Alema 33

Aoaoina Atu o le Talalelei a le Faaola

Na i ai se taimi na e lagona ai se manao e mulimuli latalata atu i le Alii ae e te le iloa le mea e fai? Sa fesili atu tagata matitiva o sa Sorama i le perofeta o Alema pe faapefea ona “tatau ona latou amata faaaoga ai lo latou faatuatua” (Alema 33:1). O le tali a Alema e taua mo soo uma o Iesu Keriso ia malamalama i ai. O lenei lesona e mafai ona faalolotoina lou malamalama i laasaga e mafai ona e faia e faatino atili ai le faatuatua ia Iesu Keriso.

Tuu atu i tagata aoga ni avanoa e aoao atu ai. Vaavaai mo avanoa e mafai ai e tagata aoga ona aoao atu vaega o lesona. Uunaia i latou e vaai i le seminare o se nofoaga saogalemu e faataitai ai le aoao atu.

Sauniuniga a le tagata aoga: Valaaulia tagata aoga e faitau le Alema 33 i le fale ma filifili se fuaiupu po o se vaega o fuaiupu latou te mananao ia malamalama atili i ai.

Gaoioiga e Ono Mafai Ona Aoao Ai

Fesili o le talalelei

Mafaufau e valaaulia tagata aoga e tali fesili nei ma se paga po o se vaega toaitiiti.

• Afai na e maua le avanoa e fesili atu ai i le perofeta a le Atua se fesili se tasi pe lua, o le a se mea e te fia iloa? Aisea?

I le Alema mataupu e 32, na valaaulia ai e le perofeta o Alema ia sa Sorama e faamalosia a latou molimau e ala i le faafaileleina o le afioga a le Atua i o latou loto. Sa latou tali atu e ala i le fai atu ia te ia o ni fesili taua.

Faitau le Alema 33:1, ma vaavaai mo fesili na latou fesili atu ai i le perofeta.

• O le a sou manatu e mafai faapefea e se talavou i aso nei ona toe faaupu le fesili “o le a le auala e tatau ona latou amata faatino ai lo latou faatuatua”?

• E faapefea ona e taliina lena fesili e faavae i mea ua e iloa e uiga i le talalelei a Iesu Keriso?

O le faatinoina o le faatuatua e sili atu nai lo le na o le talitonu ia Iesu Keriso. Tatou te faatinoina le faatuatua pe a tatou faia mea e poloai mai ai le Faaola ma saili ma le loto i ai e mulimuli ia te Ia. Na tali atu Alema i le fesili a sa Sorama e ala i le aoaoina o i latou i le tele o auala e mafai ona tatou faatino ai lo tatou faatuatua ia Iesu Keriso.

Filifili se tasi o filifiliga nei e tolu mai le tali a Alema e te fia malamalama atili i ai. Sauni e pei o le a e aoao atu se lesona e lima i le fitu minute e uiga i le filifiliga e te filifilia. Mafaufau i se tasi e te iloa ma saunia e pei o le a e faasoa atu le lesona ia i latou. Atonu e te manao e faaaoga nisi o manatu o loo lisiina i lalo o “Manatu mo Sauniuniga o le Lesona” i se taimi mulimuli ane o le lesona e fesoasoani ai ia te oe e te saunia ai.

Faailoa atu i tagata aoga o le a latou maua le avanoa e aoao atu ai le lesona ua latou saunia i se vaega toalaiti o tagata o le vasega. Ofo atu nisi filifiliga i tagata aoga o e atonu e lagonaina le popole tele e aoao atu leotele. O nei mea e aofia ai le tuuina atu i se otootoga o la latou lesona pe galulue faatasi ma se paga o se e sili atu lona to’a po o le poto masani. Afai e te filifili e le saunia e tagata aoga ni lesona, mafaufau e faaaoga manatu pe a uma filifiliga taitasi o suesuega i auala e aoao atu ai vaega eseese o le lesona.

