Atamai i Aoaoga Faavae: Alema 39:9

“Aua e Te Toe Alu e Tusa ma Tuinanau o Ou Mata.”

I au suesuega o le Alema 39, sa e aoao ai e uiga i le taua o le ola ai i le tulafono o le legavia ma le auala e tetee atu ai i faaosoosoga e ala i le faalagolago ia Iesu Keriso. O lenei lesona e mafai ona fesoasoani ia te oe e tauloto ai le mau faasino o le atamai i aoaoga faavae ma le fasifuaitau autu o le mau mo le Alema 39:9, faamatala le aoaoga faavae o loo aoao mai i lenei fuaitau, ma faaaoga mataupu faavae o le mauaina o le malamalama faaleagaga i tulaga moni o le olaga.

Uunaia tagata aoao ia taumafai ma le mautinoa ia avea atili e faapei o Iesu Keriso. A o taumafai tagata aoga ia avea atili e faapei o Iesu Keriso, fesoasoani ia latou iloa uunaiga mai le Agaga Paia e faailoa mai ai auala e mafai ona latou faaleleia atili ai. Uunaia tagata aoga e mafaufau ma le agaga tatalo i ni laasaga patino e mafai ona latou faia i a latou taumafaiga ia avea atili e faapei o le Faaola.

Sauniuniga a le tagata aoga: Valaaulia tagata aoga e amata ona tauloto le fasifuaitau autu o le mau mo le Alema 39:9. E mafai foi ona e uunaia i latou e taumafai e tauloto le fuaiupu atoa.

Gaoioiga e Ono Mafai Ona Aoao Ai

O lenei lesona o le atamai i aoaoga faavae ua mamanuina e aoao atu pe a uma le lesona o le “Alema 39,” o le lesona faatatau mo le fuaitau o le atamai i aoaoga faavae Alema 39:9. Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.

Faamatala ma tauloto

O le fasifuaitau autu o le mau o le atamai i aoaoga faavae mo le Alema 39:9 o le “Aua e te toe alu e tusa ma tuinanau o ou mata.” Faaaoga le metotia lenei, po o se isi e te filifilia, e fesoasoani ai ia te oe e tauloto le mau faasino ma le fasifuaitau autu o le mau.

I luga o le laupapa, mafaufau e tusi le Alema 39:9 ma tusi ni mata se lua i se lio kolosi. Tuu atu i tagata aoga ni nai minute e suesue ai le fasifuaitau autu o le mau, ona valaaulia lea o ni nai tagata aoga e o mai i le laupapa ma tusi le fasifuaitau faataali’o i le atatusi. Tauloto leotele faatasi o se vasega le fuaitau o mau ma fasifuaitau autu mo ni nai taimi seia oo ina taulotoina e tagata aoga.

Ona mafaufau lea e valaaulia ni nai tagata aoga e o mai i luma o le potuaoga e faatino le tulaga faataitai lenei.

Manatu faapea o oe o se faifeautalai o loo aoaoina se tasi e uiga i le tulafono o le ola mamā mo le uluai taimi. Faamatala faapuupuu po o le a le tulafono o le ola mamā, ma faaaoga le Alema 39:9 e faamatala ai pe faapefea ona tausia.

Faataitai le faaaogaina

Tuu atu i tagata aoga se avanoa e toe iloilo ai mataupu faavae o le mauaina o le malamalama faaleagaga i parakalafa 5–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022). A uma ona latou iloiloina, valaaulia i latou e filifili se upu taua mai mataupu faavae taitasi lea latou te lagona e sili ona faamatalaina ai [le mataupu faavae]. Ona mafai lea e tagata aoga ona faasoa mai po o le a le upu na latou filifilia ma pe aisea.

Faaaoga le tulaga faataitai lenei, pe mafaufau e fetuunai ina ia sili atu ona fetaui ma manaoga o tagata aoga, e fesoasoani ai i tagata aoga e faaaoga mataupu faavae o le mauaina o le malamalama faaleagaga.

E fiafia Ivan e faaalu se taimi i luga o ala o faasalalauga faaagafesootai. E maeleelega o ia ma e faaaogaina tulaga eseese o ala o faasalalauga faaagafesootai e faasoa atu ai ni savali lelei. Peitai, na te vaaia foi le tele o anotusi e le talafeagai ma e i ai taimi e oo lava i mea faaponokalafi. I le taimi muamua, sa faalavelave ia te ia, ae i le aluga o taimi ua faateleina pea lona toafimalie i ai. Talu ai nei lava, na ia saili atili ai i lenei ituaiga o anotusi. E le o popole o ia i le taimi nei e uiga i filifiliga o loo ia faia.

