Helamana 5:1–13

“O Le Papa o lo Tatou Togiola”

Na i ai se taimi na e lagonaina ai le si’o faataamilo o oe e faatosinaga le lelei po o faaosoosoga a le tiapolo? Sa faatusaina e le perofeta o Helamana ia osofaiga a Satani i se afā ma ni matagi malolosi ma le uato’a lea e taia ai i tatou. Sa ia folafola mai foi e faapea o i latou o e fausia le faavae o o latou olaga “i luga o le papa o lo tatou Togiola” (Helamana 5:12) o le a i ai le malosiaga e tetee atu ai i le leaga ma tumau faamaoni ai. O lenei lesona e mafai ona fesoasoani ia te oe e tetee atu ai i le tiapolo ma fausia ai lou faavae ia Iesu Keriso.

Fesoasoani i tagata aoao e faaloloto lo latou talisapaia ma le alofa mo Iesu Keriso. A o aoao tamaiti aoga e uiga ia Iesu Keriso, fesoasoani ia i latou ia sili atu ona nai lo o le na o le aoaoina e uiga i mea na Ia fetalai mai ai ma faia ae i le aoaoina ai lea pe o ai o Ia. O se tasi o auala e faia ai lenei mea o le taulai atu lea i Ona uiga faaalia ma uiga auaumama. Uunaia tamaiti aoga e manatunatu pe faapefea ona faatino e le Faaola Lona mana i o latou olaga.

Sauniuniga a le tamaitiiti aoga: Valaaulia tamaiti aoga e faitau le Helamana 5:12 ma faailoga upu po o fasifuaitau ia e anoa ia i latou. Mafaufau foi e valaaulia tamaiti aoga e amata ona taulotoina le fuaitau atoa.

Gaoioiga e Ono Mafai Ona Aoao Ai

O lou faavae faaleagaga

I luga o le laupapa, lisi ai tali a tamaiti aoga i le fesili lenei.

• O a nisi o luitau po o faafitauli e ono luluina ai le faatuatua o se tagata po o se faavae faaleagaga? Mafaufau e lisi i latou i totonu o lau api faamaumau mo suesuega.

Mafaufau e faaali atu se ata o le Malumalu o Sate Leki.

I le taimi o le konafesi aoao ia Oketopa 2021, sa talanoaina ai e Peresitene Russell M. Nelson le manaomia ona faamalosia le uluai faavae o le Malumalu o Sate Leki. Ona ia valaaulia lea o tagata o le Ekalesia e mafaufau i o latou lava faavae faaleagaga. Faitau le faamatalaga lenei ma maitau pe o faapefea ona faatusatusa e Peresitene Nelson le faamalosia o le malumalu i o tatou olaga patino.

I se tulaga faapena, o le taimi lenei tatou te faatinoina ai taitoatasi ni fuafaatatau tulagaese—masalo o ni fuafaatatau tatou te le’i faia muamua lava—e faamalolosia ai o tatou faavae faaleagaga patino. O vaitaimi fou e lei oo mai muamua e manaomia ona i ai ni fuafuaga fou e lei aumaua muamua.

O’u uso e ma tuafafine pele, o aso nei e gata ai. Afai e ao ia te oe ma a’u ona tetee atu i mea lamatia ma faatosinaga o loo foufou mai, e taua tele le tofu maua e i tatou o se faavae faaleagaga mausali ua atia’e i luga o le papa o lo tatou Togiola, o Iesu Keriso.

O lea ou te fesili atu ai ia te outou taitoatasi, o le a le mausali o lou faavae? Ma o a ni mea o loo manaomia e faamalosia ai lau molimau ma le malamalamaaga o le talalelei? (Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 93)

• O le a se mea e tumatila ia te oe mai le saunoaga a Peresitene Nelson?

Mafaufau e faaali atu pe tusi fesili a Peresitene Nelson i luga o le laupapa a o mafaufau loloto ma tusitusi tamaiti aoga.

