ʻAlamā 30–31

Vakai Fakalūkufuá

Naʻe haʻu ha tangata angakovi ko Kolihola ki he lotolotonga ʻo e kakai Nīfaí. Naʻá ne malanga ʻo fakafepakiʻi ʻa e ngaahi kikite kau kia Sīsū Kalaisí peá ne tohoakiʻi e loto ʻo ha kakai tokolahi ke nau mamaʻo mei he ʻOtuá. Naʻe ʻave ia ki he ʻao ʻo ʻAlamaá, pea naʻe fakamoʻoni ʻa ʻAlamā “ʻoku fakahā ʻe he meʻa kotoa pē ʻoku ʻi ai ha ʻOtua” (ʻAlamā 30:44). Naʻe fakaʻikaiʻi ʻe Kolihola ʻoku moʻui ʻa e ʻOtuá kae ʻoua kuo taaʻi ia ʻe he mālohi ʻo e ʻOtuá ʻo noa. Lolotonga iá, naʻe kamata ke tui ʻa e kakai Sōlamí, ʻa ia naʻa nau kau kimuʻa ki he Siasi moʻoni ʻo e ʻOtuá, ki he ngaahi akonaki halá. Naʻe tohoakiʻi ʻe he faʻahinga lotu kākā ko ʻení honau lotó mei he ʻOtuá pea tataki kinautolu ke nau ngaohikovia ʻa e niʻihi kehé. Hili e fanongo ʻa ʻAlamā kuo “tō [ʻa e kau Sōlamí] ki [ha] ngaahi hala lahi” (ʻAlamā 31:9), naʻá ne faʻu ha ngaahi palani ke fakaʻaongaʻi e mālohi ʻo e folofola ʻa e ʻOtuá ke fakaafeʻi kinautolu ke nau toe foki kia Sīsū Kalaisi.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

‘Alamā 30:1–29

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau ʻiloʻi mo fakasītuʻaʻi ʻa e ngaahi akonaki hala te ne lava ʻo fakatafoki kinautolu meia Sīsū Kalaisí.

• Teuteu ʻa e tokotaha akó: ʻE lava ke talanoa ʻa e kau akó mo ha mēmipa ʻo e fāmilí pe taki ʻo e Siasí fekauʻaki mo ha ngaahi founga ke ʻiloʻi ai ʻa e ngaahi akonaki halá.

• Vitiō: “Ko e Meʻaʻofa Fakalangi ʻo e Fakatomalá” (15:22; mamata mei he taimi 2:08 ki he 2:40)

•  

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi ʻa e fanga kiʻi loki fakatahá ke fakaʻatā e kau akó ke nau ngāue tauhoa pe fakakulupu iiki ʻi heʻenau aleaʻi ʻa e ngaahi pōpoaki fakafepaki kia Kalaisi kuo nau fetaulaki mo iá. ʻE lava ke fili ʻe he kulupu takitaha ha tokotaha lea ke vahevahe mo e kalasí ʻa e meʻa naʻe aleaʻi ʻe heʻenau kulupú.

‘Alamā 30:30–60

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau ʻiloʻi ʻa e fakamoʻoni ʻoku ʻi ai ha ʻOtuá pea fili ke tui kiate Ia.

• Teuteu ʻa e tokotaha akó: Fakaafeʻi ʻa e kau akó ke nau lau ʻa e ʻAlamā 30:40–41 pe Mōsese 6:63. Kole ange ke nau kumi ha fakamoʻoni ʻo e ʻOtuá ʻi honau ʻātakaí pea ʻe lava ke ke ʻalu mo ha fakatātā ke fakaʻaliʻali ʻi he kalasí.

• Ngaahi ʻAtá: Ngaahi ʻata ʻokú ne ʻomi ha fakamoʻoni ʻoku ʻi ai ha ʻOtua

• Vitiō: “Haʻu, ʻo Muimui ʻIate Au” (17:50; mamata mei he taimi 14:24 ki he 14:56)

• Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi ʻa e kau akó ke fakaʻaliʻali ha fakatātā pe meʻa ʻokú ne fakamoʻoniʻi ʻa e ʻOtuá pea fakamatalaʻi ʻa e ʻuhinga ne nau fili ai iá.

