Alema 36–38

Vaaiga Aoao

I le Alema 36–39, na fautuaina ai e Alema ona atalii o Helamana, Sepulona, ma Korianetona. Sa ia toe faamatalaina lona aafiaga i le vaaia ai o se agelu, lagonaina o le mafatia i ana agasala, ma le mauaina o le laveaiga e ala ia Iesu Keriso. Sa ia aoao e faapea e masani ona faaaoga e le Alii mea laiti ma faatauvaa e faia ai mea tetele, e pei o le faatagaina o tusitusiga paia e faasino mai “le ala e tatau ona [tatou] ui ai” i o tatou olaga (Alema 37:40). Sa ia fautuaina ona atalii ia tausi i poloaiga a le Atua. Sa ia fautuaina ma le alofa lona atalii o Korianetona e lafoai ma salamo i ana agasala, e aofia ai le solia o le tulafono o le legavia.

Saunia e Aoao Atu

O nei faamatalaga e tuuina atu ai i faiaoga ni manatu o mea atonu e manaomia ona muai saunia mo lesona taitasi.

Alema 36

Faamoemoega o le lesona: O lenei lesona ua faamoemoe e fesoasoani i tagata aoga e liliu atu ia Iesu Keriso i le faatuatua ma lagonaina le olioli o Lana laveaiga.

Sauniuniga a le tagata aoga: Valaaulia tagata aoga e o mai saunia e faasoa mai se faataitaiga o se tasi na mauaina le filemu ia Keriso ina ua mavae ona puapuagatia mo se taimi. O le a se mea na fesoasoani i lenei tagata e maua ai le filemu?
Ata e faaali atu: O se ata o Alema le Itiiti ma le agelu
Fautuaga faafaiaoga faavitio: A o faataitai e tagata aoga le makaina o upu ma fasifuaitau i ni auala eseese, e mafai ona e valaaulia i latou o e faaaogaina tusitusiga paia faaeletonika e faasoa mai a latou lau e faaalia ai auala aoga ua latou maua e faailoga ai a latou tusitusiga paia.

Alema 37

Faamoemoega o le lesona: O lenei lesona ua faamoemoe e fesoasoani i tagata aoga e faatino i le faatuatua ia Iesu Keriso a o latou suesue i Lana afioga i tusitusiga paia.

Sauniuniga a le tagata aoga: Uunaia tagata aoga a o latou faia suesuega o tusitusiga paia i aso taitasi ina ia mafaufau i faamanuiaga na te aumaia i o latou olaga, aemaise lava pe faapefea ona fesoasoani ia i latou e o mai ai ia Keriso.
Ata e faaali mai: O ata o mea laiti ma faatauvaa, e pei o se pulumufulunifo, o se feau tusitusia, faamalositino, po o se faatinoga faigofie o le auaunaga; o se ata o Liae ma le Liahona
Vitio: “Ua Fautuaina e Alema Ona Atalii” (17:05; matamata mai le faailo taimi 3:15 i le 5:05); “Manatunatu i le Alofa o le Atua—O Le Uiga o Tusitusiga Paia ia te A’u” (3:27; matamata mai le faailo taimi 2:36 i le 3:27); “Liua Faifai Pea—O Le A Le Uiga o Tusitusiga Paia ia te A’u” (2:42)
Fautuaga faafaiaoga faavitio: Ina ia amata le lesona, mafaufau e faaali atu i tagata aoga se faataitaiga se tasi pe lua o mea laiti ma faatauvaa e faia ai se eseesega tele i o tatou olaga. Ona tuu atu lea i tagata aoga le 30 sekone e sue ai se isi faataitaiga i o latou aiga ma aumai e faaali mai ai le vasega.

Alema 37–38

Faamoemoega o le lesona: O lenei lesona e mafai ona fesoasoani i tagata aoga e aoao ai o le ola ai i poloaiga i le taimi nei o le a faamanuiaina ai i latou i o latou olaga atoa.