Mafaufau loloto pe faapefea ona e tali atu i fesili a Peresitene Nelson e faatatau i lou faavae faaleagaga. Saili le uunaiga a le Agaga Paia, ma tusi i lalo au tali.

Na uunaia e Helamana ona atalii ia manatua

I le tausaga lona 54 o le nofoaiga a faamasino, o le toatele o sa Nifae na amata ona piopio ma filifili le leaga nai lo le lelei. O le taunuuga, na faamavae Nifae o se faamasino sili ma faatasi atu ma lona uso o Liae i le talaiina atu o le afioga a le Atua i tagata (tagai Helamana 5:1–4), e pei lava ona faia e le tamā o lona tamamatua, o Alema le itiiti, i le 60 tausaga na muamua atu (Alema 4:15–20). Sa mafai e Liae ma Nifae ona tumau faamaoni, i se vaega ona sa laua manatuaina aoaoga a lo la tamā, o Helamana.

Mafaufau e tusi upu Manatua, Manatua i luga o le laupapa o se ulutala. Valaaulia tamaiti aoga e faitau le Helamana 5:5–11 ona o mai lea i le laupapa ma tusi se mea se tasi na ta’u atu ia Nifae ma Liae ia manatua. Afai ua uma ona i ai i luga o le laupapa se mea na manao se tamaitiiti aoga e tusi, e mafai e le tamaitiiti aoga ona fai se faailoga faasa’o i tafatafa. Afai e lei maua se avanoa o tamaiti aoga e tusi ai i luga o le laupapa, e mafai ona latou filifili se mea mai le lisi ma faasoa mai pe faapefea e le manatuaina o lena mea ona fesoasoani ia i latou e faamalolosia ai o latou faavae faaleagaga.

O lo tatou faavae mautinoa.

Faitau le Helamana 5:12, ma vaavaai mo ni upumoni faaopoopo na manao Helamana i ona atalii e manatua.

O leHelamana 5:12 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala iloga ina ia mafai ai ona e mauaina gofie. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

Afai e auai tamaiti aoga i sauniuniga a le tamaitiiti aoga, siaki lo latou alualu i luma i le taulotoina o le Helamana 5:12. Mafaufau e valaaulia i latou e faasoa atu upu ma fasifuaitau ia e anoa ia i latou.

• O a nisi o upumoni na e mauaina i le Helamana 5:12?

O upumoni taua e lua o loo i ai i le Helamana 5:12 o, o Iesu Keriso o lo tatou faavae mautinoa lea ma afai tatou te fausia lo tatou faavae i luga o Iesu Keriso, o le a leai se malosiaga o le tiapolo i o tatou luga.

• E faapefea ona faapei Iesu Keriso o se papa ma se faavae mautinoa mo o tatou olaga?

• E faapefea ona faapei lagona o osofaiga a le tiapolo i lou faatuatua o se matagi malosi po o se asiosio?

E mafai ona outou talanoaina ni auala eseese o loo osofaia ai e le tiapolo faapotopotoga, aiga, le Ekalesia, ma tagata taitoatasi. Atonu tou te talanoaina pe faapefea ona pei luitau ma faafitauli o loo lisiina i luga o le laupapa i le amataga o le lesona o ni matagi malolosi ma asiosio. Valaaulia tamaiti aoga e toe manatunatu i soo se matagi malosi po o asiosio faaletagata lava ia o feagai ma i latou.

Afai e maua, matamata le vitio “O Asiosio Faaleagaga” (2:24) i le ChurchofJesusChrist.org e aoao ai mai ia Elder Neil L. Andersen o le Korama a Aposetolo e Toasefululua i le ala e manumalo ai i asiosio a le tiapolo.

