‘Alamā 30:30–60

“ʻOku ʻI Ai ha Tupuʻanga Fungani Māʻolunga”

Naʻe fakamoʻoni ʻa ʻAlamā “ʻoku fakahā ʻe he meʻa kotoa pē ʻoku ʻi ai ha ʻOtua” (ʻAlamā 30:44). Ka ko e hā ʻoku ʻikai fakatokangaʻi pe fakahā ai ʻe he taha kotoa ʻoku ʻi ai ha fakamoʻoni ʻoku moʻoni ʻa e ʻOtuá? Naʻe fakaʻikaiʻi ʻe Kolihola ʻoku moʻui ʻa e ʻOtuá kae ʻoua kuo taaʻi ia ʻe he mālohi ʻo e ʻOtuá ʻo noa. ʻE lava ke tokoniʻi koe ʻe he lēsoni ko ʻení ke ke ʻiloʻi ʻa e fakamoʻoni ʻoku moʻui ʻa e ʻOtuá pea fili ke tui kiate Ia.

Poupouʻi hono vakavakaiʻí mo e siviʻí. Fakahoko ha ngaahi fehuʻi fakalaumālie koeʻuhí ke fakatokangaʻi ʻe he kau akó ʻa e meʻa kuo nau ʻosi ʻiloʻi mo tui ki aí. Poupouʻi e kau akó ke fakaafeʻi ʻa e Laumālie Māʻoniʻoní ke tokoni ke nau ʻiloʻi ʻa e meʻa ʻoku fiemaʻu ke nau ʻiló pea fakamoʻoni ki he ngaahi moʻoni ʻoku nau fekumi ki aí.

Teuteu ʻa e tokotaha akó: Fakaafeʻi e kau akó ke nau lau ʻa e ʻAlamā 30:40–41 pe Mōsese 6:63. Kole ange ke nau kumi ha fakamoʻoni ʻo e ʻOtuá ʻi honau ʻātakaí pea ʻe lava ke ke ʻalu mo ha fakatātā ke fakaʻaliʻali ʻi he kalasí.

Ngaahi ʻEkitivitī Ako ʻOku Ala Fakahokó

ʻOku moʻui ʻa e ʻOtuá

Fakakaukau ke fakaʻaliʻali ha ʻū fakatātā ʻokú ke ongoʻi ʻoku nau fakahaaʻi ha fakamoʻoni ʻoku ʻi ai ha ʻOtua. ʻE lava foki ke lipooti ʻe he kau akó ʻenau teuteu ki he kalasí. Aleaʻi ha niʻihi pe kotoa ʻo e ngaahi fehuʻi ko ʻení.

• ʻI hoʻomou ʻapiakó pe koló, ko e hā hono lahi ʻo e vakai ʻa e kakaí ki ha fakamoʻoni ʻoku ʻi ai ha ʻOtua ʻi he māmani ʻokú ne ʻātakaiʻi kinautolú (hangē ko ʻení, lolotonga ʻa e vakai ki he tō ʻa e laʻaá pe ngaahi fetuʻú)?

• ʻOkú ke pehē ko e hā ʻoku lava ai ʻa e kakaí ʻo vakai ki he ngaahi meʻa tatau pea faʻu ha ngaahi aofangatuku kehekehe fekauʻaki mo e ʻOtuá?

• Ko e hā ha meʻa te ne ala tākiekina ʻa e malava ʻa ha taha ʻo fakatokangaʻi e kau ʻa e ʻOtuá ʻi heʻenau moʻuí?

Fakakaukau ki he founga ʻe tāpuekina ai koe kapau te ke lava ʻo mamata lelei ange ki he ʻOtuá mo ʻEne kau ʻi hoʻo moʻuí. ʻI hoʻo ako ʻi he ʻaho ní, feinga ke fakatupulaki hoʻo malava ke vakai ki he fakamoʻoni ʻo e ʻOtuá ʻi he meʻa ʻokú ke mamata ki ai mo aʻusiá.

Ko e tukuakiʻi ʻe Kolihola ʻa e kau taki ʻo e Siasí

Naʻe ola lelei hono fakamafola ʻe Kolihola, ko ha fili ʻo Kalaisí, ʻa ʻene ngaahi pōpoaki fakaolooló ʻi he fonua ko Seilahemalá (vakai, ʻAlamā 30:12, 17–18). Naʻá ne feinga foki ke akoʻi ʻa e kakai ʻi Selesoni mo Kitioné. Naʻe fakafepakiʻi ai ʻe he kakai tui ki he ʻOtuá ʻa Kolihola ʻo nau ʻomi ia ki he fakamaau lahí mo ʻAlamā, ko e taulaʻeiki lahí.

