“Atamai i Aoaoga Faavae: Alema 41:10—‘E Le’i Avea Lava le Amioleaga ma Fiafia,’” Tusi Lesona a le Faiaoga o le Tusi a Mamona (2024)

“Atamai i Aoaoga Faavae: Alema 41:10,” Tusi Lesona a le Faiaoga o le Tusi a Mamona

Atamai i Aoaoga Faavae: Alema 41:10

“E Le’i Avea Lava Le Amioleaga Ma Fiafia”

I le Alema 41:10, na e aoao ai e faapea “e le’i avea lava le amioleaga ma fiafia.” O lenei lesona e mafai ona fesoasoani ia te oe e tauloto ai mau faasino o le atamai i aoaoga faavae ma le fasifuaitau autu o le mau mo le Alema 41:10, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga masani o le olaga.

Fesoasoani i tagata aoao ia avea ma tagata auai toaaga. E toaaga tagata aoga pe a punoua’i o latou mafaufau ma loto i le aoaoina o le talalelei. O nisi o auala e valaaulia ai le auai toaaga e aofia ai le fesoasoani i tagata aoga ia iloa le alagatatau i upumoni o le talalelei; uuna’ia i latou e fai ni fesili ma saili tali; ma valaaulia i latou e faasoa mai o latou malamalamaaga, aafiaga, ma lagona ma ia faataitai tomai mo le suesueina o tusitusiga paia ma faaalu se taimi e mafaufau loloto ai ma tatalo.

Sauniuniga a le tagata aoga: Valaaulia tagata aoga e tauloto le Alema 41:10.

Gaoioiga e Mafai Ona Aoao Ai

O lenei lesona i fuaitau o le atamai i aoaoga faavae ua mamanuina ia aoaoina pe a uma le lesona o le “Alema 41,” o le lesona faatatau lea mo le fuaitau o le atamai i aoaoga faavae o le Alema 34:9–10. Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.

Tauloto ma faamatala

Mafaufau e uunaia tagata aoga e tauloto le tele latou te mafaia ai o le fuaitau o le atamai i aoaoga faavae.

Faaaoga gaoioiga nei po o se isi metotia aoga e fesoasoani ai i tagata aoga e tauloto le mau faasino ma le fasifuaitau autu o le mau mo le Alema 41:10 ma faamalamalama aoaoga faavae o loo aoao mai i lenei fuaitau.

Vaevae tagata aoga i ni paga. Fai atu i le tagata aoga muamua e fai leotele le upu muamua: “amioleaga.” Tuu atu i le tagata lona lua e fai atu leotele le upu muamua ma le [fasifuaitau] lona lua: “e le’i avea lava le amioleaga.” Faaauau le faaopoopoina o se upu i taimi taitasi ma mulimuli ane le mau faasino ina ia mafai e le tagata aoga mulimuli ona fai atu le fasifuaitau atoa ma le mau faasino: “E lei avea lava le amioleaga ma fiafia (Alema 41:10).”

Valaaulia tagata aoga e toe fai faatele lenei faagasologa, ma fesuia’i tagata aoga e faia muamua i taimi taitasi.

Mafaufau i se tulaga o le a fesoasoani ai mo se tasi le iloaina o le aoaoga faavae o loo aoao mai i le Alema 41:10. Ona faamatala lea pe mafai faapefea ona fesoasoani le aoaoga faavae i lea tulaga.

Mafaufau e valaaulia tagata aoga e fetalia’i le tasi ma le isi e ala i le faasoa atu i tagata o le latou vasega le tulaga sa latou mafaufau i ai. O le taimi lava e faasoa atu ai le tulaga, e mafai e le tagata o le vasega ona faamatala mai pe mafai faapefea ona fesoasoani upumoni o loo i le Alema 41:10.

