ʻAlamā 43, 48–50

Ko e Ako mei he Ngaahi Vahe ʻo e Taú

ʻOku fakamatalaʻi ʻe he konga fakaʻosi ʻo e tohi ʻa ʻAlamaá ha taimi ʻo e fakakikihí mo e taú. ʻE lava ke tokoniʻi kitautolu ʻe he ngaahi founga naʻe fakaʻaongaʻi ʻe he kau Nīfaí ʻi he ngaahi tau ko ʻení ke fakatupulaki ha ngaahi founga te tau lava ʻo fakaʻaongaʻi ʻi heʻetau ngaahi tau fakaʻaho mo Sētané. ʻE lava ke tokoni e lēsoni ko ʻení ke fakatatau ʻa e folofolá kiate koe ke ke maʻu e maluʻi ʻa e ʻEikí mei he ngaahi ʻohofi taʻetūkua mo fakautuutu ʻa e filí.

Tokoni ke maʻu ʻe he kau akó ha ʻuhinga fakataautaha ʻi he folofolá. Poupouʻi e kau akó ke nau fakaʻaongaʻi ha ngaahi taukei ako kehekehe ke fakatupulaki ʻa e mahino ʻoku nau maʻu ki he folofolá. Te nau lava ʻo kumi ha ngaahi fakaikiiki ʻi he talanoá, fai ha ngaahi fakafehoanaki mo ha ngaahi fakafehokotaki ʻi he ngaahi fakamatala fakafolofolá mo ʻenau moʻuí, pea fakapapauʻi ʻa e founga te nau fakaʻaongaʻi ai ʻa e meʻa kuo nau akó.

Teuteu ʻa e tokotaha akó: Fakaafeʻi e kau akó ke nau ako ʻa e ʻAlamā 43:18–21, 37–38, ʻo kumi e ngaahi lēsoni ʻe lava ʻo tokoni kiate kinautolu ʻi heʻenau tauʻi ʻa Sētané.

Ngaahi ʻEkitivitī Ako ʻOku Ala Fakahokó

Ko hono ʻiloʻi ʻo e filí

Fakakaukau ke fakaʻaliʻali ʻa e fakamatala ko ʻení lolotonga iá ʻoku aleaʻi ʻe he kau akó ʻenau ngaahi tali ki he ngaahi fehuʻi ʻoku hoko mai aí.

Naʻe fakatokanga ʻa Palesiteni Poiti K. Peeka (1924–2015) ʻo e Kōlomu ʻo e Toko Hongofulu Mā Ua:

ʻOku mou tupu hake ʻi he tafaʻaki ʻa e filí. … [Ko e filí] ʻokú ne ʻi he ngaahi ʻapí, fakafiefiá, mītiá, lea fakafonuá—ʻi he meʻa kotoa pē ʻoku nau ʻākilotoa koé. ʻI he ngaahi meʻa lahi, ʻoku ʻikai fakatokangaʻi ʻene ʻi aí. (Boyd K. Packer, “Founga ke Kei Moʻui Ai ʻi he Tafaʻaki ʻa e Filí,” Liahona, ʻOkatopa 2012, 2)

• Ko e hā ha ngaahi fakakaukau pe ngaahi ongo ʻokú ke maʻu fekauʻaki mo e fakamatalá ni?

• Ko e hā ha ngaahi sīpinga te ke lava ʻo fakakaukau ki ai ʻoku nau fakatātaaʻi ʻa e meʻa naʻe lea ki ai ʻa Palesiteni Pēká?

ʻOku totonu ke fakakaukau pē ʻa e kau akó ki heʻenau tali ki he ongo fehuʻi ʻi he palakalafi ko ʻení, kae ʻikai tali leʻolahi.

