Helamana 11–12

O Le Taamilosaga o le Faamaualuga

O se tasi o mamanu i le Tusi a Mamona atoa e faapea e matele ina galo i tagata le Atua ma iu ina faamaualuga pe a sologa lelei mea uma mo i latou. I le isi itu, e matele lava ina faalotomaualaloina e tagata i latou lava ma liliu atu i le Atua pe a oo mai faigata. Ua e maitauina ea lenei mamanu i le lalolagi pe i lou olaga? O lenei lesona e mafai ona fesoasoani ia te oe e lagona ai se naunautaiga sili atu e faateleina le lotomaualalo i le Atua.

Fesoasoani i tamaiti aoga e aoao mai mamanu faaletusitusiga paia. O loo i ai mamanu i tusitusiga paia uma i uiga ma amioga, autu faaleaoaoga faavae, ma gagana faatusi paia. E ala i le faamamafaina o nei mamanu, e mafai ai ona e fesoasoani i tamaiti aoga ia iloa aoaoga faavae ma mataupu faavae taua. Uunaia i latou e faaaoga mea ua latou aoaoina faatasi ai ma le fesoasoani a nei mamanu.

Sauniuniga a le tamaiti aoga: Mafaufau e valaaulia tamaiti aoga e faitau le saunoaga a Peresitene Ezra Taft Benson le konafesi aoao ia Aperila 1989 ua faaautuina “Beware of Pride.” O lenei lauga e mafai ona maua i le Gospel Library po o le Ensign, Me 1989, 7–12.

Gaoioiga e Ono Mafai Ona Aoao Ai

Mamanu

Vaavaai i fuainumera nei. I le 30 sekone, sue le tele o fuainumera e te mafaia i le faasologa faafuainumera, e amata i le “1.”

O le gaoioiga lenei ua faamoemoe e faaalia ai le taua o le faailoaina o mamanu. Faaali atu le ata pe tusi numera i luga o le laupapa, e mulimuli i le mamanu o loo faamatala atu i lalo.

• E fia fuainumera na mafai ona e maua i le 30 sekone? Na e maitauina se mamanu i le tulaga o fuainumera?

Afai na maitauina e tamaiti aoga se mamanu, valaaulia i latou e faasoa mai. Afai e lei maitauina e tamaiti aoga le mamanu o loo faamatalaina i le parakalafa lenei, aoao atu ia i latou. Faasino atu ni nai fuainumera muamua i le faasologa e fai ma faataitaiga.

O loo i ai se mamanu i fuainumera o loo i luga o le siata. Afai e te tuuina i totonu se laina tu sa’o ma se laina faalava i le ogatotonu o le siata e fatu ai ni vaega tutusa se fa, o le a e iloa ai o fuainumera e mulimuli i se mamanu agai i le taumatau, e pei ona faaalia e le aū. Mo se faataitaiga, o le “1” o loo i le itu agavale pito i luga, “2” o loo i le itu taumatau pito i luga, ma faasolo ai faapena.

Faaalu le 30 sekone e toe fai ai le lu’i ma vaai i le eseesega e tupu ai e mulimuli ai i le mamanu.

Atonu e te manao e valaaulia tamaiti aoga e faasoa atu pe na latou alualu i luma ma pe o le a foi le tele.

• O le a le taua o le faailoaina o mamanu e pei o lenei?

O le mafai ona iloa o mamanu o se tomai lea e mafai ona faalauteleina ai lau suesuega o tusitusiga paia. O le faia o lena mea e mafai ai ona fesoasoani ia te oe e faaaoga lelei ai mea o loo i tusitusiga paia i lou olaga.

I le lesona o le asō, o le a e aoao ai e uiga i se mamanu e tele ina faasino i ai o le taamilosaga o le faamaualuga. A o e suesue, mafaufau pe faapefea ona tupu lena mamanu i lou lava olaga ma mea e mafai ona e faia e aloese ai mai le faamaualuga ma faateleina ai le lotomaualalo.