E ono mafai ona fesoasoani i tagata aoga pe afai e te faataitaia faapuupuu le auala e saunia ai se lesona puupuu. Pe e mafai foi ona e valaaulia tagata aoga ua i ai le poto masani e faasoa mai ni manatu e ala i le fai atu o fesili e pei o nei: “Mai lou aafiaga, o a ni au laasaga muamua i le sauniaina o se lesona?” po o le “O le a se foliga o se fuafuaga masani o le lesona mo oe?” po o le “O fea e te alu i ai e maua ai nisi faamatalaga e uiga i lau mataupu?”

Mafaufau e tusi filifiliga nei e tolu i luga o le laupapa mo tagata aoga e filifili mai ai.

Filifiliga 1: E mafai ona tatou faatino le faatuatua i le Atua e ala i le tapuai atu ia te Ia i le tatalo. Alema 33:3–11

Mau faaopoopo e mafaufau i ai: Alema 34:17–27

Afai e te filifili e suesue le Filifiliga 1 o se vasega nai lo le saunia o tagata aoga e aoao atu, mafaufau e valaaulia tagata aoga e fai se lisi o upumoni latou te aoaoina e uiga i le tatalo mai nei fuaiupu. E mafai foi ona outou talanoaina nisi o manatu sese o loo i ai i tagata e uiga i le tatalo lea e tautalagia ma faasa’o e upumoni mai nei fuaiupu.

Atonu e aoga le valaaulia o tagata aoga e suesue i le tusipese mo fasifuaitau e uiga i le tatalo lea e i ai ni uiga ia i latou. E mafai ona latou faasoa mai ni aafiaga patino e atagia mai i upu.

Filifiliga 2: E mafai ona tatou faatinoina le faatuatua e ala i le talitonu i le Alo o le Atua. Alema 33:12–18

Mau faaopoopo e mafaufau i ai: Ioane 3:16; 2 Nifae 2:6–8

Afai e te filifili e suesue le Filifiliga 2 o se vasega nai lo le fai atu i tagata aoga e sauni e aoao atu, mafaufau e valaaulia tagata aoga e maka le Alema 33:14, 18. Ona fai atu lea i tagata aoga e sue ma faasoa mai ni fuaitau e sili ona fiafia i ai e uiga i le Alo o le Atua mai so o se tusi o tusitusiga paia. E mafai ona latou faaaogaina se lisi o fuaitau o le atamai i aoaoga faavae mai kosi uma e fa e fai ma punaoa pe a manaomia.

Filifiliga 3: E mafai ona tatou faatinoina le faatuatua e ala i le vaavaai atu ia Iesu Keriso mo le faamalologa. Alema 33:18–23

Mau faaopoopo e mafaufau i ai: Numera 21:4–9; Helamana 8:14–15

Afai e te filifili e suesue le Filifiliga 3 o se vasega nai lo le saunia o tagata aoga e aoao atu, mafaufau e faaali atu ata mai le Tusi Ata o le Talalelei “Moses and the Brass Serpent” ma le “The Crucifixion” a o faitau e tagata aoga ia fuaitau o i luga. Valaaulia i latou e talanoaina mafuaaga atonu e filifili ai tagata i aso nei e aua nei vaai atu ia Iesu Keriso mo le faamalologa faaleagaga, atoa ma punavai e ono filifili lava i latou e vaavaai atu i ai. Fesili i tagata aoga po o le a sa latou tala e fai atu i se tasi e taumanatunatu pe mafai moni e Iesu Keriso ona fesoasoani ia i latou.

Afai o le a saunia ma aoaoina atu e tagata aoga le lesona, mafaufau e tuuina atu lenei pepa e tufa atu e fesoasoani ai i a latou sauniuniga.

Mafaufau foi e tuu atu i tagata aoga ni anomea talafeagai i le vaega o “Manatu ma Talaaga o Faamatalaga” pe a manaomia ai.

Gaoioiga o le Sauniuniga o le Lesona

Tusi Lesona a le Faiaoga o le Tusi a Mamona (2024)—“Alema 33: Aoaoina Atu o le Talalelei a le Faaola”

O le fea o filifiliga na e filifili e taulai i ai?