Fakakaukau ʻi ha kiʻi taimi ki he founga ʻoku kaunga ai e lea ʻa Palesiteni Pēká kiate koé. Ko e hā ha niʻihi ʻo e ngaahi founga ʻokú ke fakatokangaʻi ʻoku tākiekina ai koe pe ko e kakai ʻokú ke ʻofa aí ʻe he ngaahi ʻahiʻahi ʻa Sētané? Ko e hā ha ngaahi ngāue ʻokú ke fai ke maluʻi ai koe mei heʻene ngaahi ʻohofí?

Ko e ngaahi tau ʻi he vahaʻa ʻo e kau Nīfaí mo e kau Leimaná

ʻOku fakamatalaʻi ʻe he ngataʻanga ʻo e tohi ʻa ʻAlamaá ha niʻihi ʻo e ngaahi tau naʻe hoko ʻi he vahaʻa ʻo e kau Nīfaí mo e kau Leimaná. ʻI hoʻo ako e ngaahi fakamatala ko ʻení, te ke lava ʻo ako ha ngaahi lēsoni mahuʻinga ʻe lava ʻo tokoni atu ʻi hoʻo tauʻi ʻa Sētané. Hangē ko ʻení, ʻe lava ke fakatatau e ngaahi taumuʻa mo e founga ʻa e kau Leimaná ki he ngaahi taumuʻa mo e ngaahi founga ʻa Sētane kiate kitautolú.

Fakakaukau ke hiki e ongo fakamoʻoni fakafolofola mo e ongo hingoa ko ʻení ʻi he palakipoé. Tohiʻi ʻi ʻolunga ʻi he ʻAlamā 43:5–8, ʻa e Seilahemena. Tohiʻi ʻi ʻolunga ʻi he ʻAlamā 46:3–5, 10, ʻa e ʻAmalekaia. ʻE lava ke vahevahe ʻa e kau akó ki ha ngaahi kulupu pea vahe ke nau ako ha ngaahi veesi.

Lau ʻa e ʻAlamā 43:5–8; 46:3–5, 10, ʻo kumi ʻa e meʻa naʻe fai ʻe he kau taki faiangahala ʻo e kau Leimaná ʻoku faitatau mo e ngaahi taumuʻa mo e ngaahi founga ʻa Sētané.

Fakakaukau ke fakaafeʻi ha niʻihi ʻe loto-fiemālie ke omi ki he palakipoé ʻo hiki e ngaahi taumuʻa mo e ngaahi founga naʻe fakaʻaongaʻi ʻe he tokotaha naʻa nau ako ki aí.

• Naʻe tatau fēfē nai ʻa e ngaahi taumuʻa mo e ngaahi founga ʻa e kau taki ko ʻení mo Sētané?

Naʻe taki ʻi he kau tau ʻa e kau Nīfaí ha tangata angatonu ko Molonai.

Fakakaukau ke hiki ʻa e fakamoʻoni fakafolofola ko ʻení ʻi he palakipoé ʻi he tafaʻaki ʻo e ngaahi fakamoʻoni fakafolofola kimuʻa fekauʻaki mo Seilahemena mo ʻAmalekaiá. Hiki ʻa e Molonaí ʻi ʻolunga ʻi he fakamoʻoni fakafolofola foʻoú.

Lau ʻa e ʻAlamā 48:11–13, 17, ʻo kumi ha ngaahi ʻulungaanga faka-Kalaisi pe ngaahi ʻulungaanga ʻo Molonai.

Fakaafeʻi ha niʻihi ʻe loto-fiemālie ke omi ki he palakipoé ʻo hiki ha ngaahi ʻulungaanga ʻo Molonai ʻoku nau fakamanatu kiate kinautolu ʻa e Fakamoʻuí.

• Ko e hā naʻá ke maʻú?

Ko hono fakatatau ʻa e folofolá kiate koé

ʻE lava ke teuteuʻi koe ʻe he ngaahi fakafehoanaki kuó ke fai ʻi he folofolá ke ke fakatatau, pe fakafekauʻaki ai ha ngaahi fakaikiiki kehe mei he ngaahi fakamatala ko ʻení ki hoʻo moʻuí.