ʻAlamā 31:1–11

Taumuʻa ʻo e lēsoní: ʻE lava ke tokoniʻi ʻe he lēsoni ko ʻení ʻa e kau akó ke nau falala ki he mālohi ʻo e folofola ʻa e ʻOtuá ke nau tui faivelenga maʻu ai pē kia Sīsū Kalaisi.

• Teuteu ʻa e tokotaha akó: Fakaafeʻi ʻa e kau akó ke nau talanoa ki ha taha fekauʻaki mo e founga kuo tokoniʻi ai kinautolu ʻe he folofola ʻa e ʻOtuá ke nau kei faivelenga maʻu ai pē ʻi he ongoongolelei ʻo Sīsū Kalaisí.

• Vitiō: “Fakafoki Fakaʻaho” (13:43; mamata mei he taimi 1:40 ki he 3:25)

• Laʻipepa Tufa: “Ko e Palani ʻa ʻAlamā ke Akoʻi ʻa e Kakai Sōlamí”

• Fokotuʻu ki hono akoʻi ʻi he konifelenisi vitioó: Ki he taumuʻa ʻa ʻAlamā ke tokoniʻi ʻa e kakai Sōlamí ke nau foki ki he ʻEikí, ʻoku fakaafeʻi e kau akó ke nau faʻu ha papa fakaʻaliʻali: ko hano fakaʻaliʻali ʻo e taumuʻa, ko e fakalotolahi ki aí, pea mo e ngaahi fakaikiiki fekauʻaki mo hono fakahoko iá. Fakakaukau ke kumi ha ngaahi sīpinga ʻo e ngaahi papa fakaʻaliʻali ʻi he ʻinitanetí pea vahevahe ʻeni mo e kau akó.

ʻAlamā 31:12–38

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke fakatupulaki honau vā fetuʻutaki mo e Tamai Hēvaní mo Sīsū Kalaisí ʻi heʻenau vakaiʻi ʻa e founga ʻoku tākiekina ai ʻe he hīkisiá mo e loto-fakatōkilaló ʻa honau vā fetuʻutaki mo Kinauá pea mo e niʻihi kehé.

• Teuteu ʻa e tokotaha akó: ʻI hoʻo teuteu ke ako ʻa e ʻAlamā 31, fakaafeʻi e kau akó ke nau lotu, ʻo tokanga taha ki he ngaahi fiemaʻu ʻa e niʻihi kehé.

• Laʻiʻata: Ngaahi ʻata ʻo e moihū ʻa ha kau ako; ko ha ʻīmisi ʻo e Lameiumitomí

• Meʻa ke fakaʻaliʻalí: Ko e saati fekauʻaki mo e lotú, ʻe lava pē ke fakaʻaliʻali pe hiki ʻi he palakipoé

• Vitiō: “ʻOku Malanga ʻaki ʻe ʻAlamā mo Hono Ngaahi Tokouá ʻa e Folofola ʻa e ʻOtuá ʻi he lotolotonga ʻo e Kau Sōlamí” (6:07; mamata mei he taimi 0:22 ki he 3:58 mo e 4:03 ki he 5:55)

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi ʻa e polokalama palakipoé (whiteboard) ke fakaʻaliʻali ʻa e saati fekauʻaki mo e lotú. Fakaafeʻi e kau akó ke nau tānaki ki he sātí ʻi he lolotonga e lele ʻa e lēsoní pea hiki ia ki heʻenau tohinoa akó.

Toe Vakaiʻi Hono 14 ʻo e Fakataukei Fakatokāteliné

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke ako maʻuloto ha niʻihi ʻo e ngaahi potufolofolá mo e ngaahi kupuʻi lea mahuʻinga ʻi he folofolá mei he potufolofola fakataukei fakatokāteline fakaʻosi ʻe 12 ʻi he Tohi ʻa Molomoná.

• Teuteu ʻa e tokotaha akó: Fakaafeʻi e kau akó ke fili mo ako maʻuloto ha potufolofola fakataukei fakatokāteline ʻe lava ʻo tokoni ke nau ongoʻi ofi ange ai ki he Fakamoʻuí pe tokoniʻi kinautolu ʻi ha meʻa ʻoku nau lolotonga fiemaʻu.

• Laʻipepa Tufa: “Fakataukei Fakatokāteline ki he Tohi ʻa Molomoná: ʻAlamā–Molonai”

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaliʻali ha meʻa mei he polokalama Fakataukei Fakatokāteliné pea ngāueʻi mo e kalasí ʻa e ngaahi ʻekitivitií.