Faataitai le faaaogaina

Vaevae le vasega i ni vaega taitoatolu. Fai atu i tagata aoga taitasi e filifili se mataupu faavae ese o le mauaina o le malamalama faaleagaga ma faitau ia parakalafa talafeagai mo lana mataupu faavae i le Pepa Autu o le Atamai i Aoaoga Faavae (2022). A uma ona faia e tagata aoga, valaaulia i latou e faamalamalama atu le mataupu faavae i le latou vaega. O le galuega faafetaui lenei e mafai ona fesoasoani i tagata aoga e manatua ai mea sa latou aoaoina. O tali i le galuega faafetaui o le (1) E, F; (2) I, U; ma le (3) A, O.

Toeiloilo mataupu faavae taitasi nei e tolu o le mauaina o le malamalama faaleagaga i le Pepa Autu o le Atamai i Aoaoga Faavae (2022). Ona faafetaui lea o faamatalaga A–F i le mataupu faavae talafeagai. O mataupu faavae taitasi uma o loo i ai ni faamatalaga se lua e fesootai i ai.

“O le Au Peresitene Sili ma le Korama a Aposetolo e Toasefululua—o perofeta a le Alii i le lalolagi i aso nei—o punaoa taua ia o le upumoni.”
“A o tatou saili e atiina a’e lo tatou malamalama ma foia popolega, e taua lo tatou faalagolago i le molimau ua uma ona tatou maua e uiga ia Iesu Keriso.”
“Tatou te mafaufau i [fesili] i le faatatauga o le fuafuaga o le faaolataga ma aoaoga a le Faaola.”
“O le aoaoina ia iloa ma aloese mai punaoa e lē faatuatuaina e mafai ona puipuia ai i tatou mai faamatalaga sesē ma mai ia i latou o e saili e lepeti le faatuatua.”
“Tatou te saili le fesoasoani a le Agaga Paia ina ia vaai ai i mea e pei ona silasila i ai le Alii.”
“A o faaauau ona tatou saili mo ni tali, e tatau ona tatou ola e ala i le faatuatua—ma talitonu o le a i’u lava ina tatou maua tali tatou te sailia.”

Afai e tuu tagata aoga i ni vaega e iloilo ai mataupu faavae o le mauaina o le malamalama faaleagaga, e ono fesoasoani le tuuina ai pea o i latou i vaega.

Faaali atu le tulaga faataitai lenei ina ia mafai ona faasino i ai tagata aoga a o latou galulue faatasi i ai.

O Kalosi, o se tagata o le Ekalesia, o loo tauivi e iloaina le taua o le tausia o poloaiga a le Atua. Na ia fai atu talu ai nei ia te oe, “Ou te iloa le toatele o tagata o ē solia poloaiga ma e foliga mai o loo maoa’e o latou olaga. E mafai faapefea ona e fai mai e tatau ona e tausia poloaiga ina ia maua ai le fiafia?” E mafai ona e vaaia le faamaoni o le fesili a Kalosi ae e te lagona le manaomia o sina taimi e tuufaatasi ai ou manatu e tali atu ai. Ua oulua malilie e talanoa atili e uiga i lana fesili i le aso e sosoo ai.

Faaaoga mea ua e aoaoina ma lagonaina a o suesueina le Alema 41:10 ma mataupu faavae o le mauaina o le malamalama faaleagaga e saunia ai e talanoaina le fesili a Kalosi.

Saili le malamalama atili e ala i punavai paia ua filifilia

O tusitusiga paia o ni punavai paia ua filifilia e mafai ona fesoasoani ia i tatou e tali ai a tatou fesili. Faitau le Alema 41:10 ma su’e se tasi pe sili atu o fuaitau o le atamai i aoaoga faavae lea e mafai ona fesoasoani ia te oe e tali atu ai.

