Alema 36

“Sa Ou Le Toe Manatuaina O’u Tiga”

tamaitai talavou fiafia

O le faasoaina atu o aafiaga faaleagaga agamalu ia i latou tatou te alolofa i ai e mafai ona avea ma se punavai o le malosiaga mo i latou ma i tatou. A o talanoa atu i lona atalii o Helamana, sa toe faamatala e Alema lona aafiaga i le vaaia ai o se agelu, lagonaina o le mafatiaga o ana agasala, ma le mauaina o le laveaiga e ala ia Iesu Keriso. O lenei lesona ua faamoemoe e fesoasoani ia te oe e liliu atu ai ia Iesu Keriso i le faatuatua ma lagonaina le olioli o Lana laveaiga.

Tomai faalesuesuega—faailogaina o fuaitau. O le faailogaina o mau e mafai ona fesoasoani i tagata aoga e faia ai ni fesootaiga anoa ma faatumauina ai mea latou te aoaoina. E mafai ona latou vaseina, valivali, pe faataali’o upu autu po o fasifuaitau. O lomiga faaeletonika o tusitusiga paia o loo aofia ai meafaigaluega aoga e faailoga ai mau.

Sauniuniga a le tagata aoga: Valaaulia tagata aoga e o mai saunia e faasoa mai se faataitaiga o se tasi na mauaina le filemu ia Keriso ina ua mavae ona puapuagatia mo se taimi. O le a se mea na fesoasoani i lenei tagata e maua ai le filemu?

Gaoioiga e Ono Mafai Ona Aoao Ai

O Faafeagai

Ina ia amata lenei lesona, fesoasoani i tagata aoga e mafaufau e uiga i suiga faaleagaga ma mea e faafaigofieina ai. O se tasi auala e faia ai lenei mea o le tusi lea o upu nei i luga o le laupapa ma fai i tagata aoga e tusi le faafeagai o upu taitasi.

• Tiga →

• Salamo →

• Faanoanoaga →

Mafaufau loloto pe na e agasala ma mauaina se lagona o loo i le itu tauagavale. Pe ua avea ea lena lagona ma mea ua e lisiina i le itu taumatau? O le a le mea na tupu ina ia ono mafai ai lena suiga?

A uma ona talanoaina mea o loo i luga, e mafai ona e faailoa atu e faapea a oo ina afua mai lagona le lelei e ala i le agasala, ua na o le Alii lava e mafai ona fesoasoani ia i tatou e suia na lagona i o latou faafeagai lelei.

Tuu atu i tagata aoga se avanoa e toe manatunatu filemu ai i le ala na fesoasoani ai le Alii ia i latou e suia pe a latou agasala. Faaali atu le iloiloga lenei faaletagata lava ia ma fai atu i tagata aoga e tusi i totonu o a latou api talaaga soo se uunaiga latou te maua a o latou mafaufau loloto. O nei mea e mafai ona avea o ni fesili, lagona, po o uunaiga e faatino.

Mafaufau loloto pe o le a le moni o faamatalaga nei mo oe:

• Pe a ou agasala, ou te iloa le ala e liliu atu ai i le Alii ia maua le faamagaloga, filemu, ma le faamoemoe.

• E ia te au le loto mautinoa e faapea e faatasi ai ma le fesoasoani a le Alii e mafai ai ona ou suia.

• Ou te liliu atu e le aunoa i le Alii mo lenei fesoasoani.

O le asō o le a e suesue ai i le ala na liua ai lagona o le tiga loloto o Alema le Itiiti i ana agasala i lagona o le olioli ma le filemu a o ia tagi atu i le Faaola. A o e suesue, vaavaai pe faapefea ona e sailia le fesoasoani a le Alii e faatoilalo ai le agasala ma ona aafiaga ma maua ai le olioli e ala ia Iesu Keriso.

Suiga tele o Alema

Ina ua uma ona teena le talalelei lea na aoaoina ia i latou, sa aufaatasi sa Sorama ma sa Lamana e faatupuina le ita e faasaga ia sa Nifae. Ona osofaia lea e sa Sorama ma sa Lamana ia sa Nifae, ma taitai atu ai i se taua tele. O le toatele o loto o sa Nifae sa “amata ona faasolo maaa” i le afioga a le Atua (Alema 35:15). I le tali atu i le pa’ū faaleagaga o sa Nifae, na valaauina faatasi ai e Alema ona atalii e “tuu eseese atu ia te i latou uma taitoatasi lana poloaiga, e faatatau i mea e uiga i le amiotonu” (Alema 35:16). Sa ia talanoa muamua ma lona atalii o Helamana ma toe faamatala lona aafiaga o le liua.

