“Atamai i Aoaoga Faavae: Alema 34:9–10—‘E Ao Ona Faia o se Togiola, … o se Taulaga e Le Gata ma Faavavau,’” Tusi Lesona a le Faiaoga o le Tusi a Mamona (2024)

“Atamai i Aoaoga Faavae: Alema 34:9–10,” Tusi Lesona a le Faiaoga o le Tusi a Mamona

Atamai i Aoaoga Faavae: Alema 34:9–10

“E ao ona faia o se togiola, … o se taulaga e le gata ma faavavau.”

I se lesona talu ai, sa e aoao ai e uiga i le Togiola e le gata ma faavavau a Iesu Keriso. O lenei lesona e mafai ona fesoasoani ia te oe e tauloto mau faasino ma le fasifuaitau autu o le mau mo le Alema 34:9–10, faamatala le aoaoga faavae o loo aoao mai i nei fuaitau, ma faaaoga mataupu faavae o le mauaina o le malamalama faaleagaga i tulaga moni o le soifuaga e faaaogaina ai lenei fuaitau o tusitusiga paia.

Fesoasoani i tagata aoga e faataitai le faaaogaina “o mataupu faavae o le mauaina o le malamalama faaleagaga.” Taumafai e faasino atu i mataupu faavae i o latou igoa ina ia iloagofie ai e tagata aoga le taimi ma pe faapefea ona faaaoga i talanoaga a le vasega.

Sauniuniga a le tagata aoga: Mafaufau e valaaulia tagata aoga e mafaufau pe mafai faapefea e upumoni o loo aoao mai i le Alema 34:9–10 ma mataupu faavae o le mauaina o le malamalama faaleagaga e mafai ona fesoasoani i se tasi o lagona e le mafai ona faamagaloina a latou agasala.

Gaoioiga e Ono Mafai Ona Aoao Ai

O lenei lesona o le atamai i aoaoga faavae ua mamanuina e aoao atu pe a uma le lesona o le “Alema 34:1–17,” o le lesona faatatau mo le fuaitau o le atamai i aoaoga faavae o le Alema 34:9–10. Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.

Faamatala ma tauloto

Pe ua e maitauina ea e mafai ona faigofie atu ona malamalama i se mea i lou mafaufau nai lo le faamatalaina i upu? O se tasi o faamoemoega o le atamai i aoaoga faavae o le tuuina atu lea ia te oe o avanoa e faamalamalama ai le aoaoga faavae mai fuaitau o le atamai i aoaoga faavae i au lava upu.

I lau suesuega talu ai nei o le Alema 34:9–10, ua e aoao ai a aunoa ma le Togiola e le gata ma faavavau a Iesu Keriso, o le a leiloloa tagata uma e faavavau.

Tuu atu i tagata aoga se avanoa e faamatala ai le aoaoga faavae o loo aoao mai i le Alema 34:9–10 i a latou lava upu e ala i le faasoa atu o faatonuga nei.

Vaai faalemafaufau e faapea, sa e maua se avanoa e faamatala ai le uiga o le Alema 34:9–10 i se tasi e itiiti sona iloa e uiga ia Iesu Keriso. Faaalu sina taimi e toe iloilo ai nei fuaiupu ma maka pe tusi i lalo upu po o fasifuaitau e te manao ia malamalama i ai lenei tagata.

A ua lava loa le taimi o tagata aoga e sauniuni ai, mafaufau e faatulaga i ni paga po o ni vaega toalaiti ma valaaulia tagata aoga taitasi e faataitai ona faasoa mai a latou faamalamalamaga.

O le fasifuaitau autu o le mau mo le Alema 34:9–10 o le: “E ao ona faia o se togiola, … o se taulaga e ao ina le gata ma faavavau.”

Fesoasoani i tagata aoga e tauloto le mau faasino ma le fasifuaitau autu o le mau. Faatulaga le vasega i paga. E mafai e se tagata aoga se toatasi ona toe fai le afa muamua o le fasifuaitau, ona fai lea e le isi i le paga o le afa lona lua. Ona mafai lea e i laua uma ona fai faatasi le mau. A uma ona fai lenei mea mo ni nai taimi, e mafai e tagata aoga ona fesuiai ma toe fai le isi afa o le fasifuaitau.

Faataitai le faaaogaina

A o lei faasoaina atu le tulaga faataitai lenei, mafaufau e fai atu i tagata aoga e ta’u mai mataupu faavae o le mauaina o le malamalama faaleagaga mai le mafaufau. Tusi mataupu faavae taitasi i le laupapa a o ta’uina mai e tagata aoga. Faamalamalama atu o le a latou maua avanoa e iloilo ma faataitai ai le faaaogaina o nei mataupu faavae i le aluga o lenei lesona.

Ona faaali atu lea o le tulaga faataitai pe tuu atu i tagata aoga se kopi e faasino i ai a o latou faamaeaina le gaoioiga.

Vaai faalemafaufau faapea na talosagaina oe e aoao atu se lesona e uiga i le Togiola a Iesu Keriso i lau vasega o le Aoga Sa. I le avea ma se vaega o lau sauniuniga, e te aapa atu ai i se tamaitai talavou i lau uarota e igoa ia Olive ma fai atu ia te ia e faasoa mai ona manatu e uiga i le ala ua faamanuiaina ai e Iesu Keriso lona olaga ona o Lana Togiola.