Mafaufau e tusi O Iesu Keriso o lo tatou faavae mautinoa lea i luga o le laupapa. Valaaulia tamaiti aoga e tusi i tafatafa o le faamatalaga a latou tali i le fesili muamua o loo i lalo. Ia saunia e faasoa atu ni nai auala e mafai ai e tamaiti aoga ona fausia o latou faavae ia Keriso ma uunaia le faasoa o ni tali se tele. O nisi auala e mafai ona aofia ai le mulimuli i Lana faataitaiga i le ala e tatalo ai o Ia i Lona Tama, alofa i Ona fili, pe faaalu se taimi e suesue ai i tusitusiga paia ina ia tusia i Lona loto. A uma ona lisi mai e tamaiti aoga a latou tali, fai atu ia i latou e filifili ni nai tali e iloilo. Talanoaina ni faatinoga patino e mafai ona latou faia i lena vaega.

• O a nisi o auala e mafai ona tatou fausia ai o tatou faavae faaleagaga i luga o le “papa o lo tatou Togiola”?

• O a nisi o mea faalavefau i le fausiaina o o tatou faavae i luga o le Faaola i nei auala?

• E mafai faapefea e le ono faia o nei mea ona taofia ai le tiapolo mai le i ai o le malosiaga i o tatou luga?

Faaaogaina patino

Mafaufau i ni matagi malolosi faaletagata lava ia po o ni luitau o loo feagai nei ma oe pe e ono feagai ma oe i le lumanai. Mafaufau ma le agaga tatalo pe faapefea e le fausiaina po o le faamalosia o lou faavae ia Iesu Keriso ona fesoasoani ia te oe e tetee atu ai i nei luitau.

Tusi se ata e faatusa ia te oe o loo e tu i luga o se faavae mautu. Faaigoa le faavae “Iesu Keriso.” Tusi ni ufanafana mu (e pei o se tao) po o se asiosio ma faaigoa ia ufanafana po o asiosio i ni faaosoosoga po o ni luitau patino o loo feagai ma oe.

I luga po o talaane o le faavae, tusi ai se mea patino o loo e faia pe mafai foi ona amata faia e fausia ai lou faavae ia Iesu Keriso.

Mo se faataitaiga, e mafai ona avea o se sini patino le faaalu o le taimi e fai ai galuega o talafaasolopito o aiga po o le auai atu i le malumalu. Atonu o le suesueina o le talalelei a le Faaola i aso taitasi i tusitusiga paia po o le faamaoni atili i tatalo faaletagata lava ia. O le suesueina o le atamai i aoaoga faavae e mafai foi ona fesoasoani ia te oe e faamalosia ai lou faavae.

Mafaufau i soo se faafitauli atonu e manaomia ona e manumalo ai, ma tusi mea o le a e faia e manumalo ai.

Afai e mafai, seti se faamanatu i lau telefoni e fesoasoani ai ia te oe e tulitatao ai tautinoga na e faia i le taimi o lenei lesona. Mafaufau e faasoa atu au tautinoga i se tagata faatuatuaina o le aiga, taitai o le Ekalesia, po o se uo ma fai atu ia i latou e fesoasoani ia te oe i le tausiaina.

Afai e mafai, tuu atu i tamaiti aoga se taimi i le vasega e amata ai mea na latou tautino e fai. Uunaia tamaiti aoga e faaauau i le aiga. Mafaufau e tuuina atu le molimau e uiga i le avea o le Faaola ma o tatou faavae mautinoa ma valaaulia tamaiti aoga e faia foi faapena.

Manatu ma Talaaga o Faamatalaga

E mafai faapefea ona ou fausia lo’u faavae faaleagaga ia Iesu Keriso?

Na aoao mai Elder Quentin L. Cook o le Korama a Aposetolo e Toasefululua:

O faavae faaletagata lava ia, e pei o le tele o sailiga taua, e masani lava ona atiae malie—tasi le laufola, tasi le aafiaga, tasi le luitau, tasi le faafitauli, ma tasi le faamanuiaina i le taimi e tasi. …

E pei lava o taumafaiga faifai soo ma le tumau e manaomia ina ia maua ai le malosi faaletino pe faalemafaufau, e faapena foi lona moni i mataupu faaleagaga. …

