Helamana 10

Ua Faamanuia e le Alii ia Nifae

Ina ua mavae ana valoaga e faatatau i le fasiotiga o le faamasino sili, sa mafaufau Nifae i mea uma na faaali atu e le Alii ia te ia, ae sa lotovaivai foi o ia ona o le amioleaga o tagata. A o agai atu o ia i le fale, sa ia maua se aafiaga ofoofogia lea na faamanuiaina ai o ia e le Alii mo lona faamaoni i le faia o Lona finagalo. O lenei lesona e mafai ona fesoasoani e te malamalama ai i upumoni mai le aafiaga o Nifae lea e mafai ona valaaulia ai le taitaiga ma le mana o le Alii i lou olaga.

Valaaulia tamaiti aoga e nafa ma lo latou lava aoaoina. E ui ina taua le matafaioi a le faiaoga, ae o tagata aoao e tupito lava le nafa ma lo latou lava aoaoga. E faagaeetia tamaiti aoga pe a latou suesue i le afioga a le Atua ia iloa ai upumoni e uiga ia Iesu Keriso ma Lana talalelei mo i latou lava. Fesoasoani i au tamaiti aoga ia iloa le taua o manatunatuga patino, mafaufau loloto, ma feutagaiga i le vasega.

Sauniuniga a le tamaitiiti aoga: Valaaulia tamaiti aoga e faitau le Helamana 10 ma vaavaai mo mea e mafai ona latou aoaoina mai le faataitaiga a Nifae lea e mafai ona faamanuiaina ai o latou olaga.

Gaoioiga e Ono Mafai Ona Aoao Ai

O le avea ia agavaa

Mafaufau e amata le vasega e ala i le valaaulia o se tamaitiiti aoga e na te iloa pe faapefea ona faia se tomai faapitoa, e pei o le seleina o se fusiua, e faamalamalama atu i se isi tamaitiiti aoga le ala e fai ai. A uma se taumafaiga puupuu, ona mafai lea e le tamaitiiti aoga atamai ona faaali atu i le isi tamaitiiti aoga le auala e faatino ai le tomai. Afai e te filifili e fai lenei mea, alu i le fesili lona lua o loo sosoo ai.

• E mafai ona e mafaufau i se taimi lea na e aoaoina ai se mea mai le faataitaiga a se isi tagata? O le a lena mea?

• Aisea e mafai ai ona faapitoa le aoga o le aoaoina e ala i faataitaiga?

O le asō o le a e maua ai avanoa e aoao ai i upumoni mai le faataitaiga a le perofeta o Nifae. Atonu e te manatua na tuuaia sese Nifae i le aafia ai i le fasiotiga o le faamasino sili o sa Nifae (tagai Helamana 9:16–20). E ala i musumusuga, na faailoa mai ai e Nifae le tagata fasioti tagata ma sa faasaolotoina o ia (tagai Helamana 9:20–38). A o toe foi atu Nifae i le fale, sa ia maua se aafiaga taua ma le Alii lea o loo tusia i le Helamana 10. O gaoioiga nei e tolu o le a fesoasoani e taiala ai lau suesuega o le mataupu.

Mafaufau e tufatufa atu i tamaiti aoga pepa e tufa atu nei ma valaaulia i latou e faamaea ia gaoioiga.

E mafai ona e vaevaeina tamaiti aoga i ni vaega toalaiti e faamaea se tasi o gaoioiga suesue. Ia mautinoa e atofa se taitai o talanoaga mo vaega taitasi. A uma ua lava se taimi o tamaiti aoga e faamaea ai le gaoioiga suesue muamua, fai ni vaega fou ma tuu atu ia i latou e faamaea se isi gaoioiga e suesue ai. E mafai ona toe faia lenei faagasologa seia oo ina galulue tamaiti aoga i gaoioiga suesue uma e tolu.

O le isi faiga o le tuu atu lea i tamaiti aoga o le taimi e suesue taitoatasi ai anomea mai se tasi o pepa e tufa atu ma ia saunia se lesona puupuu e uiga i mea sa latou aoaoina. Ona mafai lea ona tuu atu i tamaiti aoga ni avanoa e aoao atu ai a latou lesona i se vaega toalaititi, pe e mafai foi e ni nai volenitia ona aoao atu a latou lesona i le vasega.