Lau ʻa e ʻAlamā 30:30–36, ʻo kumi e tali ʻa ʻAlamā ki hono ʻohofi ʻe Kolihola ʻa e ʻOtuá mo e Siasí.  ChurchofJesusChrist.org

Mahalo te ke fie fakaafeʻi e kau akó ke lekooti ʻa e ʻuhinga ʻo e ngaahi foʻi lea ko ʻení ʻi heʻenau folofolá ke tokoni ke mahino kiate kinautolu mo nau manatuʻi ʻa e meʻa ʻoku nau akó.

Mahalo ʻe ala tokoni ke ʻiloʻi ʻoku ʻuhinga ʻa e lea taukaé ʻi he veesi 30 ke manukiʻi ʻa e ʻOtuá pe lea “taʻe fakaʻapaʻapa pe taʻeʻapasia ki he ʻOtuá pe ngaahi meʻa ʻoku toputapú” (Fakahinohino ki he Ngaahi Folofolá, “Taukaé,” scriptures.ChurchofJesusChrist.org). ʻOku ʻuhinga ʻa e foʻi lea fakafonu ʻi he ngaahi veesi ko ʻení ke tuʻumālie mei ai.

• Ko e hā ʻa e meʻa naʻe tukuakiʻi ʻe Kolihola naʻe fai ʻe he kau taki ʻo e Siasí? (Vakai, ʻAlamā 30:31.)

Ko e fakamoʻoni ʻa ʻAlamā ki he ʻOtuá

ʻI he taimi naʻe fehuʻi ai ʻe ʻAlamā kia Kolihola pe ʻoku tui ki he ʻOtuá, naʻe pehē ʻe Kolihola ʻoku ʻikai ke ne tui ki ai (vakai, ʻAlamā 30:37–38).

Lau ʻa e ʻAlamā 30:39–44, ʻo kumi e tali ʻa ʻAlamā kia Koliholá.  ChurchofJesusChrist.org.

• Ko e hā ʻoku makehe kiate koe mei he tali ʻa ʻAlamaá?

• Ko e hā ha ngaahi moʻoni fekauʻaki mo e ʻOtuá te ke lava ʻo ʻiloʻi ʻi he ʻAlamā 30:41, 44?

Fakakaukau ke fakaafeʻi e kau akó ke nau fakafekauʻaki e ongo veesi ko ʻení mo e Mōsese 6:63. Tuku ke vahevahe ʻe he kau akó ha ngaahi moʻoni ʻoku nau ongoʻi ʻoku akoʻi ʻi he ngaahi veesi ko ʻení. ʻE lava ke nau ʻiloʻi ha ngaahi moʻoni hangē ko e sīpinga ko ʻení.

Ko e moʻoni ʻe taha ʻe lava ke tau akó, ʻoku fakamoʻoni ʻa e ngaahi meʻa kotoa pē ʻoku ʻi ai ha ʻOtua.

ʻE lava ke tokoni ʻa e ʻekitivitī ko ʻení ki he kau akó ke nau fakatokangaʻi ʻa e fakamoʻoni ʻoku ʻi ai ha ʻOtua ʻi heʻenau moʻuí. Fekumi ki ha ngaahi founga ke fakakau mai ai e tokotaha ako kotoa ʻi he kalasí. Fakakaukau ke ʻai ha lisi ʻo e ngaahi tali ʻa e kau akó ki he sitepu 1 mo e 2 ʻi he palakipoé. ʻE lava foki ke hiki ʻe he kau akó ha meʻa ki he sitepu 3 mo e 4 ʻi heʻenau tohinoá pea loto-fiemālie ke vahevahe. Mahalo he ʻikai fakatokangaʻi ʻe ha kau ako ʻe niʻihi ʻa e ngaahi aʻusia kuo nau maʻú kae ʻoua kuo nau fanongo ki ha vahevahe ʻa ha niʻihi kehe.

