Toe Vakaiʻi Hono 14 ʻo e Fakataukei Fakatokāteliné

Ako Maʻuloto e Ngaahi Potufolofolá mo e Ngaahi Kupuʻi Lea Mahuʻinga he Folofolá

ʻE lava ke tokoniʻi koe ʻi ha ngaahi founga lahi ʻi hono manatuʻi ʻo e ngaahi fakamoʻoni fakafolofolá mo e meʻa ʻoku akoʻi aí. ʻOku fakataumuʻa ʻa e lēsoni ko ʻení ke tokoni ke ke ako maʻuloto ha ngaahi potufolofola mo ha ngaahi kupuʻi lea mahuʻinga he folofolá mei he potufolofola fakataukei fakatokāteline fakaʻosi ʻe 12 ʻi he Tohi ʻa Molomoná.

Ko hono ako maʻuloto ʻo e ngaahi potufolofolá. ʻI he taimi ʻoku ako maʻuloto ai e ngaahi lea ʻo e folofolá, ʻoku fakanatula pē ʻenau tānaki mai ha mālohi ʻi heʻetau akoʻi e niʻihi kehé. ʻE lava foki ke tokoni ʻa e ngāue ʻoku fiemaʻu ki hono ako maʻuloto ʻo e folofolá ke mahino lelei ange ki he kau akó ʻa e ʻuhinga ʻo e ngaahi moʻoni mo e tokāteline ʻoku ʻi he ngaahi potufolofolá. Tokoni ke akoako ako maʻuloto ʻe he kau akó ha niʻihi pe kotoa ʻo e ngaahi potufolofola fakataukei fakatokāteliné.

Teuteu ʻa e tokotaha akó: Fakaafeʻi e kau akó ke fili mo ako maʻuloto ha potufolofola fakataukei fakatokāteline ʻe lava ʻo tokoni ke nau ongoʻi ofi ange ai ki he Fakamoʻuí pe tokoniʻi kinautolu ʻi ha meʻa ʻoku nau lolotonga fiemaʻu.

Ngaahi ʻEkitivitī Ako ʻOku Ala Fakahokó

ʻE ala fiemaʻu ke akoʻi ha lēsoni ki he potufolofola fakataukei fakatokāteliné ʻo fetongi ʻaki ʻa e lēsoni ko ʻení. Vakai ki he taimi-tēpile ki he vave hono akoʻí ʻa ia ʻoku ʻomi ʻe he talēkita fakavāhengá pe vahefonuá pe kouʻōtineitá ke fakapapauʻi ʻe akoʻi e lēsoni kotoa pē ʻo e fakataukei fakatokāteline ki he potufolofolá ʻi he lele ʻa e seminelí.

Fili ha potufolofola fakataukei fakatokāteline ʻe tolu pe fā mei he konga ʻuluaki ʻo e Tohi ʻa Molomoná ke tokanga taha ki ai ʻi he lēsoni ko ʻení. ʻE ʻoange ki he kau akó ha ngaahi faingamālie ke nau tokanga taha ai ki he ngaahi potufolofola kehé ʻi ha ngaahi lēsoni kehe.

Ngaahi lelei ʻo hono ako maʻuloto ʻo e folofolá

• Ko e hā te ke talaange ki ha taha ʻokú ne fifili pe ko e hā ʻe lelei ai ke ako maʻuloto ʻa e folofolá?

Lau ʻa e ʻAlamā 31:5, ʻo kumi ki ha ʻuhinga ʻe ala fiemaʻu ai ʻe ha taha ke ne ako maʻuloto ʻa e folofolá.

• ʻE tokoniʻi fēfē koe ʻe hono ako maʻuloto ʻo e folofolá ke ke maʻu ʻa e mālohi ʻo e ʻOtuá?

• Ko e hā ha potufolofola kuó ke maʻuloto? Kuo ʻaonga fēfē kiate koe hono ako maʻuloto ʻo e ngaahi potufolofolá?

Kapau kuo teʻeki fakaʻilongaʻi ʻe he kau akó ʻa e ngaahi potufolofola fakataukei fakatokāteline ko ʻení ʻi heʻenau folofolá, fakakaukau ke fakaʻaliʻali ʻa e saati ko ʻení pea fakaafeʻi ke nau fai ia.

Fakataukei Fakatokāteline ʻo e Tohi ʻa Molomoná: ʻAlamā–Molonai

Tohi ʻa Molomoná – Tohi Lēsoni ʻa e Faiakó (2024)