Gaoioiga Suesue 1: Mafaufau Loloto ma Faaaliga Faaletagata Lava Ia

O le a se mea ua e aoaoina e uiga i le mauaina o faaaliga i lou olaga? I le vaega muamua o le Helamana 10, ua tatou aoao ai e uiga i se aafiaga na maua e Nifae lea na ia maua ai faaaliga ma le mana mai le Atua. O le faataitaiga a Nifae ua aoao ai i tatou i le auala e mafai ai ona faateleina lo tatou gafatia e maua ma iloa faaaliga mai le Alii.

Faitau le Helamana 10:1–3, ma vaavaai mo mea na taitai atu ai Nifae i le mauaina o faaaliga mai le Alii.

• O le a se mea sa e mauaina?

Matau le upu mafaufau loloto i fuaiupu 2 ma le 3. Atonu e te manao e faailoga lena upu i au tusitusiga paia.

O se tasi o upumoni e mafai ona tatou aoao mai nei fuaiupu e faapea o le mafaufau loloto i mea a le Alii e saunia ai i tatou e maua faaaliga.

• E mafai faapefea ona e faamatalaina le mafaufau loloto i se tasi e le o mautinoa po o le a lena mea?

• Aisea e ono fesoasoani ai le mafaufau loloto ia i tatou ia maua faaaliga?

Na aoao mai Peresitene M. Russell Ballard o le Korama a Aposetolo e Toasefululua:

E taua le filemu ma le faalogo ma mulimuli i le Agaga. Ua tele naua mea faalavefau e tosina ai la tatou gauai atu, nai lo o se isi lava taimi i le talafaasolopito o le lalolagi.

E manaomia e tagata uma le taimi e manatunatu loloto ma mafaufau loloto ai. E oo lava i le Faaola o le lalolagi, i le taimi o Lana galuega i le olaga nei, na maua se taimi e faatino ai. (M. Russell Ballard, “Be Still, and Know That I Am God” [Faigalotu a le Ofisa o Aoga a le Ekalesia mo talavou matutua, 4 Me, 2014], broadcasts.ChurchofJesusChrist.org)

• O a nisi o mea faalavefau ia e mafai ona faigata ai ona mafaufau loloto i mea faaleagaga?

• O a nisi o “mea a le Alii” atonu e te faaaluina se taimi e mafaufau loloto ai?

• O a ni aafiaga na e oo i ai pe o e iloa e uiga i le mafaufau loloto lea na taitai atu ai i le mauaina o faaaliga?

Mafaufau i se sini e mafai ona e faia e faaaoga ai lenei upumoni i lou olaga. Mafaufau e faamaumau lau sini i totonu o lau api faamaumau mo suesuega.

Gaoioiga Suesue 2: Saili e Faia le Finagalo o le Alii ma le Le Faavaivai

Tomanatu i se taimi na talosagaina ai oe e fai se mea sa foliga mai e faigata tele. Na tuuina atu e le Alii i le perofeta o Nifae poloaiga faigata ina ua Ia talosagaina o ia e valaau atu i sa Nifae amioleaga ia salamo. E ui ina sa faigata, ae sa galue ma le filiga Nifae e mulimuli i le finagalo o le Alii.

Faitau le Helamana 10:4–5 ma vaavaai mo mea na fetalai atu ai le Alii ia Nifae o se taunuuga o lona faamaoni.

• O a nisi o upu po o fasifuaitau e tumatila ia te oe i nei fuaiupu? Aisea?

O se upumoni e tasi e mafai ona tatou aoao mai i nei fuaiupu e faapea, a tatou saili e faia le finagalo o le Alii ma auauna atu ia te Ia ma le le faavaivai, o le a faamanuiaina i tatou e le Alii i le tele o auala.

• O le a se mea e mafai ona faafaigata ai ona manao e fai le finagalo o le Alii?

• O le a se mea e mafai ona e manatua e uiga i le Alii lea o le a faigofie atili ai ona mulimuli i Lona finagalo nai lo lou lava loto?

O le upu lē faavaivai i nei fuaiupu o lona uiga o le le vaivai po o le filigā.

