Alema 40

O Le Lalolagi o Agaga ma le Toetu

Ina ua uma ona valaaulia o ia e lona tama e salamo, sa i ai ni fesili a Korianetona e uiga i le fuafuaga a le Atua, e aofia ai le mea e tupu ia i tatou pe a mavae ona tatou feoti. O lona tama, o Alema, na taliina ana fesili ma molimau atu i le matafaioi tutotonu a Iesu Keriso i le fuafuaga a le Tama Faalelagi. O lenei lesona e mafai ona fesoasoani ia te oe e faalolotoina ai lou agaga faafetai mo mea na faia e le Faaola mo oe ma o le a tuuina atu ai ia te oe se avanoa e faamatala ai le mea e tupu pe a mavae ona tatou feoti.

Fesoasoani i tagata aoga e taulai atu ia Iesu Keriso. E ono mafai e faiaoga ona faaaluina ma le lē mafaufauina le telē o le taimi e faamatalaina ai faamatalaga auiliili o loo siomia ai upumoni o le talalelei. E ono mafai e lenei faiga ona iu ai i le misia o avanoa e fesoasoani ai i tagata aoao ia iloa ma alolofa atoatoa atili i le Faaola. Faaalu se taimi e aoao atu ai ma molimau atu i le mana, alofa, ma le alofa mutimutivale o Iesu Keriso ma Lana matafaioi tutotonu i le fuafuaga o le faaolataga a le Tama Faalelagi.

Sauniuniga a le tagata aoga: Valaaulia tagata aoga e mafaufau loloto i ni ā latou fesili atonu o i ai e uiga i le mea e tupu pe a mavae ona tatou feoti ma ō mai saunia e faasoa atu.

Gaoioiga e Ono Mafai Ona Aoao Ai

O fesili

O le tala lenei mai le olaga o Sister Aburto e mafai ona fesoasoani i tagata aoga e saunia ai e suesue le Alema 40. I se isi itu, e mafai e tagata aoga ona lisi i luga o le laupapa nisi o a latou fesili e uiga i le olaga pe a mavae le oti.

Sa faasoa mai e Sister Reyna I. Aburto, o se fesoasoani i le Au Peresitene Aoao o le Aualofa, se aafiaga patino e faapupula ai ni a tatou fesili atonu o i ai e uiga i le mea e tupu pe a mavae ona tatou feoti. Matamata i le vitiō “E Leai se Manumalo o le Tuugamau,” o loo maua i le ChurchofJesusChrist.org, mai le faailo taimi 4:21 i le 5:13, pe faitau le faamatalaga lenei:

Ina ua iva o’u tausaga, sa maliu lo’u tuagane matua i le taimi o se mafuie matautia tele. Ona sa faafuasei ona tupu, sa umi se taimi mo a’u ou te malamalama ai i le mea na tupu. Sa nutimomoia lo’u loto i le faanoanoa, ma ou te fesili ifo ia te a’u lava, “O le a le mea na tupu i lo’u tuagane? O fea o ia? O fea ua alu i ai o ia? Pe ou te toe vaai ea ia te ia?”

I le taimi lena, ou te le’i matua iloa e uiga i le fuafuaga o le faaolataga a le Atua, ma sa ia te a’u le manao ia iloa po o fea na tatou omai ai, po o le a le faamoemoega o le olaga, ma po o le a foi le mea e tupu ia i tatou pe a mavae ona tatou feoti. Pe lē o ia i tatou uma ea nā faanaunauga pe a maliu se tasi e pele ia i tatou ma pe a tatou feagai foi ma faigata i o tatou olaga? (Reyna I. Aburto, “E Leai se Manumalo o le Tuugamau,” Liahona, Me 2021, 86)

Sa i ai foi popolega o le atalii o Alema o Korianetona e uiga i le olaga pe a mavae le oti.

Faitau le Alema 40:1, ma vaavaai po o le a le mea na popole ai Korianetona.

• Aisea e te manatu ai atonu na popole o ia e uiga i lenei mea?

Manatua na solia e Korianetona poloaiga a le Atua, e aofia ai le tulafono o le legavia. Ona o ana filifiliga, atonu sa popole o ia i lona tulaga pe a mavae lenei olaga. Ina ia taulimaina popolega o Korianetona ma fesoasoani ia te ia ia salamo, sa aoao atu e Alema ia te ia aoaoga faavae. O le tali atu a Alema i popolega o Korianetona e mafai foi ona fesoasoani ai i se tasi e i ai ni fesili e pei ona sa i ai ia Sister Aburto.