Mafaufau pe mafai faapefea e le malamalama ma le faaaogaina o mataupu faavae o le mauaina o le malamalama faaleagaga ona fesoasoani ia Ivan e iloa ai popolega i ana faatinoga o i ai nei. Atonu o le a fesoasoani fesili ma punaoa nei.

Mafaufau e tusi le fesili muamua o vaega taitasi o loo i lalo i luga o le laupapa ma valaaulia tagata aoga e talanoaina a latou tali i ni paga po o ni vaega toalaiti. A o galulue tagata aoga i vaega, savalivali solo ma faalogo i mea latou te talanoaina. Faaopoopo fesili ma punaoa faaopoopo o loo lisi atu i lalo pe a manaomia e fesoasoani ai i tagata aoga e faaaoga atili ia mataupu faavae o le mauaina o le malamalama faaleagaga.

Iloilo manatu faavae ma fesili faatasi ai ma se vaaiga e faavavau

• E mafai faapefea e Ivan ona iloilo lona tulaga faatasi ai ma se vaaiga faavavau?

• E mafai faapefea e ana taumafaiga e tausia le mama o ona mafaufauga ona faia se eseesega i lona olaga atoa i le lalolagi ma i le olaga a sau?

• E mafai faapefea e ana taumafaiga ona aafia ai lana sootaga ma le Tama Faalelagi?

Saili le malamalama atili e ala i punaoa mamana ua filifilia

• O a nisi o faataitaiga o punaoa mamana ua filifilia e mafai ona fesoasoani ia Ivan? E mafai faapefea ona fesoasoani le Alema 39:9?

Afai e manaomia e tagata aoga le fesoasoani i le mauaina o punaoa mamana ua filifilia, mafaufau e faasoa atu punaoa nei.

• Mo Le Malosi o le Autalavou: O Se Taiala i le Faia o Filifiliga (tamaitusi, 2022), “O le mea e fai i lena taimi”

• Mosaea 4:30; 3 Nifae 12:28–30; Mataupu Faavae ma Feagaiga 42:23; 121:45

• O saunoaga o le konafesi aoao e uiga i le mama mai feusuaiga, ponokalafi, po o ala o faasalalauga faaagafesootai e te maua i luga o le polokalama o le Gospel Library po o ChurchofJesusChrist.org

Faatino i le faatuatua 

• O le a se mea e mafai ona fai e Ivan e faatino ai le faatuatua ma “aua le toe alu e tusa ma tuinanau o ona mata”? (Alema 39:9).

• E ono mafai faapefea e le taumafai e liliu atu ia Keriso ona fesoasoani i ana taumafaiga?

• O le a le aoaoga faavae mai le fuafuaga a le Tama Faalelagi e mafai ona fesoasoani ia Ivan ma aisea?

• O le a sou manatu e mafai faapefea e mataupu faavae o le mauaina o le malamalama faaleagaga ona fesoasoani ia Ivan ia iloa le matautia o ana faatinoga o i ai nei?

• O le a se mea e mafai ona ia faia e faatino ai ni suiga tumau?

A uma talanoaga a vaega, valaaulia i latou e faasoa mai mea na latou aoaoina i le vasega. A o faasoa mai tagata aoga, faailoa le taua o o latou manatu faaalia. Mafaufau foi e fai atu fesili e fesoasoani ai i tagata aoga e fegalegalea’i o se vasega, e pei o le “Aisea e te manatu ai o le mea na faatoa faasoa mai e lau uo e taua?” po o le “E mafai faapefea e le faaaogaina o mea na faasoa mai e lau vasega ona fesoasoani ia Ivan?”

Iloiloga o le atamai i aoaoga faavae

I le taimi o se lesona i le lumanai, faaali atu i tagata aoga se ata o ni mata se lua i totonu o se lio kolosi ma valaaulia i latou e toe manatunatu po o le fea fuaitau o le atamai i aoaoga faavae e o faatasi ma lena mea. Tauloto faatasi le fasifuaitau autu o le mau mo ni nai taimi mo le toe iloiloina.