Fakaʻaliʻali e ngaahi sitepu ko ʻení ke lava e kau akó ʻo vakai ki ai lolotonga e lēsoní.

ʻE lava ke tokoni ʻa e founga ko ʻení ke ke fakatatau ai ʻa e folofolá ki hoʻo moʻuí. Lekooti e ngaahi sitepu ko ʻení ʻi hoʻo tohinoa akó.

1. Kumi ha ngaahi fakamatala fakaikiiki mahuʻinga.

2. Fakahoko ha ngaahi fakafehoanaki ki hoʻo moʻuí.

3. ʻIloʻi ha ngaahi lēsoni mahuʻinga.

4. Fakapapauʻi hono fakaʻaongaʻi fakatāutahá.

Akoako ʻa e taukei ako folofola ʻo hono fakatataú ʻaki hono fakaʻaongaʻi e founga ko ʻení ʻi hoʻo ako fekauʻaki mo e taha ʻo e ngaahi tau ʻi he vahaʻa ʻo e kau Nīfaí mo e kau Leimaná.

ʻOku fakataumuʻa ʻeni ke tataki e kau akó ʻi hono fakatatau ʻo e folofolá pea teuteuʻi kinautolu ke fakahoko ʻeni ʻiate kinautolu pē ʻamui ange ʻi he lēsoní.

Sitepu 1: Kumi ha ngaahi fakaikiiki mahuʻinga

Lau ʻa e ʻAlamā 43:17–21, 37–39, 51–54, ʻo kumi ha ngaahi fakaikiiki mahuʻinga. ʻE lava ke kau ʻi he ngaahi fakaikiiki ko ʻení ha kakai, ngaahi feituʻu, ngaahi meʻa, pe ngaahi ngāue ʻoku fakamamafaʻi.

Kole ki he kau akó ke vahevahe ha ngaahi fakaikiiki mahuʻinga naʻa nau maʻu ʻi he ngaahi veesi ko ʻení. ʻE lava ke hiki ʻeni ʻi he palakipoé. Tokoniʻi e kau akó ke nau ʻiloʻi e ngaahi fakaikiiki mahuʻinga ko ʻení, kapau ʻe fiemaʻu.

ʻOku kau ʻi he ngaahi fakaikiiki mahalo naʻá ke fakatokangaʻí ʻa hono maluʻi ʻe Molonai ʻene kau taú ʻaki ha teunga tau mo ha vala matolu, ka naʻe ʻikai tui ʻe he kau Leimaná ha teunga tau malu, pea naʻe ikunaʻi ʻe he kau Nīfaí ʻa e kau Leimaná neongo ʻenau fuʻu tokosiʻí.

Sitepu 2: Fakahoko ha ngaahi fakafehoanaki ki hoʻo moʻuí

Fakakaukau ki he founga ʻe lava ke fakafehoanaki ai e ngaahi fakaikiiki naʻá ke ʻilo ʻi he sitepu kimuʻá ki ha meʻa fakalaumālie pe ngaahi tūkunga ʻi hoʻo moʻuí.

• Ko e hā ha ngaahi fakafehoanaki te ke lava ʻo fakahoko ʻaki e ngaahi fakaikiiki naʻá ke ʻilo ʻi he sitepu kimuʻá? (Kapau ʻe fiemaʻu, vakai ki he Tokāteline mo e Ngaahi Fuakava 27:1, 15–18 pe ʻEfesō 6:11–16. Te ke lava ʻo fakafekauʻaki e ngaahi veesi ko ʻení mo e ngaahi veesi ʻi he ʻAlamā 43.)

Mahalo naʻá ke fakafehoanaki ʻa e teunga tau ʻo e kau Nīfaí ki he teunga tau ʻo e ʻOtuá. Mahalo naʻá ke fakafehoanaki foki ʻa e ikuna ʻa e kau Nīfaí ki hono ikunaʻi ʻo Sētane mo ʻene ngaahi ʻahiʻahí.