Mafaufau e faaaoga nisi o uunaiga nei e fesoasoani ia te oe e saunia ai lau otootoga.

O fasifuaitau autu mai fuaiupu atonu e te fautua atu ia i latou e te aoaoina e ao ona latou makaina:

O mea e mafai e nei fuaiupu ona fesoasoani ia i latou o loo e aoaoina ia malamalama pe lagonaina e uiga i le Tama Faalelagi ma Iesu Keriso:

Auala e mafai ai e lenei upumoni ona aafia ai olaga o i latou e te aoaoina:

Lesona faatino, po o faataitaiga lelei o tagata o loo ola ai i lenei upumoni:

O fesili e mafai ona e fai atu e fesoasoani ai ia i latou o loo e aoaoina e mafaufau loloto ai i mea na aoao mai e Alema:

O aafiaga na e maua i mea na aoao atu e Alema:

Mau faaopoopo po o faamatalaga mai taitai o le Ekalesia:

O mea e mafai ona e valaaulia i latou o loo e aoaoina e fai ona o mea sa latou aoaoina:

© 2023 by Intellectual Reserve, Inc. Ua taofia aiā tatau uma.

Valaaulia tagata aoga e feauauai i le aoaoina atu o a latou lesona i paga po o vaega toalaiti. Ia faaeteete ia aua nei faamalosia tagata aoga o e ua popole tele e aoao atu leotele a latou lesona. Mafaufau e valaaulia nisi o tagata aoga naunautai e aoao atu le vasega atoa.

Mafaufau ma le agaga tatalo pe faapefea ona e faasoa atu mea na e aoaoina ma le tagata na e mafaufau i ai a o e saunia lenei lesona.

Valaaulia tagata aoga e faasoa mai o latou manatu mai le Alema 33 i le vasega e faaaoga ai fesili e pei o nei:

• O a ni malamalamaaga na e maua e uiga i le faatinoina o le faatuatua ia Iesu Keriso i aso nei?

• Na faapefea e le sauniaina o se lesona e uiga i ai ona fesoasoani ia te oe e maua ai na malamalamaaga?

E mafai ona e faasoa atu se malamalamaaga anoa mai le Alema 33 na e mauaina a o e sauni e aoao atu.

Manatu ma Talaaga o Faamatalaga

O le a se mea e mafai ona fesoasoani ou te malamalama atili ai i le meaalofa o le tatalo?

Na aoao mai Sister Susan H. Porter o le Au Peresitene Aoao o le Peraimeri:

E tele nofoaga sa ou tatalo ai. Sa ou tatalo i le matafaga, o mauga, o le lotu, ma le malae taalo. Sa ou tatalo i lo’u fale, i totonu o le vaalele, ma le falemai. Ou te iloa e mafai ona ou tatalo i le Tama Faalelagi i so o se taimi, ma so o se nofoaga. Ou te iloa e faafofoga mai o Ia ia te au. (Sini S. Reynolds, “E Mafai ona Ou Tatalo i le Tama Faalelagi i Soo se Taimi, i Soo se Nofoaga”, Liahona, Me 2003, 113)

Na faasoa mai e Elder D. Todd Christoffferson o le Korama a Aposetolo e Toasefululua:

E silafia i tatou e le Tama Faalelagi, ma o le a Ia mauaina i tatou i so o se mea lava tatou te i ai. E mafanafana le iloa po o fea lava tatou te i ai, o le a Ia fetalai mai ia i tatou pe afai tatou te saili atu ia te Ia i le tatalo. (D. Todd Christofferson, “Friend to Friend: Seeking Him in Prayer,” Friend, Fep. 2006, 9)

O upu o le Viiga “Pe Na Faia Sau Tatalo” (Viiga, nu. 75) o loo i ai le tele o faamanuiaga ua ofoina mai e le Atua ia i tatou e ala i le meaalofa o le tatalo.

