Helamana 1–6

Vaaiga Aoao

E lei leva lava ona mavae le maliliu ai o Kapeteni Moronae, Helamana, ma le faamasino sili o Paorana, ae mafatia loa sa Nifae i taunuuga o finauga e tele. Na manatua e atalii o Helamana, o Nifae ma Liae, le ala na folafola atu ai e lo latou tamā e faapea, o i latou o e na fausia le faavae o o latou olaga i “luga o le papa o lo tatou Togiola” (Helamana 5:12) o le a i ai le malosiaga e tetee atu ai i le leaga ma tumau ai i le faamaoni. Ina ua ufitia e le pogisa se vaega o sa Lamana amioleaga, sa aoaoina i latou e salamo ma faatuatua ia Iesu Keriso. I le mavae ai o le tele o tausaga, a o otootoina e le perofeta o Mamona le talafaasolopito o sa Nifae ma tusifaamaumauina i luga o papatusi auro, sa ia faasino mai i nisi o taimi ia upumoni taua e faaaoga ai faamatalaga e pei o le “ua faapea ona tatou vaai ai.” O upumoni sa ia faamamafaina e mafai ona fesoasoani ia i tatou i luitau o loo tatou feagai ai i aso nei.

Saunia e Aoao Atu

O faamatalaga nei e tuuina atu ai i faiaoga ni manatu o mea atonu e manaomia ona muai saunia mo lesona taitasi.

Helamana 1–4; 6

Manatua: O le taamilosaga o le faamaualuga i le Tusi a Mamona o loo talanoaina i le otootoga o suesuega mo le Helamana 1–6 i le Sau, Mulimuli Mai ia te A’u—Mo Tagata Taitoatasi ma Aiga: Tusi a Mamona 2024. I lenei tusi lesona, o le taamilosaga o le faamaualuga o le a faamamafaina i le lesona o le Helamana 11–12.

Faamoemoega o le lesona: O lenei lesona e mafai ona fesoasoani ai i tamaiti aoga ia malamalama i taunuuga o finauga ma le ala e maua ai le filemu ia Keriso i se lalolagi o fefinauaiga.

Sauniuniga a le tamaitiiti aoga: Valaaulia tamaiti aoga e tatalo mo se tasi pe e uiga i se mea lea na avea ma se faapogai o finauga i o latou olaga.
Anotusi e faaali atu: O se siata o li’o fesootai mo tamaiti aoga e kopi i a latou api faamaumau
Vitiō: “O Le Mana o le Malosiaga Faaleagaga” (17:17; matamata mai le faailo taimi 1:38 i le 3:31)
Fautuaga faafaiaoga faavitio: E mafai e tamaiti aoga ona faaali atu a latou ata o li’o o faamatalaga ua mae’a ma le faamatalaga o le mataupu faavae sa latou faailoaina mai i a latou suesuega. E mafai ona latou faia lenei mea e ala i le pueina o se ata faaeletonika o a latou ata o li’o o faamatalaga ma faasoa atu a latou lau, pe mafai foi ona uu a latou ata i luga o le latou meapueata.

Helamana 3; 6

Faamoemoega o le lesona: O lenei lesona e mafai ona fesoasoani i tamaiti aoga e faailoa upumoni mai tusitusiga paia ma iloilo pe mafai faapefea e na upumoni ona aafia ai o latou olaga.

Sauniuniga a le tamaitiiti aoga: Valaaulia tamaiti aoga e vaavaai mo se upumoni taua se tasi pe lua i le taimi o a latou suesuega faaletagata lava ia pe faaleaiga o tusitusiga paia. Fai atu ia i latou e sauni e faamatala mai pe faapefea ona latou mauaina upumoni anoa i tusitusiga paia.
Fautuaga faafaiaoga faavitio: Mafaufau e valaaulia tamaiti aoga e faasoa mai i le talanoaga ni mataupu faavae eseese latou te maua i le Helamana 3 ma le Helamana 6.

Helamana 5:1–13

Faamoemoega o le lesona: O lenei lesona e mafai ona fesoasoani i tamaiti aoga e tetee atu i le tiapolo ma fausia o latou faavae ia Iesu Keriso.

Sauniuniga a le tamaitiiti aoga: Valaaulia tamaiti aoga e faitau le Helamana 5:12 ma faailoga upu po o fasifuaitau ia e anoa ia i latou. Mafaufau foi e valaaulia tamaiti aoga e amata ona tauloto le fuaitau atoa.
Ata: O se ata o le Malumalu o Sate Leki
Vitio: “O Le Malumalu ma Lou Faavae Faaleagaga” (18:59; matamata mai le faailo taimi 3:19 i le 4:26); “O Asiosio Faaleagaga” (2:24)
Fautuaga faafaiaoga faavitio: A o faasoa atu e tamaiti aoga ni auala e fausia ai o latou faavae ia Iesu Keriso, mafaufau e faaaoga le vaega o le laupapa paepae e lisi ai a latou tali ma fesoasoani ia i latou e iloilo nisi o na tali.

Atamai i Aoaoga Faavae: Helamana 5:12

Faamoemoega o le lesona: O lenei lesona e mafai ona fesoasoani ai i tamaiti aoga e tauloto le mau faasino o le atamai i aoaoga faavae ma fasifuaitau autu o le mau mo le Helamana 5:12, faamatala le aoaoga faavae o lo o aoaoina i lenei fuaitau, ma faaaoga mataupu faavae o le mauaina o le malamalama faaleagaga i tulaga masani o le olaga.

Sauniuniga a le tamaitiiti aoga: Valaaulia tamaiti aoga e faaauau pea ona taumafai e tauloto le fuaitau atoa o le Helamana 5:12.
Vitio: “Ua Toetu Keriso; O Le Faatuatua ia te Ia O Le A Aveesea ai Mauga” (16:22; matamata mai le faailo taimi 8:42 i le 9:43)
Ata: Ata o se tagata talavou o loo tu i luga o se papa
Anomea mo tamaiti aoga: Tamai maa, fasipepa, kelū, mea faapipii, pa’umeme’i, ma penimaka
Fautuaga faafaiaoga faavitio: Mafaufau e tuu tamaiti aoga i ni vaega taapeape e talanoaina ai mataupu faavae o le mauaina o le malamalama faaleagaga. E mafai ona e tuuina i latou i ni vaega eseese mo mataupu faavae taitasi.

Helamana 5:14–52

Faamoemoega o le lesona: O lenei lesona e mafai ona fesoasoani ai i tamaiti aoga e faalagolago ia Iesu Keriso e aveesea ai lagona o le fefe ma le pogisa ae suia i Lona olioli, filemu, ma le malamalama.

Sauniuniga a le tamaitiiti aoga: Valaaulia tamaiti aoga e mafaufau loloto i auala e faapei ai Iesu Keriso o le malamalama (tagai Ioane 8:12).
Lesona faatino: O se moliuila
Fautuaga faafaiaoga faavitio: Ina ia amata le vasega, mafaufau e talanoaina pe faapefea e se malamalama lelei ma lē lelei ona aafia ai le lelei o le faaali mai o tamaiti aoga i le meapueata. E mafai ona e valaaulia tamaiti aoga e ki nisi moli faaopoopo e fesoasoani e iloa lelei ai i latou i luga o le lau.