Alema 41

E Toefuatai e Iesu Keriso Mea Uma

Ina ua uma ona aoao atu Korianetona e uiga i le matautia o ana agasala, sa galue Alema e faasa’o aoaoga sesē. Sa ia aoao atu ia Korianetona upumoni taua e fesoasoani ai ia te ia ia malamalama i le fuafuaga o le toefuataiga a le Tama Faalelagi ma fesoasoani ia te ia ia salamo. O lenei lesona o le a fesoasoani ia te oe e iloa ai e lē mafai lava e le amioleaga ona taitai atu i le fiafia.

Aoao atu tusitusiga paia i auala e fausia ai le faatuatua ia Iesu Keriso. O se tasi o faamoemoega mo tusitusiga paia o le fesoasoani lea ia i tatou ia faalatalata atili atu i le Tama Faalelagi ma Iesu Keriso (tagai 1 Nifae 6:4). Faaalu se taimi e fesoasoani ai i tagata aoga ia iloa pe na faapefea ona faamanuiaina tagata taitoatasi o loo i tusitusiga paia i le mana, alofa mutimutivale, ma le alofa o le Atua. Uunaia tagata aoga ia latou iloa faamanuiaga faapena i o latou lava olaga a o latou faatinoina lo latou faatuatua ia Iesu Keriso.

Sauniuniga a le tagata aoga: Valaaulia tagata aoga e mafaufau pe na faapefea e le usiusitai i poloaiga ona aumaia ia i latou le fiafia ma fesoasoani ia i latou ia lagona le saunia e feiloai ma le Faaola ma le Tama Faalelagi pe a mavae lenei olaga.

Gaoioiga e Ono Mafai Ona Aoao Ai

Talitonuga e uiga i le olaga pe a mavae le oti

O mea nei e mafai ona fesoasoani i tagata aoga e mafaufau ai e uiga i taunuuga e faavavau o a latou filifiliga. Mafaufau e faatali pe a uma faamatalaga taitasi ina ia mafai ai e tagata aoga ona tali mai.

Mafaufau pe faapefea ona faatosinaina au amioga pe afai e te talitonu i soo se tasi o faamatalaga sesē nei:

E leai se olaga pe a mavae le oti.

A mavae ona tatou feoti, o le a faaeaina i tatou e tusa lava po o ā a tatou galuega i le lalolagi.

• Aisea e taua ai le mauaina o se malamalamaaga sa’o o le mea o le a tupu ia i tatou pe a mavae ona tatou feoti?

• O le a se mea ua e iloa e uiga i le olaga pe a mavae le oti lea e tosina ai au faatinoga iinei ma le taimi nei?

O le uiga o le toefuataiga

Manatua sa aoaoina e Alema lona atalii o Korianetona, o lē sa faia ni agasala matuia (tagai Alema 39), ma sa i ai ni ana fesili e uiga i le talalelei. I le Alema 41 ua tatou aoao ai sa lē mautonu Korianetona i aoaoga a tagata o e na sē ese mai le talalelei a Iesu Keriso.

Faitau le Alema 41:1, ma vaavaai mo mea sa le’i malamalama i ai Korianetona. (I aoaoga a Alema, o le upu toefuataiga e faasino i se mea na toe aumaia pe toe tuu i se tulaga sa i ai muamua. Atonu foi e fesoasoani le iloa o le faauigasesē o tusitusiga paia o le mimilo, faapi’o, pe suia o latou uiga.)

• O le a le mea sa le’i malamalama i ai Korianetona?

Ina ia fesoasoani ia Korianetona ia salamo, sa aoao atu e Alema ia te ia aoaoga faavae moni. Sa ia iloa “o mataupu autu moni, ua malamalama i ai, e suia ai uiga ma amioga” (Boyd K. Packer, “Aua le Fefe,” Liahona, Me 2004, 79). O le malamalama ai i le aoaoga faavae o le toefuataiga e fesoasoani tatou te malamalama ai pe aisea e taua tele ai filifiliga tatou te faia i lenei olaga.

Mafaufau e faitau faatasi o se vasega ia fuaiupu 2–9 ma faatali vāvā ia fesoasoani ai i tagata aoga ia malamalama i mea sa latou faitauina. A uma ona faitau, atonu e fesoasoani le iloilo o mea ua malamalama ai tagata aoga e uiga i le toefuataiga lea na faasino i ai Alema. Mafaufau e tusi le upu toefuataiga i luga o le laupapa ma valaaulia le vasega e fatu ma faaleleia se faauigaga a o suesueina lenei lesona.