1. Hiki ha lisi ʻo e meʻa naʻe pehē ʻe ʻAlamā ʻokú ne ʻomi ha fakamoʻoni ʻoku ʻi ai ha ʻOtuá.

2. Tānaki atu ha toe fakamoʻoni te ke lava ʻo fakakaukau ki ai.

3. Kumi ha ngaahi meʻa ʻi hoʻo lisí kuo nau tokoniʻi fakataautaha koe ke ke sio ki he fakamoʻoni ʻoku ʻi ai ha ʻOtuá. ʻE lava ke ke hiki ha ngaahi fakaikiiki mei hoʻo ngaahi aʻusiá.

4. Te ke lava foki ʻo fili ha meʻa ʻe taha pe lahi ange ʻi hoʻo lisí pea vahevahe ʻa e founga ʻe ala tokoniʻi ai koe ʻe he ngaahi meʻá ni ke fakatupulaki hoʻo malava ke vakai ki he fakamoʻoni ʻoku ʻi ai ha ʻOtuá.

ʻE lava ke tokoni ʻa e fakamatala ko ʻení ki he kau ako ʻoku faingataʻa ke nau fakatokangaʻi ha ngaahi aʻusia mo e ʻOtuá. Fakakaukau ke vahevahe ia mo fakaafeʻi e kau akó ke vahevahe ʻa e meʻa ʻoku nau akó. Tokoniʻi e kau akó ke fakaʻehiʻehi mei he ongoʻi loto-foʻí pea fakaafeʻi ke nau muimui ki he fakaafe ʻa Palesiteni Nalesoní.

Naʻe fakahoko ʻe Palesiteni Lāsolo M. Nalesoni ʻa e faleʻi ko ʻení fekauʻaki mo hono ʻiloʻi ʻoku ʻi ai ha ʻOtuá.

Mahino ka ʻikai ha ngaahi ʻausia mo e ʻOtuá, ʻe lava ke veiveiua ha taha pe ʻoku ʻi ai ha ʻOtua. Ko ia, fokotuʻu koe ʻi he tuʻunga ke kamata ai haʻo ngaahi aʻusia pea mo Ia. Ke ke loto-fakatōkilalo. Lotua ke ke maʻu ha mata ke mamata ki he ivi tākiekina ʻo e ʻOtuá ʻi hoʻo moʻuí pea mo e māmani ʻokú ke ʻi aí. Kole ke Ne fakahā atu pe ʻokú Ne moʻui—pe ʻokú Ne ʻafioʻi koe. Fehuʻi ange pe ko e hā ʻEne ongoʻi fekauʻaki mo koé. Hili ia peá ke fakafanongo. (Russell M. Nelson, “Haʻu, ʻo Muimui ʻIate Au,” Liahona, Mē 2019, 90)

Naʻe fiemaʻu ʻe Kolihola ke fakalotoʻi ia ʻe ʻAlamā fekauʻaki mo e mālohi ʻo e ʻOtuá peá ne toutou poleʻi ʻa ʻAlamā ke fakahā ange ha fakaʻilonga, kae ʻikai ke ne ngāue ʻaki ʻa e tuí ke maʻu ha aʻusia mo e ʻOtuá (vakai, ʻAlamā 30:43, 45, 48).

• ʻOkú ke pehē ko e hā ʻoku kehe ʻi ha taha ʻoku muimui ʻi he fakaafe ʻa Palesiteni Nalesoní mo ha taha ʻokú ne fiemaʻu ha fakaʻilongá?

Lau ʻa e ʻAlamā 30:48–53, 59–60, ʻo kumi ʻa e founga naʻe tui ai ʻa Kolihola ki he mālohi ʻo e ʻOtuá.   ChurchofJesusChrist.org

• Ko e hā te tau lava ʻo ako mei he aʻusia ʻa Koliholá?

Fakatokangaʻi ange ʻa e ngaahi lēsoni naʻe fakamahinoʻi mai ʻe Molomona ʻaki ʻa e kupuʻi lea “ko ia ʻoku tau vakai” ʻi he veesi 60. Fakakaukau ki he founga ʻoku kei kākaaʻi ai ʻe he tēvoló ʻa e kakaí ʻi he ʻahó ni mo feinga ke fakalotoʻi kinautolu ke nau fakaʻikaiʻi ʻa e meʻa ʻoku nau ʻilo ʻoku moʻoní.

Fakahoko haʻo fakamoʻoni ʻoku moʻui ʻa e ʻOtuá pea fakaafeʻi e kau akó ke nau feinga ke mamata ki he ʻOtuá ʻi he māmani ʻokú ne ʻākilotoa kinautolú.

Fakamatala Fakamahinó mo e Puipuituʻá

Te u lava fēfē ʻo ʻilo lahi ange ʻa e ʻOtuá?