Sauniuniga a le tagata aoga: Valaaulia tagata aoga e faitau pe tauloto le Alema 37:35 ma o mai saunia i le vasega e faasoa mai pe aisea latou te manatu ai e taua le “aoao i [lo latou] talavou e tausi poloaiga a le Atua.”
Ata e faaali atu: O se ata o se laau laitiiti
Vitio: “Tutu i a Tatou Folafolaga ma Feagaiga” (14:39; matamata mai le faailo taimi 7:29 i le 8:35)
Fautuaga faafaiaoga faavitio: A tali mai tagata aoga i le fesili e uiga i le fautuaga sili ua latou maua mai se matua po o se taitai o le Ekalesia, mafaufau e valaaulia i latou e tuu i luga le fautuaga i le talanoaga. O lenei mea o le a mafai ai ona latou iloiloina manatu faaalia o le tasi ma le isi. Ona mafai lea ona e valaaulia i latou e faasoa mai po o ai na latou mauaina mai ai le fautuaga ma pe na faapefea ona faamanuiaina ai i latou.

Alema 39

Faamoemoega o le lesona: O lenei lesona e mafai ona fesoasoani i tagata aoga ia malamalama i le matuia o le agasala o feusuaiga ma le ala e tetee atu ai i le faaosoosoga o le solia o le tulafono o le legavia.

Sauniuniga a le tagata aoga: Valaaulia tagata aoga e mafaufau i mea ua latou iloa e uiga i le tulafono o le legavia, o a ni o latou lagona e uiga i ai, ma soo se fesili o ia i latou.
Vitio: “Ua Ou Filifili ia Mama” (4:19)
Fautuaga faafaiaoga faavitio: Tuu atu i tagata aoga e faaaoga le vaega o talanoaga e mafaufau ai i auala e mafai ai e le autalavou i aso nei ona faatino le loto pulea ma faatoilalo ai faaosoosoga. E mafai foi ona e mafaufau e faaaoga se polokalama feaveai e mafai ai e tagata aoga ona faasoa mai o latou manatu e aunoa ma le faailoaina o i latou lava.

Atamai i Aoaoga Faavae: Alema 39:9

Faamoemoega o le lesona: O lenei lesona e mafai ona fesoasoani i tagata aoga e tauloto ai le mau faasino o le atamai i aoaoga faavae ma fasifuaitau autu o le mau mo le Alema 39:9, ma faamatala le aoaoga faavae o lo o aoao i lenei fuaitau, ma faaaoga mataupu faavae o le mauaina o le malamalama faaleagaga i tulaga masani o le olaga.

Sauniuniga a le tagata aoga: Valaaulia tagata aoga e amata ona tauloto le fasifuaitau autu o le mau mo le Alema 39:9. E mafai foi ona e uunaia i latou e taumafai e tauloto le fuaiupu atoa.
Fautuaga faafaiaoga faavitio: Mo le gaoioiga faataitai o le faatinoga, mafaufau e faavasega tagata aoga i potu vaevae ina ia mafai ona latou talanoaina ai pe faapefea ona fesoasoani ia Ivan. Tuu fesili nei i le talanoaga: “Mata e faape’ī le iloiloina ai e Ivan o lona tulaga faatasi ai ma se vaaiga e faavavau? O a nisi o faataitaiga o punaoa mamana ua filifilia e mafai ona fesoasoani ia Ivan? O le a se mea e mafai ona fai e Ivan e faatino ai le faatuatua ma ‘aua [le] toe alu e tusa ma tuinanau o [ona] mata’ (Alema 39:9)?” Mafaufau e asiasi i potu vaevae taitasi pe a mafai. Pe a manaomia, mafaufau e tuu i luga i le talanoaga so o se fesili faaopoopo o loo lisiina i le lesona lea atonu e fesoasoani i tagata aoga.