Sa aoaoina mulimuli ane Sister Aburto e faifeautalai o ē sa fesoasoani ia te ia e maua ai tali i ana fesili. Mafaufau faapea o oe o se tasi o nā faifeautalai ma o loo e sauni e aoao o ia. Faaaoga punaoa nei e saunia ai se faamalamalamaga puupuu e fesoasoani e tali ai fesili a Sister Aburto.

Vaevae le vasega i ni paga e sauniuni ai e aoao atu e pei o i latou o ni faifeautalai. Tofi paga taitasi e suesue a lē o le lalolagi o agaga po o le toetu, ma tuu atu i paga taitasi le pepa e tufa atu e ō faatasi ai.

O se isi auala e saunia ai e pei o le a latou aoaoina Sister Aburto, e mafai e tagata aoga ona vaavaai mo tali i fesili a tagata o le vasega.

O Le Lalolagi o Agaga

Tusi Lesona a le Faiaoga o le Tusi a Mamona (2024)—“Alema 40: O Le Lalolagi o Agaga ma le Toetu”

Faitau le Alema 40:6–7, 11–14 e iloa ai mea na aoao atu e Alema ia Korianetona. Ona faaaoga lea o punaoa nei e fesoasoani ia te oe e saunia atili ai mea o le a e aoao atu.

• Mataupu Faavae ma Feagaiga 138:11–13, 18–22, 57

• O le Taiala i Tusitusiga Paia, “Parataiso,” scriptures.ChurchofJesusChrist.org

Sa aoao mai Peresitene Dallin H. Oaks o le Au Peresitene Sili:

Ua tatou iloa mai tusitusiga paia e faapea pe a oti o tatou tino e faaauau pea ona tatou ola o ni agaga i le lalolagi o agaga. Ua aoao mai foi tusitusiga paia e faapea ua vaevaeina lenei lalolagi o agaga ia i latou o ē na “amiotonu” pe na “faamaoni” i le taimi o le olaga ma i latou o ē na amioleaga. Ua faamatalaina mai foi le auala e aoao atu ai e nisi o agaga faatuatua le talalelei ia i latou o ē na amioleaga pe na fouvale (tagai i le 1 Peteru 3:19; Mataupu Faavae ma Feagaiga 138:19–20, 29, 32, 37). (Dallin H. Oaks, “Faalagolago i le Alii,” Liahona, Nov. 2019, 26)

Saunia pe o le a faapefea ona e faamalamalamaina tali i fesili nei:

• O le a le mea e tupu i o tatou agaga pe a tatou feoti?

• E faapeʻī le parataiso? E faape’ī le vaega o loo ta’ua ai e Alema le “pouliuli i fafo,” ae ua ta’ua foi o le falepuipui o agaga (1 Peteru 3:19) po o seoli (2 Nifae 9:12)?

• E mafai faapefea e le aoao e uiga i le parataiso ma le falepuipui ona faateleina lo tatou lotofaafetai mo le Faaola?

• E mafai faapefea e lo tatou malamalama i le lalolagi o agaga ona faamanuiaina i tatou i le taimi o lo tatou olaga faaletino?

Pe a aoao atu, ia mautinoa e faamanino atu e faapea, i le va o le oti ma le toetutū, o agaga o ē amiotonu e nonofo i le parataiso ae o agaga o ē amioleaga e nonofo i le falepuipui o agaga. Faasoa atu pe o faapefea e lou malamalama e uiga i lenei upu moni ona aafia ai filifiliga e te faia i lenei olaga.

© 2023 by Intellectual Reserve, Inc. Ua taofia aiā tatau uma.

Toetu

Tusi Lesona a le Faiaoga o le Tusi a Mamona (2024)—“Alema 40: O Le Lalolagi o Agaga ma le Toetu”

Faitau le Alema 40:2–5, 23–24 e iloa ai mea na aoao atu e Alema ia Korianetona. Ona faaaoga lea o punaoa nei e fesoasoani ia te oe e te saunia atili ai i mea o le a e aoao atu.

• Alema 11:42–45

• Taiala i Tusitusiga Paia, “Toetu,” scriptures.ChurchofJesusChrist.org

Sa aoao mai Peresitene Dallin H. Oaks o le Au Peresitene Sili:

Ua tatou faamanatuina le moni o le Toetu i lenei vaitau o le Eseta. Ua aumaia e lenei toetu le vaaiga ma le malosi e onosaia ai luitau o le olaga faaletino o loo feagai ma i tatou taitoatasi, ma i latou tatou te alolofa i ai, o mea e pei o tulaga lē atoatoa faaletino, faalemafaufau, pe faalelagona ia tatou te o mai ma i tatou ina ua fananau mai pe oo mai foi i le gasologa o le olaga faitino. Ona o le Toetu, ua tatou iloa ai o nei faaletonu faaletino ua na o se taimi lē tumau! (Dallin H. Oaks, “O Le Fuafuaga Sili,” Liahona, Me 2020, 94–95)

Saunia pe o le a faapefea ona e faamalamalamaina tali i fesili nei:

• O le a le toetu? O ai o le a toetutu?