O le tali a Olive e faateia ai oe. Fai mai a ia, “Ma le faamaoni ia te oe, ou te manatu e maoae le Togiola a Iesu Keriso mo le toatele o tagata, ae ou te le o mautinoa pe o le a le tele o lona aoga ia te au ona o nisi o mea sese sa ou faia ma faaauau pea ona fai. E i ai nisi agasala ou te le iloa pe o le a mafai ona ou faatoilaloina.”

A o faaauau pea ona e saunia lau lesona, e te mafaufau pea e uiga i faamatalaga a Olive ma manao e fesoasoani ia te ia. Mafaufau pe mafai faapefea e aoaoga o loo i le Alema 34:9–10 ma mataupu faavae o le mauaina o le malamalama faaleagaga ona fesoasoani ia Olive i lona popolega.

Mafaufau e faatulaga tagata aoga i ni vaega toalaiti ma tofi vaega taitasi e taulai atu i se tasi o mataupu faavae o le mauaina o le malamalama faaleagaga. E mafai e tagata aoga ona fai se lisi i luga o se pepa po o luga o le laupapa o auala uma latou te manatu e mafai ona fesoasoani ai lenei mataupu faavae ia Olive i lona tulaga o loo iai. Ona mafai lea ona valaaulia tagata aoga mai vaega taitasi e lipoti mai i le vasega atoa mea sa latou talanoaina.

Pe a manaomia, e mafai ona faasoa atu fesili nei i vaega e faaaoga o se vaega o la latou talanoaga.

Faatino i le Faatuatua

O a ni faatinoga faamaoni patino e te manatu e mafai ona faia e Olive e mafai ona fesoasoani ia te ia?
O le a se mea e mafai ona e aoao atu ia Olive e uiga ia Iesu Keriso ma Lana Togiola e mafai ona fesoasoani ia te ia e faatino ai i le faatuatua? E ono mafai faapefea ona fesoasoani aoaoga o loo i le Alema 34:9–10?

Mo nisi manatu e uiga i le ala e mafai ai e Olive ona faatino i le faatuatua, e mafai ona e faitau i parakalafa 5–7 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae.

Iloilo manatu faavae po o fesili faatasi ai ma se vaaiga e faavavau

O se isi auala e aoao atu ai lenei vaega o le valaaulia lea o tagata aoga e lisi i luga o le laupapa nisi o manatu sese e ono i ai ia Olive e uiga ia Iesu Keriso, Lana Togiola, ma lana matafaioi i le mauaina o le alofa mutimutivale o le Faaola. Ona valaaulia lea o le vasega e fesoasoani ia Olive e toe faatulaga lona popolega (pe vaai i ai i se auala ese) e ala i le faasoa atu o upumoni ua latou malamalama i ai e uiga ia Iesu Keriso, Lana Togiola, ma la tatou matafaioi i le mauaina o le alofa mutimutivale o le Faaola.

O le a sou manatu o le a se vaaiga a le Tama Faalelagi ma Iesu Keriso i se popolega e pei o le popolega o Olive?
Aisea e taua ai mo Olive ona manatua o le Togiola a le Faaola e “le gata ma e faavavau” (Alema 34:10)?
E mafai faapefea e le manatuaina e faapea o tagata uma e pauu ma leiloloa e aunoa ma le Togiola a le Faaola ona fesoasoani ia te ia e vaai ai i lona popolega i se isi itu?

Mo nisi manatu e uiga i le auala e mafai ai e Olive ona iloilo manatu po o fesili faatasi ai ma se vaaiga e faavavau, e mafai ona e faitauina le parakalafa 8 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae.

Saili le malamalama atili e ala i punaoa mamana ua filifilia

O a ituaiga o punaoa mamana ua filifilia o le a e fautuaina atu ia Olive e fesoasoani ia te ia e maua ai le taitaiga ma le taialaga? Aisea?
E faaopoopo atu i le Alema 34:9–10, o le a se mau po o se faamatalaga mai se taitai o le Ekalesia e mafai ona e faasoa atu ia Olive? E ono mafai faapefea e lenei mea ona fesoasoani ia te ia?

Mo nisi manatu e uiga i le auala e mafai ai e Olive ona saili le malamalama atili e ala i punaoa mamana ua filifilia, e mafai ona e faitauina parakalafa 11–12 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae.

Valaaulia tagata aoga e mafaufau e uiga i mea sa latou aoaoina pe lagonaina i le asō lea e mafai ona manuia ai o latou olaga po o olaga o tagata latou te iloa. Uunaia i latou e vaavaai mo avanoa e faaaoga ai mataupu faavae o le mauaina o le malamalama faaleagaga ma le aoaoga faavae ua aoaoina i tusitusiga paia i tulaga latou te feagai.

Iloiloga o le atamai i aoaoga faavae

I se lesona i le lumanai, fesoasoani i tagata aoga e toe iloilo le mau faasino ma le fasifuaitau autu o mau mo le Alema 34:9–10: “E ao ona faia o se togiola, … o se taulaga e le gata ma faavavau.”

O se tasi o auala e mafai ona faia ai lenei mea o le tusi lea o mataitusi muamua o le mau faasino ma le fasifuaitau autu i luga o le laupapa ma valaaulia tagata aoga e taumafai e manatua upu e o faatasi ma mataitusi taitasi. Faataitai le faia o lenei mea mo ni nai taimi seia mafai ona toe faia e tagata aoga le mau faasino ma le fasifuaitau autu o le mau mai le mafaufau.