“Alema 34:17–41: O Le Olaga Lenei o Le Taimi Lea e Saunia ai e Feiloai ma le Atua,” Tusi Lesona a le Faiaoga o le Tusi a Mamona (2024)
“Alema 34:17–41,” Tusi Lesona a le Faiaoga o le Tusi a Mamona
Alema 34:17–41
O Le Olaga Lenei o Le Taimi Lea e Saunia ai e Feiloai ma le Atua
Na e mafaufau ea pe faape’i le feiloai atu i le Tama Faalelagi pe a mavae lenei olaga? Sa faamanatu atu e Amoleka ia sa Sorama e faapea “o le olaga lenei o le taimi lea … e saunia ai e feiloai ma le Atua” (Alema 34:32) ma aioi atu ia te i latou ia aua nei faatuai le aso o lo latou salamo. O lenei lesona ua faamoemoe e fesoasoani ia te oe i au taumafaiga e saunia ai e feiloai ma le Atua.
Fesoasoani i tagata aoga ia iloa le ala e faasino atu ai e mataupu faavae o le talalelei i latou ia Iesu Keriso. Pe a aoao atu aoaoga faavae ma mataupu faavae o le talalelei, faafesootai atu nei upumoni i le Tama Faalelagi ma Iesu Keriso. Tuuina atu ni faataitaiga o le ala e mafai ai e le ola ai i mataupu faavae o le talalelei ona fesoasoani i tagata aoga ia maua le mana, alofa mutimutivale, ma le alofa tunoa o le Faaola. Uunaia i latou e faatino i le faatuatua ma filifili e ola i nei upumoni.
Sauniuniga a le tagata aoga: Valaaulia tagata aoga e faitau le Alema 34:32 ma mafaufau i ni auala e mafai ona latou mulimuli ai i le fautuaga o loo i le fuaiupu. E mafai ona latou tusia i lalo nisi o auala o loo latou sauniuni ai e toe foi atu i le afioaga o le Atua ma suiga e mafai ona latou faia o le a fesoasoani ia i latou e saunia lelei ai.
Gaoioiga e Ono Mafai Ona Aoao Ai
O le taua o sauniuniga
Mafaufau i se mea sa tatau ona e saunia ai i lou olaga, e pei o se suega, se faaaliga, po o se taaloga afeleti.
Mafaufau e valaaulia tagata aoga e talanoaina ma se paga po o se vaega toalaiti fesili nei.
-
O a nisi o fuafuaga faataatitia na e faaaogaina e fesoasoani ai ia te oe ia saunia?
-
O a nisi o mea na faia pe na faafaigata ai sauniuniga?
Manatua na talai atu Alema ma Amoleka i se vaega o sa Sorama o e na tutuliese mai o latou sunako ona o lo latou matitiva. O nei sa Sorama sa lei talitonu muamua ia Iesu Keriso (tagai Alema 31:16), o lea na apoapoai atu ai Alema ma Amoleka ia i latou e fai se avanoa i o latou loto mo se molimau i le Faaola ia tuputupu ae ai (tagai Alema 32:27–28; 34:4–6). A o aoaoina ai nei tagata, sa faasoa atu e Amoleka se mea e tatau ona tatou saunia uma i ai.
Faitau le Alema 34:32, ma vaavaai mo mea na aoao atu e Amoleka.
Atonu e te manao e tusi le faamatalaga faamatamatatetele lenei i luga o le laupapa. Uunaia tagata aoga e faailoga upu o lenei upumoni i le fuaiupu 32.
Mai aoaoga a Amoleka, ua tatou aoao ai o lenei olaga o le taimi lea mo i tatou e saunia ai e feiloai ma le Atua.
-
O a nisi o uiga ma amioga o le a e faamoemoe i ai mai se tasi o loo sauniuni e feiloai ma le Atua?
Tuu atu i tagata aoga se taimi e iloilo ai faaletagata lava ia e ala i le mafaufau i manatu nei. E le o faamoemoe e faasoa mai e tagata aoga o latou manatu.
Faaalu sina taimi e mafaufau loloto ai i ou lagona e uiga i le toe foi atu i le afioaga o le Atua. Mafaufau pe o e taumafai e toe foi atu ma le agavaa i Lona afioaga ma pe o le a se mea e ono faalavelave ia te oe mai lena sini. A o faaauau pea ona e suesue, mafaufau i ni auala e mafai ona e faaaogaina ai aoaoga o loo i le Alema 34 e fesoasoani ai ia te oe ia saunia lelei atili e fetaiai ma le Atua.
O auala e mafai ona tatou saunia ai e feiloai ma le Atua
O le tele o aoaoga a Amoleka i le Alema 34 ua fesoasoani tatou te malamalama ai i le ala e mafai ai ona tatou saunia ai nei e fetaiai ma le Atua.
Valaaulia tagata aoga e suesue fuaiupu nei, ma vaavaai mo aoaoga e mafai ona fesoasoani ia i tatou e saunia ai e feiloai ma le Atua. Vaevae tagata aoga i ni vaega toalaiti ma tofi atu i vaega taitasi ni fuaiupu faapitoa e suesue faatasi ai. Mo se faataitaiga, e mafai e se tasi vaega ona suesue fuaiupu 17–27, e mafai e le isi ona suesue le 28–34, ma le isi e mafai ona suesue le 37–41.
Talanoaina ma tagata aoga mea na latou aoaoina a o latou suesueina nei fuaiupu. O fesili nei e mafai ona faaaoga o se vaega o le talanoaga.