O le taamilosaga o le faamaualuga

Atonu e te manatua sa filiga le perofeta o Nifae ma saili i le na o le faia lava o le finagalo o le Alii. O le taunuuga, sa faamanuiaina o ia e le Alii i le mana tele ma folafola atu e faapea “e oo lava i le faia o mea uma ia te oe e tusa ai ma [lana] upu” (Helamana 10:5). O mea na tutupu ina ua uma ona tuuina atu ia Nifae lenei mana e mafai ona fesoasoani ia i tatou e vaai ai i se faataitaiga o le taamilosaga o le faamaualuga i totonu o sa Nifae.

Mafaufau e faaali atu le ata lenei ma valaaulia tamaiti aoga e tusi le ata o se mea e talitutusa [ma lena mea] i a latou api faamaumau mo suesuega.

Mafaufau e vaevae tamaiti aoga i ni vaega taitoafā. Tuu atu i tamaiti aoga taitasi e faamaea le gaoioiga lenei mo se tasi o vaega o le taamilosaga o le faamaualuga. Ona mafai lea e tamaiti aoga ona faasoa mai mea na latou mauaina i tagata o le vaega ma faailoga a latou tusitusiga paia mo vaega taitasi o le taamilosaga o le faamaualuga. E mafai foi e vaega ona talanoaina le fesili o loo mulimuli mai.

Faitau fuaitau o mau o loo i le ata, e amata i le Helamana 10:13–15. Vaavaai mo upu po o fasifuaitau o loo faamatala ai le vaega o le taamilosaga o le faamaualuga sa i ai tagata. Mafaufau e faailoga na upu ma fasifuaitau ma tusi le igoa o le vaega i pito o itulau o au tusitusiga paia i tafatafa o fuaiupu e faatatau iai.

• Aisea e aoga ai mo i tatou le nofouta i lenei mamanu?

Mafaufau pe o fea e te vaaia ai oe i lenei mamanu. A o faaauau pea ona e suesue, mafaufau pe mafai faapefea ona e faateleina le lotomaualalo ma le faalagolago i le Alii.

Aoao mai i le taamilosaga o le faamaualuga

Nai lo le aoteleina o fuaiupu nei, e mafai ona e valaaulia ni nai volenitia e faitau leotele atu i le vasega.

Ina ua uma ona faamuta e le Alii le oge, sa manuia tagata. Peitai, i totonu o ni nai tausaga, sa toe faamaualuluga tagata ma oo ai i taua ma puapuaga (tagai Helamana 11:21–33). Sa faaosofia i latou e manatua le Atua ae na vave ona toe pauu atu i le faamaualuga ma le amioleaga (tagai Helamana 11:34–38).

Atonu na e maitauina mai lau suesuega o le Tusi a Mamona e i ai taimi na faatali ai e le perofeta o Mamona lana faamatalaga o ni tala patino ina ia faailoa ai lesona e mafai ona tatou aoaoina. E masani lava ona ia faaaogaina fasifuaitau e pei o le “ua faapea ona tatou vaai ai” po o le “ua faapea ona mafai ai ona tatou vaai.”

Tusi le fasifuaitau Ma ua faapea ona mafai ai ona tatou vaai … i luga o le laupapa. Valaaulia tamaiti aoga e faasoa atu a latou tali i le fesili lenei.

• E faavae i mea na e suesueina e uiga ia sa Nifae i le Helamana 11, e faapefea ona e faaumaina le faamatalaga lenei: “Ma ua faapea ona mafai ai ona tatou vaai …”?

Faitau le Helamana 12:1–6, ma vaavaai mo nisi o faaiuga na faia e Mamona ina ua uma ona faasoa atu lenei tala.

• Aisea e te manatu ai e galo i nisi taimi i tagata ua faamanuiaina le Alii?

• E mafai faapefea e se tagata ona aloese mai pe faamisi le faamaualuga ma le puapuagatia o ni vaega o le taamilosaga o le faamaualuga (pusa 1 ma le 2)?