Sitepu 3: ʻIloʻi ha ngaahi lēsoni mahuʻinga

Fakakaukau ki he meʻa ʻokú ke ako mei he talanoa ko ʻení ʻa ia te ke lava ʻo fakaʻaongaʻi. Te ke lava foki ʻo fakakaukau ki he meʻa ʻokú ke ako fekauʻaki mo e Fakamoʻuí.

Fakaafeʻi ha kau ako ke vahevahe ʻenau ngaahi tali ki he ongo fehuʻi ko ʻení.

• Ko e hā ha ngaahi lēsoni ʻokú ke ako mei he tau ko ʻeni ʻi he vahaʻa ʻo e kau Nīfaí mo e kau Leimaná ʻe ala tokoni atu ʻi hoʻo ngaahi tau mo Sētané?

• Ko e hā ‘oku akoʻi atu ʻe he talanoá ni fekauʻaki mo Sīsū Kalaisí?

Ko e tefitoʻi moʻoni ʻe taha te tau lava ʻo akó, ʻoku foaki mai ʻe Sīsū Kalaisi ʻa e maluʻi ʻoku tau fiemaʻu ʻi heʻetau tau mo Sētané.

Sitepu 4: Fakapapauʻi hono fakaʻaongaʻi fakatāutahá

Fakakaukau ki he founga te ke lava ai ʻo fakaʻaongaʻi e ngaahi lēsoni naʻá ke ʻiloʻi ʻi he sitepu kimuʻá.

• Ko e hā te ke lava ʻo fai ke maʻu ʻa e maluʻi ʻa Sīsū Kalaisí meia Sētané?

ʻI he ngaahi founga lahi ke fakaʻaongaʻi ai e moʻoni ko ʻení, mahalo naʻá ke fakakaukau ki he founga ʻoku maʻu ai e maluʻi ʻa e Fakamoʻuí ʻi he ngaahi ngāue faivelenga hangē ko e lotú (vakai, Tokāteline mo e Ngaahi Fuakava 10:5), ako folofolá (vakai, 1 Nīfai 15:24), pe tauhi e ngaahi fekau ʻa e ʻEikí (vakai, Mōsaia 2:41).

Toe akoako hono fakatatau ʻo e folofolá

ʻOku fakataumuʻa ʻeni ke tokoniʻi e kau akó ke fakaʻaongaʻi ʻa e taukei ʻo hono fakatatau ʻo e folofolá kiate kinautolu peé. Kapau ʻe fiemaʻu, vahe ki he kau akó ha hoa pe ha kulupu ke nau ngāue mo ia. Fakaʻaliʻali ʻa e ngaahi potufolofola ko ʻení, pea tuku ke vakai e kau akó ki he sitepu ʻe fā naʻe fakaʻaliʻali kimuʻa ʻi he lēsoní ke nau lava ʻo fakaʻaongaʻi kinautolu lolotonga ʻenau akó.

Fili ha veesi ʻe ua pe lahi ange, pea ʻi hoʻo akó, akoako fakaʻaongaʻi ʻa e founga sitepu ʻe fā ki hono fakatatau ʻo e folofolá.

• ʻAlamā 48:7–9; 49:13–15

• ʻAlamā 48:14–16

• ʻAlamā 49:1–5, 8–9

• ʻAlamā 49:18–23

• ʻAlamā 50:1–6

• ʻAlamā 50:17–23

ʻOange ki he kau akó ha faingamālie ke vahevahe ʻa e meʻa ne nau ʻilo mei heʻenau akó. Te ke lava foki ʻo fakakaukau ke tānaki atu haʻo ngaahi fakakaukau mei he ngaahi veesi ko ʻení.

• Ko e hā ha ngaahi fakaikiiki mahuʻinga naʻá ke ʻiloʻi mei ha talanoa naʻá ke ako?