E mafai e tagata aoga ona galulue i a latou vaega e sue ma talanoaina fuaitau faaopoopo o le atamai i aoaoga faavae lea e mafai ona fesoasoani ia Kalosi. O nisi fuaitau aoga e aofia ai le 2 Nifae 2:25, 27 ma le Mosaea 2:41.
Mafaufau e uiga i nisi o punavai o le a e valaaulia Kalosi e toeiloilo i ai mo nisi faamatalaga. E mafai foi ona e faamatala atu le mafuaaga e faatuatuaina ai se punavai tau i mataupu faaleagaga.

Iloilo manatu faavae po o fesili faatasi ma se vaaiga e faavavau

E mafai e tagata aoga i vaega ona tali taitoatasi i se tasi o fesili nei na o i latou lava, ona faasoa atu lea o a latou tali i le latou vaega.

Fesoasoani i tagata aoga e faailoa mai ni manatu faivavale atonu o loo i ai ia Kalosi. Afai e manaomia e tagata aoga se fesoasoani, mafaufau e faasoa atu se tasi pe sili atu o mea nei: Atonu e manatu Kalosi o poloaiga e faasāsā pe faatapulaa ai lona gafatia e filifili ai. Atonu e manatu sesē o ia o le fiafia e mafai ona maua i mea faafiafia faaletino.

O fesili nei e mafai ona fesoasoani ia te oe e faailoa ai manatu faivavale ua talitonu i ai Kalosi:

O a ni ona manatu faivavale atonu o i ai e uiga i poloaiga po o le fiafia?
O a aoaoga o le talalelei e fesootai i ai pe tuuina mai ai ni tali i lana fesili?
O le a se mea e te manatu e manaomia ona iloa e Kalosi e uiga i le Tama Faalelagi, Lana fuafuaga, ma le auala Na te taulimaina ai Lana fanau?

Faatino i le faatuatua

E mafai ona valaaulia tagata aoga i vaega e galulue na o i latou e faailoa mai poloaiga, ona o mai faatasi lea e faasoa mai a latou faataitaiga. Ona mafai lea ona latou galulue faatasi e ofo atu ni fautuaga i le ala e mafai ai e Kalosi ona faatino i le faatuatua a le o le sailia o se malamalama sili atu po o le faia o se fuafuaga e mulimuli i poloaiga.

E mafai e Kalosi ona faatino i le faatuatua e ala i le saili ia malamalama atili i poloaiga a le Tama Faalelagi. O le filifili ai e tausi poloaiga a o ia sailia se malamalama sili atu e uiga i lo latou taua o le faatinoina foi lea i le faatuatua. Filifili ia lē itiiti ifo ma le lua ni poloaiga ma faailoa mai pe mafai faapefea e le tausiaina o nā poloaiga ona fesoasoani ia Kalosi ia maua le fiafia pe faapefea foi e le solia o i latou ona taitai atu ai i le faanoanoa. E mafai foi ona e faasoa atu pe faapefea e le tausia o nei poloaiga ona aumaia ai ia te oe le fiafia.

Valaaulia tagata aoga e faasoa mai mea na latou saunia. Afai e i ai se taimi, mafaufau e valaaulia le vasega e mafaufau i ni auala eseese e ono tali mai ai Kalosi. Ona valaaulia lea o tagata aoga e toe foi i a latou vaega e fetuunai a latou fuafuaga. E mafai e tagata aoga ona faia se tala faatino i luma o le vasega pe i a latou vaega. E mafai foi ona latou tesi atu i le tasi ma le isi e avea o se tala faatino.

Iloiloga o le atamai i aoaoga faavae

O le iloiloga lenei e mafai ona faia i se lesona i le lumanai. Fai atu i tagata aoga pe mafai ona latou manatua le fasifuaitau autu o le mau mo le Alema 41:10. Pe a manaomia, faamanatu atu ia i latou le gaoioiga o le taulotoina sa latou faamaeaina i lenei lesona. Valaaulia tagata aoga e toe fai le mau faasino ma le fasifuaitau autu mo ni nai taimi seia oo ina latou taulotoina.