Faitau le Alema 41:2–9 e vaai ai i mea na aoao atu e Alema e talanoaina ai le popolega o Korianetona.

• O le a le mea o le a toefuatai i ai i tatou pe a mavae ona tatou feoti?

• E pei ona ta’ua e Alema, e faapefea ona mafai lenei toefuataiga?

• E ono mafai faapefea e lenei malamalama o le toefuataiga ona uunaia se tasi e pei o Korianetona e toe foi i le ala o feagaiga?

“E le’i avea lava le amioleaga ma fiafia.”

Faitau le Alema 41:10, ma vaavaai mo mea na aoao atu e Alema e uiga i le toefuataiga, amioleaga, ma le fiafia.

• O le a le malamalamaaga sesē na faasa’o e Alema mo Korianetona?

Mai le Alema 41:10, ua tatou aoao ai e le’i avea lava le amioleaga ma fiafia.

• A o e mafaufau i aoaoga a Alema e uiga i le tulafono o le toefuataiga, aisea e te manatu ai e moni e faapea “e le’i avea lava le amioleaga ma fiafia”?

Atonu e fesoasoani le ta’u atu faapea o nisi tagata e manatu e mafai ona latou toe foi atu e mau faatasi ma le Atua e aunoa ma le tauaveina o le tiutetauave patino o le tali atu mo ā latou amioga. Atonu latou te faapea mai o ā latou filifiliga agasala e faaosofiafia. O nisi taimi o i latou e filifili le agasala atonu e foliga mai e fiafia.

O le malamalama ai i le natura o le Atua

O le fuafuaga o le toefuataiga a le Atua e sili atu nai lo na o se fuafuaga mo i tatou e toe ola ai. O se fuafuaga e fesoasoani ia i tatou ia avea e faapei o Ia ma ia maua Lona fiafia.

Faitau le Alema 41:11, ma vaavaai pe aisea e lē mafai ai ona fiafia moni pe a faia filifiliga sesē. Atonu e fesoasoani le iloa o le “au oona” (fuaiupu 11) o lona uiga o le oo i le faanoanoa tele po o le tiga ogaoga faalelagona ona o se taunuuga o le agasala.

• O a ni eseesega ua e vaaia i le va o le fiafia ua ofoina mai e le Atua ma le fiafia a le lalolagi?

• O a ni manatu sesē e te vaai i ai o faalauiloaina lea e lē aumaia ai le fiafia, e tusa lava pe taufaaosooso?

Na faamalamalama mai e Elder Marcus B. Nash o le Fitugafulu le sootaga i le va o le natura o le Atua ma le fiafia:

Ia maitau e faapea o le aunoa ai ma le Atua i le lalolagi—i nisi upu, o le musuā e ola i Lana talalelei ma o lea ua leai ai se mafutaga ma le Agaga—o le i ai lea i se tulaga e ese mai nai lo le natura o le fiafia. O le talalelei a Iesu Keriso, o le mea moni, o le—ia mātau e segila le upu lenei, o lona uiga e na o le pau lava lea o le—“ala sili o le fiafia” (Alema 42:8). Afai e te filifili se isi lava ala o le olaga, po o le taumafai e ola na o ni vaega o le talalelei lea e foliga mai e faigofie, o se filifiliga o le a matua’i faasesēina ai lava oe, mai le atoatoaga o le olioli ma le fiafia maoae lea na fuafuaina i ai oe e lou Tama oi le Lagi ma Lona Alo. (Marcus B. Nash, “O Le Fuafuaga Sili o le Fiafia,” Liahona, Nov. 2006, 49)

Fesoasoani i tagata aoga ia malamalama o le natura o le Tama Faalelagi o le fiafia ma e mafai ona tatou maua le fiafia moni a o tatou taumafai e avea e faapei o Ia.

O se tasi auala e aoao atu ai lenei mea o le tusi lea o upu Fiafia ma le Faanoanoa i luga o le laupapa. Valaaulia tagata aoga e tusi uiga o le Tama Faalelagi i lalo o le upu Fiafia ma faamatala pe aisea e taitai atu ai nei uiga i le fiafia. Mo se faataitaiga, e mafai ona e talanoaina pe faapefea e le paia sili atu, onosa’i, po o le filiga ona taitai atu i le fiafia sili atu. Ona mafai lea e tagata aoga ona tusi faatinoga ma uiga ia e taitai atu ai i le faanoanoa ma faamatala pe faapefea ona faafeagai i latou ma uiga o le Atua.