• Ko e hā ha ngaahi fakafehoanaki naʻá ke fakahoko ʻi he ngaahi fakaikiiki ko iá mo e ngaahi tafaʻaki ʻo hoʻo moʻuí?

• Ko e hā ha lēsoni ʻe taha pe lahi ange naʻá ke ako mei he talanoa ko ʻení?

• Te ke fakaʻaongaʻi fēfē nai ʻa e ngaahi lēsoni ko ʻení ʻi hoʻo moʻuí?

Fakamatala Fakamahinó mo e Puipuituʻá

Ko e hā ha ngaahi founga ʻoku tau ʻi ha tau fakalaumālie ai he kuongá ni?

Naʻe akonaki ʻa Palesiteni Lāsolo M. Nalesoni ʻo pehē:

ʻOku hoko moʻoni e fāinga mo e angahalá. ʻOku liunga fā e feinga ʻa e filí ke uesia ʻetau fakamoʻoní mo taʻofi e ngāue ʻa e ʻEikí. ʻOkú ne fakamahafu hono kau muimuí ʻaki ha ngaahi mahafu-tau mālohi ke taʻofi ke ʻoua te tau maʻu ʻa e fiefia mo e ʻofa ʻa e ʻEikí. (Russell M. Nelson, “Te Tau Lava ʻo Fai Lelei Ange pea Toe Lelei Ange,” Liahona, Mē 2019, 68)

ʻOku fakautuutu ai pē hono ʻohofi ʻe he filí ʻa e tuí, mo kitautolu pea mo hotau ngaahi fāmilí. ʻOku fiemaʻu ke tau fakafepakiʻi mo ngāue tōmuʻa leva ka tau lava ʻo hao fakalaumālie. (Russell M. Nelson, “Lea Fakafeʻiloaki,” Liahona, Nōvema 2018, 7)

Ko e hā te u lava ʻo fai ke maluʻi ai au mei he filí?

Naʻe fakamatalaʻi ʻe Palesiteni Lāsolo M. Nalesoni ʻo pehē:

Kuo ʻosi talaʻofa mai “kapau [te tau] mateuteu ʻe ʻikai [te tau] manavahē” [Tokāteline mo e Ngaahi Fuakava 38:30]. Ko e fakapapauʻi mai ko ʻení ʻoku ʻi ai hono lelei lahi he ʻahó ni. Kuo ʻosi folofola ʻa e ʻEikí neongo ʻa e ngaahi faingataʻa makehe ʻo e ʻaho ní, ka ko kinautolu ʻe langa honau fakavaʻé ʻia Sīsū Kalaisí, mo ʻosi ako ki he founga hono fakaʻaongaʻi Hono mālohí, ʻoku ʻikai fiemaʻu ke nau moʻulaloa ki he ʻū meʻa fakahohaʻa makehe ʻo e kuonga ko ʻení. (Russell M. Nelson, “Ko e Temipalé mo Hoʻo Fakavaʻe Fakalaumālié,” Liahona, Nōvema 2021, 94)

Ko e hā te u lava ʻo fai ke ngaohi hoku ʻapí ko ha potu ʻo e malu?

Mamata ʻi he vitiō ko ʻení ke ako lahi ange ki he meʻá ni.

Ngaahi ʻEkitivitī Fakalahi ki he Akó

ʻAlamā 50:17–23. “Naʻe teʻeki ke ʻi ai ha taimi fakafiefia ange”

Tokoni ki he kau akó ke nau fakakaukau ki ha ngaahi taimi fakafiefia ʻi heʻenau moʻuí. Te ke lava ʻo fakaafeʻi e kau akó ke lau ʻa e ʻAlamā 50:17–23, ʻo kumi ʻa e ʻuhinga naʻe tāpuakiʻi mo fiefia ai ʻa e kau Nīfaí. Te mou lava leva ʻo aleaʻi e ongo fehuʻi hangē ko ʻení, “Ko e hā ʻokú ke ako fekauʻaki mo e ʻEikí mei he veesi 19 ʻe lava ʻo tokoni kiate koe ʻi hoʻo moʻuí?” mo e “Ko e hā te tau lava ʻo manatuʻi fekauʻaki mo e talangofua ki he ʻEikí, neongo ʻa e ngaahi taimi faingataʻa ʻoku tau foua ʻi he moʻuí?”

