Alema 39–42

Vaaiga Aoao

Ina ua uma ona valaaulia o ia e lona tama e salamo, sa i ai ni fesili a Korianetona e uiga i le fuafuaga a le Atua, e aofia ai le mea e tupu ia i tatou pe a mavae ona tatou feoti. Na aoao atu e Alema ia Korianetona upumoni taua e fesoasoani ai ia te ia ia malamalama i le fuafuaga o le toefuataiga a le Tama Faalelagi. Sa tauivi foi Korianetona ia malamalama i le moni o le faamasinotonu ma le alofa mutimutivale o le Atua. Na fesoasoani Alema ia te ia e faalautele lana vaaiga i lo tatou Tama Faalelagi alofa ma Lana fuafuaga mo i tatou.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona mua’i saunia mo lesona taitasi.

Alema 40

Faamoemoega o le lesona: O lenei lesona e mafai ona fesoasoani i tagata aoga e faaloloto ai lo latou talisapaia o mea na faia e le Faaola mo i latou ma o le a tuu atu ai ia i latou se avanoa e faamatala ai le mea e tupu pe a mavae ona tatou oti.

Sauniuniga a le tagata aoga: Valaaulia tagata aoga e mafaufau loloto i ni a latou fesili atonu o i ai e uiga i le mea e tupu pe a mavae ona tatou oti ma o mai saunia e faasoa atu.
Vitiō: “E Leai se Manumalo o le Tuugamau” (9:18; matamata mai le faailo taimi 4:21 i le 5:13); “O Le A le Mea e Tupu i o Tatou Tino ma Agaga pe a Mavae ona Tatou Oti?” (4:19)
Pepa e tufa atu: “O Le Lalolagi o Agaga”; “Toetu”
Fautuaga faafaiaoga faavitiō: A uma ona vaevaeina tagata aoga i ni soa ma maua se taimi e saunia ai mea o le a latou aoao atu i se tasi o autu e lua, tuu soa taitasi i se potu vaevae faatasi ma se soa na suesueina le isi autu. Valaaulia soa e feauauai e aoao atu e le tasi le isi. A toe o mai faatasi tagata aoga, valaaulia i la’ua e faasoa mai mea sa la’ua fiafia ai e uiga i le auala na aoaoina ai i la’ua e le isi soa.

Alema 41

Faamoemoega o le lesona: O lenei lesona o le a fesoasoani i tagata aoga e iloa ai, e lei avea lava le amioleaga ma fiafia.

Sauniuniga a le tagata aoga: Valaaulia tagata aoga e mafaufau pe na faapefea e le usiusitai i poloaiga ona aumaia ia i latou le fiafia ma fesoasoani latou te lagona le saunia ai e fetaiai ma le Atua pe a mavae lenei olaga.
Vitiō: “O Le Fuafuaga Sili o le Fiafia” (9:18; matamata mai le faailo taimi 3:07 i le 3:46)
Fautuaga faafaiaoga faavitiō: Mafaufau e faaaoga le vaega o le “laupapa paepae” e fatu ai ni lisi se lua ua faaautuina “Fiafia” ma le “Faanoanoa” ma faataga tagata aoga e faaopoopo uiga i lisi taitasi e taitai atu ai i le fiafia po o le faanoanoa.

Atamai i Aoaoga Faavae: Alema 41:10

Faamoemoega o le lesona: O lenei lesona o le a fesoasoani i tagata aoga e tauloto le fuaitau o le atamai i aoaoga faavae ma fasifuaitau autu o mau mo le Alema 41:10, ma faamatala le aoaoga faavae, ma faataitai le faaaogaina o mataupu faavae o le mauaina o le malamalama faaleagaga i tulaga masani o le olaga.

Sauniuniga a le tagata aoga: Valaaulia tagata aoga e tauloto le Alema 41:10.
Aitema e faaali atu: O le tulaga faataitai i le faataitaiga o le faaaogaina
Fautuaga faafaiaoga faavitiō: Mafaufau e faaali atu ma faaaoga le vaega o le “tauloto” o le polokalama o le Atamai i Aoaoga Faavae e fesoasoani ai i tagata aoga e faataitai le taulotoina o le fuaitau atoa o le atamai i aoaoga faavae. O taimi taitasi e tauloto ai e tagata aoga le fuaitau, e mafai ona e faaaogaina le vaega faasolo o loo i le pito i lalo o le lau e aveese ai se upu seia na o le mataitusi muamua o upu taitasi o loo totoe.

Alema 42, Vaega 1

Faamoemoega o le lesona: O lenei lesona ua faamoemoe e fesoasoani ai i tagata aoga ia malamalama lelei atili i le natura o le Tama Faalelagi o se tagata e faamasinotonu ma alofa mutimutivale.

Sauniuniga a le tagata aoga: Mafaufau e valaaulia tagata aoga e fai se talanoaga ma se tagata o le aiga po o se uo e uiga i nisi o manatu eseese o loo i ai i tagata e faatatau i uiga faaalia o le Atua.
Vitiō: “Saoloto e Faavavau, e Galue mo i Latou Lava” (14:51; matamata mai le faailo taimi 5:40 i le 6:50)

Alema 42, Vaega 2

Faamoemoega o le lesona: O lenei lesona e mafai ona fesoasoani ai i tagata aoga ia malamalama i le ala e mafai ai e le Togiola a Iesu Keriso ona faatagaina i latou e maua le alofa mutimutivale ua folafola mai i le fuafuaga a le Tama Faalelagi.

Sauniuniga a le tagata aoga: Valaaulia tagata aoga e sue se faataitaiga i tusitusiga paia o se tagata po o se vaega o tagata o ē na faaalia le salamo faamaoni.
Aitema e faaali atu: O se atatusi o fua [faatautau]
Fautuaga faafaiaoga faavitiō: Mafaufau e faaali atu le ata o fua ma faaigoa i le taimi o le aoaoga. E mafai ona e faaaogaina le vaega o le “laupapa paepae” pe fatu se faaaliga e faaali mai ai fua ona faaopoopo lea o faailoga ia taitasi i le taimi.