Alema 34:1–17

O Le Togiola e Le Gata ma Faavavau a Iesu Keriso

Na i ai se taimi na e mafaufau ai pe o le a faape’ī lou olaga e aunoa ma Iesu Keriso ma Lana Togiola? Na aoao atu e Amoleka sa Sorama e faapea o tagata uma lava e faamaaa, pauu, ma leiloloa e aunoa ma le taulaga e le gata ma faavavau a le Alo o le Atua. O lenei lesona ua faamoemoe e fesoasoani e te malamalama ai i le ala e mafai ai e Iesu Keriso ona faamanuia oe e ala i Lana taulaga togiola e le gata ma e faavavau.

Faatutu ni faamoemoega maualuluga. A iloa e tagata aoga e maualuluga ou faamoemoega mo i latou o ni tagata aoao, o le a latou taumafai lava e ausia na faamoemoega. O nisi tagata aoga atonu e i ai taimi e faalavelaveina ai e se tasi latou te tupulaga po o se masini eletonika. Ia tuuina atu pea lava pea ni faasa’oga agamalu ma agaalofa pe a tulai mai nei amioga po o isi amioga faalavefau. O le faia o lena mea e mafai ona fesoasoani ai i le vasega atoa ia malamalama i ou faamoemoega ma tuuina atu ai ni avanoa se tele mo tagata aoga e maua ai ni aafiaga anoa.

Sauniuniga a le tagata aoga: Valaaulia tagata aoga e saili ma suesue i mau ia e fesoasoani latou te malamalama atili ai i le Togiola a Iesu Keriso. O le Taiala o Ulutala ma Taiala i Tusitusiga Paia e mafai ona avea ma punaoa aoga.

Gaoioiga e Ono Mafai Ona Aoao Ai

O le a faapefea ona ese ai le olaga?

Mafaufau e faaali atu fesili e le i mae’a nei. Valaaulia tagata aoga e faasoa mai ni faataitaiga pe faapefea ona ese o latou olaga e aunoa ma nisi o tagata po o mea e sili ona latou faalagolago i ai. Ina ia fesoasoani i tagata aoga e mafaufau i faataitaiga, aumai ni nai mea faitino po o ni ata o mea e te faatauaina.

O le a faapefea ona ese le olaga e aunoa ma …?

Mafaufau i ni nai auala e mafai ona e tali ai lenei fesili i tagata po o mea e te faalagolago i ai. Mo se faataitaiga, atonu e te mafaufau pe faapefea ona ese lou olaga e aunoa ma se tagata faapitoa, nisi o tekinolosi po o meafaigaluega e masani ona e faaaogaina, po o se gaoioiga e te fiafia i ai.

A uma ona faasoa mai e tagata aoga nisi o a latou tali, mafaufau e faaali atu le ata lenei ma fetuunai le faamatalaga talu ai ina ia faitauina: O le a faapefea ona ese le olaga e aunoa ma Iesu Keriso ma Lana Togiola?

Valaaulia tagata aoga e mafaufau pe faapefea ona latou taliina lenei fesili ma fai se lisi i a latou api talaaga mo suesuega o auala o le a ese ai o latou olaga e aunoa ma Iesu Keriso ma Lana Togiola. O le a latou maua se avanoa e faasoa mai ai a latou tali i lenei fesili i se taimi mulimuli ane o le lesona.

Ua molimau atu Amoleka ia sa Sorama e uiga ia Iesu Keriso

Atonu e te manatua na talai atu Alema ma Amoleka i sa Sorama, o e sa talitonu o le a “leai se Keriso” (Alema 31:16). Ina ua uma ona faamaumauina e Alema ana savali o loo tusia i le Alema 32–33, sa faasoa atu e Amoleka lana lava molimau e uiga i le Faaola.

Faitau le Alema 34:1–10, ma vaavaai mo mea na faasoa atu e Amoleka e uiga ia Iesu Keriso ma Lana Togiola.

O le Alema 34:9–10 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala iloga ina ia mafai ai ona e mauaina gofie. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

• O a upu po o fasifuaitau e uiga ia Iesu Keriso ma Lana Togiola na e iloa e faapitoa le anoa? Aisea?