I le faaiuga, o lo tatou faatuatua ia Iesu Keriso o le faavae taua lea mo lo tatou faaolataga e faavavau ma le faaeaga. (Quentin L. Cook, “O Faavae o le Faatuatua,” Liahona, Me 2017, 127–31)

Na aoao mai Elder Donald L. Hallstrom o le Fitugafulu:

O loo avanoa mo oe meafaigaluega uma e te manaomia e fausia ai, faaleleia, pe faamalosia ai lou faavae. O meafaigaluega lava ia e tasi e faaaoga e faatumauina ai se faavae mautu. Ua e iloa na mea. E aofia ai le tatalo faifai pea ma le loto i ai; o le suesue i le talalelei i aso taitasi e ala i tusitusiga paia; o le auai atoatoa i sauniga a le Ekalesia, aemaise lava le aai ma feinu i le faamanatuga ma le faamoemoega tonu; auauna atu faifaipea ma le le manatu faapito; ma le tausia ma le maelega o feagaiga.

O se isi meafaigaluega taua o fautuaga a perofeta soifua. (Donald L. Hallstrom, “Jesus Christ: Our Firm Foundation,” Ensign, Aperila 2016, 61).

E mafai faapefea ona ou feagai ma o’u matagi malolosi ma luitau faaletagata lava ia ma le loto mautinoa?

Na aoao mai Peresitene Russell M. Nelson:

Faamolemole talitonu mai ia te a’u pe a ou fai atu, a atiae lou faavae faaleagaga ma le mausali i luga o Iesu Keriso, e lē manaomia la ona e fefe. A o e faamaoni ai i au feagaiga, o le a faamalosia oe e Lona mana. O lea, pe a oo ina tutupu mafui’e faaleagaga, o le a mafai ona e tu malosi ona ua mautu ma lē maluelue lou faavae faaleagaga. (Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 96)

Gaoioiga Faaopoopo e Aoao Ai

Amata le lesona i se vitio

A uma ona talanoaina luitau i lo tatou faatuatua ma faavae faaleagaga, mafaufau e faaali atu le “O Le Malumalu ma Lou Faavae Faaleagaga” mai le faailo taimi 1:01 i le 2:55 mai le konafesi aoao ia Oketopa 2021 nai lo le faitauina o le saunoaga a Peresitene Nelson.

Helamana 5:6–7. “Fai le mea ua lelei”

A o faailoa mai e tamaiti aoga manatu ma tagata na mananao Helamana i ona atalii ia manatua, mafaufau e valaaulia i latou e fefaasinoa’i mau o le Helamana 5:6–7 ma le Galuega 10:38. Fai atu ia i latou e faasoa mai pe o faapefea ona latou taumafai e mulimuli i le faataitaiga a le Faaola o le faia o mea lelei. Ia mafaufau foi e talanoaina pe mafai faapefea e le faia o mea lelei i o tatou aiga, i o tatou nuu, ma i le lalolagi ona faamalolosia ai o tatou faavae faaletagata lava ia ia Iesu Keriso.

Helamana 5:10–11. Togiolaina mai a tatou agasala, ae le i a tatou agasala

Afai e mafai ona manuia tamaiti aoga mai le malamalama atili i le aoaoga faavae o loo aoao mai i le Helamana 5:10–11 (tagai foi Alema 11:34–37), valaaulia i latou e faamatala ia fuaiupu i a latou lava upu. Mo se fesoasoani ma se malamalama faaopoopo, faasino atu tamaiti aoga i le faamamafa faaleaoaoga faavae “O Le Salamo o le Meaalofa lea a le Atua ia i Tatou” (D. Todd Christofferson, i le “Oketopa 2016 Tusigāmanatu o le Konafesi,” Liahona, Ian. 2017, 8). O le saunoaga a Elder D. Todd Christofferson “Tumau i Lo’u Alofa” (Liahona, Nov. 2016, 48–51) o se punaoa taua foi e fesoasoani ai i tamaiti aoga ia malamalama i le ala e laveai ai i tatou e le Faaola i tuutuuga o le salamo.