• E tusa ai ma le Alema 40:2–3, o le a le mea ua mafai ai ona maua le Toetu?

• E mafai faapefea e lo tatou malamalama i le Toetu ona faamanuiaina i tatou i le taimi o ō tatou olaga faaletino?

Pe a aoao atu, ia mautinoa ua faamanino atu e faapea, ona ua toetu Iesu Keriso, o le a toetutu ai foi i tatou uma. Faasoa atu se mafuaaga se tasi e te faafetai ai mo le folafolaga o le toetu.

© 2023 by Intellectual Reserve, Inc. Ua taofia aiā tatau uma.

Mafaufau e faaaoga le vitiō o loo i lalo pe afai e manaomia e tagata aoga nisi fesoasoani e malamalama ai i le mea e tupu pe a mavae ona tatou feoti.

Atonu e te manao e matamata le vitiō “O Le a Le Mea e Tupu i o Tatou Tino ma Agaga pe a Mavea Ona Tatou Feoti?” (4:19), o loo maua i le ChurchofJesusChrist.org, ma vaavaai mo isi upumoni e mafai ona e faamatalaina a o e aoao atu.

A uma ona sauniuni tagata aoga, valaaulia i latou e aoao atu se paga o tagata aoga o ē na saunia se autu e ese. Mafaufau e tuuina atu le fesoasoani pe a manaomia a o latou aoao atu.

A uma ona aoao atu e tagata aoga a latou lesona, mafaufau e taitai se talanoaga puupuu ma le vasega e faaaoga ai nisi po o fesili uma nei.

• Aisea e taua ai ia te oe mea sa e aoaoina e uiga i le lalolagi o agaga ma le toetutū?

• E faapefea ona aafia ou lagona i le Tama Faalelagi ma Iesu Keriso i lenei malamalamaaga?

• O a nisi o fesili sa ia te oe na taliina i le asō?

• O a fesili e te manao e faaauau pea ona sailia o latou tali?

Faamanatu i tagata aoga e lē o ia i tatou tali uma ae e lē afaina le i ai o ni fesili e lei taliina. Valaaulia i latou e mulimuli i mataupu faavae o le mauaina o le malamalama faaleagaga a o latou saili mo tali.

Mafaufau e faasoa atu lau molimau i le meaalofa o le Toetu ma le filemu e mafai ona tatou maua i le lalolagi o agaga ona o le Togiola a Iesu Keriso.

Manatu ma Talaaga o Faamatalaga

Alema 40:16–20. O le a le Uluai Toetutū?

Na aoao mai e Elder Bruce R. McConkie (1915–85) o le Korama a Aposetolo e Toasefululua:

O i latou e o mai i le taeao o lenei toetutū e faia faapea i tino selesitila ma o le a mautofi i se mamalu selesitila; o i latou ia o faapolopolo o Keriso. O i latou o e o mai i le aoauli o lenei toetutū ua faapea ona faia i tino teresitila ma o le a fai ma tofi o lena malo; ua faamatalaina i latou o ni ā Keriso i lenei afio mai. O i latou uma o e ua toetutū mai ua maua ni tino selesitila; o le oo mai o tagata teresitila e lē amataina seia mavae le Afio Mai Faalua. (Mataupu Faavae ma Feagaiga 76:50–80; 88:95–99.) (Bruce R. McConkie, Doctrinal New Testament Commentary [1965], 1:196)

Alema 40:21–22. O le a le uiga o le “aumai e tutulai i luma o le Atua”?

Na aoao mai Elder D. Todd Christoffferson o le Korama a Aposetolo e Toasefululua:

E ala i Lana Togiola ma le Toetu, ua manumalo ai Iesu Keriso i vaega uma o le Pa’ū. O le oti faaletino o le a na o sina taimi lē tumau, ma e oo lava i le oti faaleagaga ua i ai sona mutaaga, auā o le a tatou toe foi uma i le afioaga o le Atua, mo na o sina taimi lē tumau, ina ia faamasinoina. E mafai ona tatou tuuina atu atoa lo tatou faatuatuaga ma le talitonuga i Lona mana ina ia faatoilaloina mea uma ma aumaia ia i tatou le ola e faavavau. (D. Todd Christofferson, “O Le Toetu o Iesu Keriso,” Liahona, Me 2014, 112)

Alema 40:23. O a foliga o se tino toetu?