• O le a se mea na e aoaoina mai nei fuaiupu e uiga i le mafuaaga tatou te manaomia ai Iesu Keriso e togiola mo i tatou?

• O le a faapefea ona e aoteleina aoaoga a Amoleka i le Alema 34:8–10 o se faamatalaga o le upumoni?

Atonu ua e faailoa maia se upumoni e talitutusa ma lenei: A aunoa ma le Togiola e le gata ma faavavau a Iesu Keriso, o le a leiloloa tagata uma e faavavau.

• Aisea o le a “lē maalofia le fano” o tagata uma pe leiloloa ai e faavavau e aunoa ma Iesu Keriso ma Lana Togiola?

Mafaufau e fai atu i tagata aoga e mafaufau i nisi o auala o le a latou leiloloa patino ai e aunoa ma Iesu Keriso ma Lana Togiola. O se tasi auala e faia ai lenei mea o le valaaulia lea o i latou e suesue le 2 Nifae 9:6–12, ma vaavaai mo aoaoga o loo faamatala mai ai le mafuaaga tatou te manaomia ai se Faaola.

E le gata ma faavavau

Mafaufau e maka ia upu “e le gata ma faavavau” i le faaiuga o le fuaiupu 10 ma kopi le ata lenei i lau api talaaga mo suesuega:

Mafaufau e tusi le ata lenei i luga o le laupapa mo tagata aoga e kopi.

• O le a sou manatu o le a le uiga o le Togiola a Iesu Keriso e le iu ma e faavavau?

Sa faasoa mai e Peresitene Russell M. Nelson le malamalamaaga lenei:

O Lana Togiola e le gata—e leai sona iuga. E le gata foi ina ia mafai ona faaolaina tagata ola uma mai le oti e le iu. Sa le gata pe a fua i Lona puapuagatia tele. … Sa le gata i se tulaga—na faia i le taimi e tasi mo tagata uma. Ma o le alofa mutimutivale o le Togiola ua oo atu e le gata i le le mafaitaulia o tagata, ae faapea foi i le tele o lalolagi e le mafaitaulia na foafoaina e Ia. E le gata i le tulaga e sili atu i se fua faatatau po o se malamalama o le tagata soifua. (Russell M. Nelson, “The Atonement,” EnsignNov. 1996, 35)

• O le a se mea na fesoasoani lenei saunoaga ia te oe e aoao pe lagona ai e uiga ia Iesu Keriso ma Lana taulaga togiola?

E faapefea ona faatatau ia te oe?

E avea o se vaega o le faamalamalamaga lenei, atonu e fesoasoani le faasoa atu o le saunoaga a Elder Michael John U. Teh o le Fitugafulu o loo maua i le vaega o “Manatu ma Talaaga o Faamatalaga”.

E ui e mafai e le Faaola ona faamanuiaina se aofaiga e le mafaitaulia o tagata e ala i Lana Togiola, ae e mafai foi ona Ia faamanuiaina oe lava ia. Mafaufau e faafou le ata i lau api talaaga mo suesuega ia foliga faapea:

O le gaoioiga lenei e mafai ona fesoasoani i tagata aoga ia malamalama atili ai i le ala e mafai ai e le Faaola ona faamanuia patino i latou ona o Lana Togiola. Faaali atu pe lolomi ia punaoa nei ma tuu atu i tagata aoga se taimi e suesue ai na o i latou pe i ni vaega. Valaaulia tagata aoga e faailoa mai upu po o fasifuaitau mai nei punaoa o loo faamatala ai pe mafai faapefea e Iesu Keriso ona faamanuia i latou lava e ala i Lana Togiola.

E faaopoopo atu i mau ma faamatalaga o i le lisi, e mafai e tagata aoga ona maua mau eseese po o isi saunoaga a taitai o le Ekalesia.