Faaali atu le ata lenei. Valaaulia tagata aoga e galulue ma se paga e tali le fesili o loo mulimuli mai.

O le isi filifiliga o le tusi lea o upu e talitutusa ma upu nei i luga o le laupapa: Alema, atalii o Mosaea, faaumatia le ekalesia, agelu, tolu aso. Ona fai atu lea i paga e toe faamatala le tala e faaaoga ai upu po o fasifuaitau taitasi.

o le liua o Alema le Itiiti

• O le a se mea e te manatua e uiga ia Alema le Itiiti ma le mea o loo faaalia i lenei ata?

Faitau le Alema 36:6–11 ma vaavaai mo faamatalaga atonu na e misia.

• Aisea e te manatu ai o upu a le agelu na i ai se aafiaga malosi ia Alema?

• E le gata i le vaai atu ai i se agelu, o le a se mea e ono taitai atu ai se tasi ia iloa e tatau ona ia suia?

Atonu e te manao e fesoasoani i tagata aoga ia malamalama i le taua o le faailogaina o mau ma uunaia i latou e faataitai lenei tomai i le aluga o lenei lesona. Afai o maua le filifiliga, mafaufau e faaali atu se lomiga faaeletonika o mau po o se seti pepa ma faataitai ni auala e faailoga ai fuaitau o mau.

Mo le gaoioiga lenei, mafaufau e valaaulia tagata aoga e faailoga upu ma fasifuaitau i ni auala eseese. Mafaufau e galulue i le seti muamua o fuaiupu o se vasega, e faataitai ai le gaoioiga mo i latou. Ona mafai lea e tagata aoga ona galulue na o i latou lava i seti o fuaiupu lona lua ma le lona tolu. A uma, e mafai ona latou faasoa atu i paga po o le vasega mea na latou maua ma le auala na latou faailogaina ai.

Faitau le faamatalaga a Alema o mea na ia oo i ai ma lagonaina i aso e tolu sa le mafai ai ona ia minoi i seti o fuaiupu nei. Mafaufau e faailoga mea ua fautuaina atu.

• Alema 36:12–16: upu po o fasifuaitau o loo faamatala ai lagona o Alema e uiga i ana agasala

• Alema 36:17–18: upu po o fasifuaitau o loo tau mai ai mea na manatua ma faia e Alema lea na taitai atu ai i lona suiga

• Alema 36:19–21: upu po o fasifuaitau o loo faamatala ai le lagonaina e Alema o se mea e faafeagai pe faatusatusa i mea na ia muai oo i ai

Tuu atu i tagata aoga se avanoa e faasoa mai ai mea sa latou maitauina pe aoaoina a o latou suesueina fuaiupu 12–21. Afai e alagatatau, mafaufau e fai atu se fesili e pei o le “O le a se mea na e maitauina e ala i le faatusatusaina o lagona o Alema a o lei suia ma ina ua mavae lona suiga?” E mafai foi ona e fai atu nisi o fesili nei.

• O le a se mea ua faagaeetia ai oe e uiga i le mea na taitai atu ai i le suiga o Alema?

• O a upumoni e mafai ona tatou aoao mai i lona aafiaga?

O se upumoni e tasi e mafai ona tatou aoaoina e faapea ua ia Iesu Keriso le mana e laveai ai i tatou mai tiga o a tatou agasala ma faatumulia i tatou i le olioli.

• Na faapefea ona valaaulia e Alema le mana o le laveaiga a le Faaola?

O faamatalaga nei e mafai ona fesoasoani i tagata aoga e malamalama atili ai i le upumoni ua faamatamatateteleina. E mafai foi ona e valaaulia tagata aoga e suesue fuaiupu 24–26, ma vaavaai mo auala na faatino ai e Alema le faatuatua ia Iesu Keriso.