Ina ia fesoasoani ia te oe ia iloa le ala e avea ai le natura o le Atua ma fiafia, fai se lisi o nisi o Ona uiga po o uiga auaumamā. A uma loa ona e faia se lisi, mafaufau pe faapefea e nei uiga ona aumaia le fiafia mo le Tama Faalelagi ma isi. Mo se faataitaiga, e alofa mutimutivale le Atua. Ona e alofa mutimutivale le Atua, e mafai ona Ia maua le olioli i agaga o ē salamo ma faasafua atu le olioli o le faamagaloga i isi (tagai Mataupu Faavae ma Feagaiga 18:13). Filifili se tasi pe sili atu foi o se uiga po o se poloaiga a le Atua ma faamatala pe faapefea e le ola ai i lena uiga po o le tausia o lena poloaiga ona aumaia le fiafia.

O le toefuataiina i le lelei

Na manatu Korianetoa e mafai ona ia ola i se olaga amioleaga ma toetu mai pea i le mamalu. E tusa ai ma le tulafono a le Atua, e lē mafai ona tupu lenei mea (tagai Kalatia 6:7–8). Sa faasa’o e Alema ia Korianetona ma valaaulia o ia e amata ona faia laasaga e toe foi atu ai i le Atua ma i’u ai i le fiafia. Faitau le Alema 41:12–15, ma vaavaai pe na faapefea ona uunaia e Alema ia Korianetona e ola ina ia mafai ona toefuatai o ia i le lelei ma le fiafia.

• Mai mea na e faitauina, o le a se mea e mafai e se tagata ona “auina atu” pe afai latou te mananao i le fiafia sili atu e “toe faafoi mai ia te [i latou]”? (Alema 41:15).

• O anafea na e maua ai le fiafia moni mai le ola ai i le talalelei a Iesu Keriso?

E mafai ona fesoasoani mea nei i tagata aoga e faatino ai uunaiga na latou maua.

Mafaufau i mea ua e aoaoina i le Alema 41 ma lou manao ia fiafia. O fesili nei e mafai ona fesoasoani ia te oe e faia ai se fuafuaga e maua ai le fiafia sili atu:

• O le a se mea e tasi e mafai ona ou amata faia e mafai ona fesoasoani ia te a’u ia fiafia ma toefuatai ai i le lelei?

• O le a se mea e tasi e mafai ona ou taofia le faia lea e mafai ona fesoasoani ia te a’u ia ou fiafia ma toefuatai ai i le lelei?

Valaaulia le Agaga Paia e taitaia ou mafaufauga ma lagona. Mafaufau e tusifaamaumau ou lagona i lau api talaaga po o tusitusiga paia lea e mafai ona e iloiloina ai. Fai se fuafuaga e faatino, e aofia ai le taimi o le a e amata ai ma le auala o le a e fuaina ai lou alualu i luma.

Manatu ma Talaaga o Faamatalaga

O le a le mea o le a toefuatai mai ia i tatou i le isi olaga?

Sa aoao mai Peresitene Dallin H. Oaks o le Au Peresitene Sili:

I le avea ai ma se isi vaega o le “fuafuaga o le toefuataiga” a le Atua (Alema 41:2), o le a toefuatai mai e le Toetutū “mea uma … i o latou tino e tatau ai ma atoatoa” (Alema 40:23). E aofia ai i lenei mea le faaatoatoaina o ō tatou lē atoatoa ma faaletonu faaletino na maua i le olaga faitino, e aofia ai i le fanau mai pe mai ni manu’aga po o faama’i. (Dallin H. Oaks, “Faamamina e le Salamo,” Liahona, Me 2019, 94)

E mafai faapefea e le salamo ona saunia a’u ia toefuataiina i le lelei?

Na saunoa mai Peresitene Dallin H. Oaks o le Au Peresitene Sili:

Pe faaatoatoaina e lenei toefuataiga i tatou mai i o tatou manaoga uma lē paia ma lē mafaatoilaloina po o vaisu? E lē mafai lena mea. Ua tatou iloa mai faaaliga o aso nei o le a faamasinoina i tatou i o tatou manaoga faapea ai foi ma a tatou amioga (tagai Alema 41:5; Mataupu Faavae ma Feagaiga 137:9) ma e oo lava i o tatou mafaufauga o le a ta’usalaina ai i tatou (tagai Alema 12:14). E lē tatau ona tatou “faatuai le aso o lo [tatou] salamo” seia oo i le oti, sa aoao mai ai Amoleka (Alema 34:33), ona o le agaga lava e tasi na umia o tatou tino i lenei olaga—pe e ā le Alii pe ōu le tiapolo—“o le a i ai le mana e umia ai o [tatou] tino i lena lalolagi e faavavau” (Alema 34:34). Ua i ai i lo tatou Faaola le mana ma ua tu sauni e faamamā i tatou mai le leaga. O le taimi lenei e saili atu ai i Lana fesoasoani e salamo ai i o tatou manaoga ma mafaufauga leaga pe lē talafeagai ina ia faamamāina ai ma saunia e tutū i luma o le Atua i le Faamasinoga Mulimuli. (Dallin H. Oaks, “Faamamaina e le Salamo,” Liahona, Me 2019, 94)

Ae faapefea pe afai o loo o’u tausia poloaiga ae ou te lē lagonaina le fiafia?

Na faamalamalama mai e Elder Quentin L. Cook o le Korama a Aposetolo e Toasefululua:

Ua ou iloa e faapea, e ui lava i le fiafia maoae o loo i ai i le fuafuaga paia a le Atua, o nisi taimi e mafai ona lagona lona mamao ese ma ua motusia mai ma o tatou tulaga i le taimi nei. E ono lagona ua lē oo i ai lo tatou malosi o ni soo o loo tauivi pea. Mai la tatou vaaiga e gata mai, e mafai ona vaaia faaosoosoga ma faataumaoi o le taimi nei e foliga mananaia mai. O taui o le teenaina o nā faaosoosoga, i se isi itu, e mafai ona manatu e mamao ma e lē ono mafai ona maua. Ae o se malamalama moni i le fuafuaga a le Tama ua faaalia mai ai o loo maua ia taui o le amiotonu i le taimi nei lava. O le amioleaga, e pei o le amio lē mamā, e lē o se vaega lea o le tali. (Quentin L. Cook, “To’a le Tai ma Sitaili Faa-Bristol: Ia Agavaa mo le Malumalu—i Taimi Lelei ma Taimi Leaga,” Liahona, Nov. 2015, 40)

Gaoioiga Faaopoopo e Aoao Ai

Mafaufau loloto ai i manaoga o i ai nei

A o faitau e tagata aoga le Alema 41:5, e ono mafai ona latou faailoa mai le taua o ō latou manaoga i le mauaina o se toefuataiga lelei. Afai e manaomia ona malamalama atili tagata aoga e uiga i manaoga, e mafai ona latou suesue i tusitusiga paia mo isi fuaiupu e uiga i manaoga (mo se faataitaiga, Alema 29:5; Mataupu Faavae ma Feagaiga 11:8, 14, 17; po o le Mataupu Faavae ma Feagaiga 137:9). Ona mafai lea ona e valaaulia i latou e mafaufau i o latou manaoga o i ai nei ma pe faapefea ona latou faaogatusa ma mea o finagalo i ai le Atua.

Faailoaina o talitonuga sesē e uiga i le toefuataiga pe a mavae lenei olaga

Na aoao atu e Alema ia Korianetona e faapea, o nisi sa latou faauigasesēina tusitusiga paia e faatatau i le toefuataiga (tagai Alema 41:1). I le Alema 41:10 sa ia faailoa mai ai se talitonuga sesē se tasi—e mafai ona toefuatai mai se tagata mai le agasala i le fiafia. A uma ona suesue tagata aoga e uiga i le natura o le Atua, mafaufau e faasoa atu faataitaiga nei ma valaaulia tagata aoga e faaaoga mea ua latou aoaoina e faasa’o ai le lē malamalama po o le aoaoga sesē:

• “Ou te iloa o le mea o loo o’u faia e lē tonu, ae e mafai lava ona ou salamo e lē aunoa ma o le a lelei mea uma.”

• “E alofa le Atua i Ana fanau uma, o lea na te lē auina atu ai se tasi o i tatou i seoli.”

Lesona faatino: O le aupega e togi ae toe foi mai (Boomerang)

Faaali atu i tagata aoga se boomerang pe tusi se ata i luga o le laupapa. Fai atu i tagata aoga le mea e fai e le boomerang pe a sa’o le togiina. (E toe foi mai i le nofoaga lea na togi atu ai.)

Valaaulia tagata aoga e faamatala mai pe faapefea ona faapei se boomerang o le aoaoga faavae o le toefuataiga o loo faamatala mai i le Alema 41:12–15.