• Alema 34:11–17

• 2 Nifae 9:10

• Mataupu Faavae ma Feagaiga 58:42

Na aoao mai Peresitene Tad R. Callister, o le sa avea ma Peresitene Aoao o le Aoga Sa:

E i ai nisi taimi sa ou feiloai ai i nisi o le Au Paia lelei o loo i ai ni faafitauli i le faamagaloina o i latou lava, o ē sa aunoa ma le iloa na latou tuuina ma le le sa’o ni tapulaa i mana togiola o le Faaola. E aunoa ma le iloa, ua latou liuaina se Togiola le i’u i se togiola e gata lea e le taulimaina ai a latou agasala po o vaivaiga patino. Ae o se Togiola le i’u, ona na te faaaofiaina ma totogia agasala uma ma vaivaiga, faapea ai foi ma sauaga uma po o tiga e mafua ona o isi. (Tad R. Callister, “O Le Togiola a Iesu Keriso,” Liahona, Me 2019, 85–86)

Talanoaina ma tagata aoga mea sa latou aoaoina ma lagonaina mai a latou suesuega. Valaaulia i latou e faasoa mai ni upu po o ni fasifuaitau patino na latou maua e faamatala ai le ala e mafai ai e Iesu Keriso ona faamanuia i latou lava e ala i Lana Togiola. Mo se faataitaiga, atonu e ta’u mai e tagata aoga ia fasifuaitau e pei o le “o le a faapea ona aumai e ia le olataga ia i latou uma o e e talitonu i lona suafa” (Alema 34:15); o le “Atua … o lē ua saunia se ala mo lo tatou sosola ese mai le … oti ma seoli” (2 Nifae 9:10); po o le “ma o A’u, o le Alii, e lē toe manatuaina lava [agasala ua salamo] i latou” (Mataupu Faavae ma Feagaiga 58:42).

A uma lenei talanoaga, faasino tagata aoga i le lisi na latou fatuina i a latou api talaaga mo suesuega e uiga i le tulaga o le a i ai o latou olaga e aunoa ma Iesu Keriso ma Lana Togiola. E mafai e tagata aoga ona faafou a latou lisi e faavae i luga o mea sa latou aoaoina. Valaaulia tagata aoga e faasoa atu a latou lisi i se paga po o le vasega atoa. Fai atu i tagata aoga e faasoa mai se mea na latou faaopoopoina i le latou lisi ona o mea sa latou aoaoina i le aso. E mafai foi ona latou faasoa mai se mea ua uma ona latou faaaofiaina i le latou lisi lea e sili atu le anoa ia i latou ona o mea ua latou aoaoina, ona faamatala lea pe aisea.

Molimau atu e uiga i upumoni sa outou talanoaina. Uunaia tagata aoga e faatino so o se uunaiga latou te maua i le taimi o le lesona.

Manatu ma Talaaga o Faamatalaga

E mafai faapefea e Iesu Keriso ona faamanuiaina au lava ia e ala i Lana Togiola e le gata ma faavavau?

Na aoao mai Elder Michael John U. Teh o le Fitugafulu:

E tele taimi e faigofie atu mo i tatou ona mafaufau ma tautatala e uiga i le Togiola a Keriso i mea faalauaitele, nai lo le faailoaina o le taua patino i o tatou olaga. O le Togiola a Iesu Keriso e le i’u ma e faavavau ma e aofia ai le lautele ma le loloto o mea uma ma tagata uma ae e aafia patino ai i tatou uma taitoatasi. Ona o Lana taulaga togiola, ua i ai i le Faaola le mana e faamama, faamalolo, ma faamalolosia ai i tatou taitoatasi. (Michael John U. Teh, “O lo Tatou Faaola Patino,” LiahonaMe 2021, 99)

E mafai faapefea e Iesu Keriso ma Lana Togiola ona tuuina mai ia te au le faamoemoe?

Na aoao mai Elder Dieter F. Uchtdorf o le Korama a Aposetolo e Toasefululua:

O le Togiola e le i’u a le Faaola ua suia atoa ai le ala e mafai ona tatou vaavaai atu ai i a tatou solitulafono ma ni lē atoatoa. Nai lo le nofoa’i i na mea ma lagonaina le lē matogiolaina, e mafai ona tatou a’oa’o mai ai ma lagonaina le faamoemoe. O le meaalofa faamamā o le salamo e mafai ai ona tuua i tua a tatou agasala ma tutula’i a’e o ni tagata fou.