Sa faamalamalama mai e Peresitene Boyd K. Packer (1924–2015) o le Korama a Aposetolo e Toasefululua:

Peresitene Boyd K. Packer

E le manaomia ona e iloaina o mea uma ona faatoa galue lea o le mana o le Togiola mo oe. Ia faatuatua ia Keriso; e amata ona galue i le aso e te ole atu ai! (Boyd K. Packer, “Washed Clean,” Ensign, Me 1997, 10)

Na aoao mai Elder Neil L. Andersen o le Korama a Aposetolo e Toasefululua:

Elder Neil L. Andersen

A o tatou ta’uta’u atu ma le faamaoni a tatou agasala, toefuatai mea tatou te mafai ona faia i e na faatiga i ai, ma lafoai a tatou agasala e ala i le tausia o poloaiga, ua tatou i ai i le faagasologa o le mauaina o le faamagaloga. I le aluga o taimi, o le a tatou lagona ai le mou atu o le mafatiaga o lo tatou faanoanoa, ma “aveese le lagona sala mai i o tatou loto” ma aumai le “filemu o le mafaufau.” (Neil L. Andersen, “Repent … That I May Heal You,” Liahona, Nov. 2009, 42)

• O a ni malamalamaaga faaopoopo na e maua mai faamatalaga?

Atonu e fesoasoani le ta’u atu e faapea o le fesoasoani mai ia Iesu Keriso e mafai ona amata i le taimi tatou te ole atu ai ae o le faagasologa o le salamo ma le lagonaina o le faamagaloina atonu e faasolosolo malie.

Mafaufau e fai atu i tagata aoga e talanoaina i ni vaega toalaiti po o ni paga pe faapefea ona latou tali atu i tulaga nei.

O le a sau tala e fai atu i se talavou o lē:

• E lagonaina le faanoanoa tele ma le tiga ona o ana agasala.

• E lagona e le matuiā ana agasala ma o le a foia i latou lava i le aluga o taimi e aunoa ma le salamo.

Faaalu sina taimi e manatunatu ai i lou lava tulaga ma pe mafai faapefea ona faatatau le lesona o le asō i lou olaga. Mafaufau i se mea se tasi e mafai ona e faia i le asō e liliu atu ai i le Faaola ma valaaulia Lona mana o le laveaiga i lou olaga.

Mafaufau e faasoa atu lau molimau i le ala ua faamanuiaina ai oe i le mana faamalolo o le Faaola ma lou talitonuga i Lona manao e aumaia le filemu ma le olioli i olaga o au tagata aoga.

Manatu ma Talaaga o Faamatalaga

Alema 36:12–16. O a uiga o nisi o upu na faaaogaina e Alema?

Sa aoao mai Peresitene Boyd K.Packer (1924–2015) o le Korama a Aposetolo e Toasefululua:

Peresitene Boyd K. Packer

O le tigaina o lona uiga o le “mafatia.” O aso anamua, o se fata sa faaaoga e faataoto ai se tagata mafatia faatasi ma ona tapulima uma ma tapuvae e nonoa i se auvili lea e mafai ai ona faataavili ma mafua ai le tiga e le lavatia.

O se suotosina o se fausaga uamea lea e i ai ni ona tala maamaai. Afai e toso i luga o le palapala, e faapena ona sunui i lalo ma sua a’e ai i luga le eleele. E masani ona talanoa mai tusitusiga paia e uiga i agaga ma mafaufau ua “lagā i luga” i le tausalaina.

O le mafatia o lona uiga “ia mimilo,” o se faiga faatigaina e matua tigā ai e oo lava i ē e lē sala o le a latou taʻutino atu. (Boyd K. Packer, “The Touch of the Master’s Hand,” Ensign, Me 2001, 23)

Alema 36:19. Afai ou te salamo, pe galo ea ia te a’u a’u agasala?

I le ta’ua ai o le manatuaina o a tatou agasala, sa faamalamalama mai ai e Elder Dieter F. Uchtdorf o le Korama a Aposetolo e Toasefululua:

Peresitene Dieter F. Uchtdorf

O le a taumafai Satani e faatalitonu i tatou e le faamagaloina a tatou agasala aua e mafai ona tatou manatuaina. O Satani o le [tagata] pepelo; e taumafai o ia e faapuaoa la tatou vaaiga ma taitai ese mai ai i tatou mai le ala o le salamo ma le faamagaloga. E lei folafola mai le Atua faapea, o le a tatou le manatuaina a tatou agasala. O le manatuaina o le a fesoasoani ia i tatou e aloese mai ai i le toe faia o mea sese lava na. Peitai, afai tatou te tumau i le moni ma le faamaoni, o le a oo ina manifinifi le manatua o a tatou agasala. O le a avea lena ma vaega o le faagasologa o le faamalologa ma le faapaiaga o loo manaomia. Na molimau mai Alema ina ua uma ona ia alaga atu mo le alofa mutimutivale o Iesu, sa mafai lava ona ia manatuaina ana agasala, peitai o le manatuaina o ana agasala sa le toe faaatuatuvale ma pagatia ai o ia, aua sa ia iloa ua faamagaloina o ia (tagai Alema 36:17–19). (Dieter F. Uchtdorf, “Vaega Tonu o le Toe Foi Saogalemu,” Liahona, Me 2007, 101)

E faapefea ona faatusatusa mafatiaga e aofia ai i le salamo i mafatiaga o le a tatou oo i ai pe afai tatou te le salamo?

Na aoao mai Elder D. Todd Christoffferson o le Korama a Aposetolo e Toasefululua:

Elder D. Todd Christofferson

O so o se tiga lava e manaomia e le salamo o le a itiiti lava nai lo le puapuaga na manaomia e faamalie ai le faamasinotonu mo agasala e le’i salamoina. E le’i saunoa tele le Faaola e uiga i le mea na Ia onosaia e faamalie ai manaoga o le faamasinoga tonu ma togiola ai a tatou agasala, ae sa Ia faia le fetalaiga manino lenei:

“Aua faauta, o a’u le Atua na puapuagatia i nei mea mo tagata uma, ina ia latou le puapuagatia pe afai latou te salamo;

“Ae afai latou te le salamo, e ao ina latou tiga e pei o a’u;

“O le mafatia lea na oo ai ia te a’u lava, o le Atua lava lea, o le ua silisili i tagata uma, le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga—ma manao ai ia Ou le inuina le ipu oona” (MF&F 19:16–18). (D. Todd Christofferson, “O Le Meaalofa Paia o le Salamo,” Liahona, Nov. 2011, 40)

Gaoioiga Faaopoopo e Aoao Ai

Fefulisaiga

Mafaufau e fesoasoani i tagata aoga ia malamalama o le Alema 36 o se faataitaiga o se faatulagaga o tusiga faaEperu ua ta’ua o le fefulisaiga. I le fefulisaiga, e faatulagaina upu po o manatu i se faatulagaga patino ona toe faatulaga lea i le faasologa agai i tua. O lenei toefaiga e faamamafa ai manatu ma upu taua, ma e masani lava o le manatu autu o le tusitala o loo i le ogatotonu o le fefulisaiga.

I le siata o i lalo, maitau o le savali tutotonu o le fefulisaiga o loo maua i le Alema 36:17–18, ina ua liliu atu Alema ia Iesu Keriso mo se toomaga.

Afai e te filifili e faaaofia lenei faamatalaga i le lesona, ia faaeteete e le suia ai le anotusi autu o le Alema 36.

otootoga vaaia o le fefulisa’iga i le Alema 36

Alema 36:2–3, 27–29. Afai tatou te faalagolago i le Atua, o le a Ia lagolagoina i tatou i o tatou tofotofoga

Afai e faailoa mai e tagata aoga lenei upumoni, fesoasoani ia i latou e faalolotoina lo latou malamalama i ai e ala i le fai atu ia i latou e sue isi tala o tusitusiga paia e faaopoopo atu i na tala na ta’ua e Alema e faamaonia ai lenei upumoni. Ona fuafua lea e faataitai e tagata aoga le faaaogaina o se tasi pe sili atu o nei tala e faamalamalama atu ai i se isi tagata le ala e mafai ai e le Atua ona fesoasoani ia i latou i o latou tofotofoga. E mafai ona e tuuina atu se tulaga faataitai i tagata aoga e uiga i se tasi e lagona le lotovaivai i tofotofoga o loo feagai ma ia.

Olioli matua sili ona maoae

Mafaufau e valaaulia tagata aoga e faitau le Alema 36:25–26, ma vaavaai pe na mafai faapefea e taumafaiga a Alema e aoao atu le talalelei ona aafia ai o ia ma isi. E mafai e tagata aoga ona faasoa mai mea latou te maua. Fesoasoani i tagata aoga ia malamalama e mafai ona tatou maua le olioli tele a o tatou saili e aumai isi ia Keriso.