Atonu e fesoasoani le valaaulia o tamaiti aoga e faitau le Mataupu Faavae ma Feagaiga 64:33 ma se aoaoga e faatatau i ai lea na faasoa mai e le Alii e uiga i le le faavaivai. E mafai e tamaiti aoga ona tusi lenei mau faasino i tafatafa o le Helamana 10:4–5 i a latou tusitusiga paia.

• O a nisi o auala na auauna atu ai Iesu Keriso i le Tama Faalelagi ma le le faavaivai?

• E mafai faapefea ona e auauna atu i le Tama Faalelagi ma Iesu Keriso ma le le faavaivai i o tatou aso?

Mafaufau i se sini e mafai ona e faia e saili ai le finagalo o le Tama Faalelagi ma auauna atu ai ia te Ia ma le le faavaivai. Mafaufau e faamaumau lau sini i totonu o lau api faamaumau mo suesuega.

Gaoioiga Suesue 3: O Le Mana o Faamauga

Vaai faalemafaufau i le tuuina mai e le Alii ia te oe o le mana e fai ai so o se mea e te ole atu ai ia te Ia. I le perofeta o Nifae, na fetalai atu ai le Atua o le a Ia tuuina atu soo se mea na manao i ai Nifae ona o le a ia “le ole [atu] i se mea ua le tusa ai ma le finagalo [o le Atua]” (Helamana 10:5).

Faitau le Helamana 10:7, ma vaavaai mo se tasi o mea na tuu atu e le Alii ia Nifae le mana e fai ai.

O le mana o loo faamatala mai i le fuaiupu 7 ua ta’ua o le mana o faamauga. Mai lenei fuaiupu, ua tatou aoao ai e faapea, o le mana o faamauga e fusia ma tatalaina i le lalolagi ma i le lagi. Atonu e fesoasoani le iloa e faapea o le fusia o lona uiga o le sosoo po o le faafesootai ma le tatalaina o lona uiga o le motusia po o le soloia.

Mafaufau e tusi ia fuaiupu o loo lisi atu i le parakalafa lenei i luga o le laupapa ma valaaulia tamaiti aoga e tusia i latou o ni mau fefaasinoa’i i tafatafa o le Helamana 10:7 i a latou tusitusiga paia.

O le mana faamau o loo ta’ua i le fuaiupu 7 o le mana lava lea e tasi o faamauga na umia e Elia (tagai 1 Tupu 17:1), Peteru ma aposetolo (tagai Mataio 16:15–19; 18:18), ma Iosefa Samita (tagai Mataupu Faavae ma Feagaiga 132:46). O ki o lenei lava mana e tasi o loo umia i aso nei e le Peresitene O Le Ekalesia a Iesu Keriso o le Au Paia o Aso e Gata Ai ma i latou o e e mafai ona ia faamatuu atu i ai. Faatasi ai ma lenei mana, e mafai ai ona faamauina faatasi aiga e faavavau e ala i sauniga o le malumalu.

• Aisea e te manatu ai e finagalo le Tama Faalelagi ia tatou osia feagaiga e faatatau i lenei olaga ma le olaga a sau?

• O a ni auala ua faamanuiaina ai oe e le malamalama e mafai ona faamauina aiga e faavavau?

• E mafai faapefea e le malamalama e mafai ona tuufaatasia aiga e faavavau ona aafia ai ou mafaufauga po o filifiliga i le taimi nei?

A uma ona faamaea e tamaiti aoga ia gaoioiga e aoao ai, mafaufau e valaaulia ni tamaiti aoga se toatele e faasoa mai se mea na latou lagonaina sa faapitoa le taua pe anoa mai a latou suesuega. Afai e lava le taimi, e mafai foi ona fesoasoani le faitau o le Helamana 10:11–19 e vaai ai i le mea na faia e Nifae ina ua mavae lenei aafiaga paia ma le Alii.

Molimau atu i upumoni na suesueina i le asō, ma uunaia tamaiti aoga e faatino soo se uunaiga faaleagaga na latou maua.

Manatu ma Talaaga o Faamatalaga

E faapefea ona ou malamalama atili ma faaaoga tatau le mafaufau loloto?