Na aoao mai Elder Paul V. Johnson o le Fitugafulu:

O le toetu ua mafai ai ona toe tuufaatasia le agaga ma le tino o se tagata, ae i le taimi lea o lena tino o le a ola pea ma atoatoa—e lē oo i ai le tiga, mai, po o isi faafitauli [tagai Alema 11:43]. …

O i tatou taitoatasi e i ai ni tapulaa ma ni vaivaiga faaletino, faalemafaufau, ma faalelagona. O nei luitau, o nisi e foliga mai e lē mafai ona faatoilaloina i le taimi nei, ae mulimuli ane ona foiaina lea. E leai se tasi o nei faafitauli o le a mafatia ai i tatou pe a mavae le toetutū. (Paul V. Johnson, “Ma E Leai Foi Se Toe Oti,” Liahona, Me 2016, 121-22)

Gaoioiga Faaopoopo e Aoao Ai

O le faasologa o mea na tutupu

O le fesoasoani ai i tagata aoga ia iloa mea o le a feagai ma tagata uma pe a mavae ona tatou feoti e mafai ona fesoasoani ia i latou e maua ai se vaaiga e faavavau ma mafai ai ona aveesea se fefe e faatatau i le oti. Mafaufau e tusi le oti, lalolagi o agaga, toetu, ma le faamasinoga mulimuli i luga o fasi pepa ma tuu i luga o le laupapa i se faasologa faafefiloi. Valaaulia tagata aoga e faitau le Alema 40:6–7, 11–14, ma le 21–23, ma fai atu ia i latou e tuu mea na tutupu i luga o le laupapa i le faasologa tonu na tutupu ai. Mafaufau foi e talanoaina po o le a le uiga o mea na tutupu ma le matafaioi o loo i ai i le fuafuaga a le Tama Faalelagi.

Malamalama e salamo ai

O upu a Alema i le Alema 40:11–26 e mafai ona fesoasoani i tagata aoga e lagona ai le taua o le o mai i le Faaola ma salamo i a tatou agasala i lenei olaga. Mafaufau e tusi le Amiotonu (Salamo) ma le Amioleaga (Lē salamo) i le laupapa ma valaaulia tagata aoga e suesue le Alema 40:11-26 ma lisi i le laupapa upu po o fuaitau na faaaoga e Alema e faamatala ai le tulaga o nei vaega taitasi o tagata pe a mavae ona latou feoti. Ona valaaulia lea o tagata o le vasega e iloilo le fesili “E mafai faapefea e nei aoaoga ona musuia i tatou e salamo?”

(Atonu e fesoasoani i tagata aoga ia malamalama e faapea e ala i le Faaola, o loo i ai pea le faamoemoe mo ē e pele ia i latou ua maliliu a o lei salamo. Mafaufau e valaaulia tagata aoga e faitau ma talanoaina upumoni o loo maua i le 1 Peteru 3:18–20; 4:6 ma le Mataupu Faavae ma Feagaiga 138:29–37.)

Mauaina o le malamalama faaleagaga

Mafaufau e faaaoga le Alema 40 e fesoasoani ai i tagata aoga e toeiloilo mataupu faavae o le mauaina o le malamalamaaga faaleagaga. Amata i le fesoasoani i tagata aoga e faailoa mai le fesili a Alema i le Alema 40:1–3, 9, ona valaaulia lea o tagata aoga e vaavaai mo fuaiupu o loo faamatala ai le ala na faatino ai e Alema le faatuatua (Alema 40:5–6), iloilo lana fesili ma se vaaiga e faavavau (Alema 40:9–13, 23–26), ma vaavaai atu i punaoa mamana ua filifilia mo se malamalama sili atu (Alema 40:3).

Fesoasoani i tagata aoga e faaaoga mea na latou aoaoina e ala i le valaaulia o i latou e iloilo le fesili “E mafai faapefea ona e mulimuli i le faataitaiga a Alema o le faaaogaina o mataupu faavae o le mauaina o le malamalamaaga faaleagaga a o vaavaai mo tali i au fesili?”

Fesili o loo tali e Alema

Mafaufau e atofa atu i tagata aoga se seti o fuaiupu mai le Alema 40 ma valaaulia i latou e sailiili i na fuaiupu, ma vaavaai mo fesili na tali e Alema e uiga i le lalolagi o agaga ma le toetutū. Ona mafai lea e tagata aoga ona faasoa mai fesili ma tali na latou maua.