Naʻe fakamatalaʻi ʻe Palesiteni Lāsolo M. Nalesoni, “ʻi hono tukutaha ʻetau tokangá he palani ʻa e ʻOtuá ki he fakamoʻuí, pea mo Sīsū Kalaisi mo ʻEne ongoongoleleí … te tau lava ʻo ongoʻi fiefia ʻo tatau ai pē ko e hā e meʻa ʻoku hokó—pe ʻikai ke hoko—ʻi heʻetau moʻuí” (“Fiefiá mo e Moʻui Fakalaumālié,” Liahona, Nōvema 2016, 82).

ʻAlamā 50–51. Fakaʻehiʻehi mei he māvahevahé mo e fakakikihí ke pukepuke ʻa e melinó

Fakakaukau ke hiki ha ngaahi lea ʻuhinga tatau ʻo e foʻi lea fakakikihí ʻi he palakipoé pe tā ha fanga kiʻi fakatātā faingofua te ne lava ʻo fakatātaaʻi ʻa e fakakikihí. ʻEke ki he kau akó ʻa e founga kuo nau vakai ai ki hano uesia kovi ʻe he fakakikihí ha ngaahi moʻui.

ʻE lava ke lau ʻe he kau akó ʻa e ngaahi fakamoʻoni fakafolofola ko ʻení, ʻo kumi e nunuʻa ʻo e fakakikihí ʻi he kau Nīfaí.

• ʻAlamā 50:23–26, 35–36

• ʻAlamā 51:1–8, 14–16, 21

Tokoni ke ʻilo ʻe he kau akó ʻa e founga ʻe lava ke nau fakaʻaongaʻi ai ʻa e meʻa naʻa nau akó ʻi heʻenau moʻuí ʻaki hono aleaʻi ha ngaahi fehuʻi hangē ko ʻení: Ko e hā ʻene ʻuhinga kiate koe ʻa hono maʻu ʻo e melinó ʻi ho fāmilí, ngaahi kaungāmeʻá, pe ʻi homou koló? Te ke tokoni fēfē nai ke fakaleleiʻi ha fakakikihi ʻi ha taha ʻo e ngaahi tafaʻaki ko ʻení ʻi hoʻo moʻuí?

ʻAlamā 50:1–6. ʻOua naʻa tuku e teuteú

ʻE lava ke lau ʻe he kau akó ʻa e ʻAlamā 50:1–6 pea tā ha fakatātā ʻokú ne fakafofongaʻi e ngaahi teuteu ʻa e kau Nīfaí. Fakakaukau ke fakaʻaongaʻi ʻa e lea ko ʻeni ʻa Palesiteni Nalesoní ke tokoni ke mahino ki he kau akó ʻa e mahuʻinga ʻo e teuteú neongo ʻoku teʻeki hā mahino mai ʻa e fakatuʻutāmakí:

“Neongo naʻe tokamālie, ʻa e meʻa kotoa, ka naʻe kei hokohoko atu pē hono teuteuʻi ʻe he ʻEikitau ko Molonaí ʻa hono kakaí. Naʻe ʻikai pē ke ne teitei tuku. Naʻe ʻikai pē ke ne teitei fakafiefiemālie.

“ʻOku ʻikai teitei tuku e ʻoho ʻa e filí. Ko ia ai, he ʻikai ke tau teitei lava ʻo taʻofi ʻetau teuteú!” (Russell M. Nelson, “Tali Lelei ʻa e Kahaʻú ʻi he Tui,” Liahona, Nōvema 2020, 75)