O le a se mea e mafai ona fesoasoani ou te malamalama atili ai i le meaalofa o le Alo o le Atua?

Na faamalamalama mai e Peresitene Henry B. Eyring o le Au Peresitene Sili:

O Se Tofi o le Faamoemoe e Le Mafaatauina

Ua uunaia i tatou e Henry B. Eyring ia tuua se tofi o le faamoemoe mo i latou o le a mulimuli i a tatou faataitaiga.

Peitai na tuu mai e lo tatou Tama Faalelagi alofa ia i tatou le meaalofa o Lona Alo Pele, o Iesu Keriso, e fai ma o tatou Faaola. O lena meaalofa maoae ma le faamanuiaga o le Togiola a Iesu Keriso ua aumaia ai se tofi mo tagata uma: le folafolaga o le Toetu ma le mauaina o le ola e faavavau mo i latou uma e fananau mai. (Henry B. Eyring, “O Se Tofi o le Faamoemoe e Le Mafaatauina,” Liahona, Me 2014, 24)

O le a se mea e mafai ona fesoasoani ia te au e malamalama atili ai i le faatusa o le gata apamemea?

Faatusatusa ata nei e lua a o e faitau i punaoa nei:

Na saunoa mai Elder Glen O. Jenson o le Fitugafulu:

E pei o Isaraelu anamua i le vao, e i ai o tatou aafiaga i o tatou olaga faaletino e faasino atu ai i tatou i le Alii … mo le faamalologa ma le faaolataga. O nisi taimi Na te faasa’osa’oina i tatou (tagai 1 Nifae 17:41), ma le faamoemoe e faamaluluina o tatou loto. Ae i tulaga faigata taitasi, ua Ia tulai saunia ma le alofa mutimutivale e faamalolo i tatou pe afai ae o le a tatou talitonu ia te Ia. …

Tatou te faaalia lo tatou naunau ina ia faamaloloina e ala i le manatuaina o Ia e le aunoa ma usitai i Ana poloaiga. E le o le gata apamemea na aumaia ai le faamalologa; ae o le faatuatua ia Ieova ma le usiusitai i Ana afioga. (Glen O. Jenson, “Look and Live,” Ensign, Mat. 2002, 34)

Tagai “Serpent, Brazen” i le O le Taiala i Tusitusiga Paia.

Faitau le Ioane 3:14–15; 1 Nifae 17:40–41; 3 Nifae 27:13–16.

Gaoioiga Faaopoopo e Aoao Ai

Vitio o le Tusi a Mamona

Ina ia tuu atu i tagata aoga se vaaiga lautele puupuu o aoaoga a Alema i lenei mataupu, mafaufau e faaali le vitio “Ua Faatusa e Alema le Afioga a le Atua i se Fatu | Alema 32–33” mai le faailo taimi 5:00 i le 7:11.

Ua Faatusa e Alema le Afioga a le Atua i se Fatu| Alema 32-33

Ua ta’u atu e Alema i tagata ia lava le faatuatua e toto ai le fatu (afioga a le Atua) i o latou loto. Afai e lelei le afioga a le Atua, pei o se fatu lelei, o le a tupu ma latou fiafia ai.

Mafaufau loloto i le aafiaga o upumoni o le talalelei i o tatou olaga

O se tasi o auala e fesoasoani ai i tagata aoga ia malamalama pe faapefea e upumoni o le talalelei ona faamanuiaina o latou olaga o le mafaufau lea pe o le a se eseesega o o latou olaga pe ana latou le iloaina ni upumoni patino. Mo se faataitaiga, i le lesona lenei, e mafai ona e fai atu fesili nei e uiga i upumoni e o faatasi ai:

• E faapefea ona ese le olaga pe afai e te talitonu e na o le Aso Sa pe na o le lotu e mafai ona tatou tatalo ai?

• O le a faapefea ona ese le olaga pe ana e le iloa e uiga i le Alo o le Atua?

• O le a sou lagona pe afai e te manatu e leai se auala e mafai ai ona faamaloloina oe mai au mea sese?