I le avea ai o se vaega o le talanoaga o le fesili na muamua atu, e mafai ona e valaaulia tamaiti aoga e faitau le Alema 62:48–51 ma maitau le ala na mafai ai e se vaega o sa Nifae ona aloese mai le faamaualuga ma ona taunuuga.

Tusi le upumoni lenei i luga o le laupapa: Atonu foi e te mafaufau e tusi ni aū i luga o le ata o le taamilosaga o le faamaualuga lea e alu mai le pusa 4 i tua i le pusa 3.

O se upumoni e mafai ona fesoasoani ia i tatou e tumau ai i vaega sili atu o lenei taamilosaga o le; afai tatou te filifili e manatua le Alii, faamaualalo i tatou lava, ma salamo, e mafai ona tatou aloese mai le faamaualuga ma ona taunuuga.

Valaaulia tamaiti aoga e mafaufau i ni tali i le fesili lenei. E mafai ona e tuuina atu i le toatele o tamaiti aoga se penimaka ma valaaulia i latou e tusi se tali se tasi i luga o le laupapa. Pe e mafai foi e tamaiti aoga ona fai se lisi i a latou api faamaumau mo suesuega ona faasoa mai lea o a latou tali.

E ono fesoasoani foi le faasoa atu o nisi po o faamatalaga uma i le “Manatu ma Talaaga o Faamatalaga” o se vaega o lenei talanoaga.

• O le a se mea e mafai ona tatou faia lea o le a fesoasoani ia i tatou e manatua ai le Alii ma aloese ai mai le faamaualuga?

Iloilo oe lava ia

Mafaufau pe faapefea ona fesootai upumoni sa e suesueina i le asō ia te oe. E mafai ona fesoasoani le iloiloga faaletagata lava ia o loo i lalo i lenei mea. Faavasega au taumafaiga i vaega nei i luga o se fua mai le 1 i le 5, o le 1 o le “leai lava” ma le 5 o le “taimi uma lava.”

E mafai ona e faaali atu fesili ma tuu atu i tamaiti aoga se taimi filemu e manatunatu ai ma iloilo i latou lava i fesili taitasi i a latou api faamaumau mo suesuega. E mafai foi ona aoga mo tamaiti aoga le faia o a latou lava seti o fesili e mafai ona latou faaaogaina e iloilo ai i latou lava e uiga i le faamaualuga. Aua le fai atu i tamaiti aoga e faasoa mai a latou tali.

1. O e lagona ma faailoa atu lou agaga faafetai i le Atua ma isi?

2. E te faaavanoaina se taimi mo le Atua i aso taitasi?

3. O e lagonaina e faapei o ou manuia o taunuuga ia o au lava taumafaiga?

4. E te sailia le fesoasoani ma le taitaiga a le Atua i lou olaga?

5. E te taulimaina isi i le agalelei ma le faaaloalo?

6. O e faitioina isi pe faaaoga faamasinoga amioletonu ia i latou?

Manatu ma Talaaga o Faamatalaga

E mafai faapefea ona ou aloese mai le faamaualuga ma tumau i le lotomaualalo?

Sa aoao mai Peresitene Henry B. Eyring o le Au Peresitene Sili:

E matua faigofie ona galo ia i tatou na tatou o mai i le olaga e aunoa ma se mea. Po o le a lava le mea tatou te vave maua e foliga mai o la tatou aia masani, ae le o se meaalofa. Ma e galo ia i tatou le na foai mai. Ona suia lea o la tatou vaai mai mea na tuuina mai ia i tatou i mea tatou te lei mauaina. …

O le feagai ai ma le oti ma faigata e toe faafoi mai ai le manatuaina ma o lea o le lotofaafetai i tagata amiotonu faapea foi ma e amioleaga. Ae e tatau ona i ai se isi auala e manatua ai, se tasi e mafai ona tatou filifilia. …