Potufolofolá	Kupuʻi Lea Fakafolofola Mahuʻingá
Potufolofolá ʻAlamā 7:11–13	Kupuʻi Lea Fakafolofola Mahuʻingá “Pea te ne hāʻele atu, ʻo kātakiʻi ʻa e ngaahi mamahi mo e ngaahi faingataʻá pea mo e ngaahi ʻahiʻahi kehekehe kotoa pē.”
Potufolofolá ʻAlamā 34:9–10	Kupuʻi Lea Fakafolofola Mahuʻingá “Kuo pau ke fai ha fakalelei, … ko ha feilaulau taʻe-fakangatangata mo taʻengata.”
Potufolofolá ʻAlamā 39:9	Kupuʻi Lea Fakafolofola Mahuʻingá “ʻIkai toe muimui ʻi he ngaahi holi ʻa ho matá.”
Potufolofolá ʻAlamā 41:10	Kupuʻi Lea Fakafolofola Mahuʻingá “Kuo teʻeki ai hoko ʻa e faiangahalá ko e fiefia”
Potufolofolá Hilamani 5:12	Kupuʻi Lea Fakafolofola Mahuʻingá “ʻOku makatuʻunga ʻi he maka ʻo hotau Huhuʻí … kuo pau ke mo langa ai homo makatuʻungá.”
Potufolofolá 3 Nīfai 11:10–11	Kupuʻi Lea Fakafolofola Mahuʻingá “Kuó u fai ai ʻa e meʻa kotoa pē kuo finangalo ʻa e Tamaí ke u fai talu mei he kamataʻangá.”
Potufolofolá 3 Nīfai 12:48	Kupuʻi Lea Fakafolofola Mahuʻingá “Ke mou haohaoa ʻo hangē pē ko aú, pe hangē ko e haohaoa hoʻomou Tamai ʻa ia ʻoku ʻi he langí.”
Potufolofolá 3 Nīfai 27:20	Kupuʻi Lea Fakafolofola Mahuʻingá “Haʻu kiate au ʻo papitaiso … koeʻuhi ke fakamāʻoniʻoniʻi ʻa kimoutolu ʻi he maʻu ʻo e Laumālie Māʻoniʻoní.”
Potufolofolá ʻEta 12:6	Kupuʻi Lea Fakafolofola Mahuʻingá “ʻOku ʻikai te mou maʻu ha fakamoʻoni kae ʻoua kuo hili hono ʻahiʻahiʻi ʻo hoʻomou tuí.”
Potufolofolá ʻEta 12:27	Kupuʻi Lea Fakafolofola Mahuʻingá “Kapau ʻe haʻu kiate au ʻa e tangatá … te u liliu ʻa e ngaahi meʻa vaivaí ko e mālohi kiate kinautolu.”
Potufolofolá Molonai 7:45–48	Kupuʻi Lea Fakafolofola Mahuʻingá “Ko e manavaʻofá ʻa e ʻofa haohaoa ʻa Kalaisí.”
Potufolofolá Molonai 10:4–5	Kupuʻi Lea Fakafolofola Mahuʻingá “Mou kole ʻi he loto-fakamātoato, mo e loto-moʻoni, ʻo maʻu ʻa e tui kia Kalaisi … [pea] ʻi he mālohi ʻo e Laumālie Māʻoniʻoní te mou lava ai ke ʻiloʻi hono moʻoni ʻo e ngaahi meʻa kotoa pē.”

© 2023 by Intellectual Reserve, Inc. All rights reserved.

ʻI ha ʻū laʻipepa kehekehe, faʻu ʻa e ngaahi fokotuʻu ko ʻení ki he ngaahi potufolofola fakataukei fakatokāteline ʻe nofotaha ai ʻa e kau akó ʻi he lēsoni ko ʻení. Fokotuʻu ha feituʻu akoʻanga ki he ʻekitivitī pe potufolofola takitaha. ʻE lava ke fakahoko ʻeni ʻaki hano fakapipiki e ʻū laʻipepá ki he holisí pe tuku kinautolu ʻi ha konga ʻo e loki akó. ʻE lava foki ke ngāue tautau toko ua ʻa e kau akó ʻi he ngaahi ngāue ko ʻení pea nau fesiviʻiʻaki pē kinautolu ʻi he ngaahi potufolofolá.

1. Hiki ʻa e potufolofola takitaha mo e kupuʻi lea mahuʻinga ʻi he folofolá, kae fakaʻatā ha ngaahi foʻi lea pe mataʻi fika ʻe niʻihi. ʻE fakafonu ʻe he kau akó e ngaahi foʻi lea pe mataʻifika ʻoku puliá.

2. Hiki ʻa e ʻuluaki mataʻitohi ki he foʻi lea takitaha ʻo e potufolofolá pea mo e kupuʻi lea mahuʻinga he folofolá.

3. Hiki e ngaahi foʻi lea mo e mataʻifika ʻo e potufolofolá mo e kupuʻi lea mahuʻinga he folofolá ʻi ha hokohoko kehekehe. Fakaafeʻi e kau akó ke hiki ʻa e potufolofola mo e kupuʻi lea folofola tonú ʻi ha laʻipepa kehe pe ʻi heʻenau tohinoa akó.

4. ʻE lava ke fakaʻaongaʻi ʻe he kau akó ʻa e polokalama fakaʻaliʻali kaati ʻi he polokalama Fakataukei Fakatokāteliné. ʻE lava foki ke fili ʻe he kau akó ha potufolofola kakato ke ako maʻuloto pea fakaʻaongaʻi ʻa e polokalamá ke tokoni kiate kinautolu.

Fakaafeʻi e kau akó ke vilo ʻi he ngaahi feituʻú pea fakakakato kotoa e ngaahi ʻekitivitií ki ha potufolofola pau. Hili hono akoako fakahoko ha potufolofola ʻe taha, ʻe lava ke toe fai ʻe he kau akó ʻa e founga tatau ki he ngaahi potufolofola kehé. Toutou fakahoko pē ia ʻo fakatatau mo ʻenau fiemaʻú.

Hili hono fakakakato ʻe he kau akó, fakaafeʻi ha niʻihi ʻe loto-fiemālié ke toe lau e ngaahi potufolofola mo e ngaahi kupuʻi lea mahuʻinga he folofolá naʻa nau ako maʻulotó. Te nau lava foki ʻo vahevahe ʻa e founga ako maʻuloto naʻe tokoni lahi taha kiate kinautolú. Fakaafeʻi e kau akó ke hokohoko atu hono ako maʻuloto ʻa e ngaahi potufolofola fakataukei fakatokāteliné.