Naʻe vahevahe ʻe Palesiteni Henelī B. ʻAealingi ʻo e Kau Palesitenisī ʻUluakí ʻa e meʻa naʻá ne fakahoko ke ʻiloʻi ai ʻa e ʻOtuá ʻi heʻene moʻuí:

Te u fakakaukauloto ki he fehuʻi ko ʻení: “Kuó u mamata nai ki he mafao mai e toʻukupu ʻo e ʻOtuá kiate kimaua pe ko ʻema fānaú pe fāmilí he ʻahó ni?” ʻI he hokohoko atu ʻeku hiki e ngaahi meʻá ni, naʻe kamata ke hoko ha liliu. ʻI heʻeku fakakaukau ki he ngaahi meʻa naʻe hoko ʻi he ʻaho ko iá, ne u mamata ki he fakamoʻoni ʻo e meʻa kuo fakahoko ʻe he ʻOtuá ki ha taha ʻo kimautolu, ʻa ia ne ʻikai ke u fakatokangaʻi ʻi he ngaahi taimi femoʻuekina ʻo e ʻahó. ʻI heʻene hoko iá pea naʻe lahi ʻene toutou hokó, naʻá ku ʻiloʻi ko ʻeku feinga ko ia ke u manatuʻí, naʻe fakaʻatā ai ʻe he ʻOtuá ke fakahā mai kiate au ʻa e meʻa kuó Ne fakahokó. (Henry B. Eyring, “O Remember, Remember,” Liahona, Nov. 2007, 67)

Naʻe akoʻi ʻe Sisitā Sūsana Petinā ʻo pehē:

ʻOku ou fakamoʻoni, ʻi heʻetau lotua ke mātā tonu ʻEne palaní, te tau ʻiloʻi ai e kau mai ʻa e ʻOtuá ki heʻetau moʻuí pea mo tau ʻiloʻi ʻokú Ne ʻafioʻi kitautolu. (Susan Bednar, “Kuó u Mātā Nai e Toʻukupu ʻo e ʻOtuá ʻi Heʻeku Moʻuí?” [Fakataha lotu ʻa e Potungāue Ako ʻa e Siasí maʻá e kakai lalahi kei talavoú, 3 Māʻasi, 2013], broadcasts.ChurchofJesusChrist.org)

Te u lava fēfē ʻo fakaafeʻi e Laumālie Māʻoniʻoní ke tokoniʻi au ke u mamata ki he ʻOtuá ʻi heʻeku moʻuí?

Naʻe akoʻi ʻe ʻEletā Kimi B. Kalake ʻo e Kau Fitongofulú ʻo pehē:

ʻOku ʻomi ʻe he talangofua faingofuá ʻa e Laumālié ki hotau lotó. ʻOku tau lotu ʻi he tui ʻi hotau ngaahi ʻapí, fekumi ʻi he folofolá, mo tauhi e ʻaho Sāpaté ke māʻoniʻoni. ʻOku tau maʻu ʻa e sākalamēnití ʻi hotau ngaahi falelotú pea fai ʻa e ngaahi palōmesi toputapu ki heʻetau Tamai Hēvaní ʻi he huafa ʻo Kalaisí. ʻOku tau kau ʻi he ngaahi ouau toputapu ʻi he ngaahi temipale māʻoniʻoní maʻa hotau kāinga kuo pekiá. ʻI hotau ngaahi fāmilí pea ʻi heʻetau ngaahi ngāue mei he ʻEikí, ʻoku tau ala atu ki he niʻihi kehé, pea hiki ʻenau ngaahi kavengá pea fakaafeʻi kinautolu ke nau haʻu kia Kalaisi.

ʻE kāinga, ʻoku ou ʻiloʻi kapau te tau fai ʻa e ngaahi meʻá ni, ʻe hoko mai ʻa e Laumālie Māʻoniʻoní! Te tau tupulaki fakalaumālie mo maʻu ha aʻusia ʻaki e Laumālie Māʻoniʻoní, pea te Ne hoko ko hotau takaua. Kapau te tau sio kia Kalaisi pea fakaava hotau matá mo hotau telingá, ʻe faitāpuekina kitautolu ʻe he Laumālie Māʻoniʻoní ke tau sio ki he ngāue ʻa e ʻEiki ko Sīsū Kalaisí ʻi heʻetau moʻuí, ʻo fakamālohia ai ʻetau tui kiate Iá ʻi he fakapapau mo e fakamoʻoni. (Kim B. Clark, “Mata ke Mamata mo e Telinga ke Fanongo,” Liahona, Nōvema 2015, 125)

Fēfē kapau te u tui ki he ʻOtuá ka ʻoku ʻikai ke u ʻiloʻi fakapapau pe ʻokú Ne moʻoni?