Na faamalamalama mai e Peresitene Henry B. Eyring o le Au Peresitene Sili:

Pe a tatou manatunatu loloto, ua tatou valaaulia faaaliga e ala i le Agaga. O le manatunatu loloto, ia te au lava, o le mafaufau lea ma le tatalo ou te faia pe a uma ona faitau ma suesue ma le faaeteete i tusitusiga paia. (Henry B. Eyring, “Auauna Atu ma le Agaga,” Liahona, Nov. 2010, 60)

Na aoao mai Elder David A. Bednar o le Korama o Aposetolo e Toasefululua:

O le upu mafaufau loloto o lona uiga o le mafaufau, manatunatu loloto, tomanatu, pe mafaufau i ai. O le mafaufau loloto la i tusitusiga paia, o le tomanatu lea ma le migao i upumoni, aafiaga, ma lesona i tusitusiga faavae. O le faagasologa o le mafaufau loloto e faaaluina ai le taimi ma e le mafai ona faamalosia, faatopetopeina, pe faanatinatiina. …

O le tusia i lalo o mea ua tatou aoaoina, mafaufau i ai, ma lagonaina a o tatou suesue i tusitusiga paia o se isi lea ituaiga o mafaufau loloto ma se valaaulia mamana i le Agaga Paia mo aoaoga faifai pea. (David A. Bednar, “Because We Have Them before Our Eyes,” New Era, Ape. 2006, 6–7)

E mafai faapefea ona ou tuuina le finagalo o le Alii ia sili atu i lo’u lava loto?

Na faamalamalama mai e Elder Dale G. Renlund o le Korama a Aposetolo e Toasefululua:

Pe a tatou mafaufau i le agalelei o lo tatou Tama Faalelagi ma Iesu Keriso, e faateleina lo tatou faalagolago ia te i La’ua. E suia a tatou tatalo ona ua tatou iloa o le Atua o lo tatou Tama ma o i tatou o Ana fanau. Tatou te le saili e suia Lona finagalo ae ia ogatusa o tatou loto ma Lona [finagalo] ma faamautinoa mo i tatou lava faamanuiaga e finagalo o Ia e faamatuu mai, e fua lea i lo tatou ōle atu mo na faamanuiaga. Tatou te naunau ia agamalu atili, mama atili, mausali atili, ma FaaKeriso atili. O nei suiga e faaagavaa ai i tatou mo isi faamanuiaga faalelagi. (Dale G. Renlund, “Mafaufau i le Agalelei ma le Silisiliese o le Atua,” Liahona, Me 2020, 43)

O a nisi o faataitaiga faaonapo nei o upumoni na suesueina i le aso?

Ua aoao mai Elder D. Todd Christofferson o le Korama a Aposetolo e Toasefululua e uiga i le alofa ma le taimi a le Atua i le tuuina mai ai o faaaliga.

O le vitio lenei o loo faapupula mai ai le taua o le mana o faamauga o loo maua i malumalu o le Alii.

Gaoioiga Faaopoopo e Aoao Ai

Helamana 10:11–12. O le tali vave atu i le taitaiga a le Alii

Mafaufau e uiga i le faamamafaina o le faataitaiga a Nifae o se tali vave atu i le taitaiga a le Alii. Mafaufau e valaaulia tamaiti aoga e faitau le Helamana 10:11–12 ma faailoa mai mea na poloaiina ai e le Alii ia Nifae e fai ma pe na faapefea ona ia tali atu. Atonu e fesoasoani fesili nei i le talanoaina o nei fuaiupu:

O anafea na e vaai ai i se tasi o tali vave atu i le taitaiga a le Alii?

O a nisi o faataitaiga o auala e ono tali vave atu ai se talavou i le taitaiga a le Alii?

Helamana 10:2–3. O le mafaufau loloto e saunia ai i tatou mo faaaliga

Ina ia faamamafa atili atu le mataupu faavae e faapea, o le mafaufau loloto e saunia ai i tatou mo faaaliga, atonu e te tuu atu i tamaiti aoga e faailoa mai le mamanu lava lea e tasi i le 1 Nifae 11:1; Mataupu Faavae ma Feagaiga 76:19; ma le Mataupu Faavae ma Feagaiga 138:1–2, 11.