi ang atong garbo o pagpaubos makaimpluwensiya kon giunsa nato pagtratar ang uban?

• Unsa ang imong nakat-onan gikan kang Alma mahitungod sa pagpaubos? Unsa ang gitudlo ni Jesukristo kanimo mahitungod sa pagkamapainubsanon?

Pagpili og duha o tulo ka paagi nga atong mahimong ikapakita ang pagkamapainubsanon sa atong pagsimba sa Dios. Isulat ang matag usa diha sa imong journal sa pagtuon.

Dapita ang mga estudyante sa pagpamalandong sa mosunod. Mahimo nimo silang dasigon sa pagsulat diha sa ilang journal sa pagtuon o magdugang og mubo nga sulat diha sa ilang digital nga mga kasulatan.

Paggahin og panahon sa pagsusi kon sa unsang paagi nimo sa personal nga gisimba ang Langitnong Amahan ug si Jesukristo ug sa unsang paagi nga ang imong pagsimba makaimpluwensiya sa imong relasyon Kanila. Usab, pamalandongi kon sa unsang paagi ang garbo ug ang pagpaubos makaapektar sa imong pagtratar sa uban. Pagdesisyon kon aduna bay bisan unsang mga kausaban nga gusto nimong buhaton.

Ikonsiderar ang pagpakigbahin og pagpamatuod kon sa unsang paagi ang imong pagsimba nakaimpluwensiya sa imong gibati mahitungod sa Dios ug giunsa nimo pagtratar ang uban.

Komentaryo ug Background nga Impormasyon

Ngano nga ang Dios nagdapit kanato sa paghigugma ug pagsimba Kaniya?

Si Presidente Dieter F. Uchtdorf, niadtong anaa sa Unang Kapangulohan, mitudlo:

Ang Dios nga Mahangturong Amahan wala mohatag nianang una ug dakong sugo tungod kay nagkinahanglan siya kanato nga mohigugma Kaniya. Ang iyang gahom ug himaya dili mous-os bisan dili kita magpakabana niini, molimod, o bisan gani sa pagdaot sa Iyang pangalan. Ang Iyang impluwensiya ug kamandoan molapas pa sa kapanahonan ug sa kapunaw-punawan nga dili mag-agad sa atong pagdawat, pagtugot, o pagdayeg.

Wala, ang Dios wala magkinahangalan sa atong gugma. Apan, unsa ka dako ang atong panginahanglan nga higugmaon ang Dios!

Kay unsa ang atong gihigugma nagtino kon unsa ang atong gipangita.

Unsa ang atong gipangita nagtino kon unsa ang atong gihunahuna ug gibuhat.

Unsa ang atong gihunahuna ug gibuhat nagtino kon si kinsa kita—ug kon si kinsa kita sa umaabot. (Dieter F. Uchtdorf, “Ang Gugma sa Dios,” Liahona, Nob. 2009, 22)

Sa unsang paagi kita makasimba sa matag bahin sa atong mga kinabuhi?

Alang sa mga kapanguhaan ug impormasyon, tan-awa ang “Worship” diha sa Gospel Topics, anaa sa topics.ChurchofJesusChrist.org.

Unsaon nako pagpalambo sa akong mga pag-ampo?

Si Elder Joseph B. Wirthlin (1917–2008) sa Korum sa Napulog Duha ka Apostoles nangutana og mahinungdanong mga pangutana ug mihatag niini nga tambag:

Ang inyo bang mga pag-ampo ingon og nagbalik-balik ug bation ninyo nga parehas ra? Nakaampo ba kamo sukad nga dili sinsero, ang mga pulong nga gilitok naingon sa demakina? Laayon ba kamo usahay samtang kamo nag-ampo?

Ang mga pag-ampo nga wala mangayo og dako sa inyong hunahuna makakuha ba og dakong pagtagad gikan sa atong Langitnong Amahan? Kon inyong namatngonan ang inyong kaugalingon nga nagbalik-balik na ang inyong mga pag-ampo, hunong ug paghunahuna. Pamalandongi sa makadiyot ang mga butang nga kamo mapasalamaton gayod. Pangitaa kini. Dili kini kinahanglan nga nindot kaayo o mahimayaon. Usahay kinahanglan natong ipahayag ang atong pagpasalamat sa gagmay ug yanong mga butang sama sa alimyon [scent] sa ulan, sa lami sa inyong paborito nga pagkaon, o sa tingog sa usa ka minahal (Joseph B. Wirthlin, “Improving Our Prayers,” Ensign, Mar. 2004, 26)

Ngano nga importante ang pag-ampo alang sa uban?

Si Elder David A. Bednar sa Korum sa Napulog Duha ka Apostoles mitudlo:

Mangamuyo sa Langitnong Amahan alang sa mga panalangin nga atong gitinguha sa atong personal nga mga kinabuhi maayo ug angay. Hinoon, ang pag-ampo sa matinguhaon nga paagi alang sa uban, niadtong kinsa atong gihigugma ug niadtong matamayon nga naggamit kanato, usab usa ka importante nga butang sa makahuluganon nga pag-ampo. … Ang pag-ampo alang sa uban sa tanang kusog sa atong mga kalag modugang sa atong kapasidad sa pagpaminaw ug sa pagsunod sa tingog sa Ginoo. (David A. Bednar, “Pag-ampo Kanunay,” Liahona, Nob. 2008, 43).

Dugang nga mga Kalihokan sa Pagkat-on

Pagsimba subay sa paagi sa Ginoo

Sa Wali sa Bukid ug sa templo sa Bountiful, si Jesukristo mitudlo unsaon (ug unsaon sa dili) pagsimba (tan-awa sa Mateo 6:1–18; 3 Nephi 13:1–18). Mahimong itandi sa mga estudyante ang mga pagtulun-an ni Jesukristo ngadto sa mga binuhatan sa mga Zoramite. Ikonsiderar ang paghangyo sa mga estudyante sa pagpangita og “mga ganti” nga moabot sa paagi sa atong pagpili sa pagsimba.

Usa ka modernong panahon nga ehemplo sa tukma nga pagsimba gipakigbahin ni Elder Dean M. Davies (1951–2021) sa Seventy sa “Ang mga Panalangin sa Pagsimba” (Liahona, Nob. 2016, 93–95.) Mahimo nimong dapiton ang mga estudyante sa pagpangita kon unsay namatikdan ni Elder Davies samtang nagtambong sa miting sa sakramento.

Pagpalambo sa atong personal nga mga pag-ampo

Mahimong makabenepisyo ang mga estudyante gikan sa pagsusi sa ilang personal nga mga pag-ampo. Ikonsiderar ang paghangyo kanila sa pagpamalandong kon unsa ka sagad ang ilang mga pag-ampo nakatutok sa ilang mga kaugalingon ug unsa ka sagad sila mag-ampo alang sa uban. Mahimo usab nga hangyoon ang mga estudyante sa paghunahuna kon unsay kalainan sa ilang mga pag-ampo matag higayon nga sila mag-ampo. Human sila nahatagan og panahon sa pagpamalandong, ikonsiderar ang pagpakita ug pagbasa sa mga pamahayag bahin sa pag-ampo aron matabangan sila sa pagpamalandong sa bisan unsang mga kausaban nga ilang mahimo. Ang mga pamahayag nga imong magamit makita diha sa seksiyon sa “Komentaryo ug Background nga Impormasyon”. Mahimo usab nimong dapiton ang mga estudyante sa pagbasa sa Mateo 6:9–13 ug pangitaon kon unsay gidapit ni Jesukristo sa Iyang mga disipulo nga iapil sa ilang mga pag-ampo.