Naʻe vahevahe ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ne lea momou mai ha kiʻi tamasiʻi taʻu 14 kiate au, “ʻEletā Hōlani, he ʻikai ke u lava au ʻo pehē [ʻoku ou ʻiloʻi] ʻoku moʻoni ʻa e Siasí, ka ʻoku ou tui pē ki ai.” Naʻá ku fāʻofua ʻo kuku e kiʻi tamasiʻí kae ʻoua kuo mei tuʻu ʻene mānavá. Naʻá ku talaange ki ai [ʻi he] mālohi kotoa hoku lotó ko e tuí ko ha foʻi lea mahuʻinga, pea ko ha ngāue ia ʻoku mahuʻinga ange, pea ʻoku ʻikai fiemaʻu ke teitei kole fakamolemole ia ʻi heʻene “tui ʻataʻatā peé.” Naʻá ku talaange ki ai naʻe folofola tonu ʻa Kalaisi, “ʻOua te ke manavahē ka ke tui pē” [Maʻake 5:36] . … Naʻá ku talaange ki he tamasiʻi ko ʻení ko e tuí ko e ʻuluaki sitepu maʻu pē ia ki he ʻiloʻi fakapapaú. … Pea naʻá ku talaange ʻeku laukau ʻaki ia ʻi heʻene feinga fakamātoató. (Jeffrey R. Holland, “ʻEiki, ʻOku ou Tui,” Liahona, Mē 2013, 94–95)

Ngaahi ʻEkitivitī Fakalahi ki he Akó

Ko hono fakaafeʻi ʻo e toʻu tupú ke nau ako mo fakamoʻoni ki he ʻOtuá

Hili hono ʻiloʻi ha foʻi moʻoni fekauʻaki mo e ngaahi meʻa kotoa pē ʻokú ne fakamoʻoniʻi ʻa e ʻOtuá (vakai, ʻAlamā 30:41, 44), fakakaukau ke fakaafeʻi e kau akó ke nau ako ha niʻihi ʻo e ngaahi potufolofola, himi, pe ngaahi konga ʻo e ngaahi lea ʻo e konifelenisi lahí. Te ke lava ʻo fakaafeʻi e kau akó ke fakamālohia ʻenau fakamoʻoní ʻi hono ako, ngāueʻi e meʻa ʻoku nau akó, mo e fakamoʻoni ki he niʻihi kehé. Fakakaukau ke fakaafeʻi ha niʻihi te nau loto-fiemālie ke vahevahe ʻa e meʻa ne nau akó mo e kalasí. Te ke lava foki ʻo fakaafeʻi ha kau ako ke vahevahe ʻi ʻapi.

• ʻAlamā 30:44

• Mōsese 6:63

• “Fānau Au ʻa e ʻOtuá,” Ngaahi Himí, fika 193

• “ʻE ʻOtua ko e Tapuhā,” Ngaahi Himí, fika 38

• Kim B. Clark, “Mata ke Mamata mo e Telinga ke Fanongo,” Liahona, Nōvema 2015, 124–126

Tokoniʻi e niʻihi kehe ʻoku nau veiveiua pe ʻoku ʻi ai ha ʻOtuá

ʻE ala ʻaonga ki he kau akó hano fakafaivaʻi ha tūkunga te nau lava ai ʻo tokoniʻi ha taha ʻoku nau ʻofa ai, ʻa ia ʻoku veiveiua pe ʻoku ʻi ai ha ʻOtua. Hangē ko ʻení, te ke lava ʻo fakaafeʻi e kau akó ke fakatātaaʻi ha fepōtalanoaʻaki mo ha mēmipa ʻo e fāmilí naʻá ne laukonga pe mamata ʻi ha meʻa naʻá ne fakatupu ʻenau fehuʻia pe ʻoku ʻi ai ha ʻOtuá. ʻOange ha taimi ki he kau akó ke teuteu ai ʻenau talí, pea fakaafeʻi ke nau fakakau ha meʻa ʻe taha pe ua ʻokú ne fakamoʻoniʻi kiate kinautolu ʻa e moʻoni ʻo e ʻOtuá.