-
O le a se mea na aoao atu e Amoleka i nei fuaiupu e mafai ona fesoasoani ia te oe e saunia ai e feiloai ma le Atua?
-
E mafai faapefea e le mulimuli i nei aoaoga ona fesoasoani ia i tatou e saunia lelei ai e toe foi atu ma le agavaa i le afioaga o le Atua?
-
O le a se mea na e aoaoina e uiga i uiga faaalia ma le finagalo o le Tama Faalelagi ma Iesu Keriso mai fuaiupu sa e suesueina?
O faataitaiga o tali atonu e tuuina atu e tagata aoga i le fesili na muamua atu e aofia ai le faigofie ona faalatalata atu i le Atua, e tusa lava po o fea tatou te i ai pe o le a foi le mea tatou te mananao e fesili atu ai (tagai fuaiupu 17–27). E mafai foi ona latou ta’u mai ai le vave o le a faamanuiaina ai i tatou e le Faaola pe a tatou salamo (tagai fuaiupu 31).
Aua le faatuai lou salamo
Tagai i le faamatalaga a Amoleka i le fuaiupu 33: “Aua nei o outou faatuai le aso o lo outou salamo seia oo i le iuga.” Mafaufau e faailoga lenei fuaitau i au tusitusiga paia.
-
Aisea e mafai ai ona faaosoosoina nisi tagata e faatuai ona salamo?
Faitau le Alema 34:33–35, ma vaavaai mo mafuaaga na uunaia ai e Amoleka ia aua nei faatuai lo tatou salamo.
Atonu e fesoasoani le valaaulia o tagata aoga e faailoa mai fesili po o popolega e mafai ona i ai i se tasi pe a uma ona faitau nei fuaiupu. Mafaufau e lisi i luga o le laupapa ia tali a tagata aoga. A o suesue e tagata aoga punaoa nei, e mafai ona latou faailoa mai aoaoga e fesoasoani e foia ai na fesili po o popolega.
Ua aoaoina i tatou e mafai ona tupu le salamo i le lalolagi o agaga (tagai Mataupu Faavae ma Feagaiga 138:31, 33, 58). Ae ua faamamafa mai e tusitusiga paia ma perofeta o aso e gata ai le taua o lo tatou salamo i le olaga nei. Na tuuina mai e Elder Melvin J. Ballard [1873–1939] o le Korama a Aposetolo e Toasefululua lenei taitaiga:
E matua faigofie atu le manumalo ma auauna atu i le Alii pe a tuufaatasia uma le tino ma le agaga ia tasi. O le taimi lenei e sili atu ona faatosinaina tagata ma aafia gofie ai. … O le olaga lenei o le taimi lea e salamo ai. (Melvin J. Ballard: Crusader for Righteousness (1966), 212–13; sii mai i le Dallin H. Oaks, “Faamamaina e le Salamo,” Liahona, Me 2019, 94)
-
O a mea ua fesoasoani ai fuaiupu 33–35 ma lenei saunoaga ia te oe e malamalama ai e uiga i le mafuaaga e le tatau ai ona faatuai lo tatou salamo?
O le salamo o se vaega taua o le saunia ai e toe foi atu i le afioaga o le Atua. Manatua e tuuina mai ma le alofa e le Alii le alofa mutimutivale ia i latou o e taumafai e salamo, e tusa lava pe faigata ona latou faatoilaloina ni agasala patino.
Na aoao mai Elder Neil L. Andersen o le Korama a Aposetolo e Toasefululua:
O nisi taimi i lo tatou salamo, i a tatou taumafaiga i aso taitasi ia avea atili e faapei o Keriso, tatou te iloaina ai lo tatou lava tauivi pea lava pea ma faafitauli lava e tasi. …. Aua le lotovaivai. Afai o loo e taumafai ma galue ia salamo, ua e i ai i le faagasologa o le salamo. (Neil L. Andersen, “Repent …. That I May Heal You,” Liahona, Nov. 2009, 41)
A o lei faia fesili nei, valaaulia tagata aoga e mafaufau faapea e i ai se latou uo o loo aloese mai le salamo ona o mafuaaga eseese, e pei o le maasiasi po o le leai o se manao e suia.
E ono fesoasoani mo tagata aoga le faatulagaina o o latou manatu e ala i le taliina o fesili i a latou api talaaga mo suesuega a o lei talanoaina nei fesili o se vasega.
-
O le a se mea e mafai ona e faasoa atu mai aoaoga a Amoleka i le Alema 34:30–38 lea e mafai ona fesoasoani i se tasi o loo faaosoosoina e faatali seia oo i se taimi mulimuli ane i le olaga ia salamo ma suia?
-
Aisea e te manatu ai e aoga le salamo, e ui lava i mafuaaga atonu o loo iai i lenei tagata e le faia ai?
-
O le a se mea ua e iloa e uiga i le Tama Faalelagi ma Iesu Keriso lea e mafai ona uunaia ai lenei tagata ia salamo vave ma faifai pea?
Molimau atu i upumoni sa outou talanoaina i le asō ma le fesoasoani e mafai e le Faaola ona tuuina atu i tagata aoga a o latou taumafai ia sili atu ona saunia e fetaiai ma le Atua.
Mafaufau i mea ua e aoaoina ma lagonaina i le asō e uiga i le saunia e fetaiai ma le Atua ma le le faatuai. Mafaufau i faatinoga e te manao e fai ona o mea sa e suesueina i le asō. Tusi faamaumau ou manatu ma uunaiga i lau api talaaga mo suesuega.