Ona o Iesu Keriso, e le tau faamatalaina ai i tatou i o tatou to’ilalo. E mafai ona latou faaleleia i tatou. (Dieter F. Uchtdorf, “O Loo ia i Tatou le Atua,” Liahona, Me 2021, 8–9)

Na aoao mai Elder Gerrit W. Gong o le Korama o Aposetolo e Toasefululua:

Afai sa tatou lagonaina, pe o lagonaina, le lē mautinoa, tuuatoatasi, ita, teenaina, lē fiafia, po o le vavae ese mai le Atua ma Lana Ekalesia toefuataiina, atonu e manaomia se isi fuataga o taumafaiga ma le faatuatua e toe foi atu ai i Lana ala o feagaiga. Ae e tauia! Faamolemole o mai, pe toe o mai, i le Alii o Iesu Keriso! O le alofa o le Atua e sili atu ona malosi nai lo noataga o le oti—faaletino pe faaleagaga. O le Togiola a lo tatou Faaola e lē mafuatia ma e faavavau. E tofu i tatou uma ma masalosaloga ma mea e toilalo ai. E i ai taimi tatou te ono se ese ai ma le ala. Ua faamautinoa mai ma le agaalofa e le Atua ia i tatou, po o fea lava o tatou i ai, po o a foi mea sa tatou faia, e leai se mea e ta’u o le lē toe foi. E faatalitali mai o Ia e sauni e opogi i tatou. (Gerrit W. Gong, “O La Tatou Afi o le Tolauapiga o le Faatuatua,” Liahona, Nov. 2018, 41)

Gaoioiga Faaopoopo e Aoao Ai

Vitio: “Togiola – E Le o se Mea mo se Taimi e Tasi”

Ina ia fesoasoani i tagata aoga ia vaaia se faataitaiga o se alii talavou sa faamanuiaina pea lava pea e Iesu Keriso ma Lana Togiola e le gata ma faavavau, mafaufau e faaali le vitio “Togiola – E Le o se Mea mo se Taimi e Tasi” (3:00).

O le auala e fesoasoani ai le Tusi a Mamona ia i tatou e malamalama atili ai i le Togiola a Iesu Keriso.

Na aoao mai Peresitene Nelson, “Ua tuuina mai e le Tusi a Mamona le atoatoaga ma le malamalama sili ona mausali o le Togiola a Iesu Keriso e maua i so o se mea.” (“O Le Tusi a Mamona: Faamata e Faapei Lou Olaga e aunoa ma Ia?” Liahona, Nov. 2017, 62)

Ina ia fesoasoani e faapupula lenei manatu, mafaufau e faaali atu i tagata aoga le “O Iesu Keriso ma le Togiola i le Tusi a Mamona” (mai le faailo taimi 1:14 i le 2:25). I lenei vitio, o loo faamatala ai e Peresitene Nelson le matafaioi tulaga ese o loo faia e le Tusi a Mamona e fesoasoani ai ia tatou malamalama i le Togiola a le Faaola.

Mafaufau e valaaulia tagata aoga e faitau nisi po o fuaiupu uma nei, ma vaavaai mo aoaoga mai le Tusi a Mamona e fesoasoani latou te malamalama atili ai i le Togiola a Iesu Keriso: 2 Nifae 2:6–8; Mosaea 3:5–11; 15:7–9; Alema 7:11–13; 42:12–26; Helamana 14:15–19; Moronae 8:8–12.

Vitio o le Tusi a Mamona

E mafai ona manuia tagata aoga mai le matamata i se ata vitio o loo faaali ai fuaiupu na suesueina i lenei lesona. Mafaufau e faaali atu le “Ua Molimau atu Amoleka o le Faaolataga o loo ia Iesu Keriso | Alema 34” (mai le faailo taimi 0:22–2:45)