E mafai ona e filifili e manatua le meaalofa silisili o meaalofa uma. O le vaiaso a sau, e mafai ona e alu ai i se sauniga e faia ai le faamanatuga. O le a e faalogo i upu, “Manatua pea o ia.” E mafai ona e tautino atu e faia lena mea, ma o le a fesoasoani le Agaga Paia ia te oe. (Henry B. Eyring, “Remembrance and Gratitude,” Liahona, Ian. 1990, 12, 13)

Na aoao mai Elder Dale G. Renlund o le Korama a Aposetolo e Toasefululua:

E finagalo lo tatou Tama Faalelagi ia i tatou ia manatuaina Lona agalelei ma le agalelei a Lona Alo Pele, e le mo le faamalieina o i La’ua lava, ae mo le faatosinaga a lena manatuaga ia i tatou. E ala i le mafaufau i lo La’ua agalelei, e faateleina ai la tatou vaaiga ma le malamalamaaga. E ala i le manatunatu i lo La’ua agaalofa, o le a atili ai ona tatou lotomaualalo, lototatalo, ma tumau. (Dale G. Renlund, “Mafaufau i le Agaglelei ma le Silisiliese o le Atua,” Liahona, Me 2020, 41)

Na faamalamalama mai e Elder Wilford W. Andersen o le Fitugafulu:

Pe a foliga mai e le mafai ona tatou faia se mea sese, pe a sologa lelei mea uma, afai nai lo le avea ma e faamaualuga ae avea ma e e lotofaafetai , ona tatou o ese lea mai le taamilosaga o le faamaualuga. Ae … o le a tatou o ese atu i luga agai atu i le Atua. Ina ia ulufafo mai le taamilosaga o le faamaualuga … , e tatau ona tatou iloa o faamanuiaga uma tatou te maua e mai le Tama Faalelagi ia. O Ia o le puna o mea lelei uma i o tatou olaga—o le punavai o faamanuiaga uma. … Faatumu lou loto i le agaga faafetai mo Lona agalelei alofa mutimutivale. Ia faapelepele ma mulimuli i fautuaga a Ana auauna. O lou lotofaafetai o le a puipuia ai oe e faasaga atu i le faamaualuga ma faia ai se ala mo lou sola ese mai le taamilosaga o le faamaualuga. (Wilford W. Andersen, “The Pride Cycle” [Brigham Young University devotional, Nov. 7, 2017], 5–6, speeches.byu.edu)

Na aoao mai Elder Dieter F. Uchtdorf o le Korama a Aposetolo e Toasefululua e uiga i le lotomaualalo ma le auala e mafai ai ona fesoasoani ia i tatou e manumalo mai le faamaualuga.

Gaoioiga Faaopoopo e Aoao Ai

Isi auala e aoao atu ai le taamilosaga o le faamaualuga

Nai lo le faaali atu i tamaiti aoga o laasaga o le taamilosaga o le faamaualuga, e mafai ona e lisiina mau faasino mo laasaga taitasi ma valaaulia tamaiti aoga e taumafai e faailoa mai laasaga e fa e faavae i mea sa latou suesueina.

O isi nofoaga e faaalia ai le taamilosaga o le faamaualuga

Atonu e te manao e tuu atu i tamaiti aoga e faataitai le faailoaina o le mamanu o le taamilosaga o le faamaualuga i isi vaega o le Tusi a Mamona. E mafai ona e valaaulia i latou e filifili se tasi o fuaitau nei ma vaavaai mo vaega e fa o le taamilosaga o le faamaualuga.

• 3 Nifae 1:20–23, 27–30; 2:1–3

• Eteru 6:16–18; 7:20, 23–27

Ia faaeteete i le faamaualuga

E mafai e tamaiti aoga ona faitau se vaega po o le lauga atoa a Peresitene Ezra Taft Benson o le konafesi aoao o Aperila 1989 “Beware of Pride.” E mafai ona e fai atu i tamaiti aoga e faasoa atu mea na tumatila ia i latou mai aoaoga a Peresitene Benson. E mafai ona latou talanoaina mea na latou aoaoina e uiga i le maua i le faamaualuga, faapea foi ma le auala e mafai ona tatou faateleina ai le lotomaualalo.